Nte Emesineme Nneme ye Mbonima Fo?
Nte Emesineme Nneme ye Mbonima Fo?
“NNYỊN ikemeke ndineme nneme aba ye mbonima nnyịn,” ntre ke n̄wedmbụk Poland oro ẹkotde Polityka ọdọhọ. Ẹdọhọ ke mme ọdọ ndọ ke United States ẹsibiat minit itiokiet kpọt ke usen ẹneme nneme edifọn edifọn ye nsan̄a ndọ mmọ. Ndusụk ntaifiọk ẹkere ke emi edi ntak oro mbahade iba ke otu kpukpru mme ọdọ ndọ ẹdian̄ade ẹtie ẹnyụn̄ ẹsiode ndọ.
Nso kaban̄a mme ete ye eka ndineme nneme ye nditọ mmọ? N̄wedmbụk oro iketịn̄de iban̄a ke enyọn̄ emi ọdọhọ ke ediwak ini ke “isidịghe nneme ke ẹsineme, edi ke esidi ndibụp mme utọ mbụme ndụn̄ọde nte: Ufọkn̄wed eketie didie? Idem mme ufan fo.” N̄wedmbụk oro obụp ete: “Nditọ nnyịn ẹkpesan̄a didie ẹfiọk ndinyene eti itie ebuana ye mme owo?”
Sia owo mîsidahada usọ uneme nneme imana, didie ke nnyịn ikeme ndifori usọ uneme nneme? Christian mbet oro James ama ọnọ nnyịn akpan item ete: “Ana kpukpru owo ẹsọp ndikop ikọ, ẹkûsọp nditịn̄ ikọ, ẹkûsọp ndiyat esịt.” (James 1:19) Ih, man ikeme ndineme nneme edifọn edifọn, ana nnyịn inen̄ede ikpan̄ utọn̄ ke ini owo efen etịn̄de ikọ, inyụn̄ itre ndibọ owo ikọ ke inua m̀mê ndisọsọp mbiere se owo okoyomde nditịn̄. Fep ndikụt ndudue nnọ owo sia oro ekeme ndisọp mbiat nneme. Akan oro, Jesus ama esida usọ obụp mbụme, idịghe man odụn̄ọde owo, edi man anam owo etịn̄ se isịnede enye ke esịt onyụn̄ ada oro ọsọn̄ọ itie ufan mmọ.—Mme N̄ke 20:5; Matthew 16:13-17; 17:24-27.
Ke adade nti edumbet oro ẹkụtde ke Bible esịn ke edinam, oro ayanam fi ọfiọk nte ọkpọtọn̄ọde nneme ye mbonima fo. Ndien oro ekeme ndinam mbufo ẹnyene ata inem inem itie ebuana oro edibịghide—idem ke ofụri eyouwem.