Nditoro Jehovah ke Ufọkn̄wed

MME uyen Ntiense Jehovah ke ofụri ererimbot ke ẹyom usụn̄ nditoro Abasi ke ufọkn̄wed—ke ikọ ye ke edinam mmọ. Kop ndusụk ifiọkutom oro ẹwụtde ifịk oro n̄kparawa emi ẹnyenede.

Ẹkedọhọ uyen Ntiense kiet ke Greece ewet n̄kpọ aban̄a nte ẹsabarede ofụm. Ke ama akanam ndụn̄ọde ke Watch Tower Publications Index, enye ama okụt eti ntọt ke Awake!, onyụn̄ ewet ke utịt utịt n̄wed esie ke imọ ida se iwetde ito Awake! Andikpep ama ọdọhọ enye ke n̄wed esie edi kiet ke otu nnem-n̄kan n̄wed oro akanam imọ ikotde. Ekem andikpep oro ama ada se uyen Ntiense emi ekewetde anam n̄kpọ ke mbono ubọ ukpep, onyụn̄ enyene nti utịp. Ekpri eyenete an̄wan emi ama ebiere ndinọ andikpep mme Awake! efen efen, esịnede enye oro ọdọhọde “Teachers—What Would We Do Without Them?” Ekem andikpep oro ama otoro Awake! ke ubet ukpepn̄kpọ, ndien ndusụk nditọ ufọkn̄wed ẹma ẹtọn̄ọ ndidọhọ ẹnọ mmimọ Awake! Eyenete an̄wan oro ama esida ndusụk Awake! edi ufọkn̄wed man nditọ ufọkn̄wed ẹkpekot mme nsiondi en̄wen.

Ke idụt Benin mi ke Africa, uyen kiet emi edide Christian ama enyene esen esen mfịna. Nte ido mmọ edide, mme ete ye eka ediwak nditọ ufọkn̄wed ẹma ẹtịp okụk ẹnọ mme andikpep ẹte ẹkpep nditọ mmimọ mme n̄kpọ oro ẹnen̄erede ẹsọn̄ man ẹtịm mmọ idem ẹnọ udomo. Nte ededi, mme andikpep oro ẹkemek ndisikpep mmọ n̄kpọ ke usenubọk Saturday. Uyen Ntiense emi ama afan̄a ete: “Usenubọk Saturday ke ofụri esop ẹsikwọrọ ikọ ọtọkiet. Enye edi ini oro nsikopde inemesịt n̄kan ke urua, ntre n̄kemeke ndida ini oro nnam n̄kpọ efen ekededi!” Ete esie emi edide Ntiense oro ọbọkde nditọ ikpọn̄ ama odomo ndida ye ete ye eka kiet ọkọrọ ye mme andikpep nnam ẹkpụhọ ini oro. Edi kpukpru mmọ ikenyịmeke. Ekpri eyenete emi ama efre enyịn aban̄a ukpep oro. Utu ke oro, enye ama esitiene esop aka ukwọrọikọ. Nsan̄a ubet ukpepn̄kpọ esie ẹma ẹsak enye nsahi, ẹdọhọde enye etre ukwọrọikọ onyụn̄ etre ndikpono Abasi esie. Mmọ ẹma ẹnen̄ede ẹnịm ke enye idibehe udomo oro. Nte ededi, nditọ ufọkn̄wed oro ẹkebọde ukpep mi mîkakam ibehe udomo, edi uyen Ntiense emi ama ebe. Ufọn idụhe nditetịn̄, mmọ ikasakke uyen Ntiense emi nsahi aba. Idahaemi mmọ ẹkam ẹsesịn udọn̄ ẹnọ enye ẹte: “Ka iso kpono Abasi fo.”

Ke Czech Republic, ẹkedọhọ n̄kaiferi isua 12 etịn̄ mme akpan n̄kpọ ẹtode n̄wed ekededi. Eka esie ama ọdọhọ enye etịn̄ aban̄a n̄wed Akakan Owo Oro Akanam Odude Uwem. Enye ọkọtọn̄ọ mbụk esie ye mbụme emi: “Nso idi ekikere fo? Anie edi akakan owo oro akanam odude uwem?” Enye ama etịn̄ n̄kpọ aban̄a Jesus, uwem esie ke ini enye okodude ke isọn̄, ye mme n̄kpọ oro enye ekekpepde. Ekem, enye ama eneme ibuotikọ oro “Ukpepn̄kpọ Edifen Nnọ.” Andikpep ama ofiori ete: “Enye emi enem akan kpukpru se esiwetde!” onyụn̄ ọbọ n̄wed Akakan Owo ke idatesịt. Ndusụk nditọ ufọkn̄wed ẹma ẹyom ẹnọ mmimọ n̄ko. Ke ndan̄nsiere, uyen Ntiense emi ama okop inemesịt ndinọ mmọ n̄wed Akakan Owo 18.

Mme utọ uyen emi ẹnen̄ede ẹkop idatesịt nditoro Jehovah ke ufọkn̄wed. Kpukpru nnyịn ikpakam ikpebe ifịk mmọ!