“Ẹkekọbọ Enye ke Ntak Mbuọtidem Esie”

MBON Cernobbio ke edem edere Italy ẹma ẹsio itie kiet ẹnịm ke itie unọ idem nduọkodudu mmọ ndida nti mbon oro ẹkebọde unen mmọ. Ẹkewet enyịn̄ Narciso Riet ke kiet ke otu itiat oro ẹkefụhọrede. Riet akamana ke Germany, edi ete ye eka esie ẹketo Italy. Enye akakabarede edi kiet ke otu Mme Ntiense Jehovah ke iduọk isua 1930. Ẹma ẹnen̄ede ẹkọbọ Mme Ntiense Jehovah ke ini ukara Hitler sia mmọ ẹketuakde ibuot ẹnọ ata Abasi, Jehovah, utu ke Hitler.

Ke ini Mme Ndedịbe Bodisi ẹkedide ẹdifiọk ke Riet ama esida Enyọn̄-Ukpeme odụk itienna ekikere, enye ama efehe aka Cernobbio. Ẹma ẹdọhọ enye esikabade Enyọn̄-Ukpeme do esịn ke usem Italian onyụn̄ ada enye ọsọk ekemmọ mme andinịm ke akpanikọ ke mbọhọ oro. Ifịk ifịk utom esie ikedịbeke. Akwa owo SS ye ikọt esie ẹma ẹbụn̄ọ ẹdụk ufọk Riet ẹmụm enye, ẹnyụn̄ ẹtan̄ Bible iba ye leta ifan̄ oro mmọ ẹkedade nte uyarade oro ẹwụtde ke Riet edi abiatibet! Ẹma ẹda Riet ẹfiak ke Germany, ẹkesịn enye ke itienna ekikere ke Dachau, ẹnyụn̄ ẹwot enye esisịt ini mbemiso ọyọhọ ekọn̄ ererimbot iba eketrede. Ẹwet ke itiat editi ke Cernobbio ẹte: “Ẹkekọbọ enye ke ntak mbuọtidem esie.”

Mbuọtidem Narciso Riet ye eke ediwak Mme Ntiense eken oro ukara Nazi ọkọkọbọde esịn udọn̄ ọnọ mme Christian mfịn ndisọn̄ọ nda nnam akpanikọ nnọ Jehovah, kpa n̄kukụre Owo ke ekondo oro odotde mmọ ẹtuak ibuot ẹnọ. (Ediyarade 4:11) Jesus ọkọdọhọ ete: “Inemesịt edi eke mmọ oro ẹkọbọde ke ntak edinen ido.” Abasi eyeti utom mmọ onyụn̄ ọdiọn̄ mmọ ke ntak uko uko edinam mmọ.—Matthew 5:10; Mme Hebrew 6:10.