Nnyịn Imekeme Ndiyọ Idomo Ekededi!

NDI ke ọyọ idomo idahaemi? Ndi idem emem fi, anamde ekere ke udukemeke ndiyọ? Ndi emesikam ekere ndusụk ini ke mfịna fo okpon akaha ndien ke usọbọ idụhe? Ke edide ntre, mbọk sọn̄ esịt! Bible ọn̄wọn̄ọ ke Abasi ọyọnọ nnyịn ukeme ndiyọ idomo ekededi oro isobode.

Bible owụt ke “nsio nsio idomo” ẹyesịm mme asan̄autom Abasi. (James 1:2) Nen̄ede tie kere ikọ oro, “nsio nsio” (Greek poi·kiʹlos). Ke eset, ikọ Greek emi ọkọwọrọ “ekese” m̀mê “nsio nsio uduot,” ndien emi enen̄ede owụt ke “mme idomo ẹdidi ke nsio nsio uduot.” Ntre, emi aban̄a ‘nsio nsio orụk idomo’ oro ẹsịmde owo. Nte ededi, Jehovah ọnọ nnyịn ukeme ndiyọ mme idomo emi kiet kiet. Ntak emi nnyịn ikemede nditịm nnịm oro ke akpanikọ?

“Mfọnido Abasi Oro Owo Mîdotke Emi Ẹwụtde ke Nsio Nsio Usụn̄”

Apostle Peter ọkọdọhọ ke “nsio nsio idomo” ẹnam mme Christian “ẹfụhọ.” (1 Peter 1:6) Ekem enye ama ọdọhọ ke leta oro enye ekewetde ke odudu spirit ete ke ẹwụt nnyịn “mfọnido Abasi oro owo mîdotke . . . ke nsio nsio usụn̄.” (1 Peter 4:10) Ikọ oro “ke nsio nsio usụn̄” edi ukem ye akpasarade ikọ Greek oro ikebemde iso itịn̄ iban̄a. Ke enemede aban̄a ikọ emi, eyen ukpepn̄kpọ Bible kiet ọdọhọ ete: “Emi edi ata ntotụn̄ọ ekikere. . . . Ndidọhọ ke mfọn Abasi [m̀mê, mfọnido Abasi oro owo mîdotke] edi poikilos ọwọrọ ke idụhe idaha ndomokiet oro owo odude emi mfọn Abasi mîkemeke ndin̄wam enye ọyọ.” Enye aka iso ọdọhọ ete: “Idụhe idaha ndomokiet, afanikọn̄, m̀mê mbabuat n̄kpọntịbe, emi mfọn Abasi mîkemeke ndin̄wam owo ọyọ uforo uforo. Idụhe idaha ndomokiet ke uwem oro mfọn Abasi mîkemeke ndin̄wam owo ọyọ. In̄wan̄-in̄wan̄ ikọ oro poikilos anam nnyịn iti nsio nsio mfọn Abasi oro ẹkemede ndin̄wam nnyịn iyọ ke idaha ekededi.”

Mfọnido Abasi An̄wam Nnyịn Ndiyọ Idomo

Nte Peter ọdọhọde, usụn̄ kiet oro ẹwụtde nnyịn mfọnido Abasi oro owo mîdotke edi ndida nsio nsio nditọete oro ẹdude ke esop Christian n̄n̄wam nnyịn. (1 Peter 4:11) Asan̄autom Abasi kiet kiet enyene mme enọ eke spirit, m̀mê ukeme, oro ekemede ndidi n̄kpọ nsịnudọn̄ nnọ mbon oro ẹyọde idomo. (Rome 12:6-8) Ke uwụtn̄kpọ, ndusụk mbon oro ẹdude ke esop ẹnen̄ede ẹfiọk ndinọ ukpep Bible. Ifiọk oro mmọ ẹsidade ẹtịn̄ ikọ esinam mbon en̄wen ẹkeme ndiyọ idomo. (Nehemiah 8:1-4, 8, 12) Mbon eken oro ẹdide mme ekpemerọn̄ ẹsika ẹkese mbon oro ẹyomde un̄wam. Ẹsida utọ ifet oro ẹsịn udọn̄ ẹnọ mmọ “man mmọ ẹkpekop ndọn̄esịt.” (Colossae 2:2) Ke ini mme esenyịn ẹkade ẹkenọ owo nsịnudọn̄ ntre, mmọ ẹnọ mme utọ owo oro enọ eke spirit. (John 21:16) Ke adianade ye  oro, odu mbon en̄wen ke esop oro ẹsimade nditua nditọete oro ẹkopde mfụhọ ke ntak idomo, mbọm, mma mmọ, nnyụn̄ nse mban̄a mmọ. (Utom 4:36; Rome 12:10; Colossae 3:10) Edikere mban̄a ye un̄wam oro ndima nditọete iren ye iban ẹnọde ẹdi n̄wọrọnda usụn̄ oro owụtde “nsio nsio” mfọnido Abasi oro owo mîdotke.—Mme N̄ke 12:25; 17:17.

“Abasi Kpukpru Ndọn̄esịt”

Ke akande kpukpru, Jehovah esidọn̄ nnyịn esịt. Enye edi “Abasi kpukpru ndọn̄esịt, emi ọdọn̄de nnyịn esịt ke kpukpru ukụt nnyịn.” (2 Corinth 1:3, 4) Ọniọn̄ oro ẹkụtde ke Ikọ Abasi oro ẹkedade odudu spirit ẹwet ye odudu oro edisana spirit ọnọde ẹdi ata akpan usụn̄ oro Jehovah adade ọbọrọ akam oro ibọn̄de iyom un̄wam. (Isaiah 30:18, 21; Luke 11:13; John 14:16) Un̄wọn̄ọ oro apostle Paul akadade odudu spirit ọn̄wọn̄ọ ekeme ndidọn̄ nnyịn esịt. Enye ọkọdọhọ ete: “Abasi edi akpanikọ, idinyụn̄ iyakke ẹdomo mbufo ẹbe se mbufo ẹkemede ndiyọ, edi enye oyosio usụn̄ ubọhọ ke ufọt idomo man mbufo ẹkeme ndiyọ enye.”—1 Corinth 10:13.

Ih, ke idomo ekededi oro isobode, mfọnido Abasi oro owo mîdotke ọyọnọ nnyịn ukeme ndiyọ. (James 1:17) Eti un̄wam oro Jehovah ọnọde mme asan̄autom esie ke ekemini—inamke n̄kpọ m̀mê nso orụk idomo m̀mê afanikọn̄ ke mmọ ẹsobo—owụt ke Abasi enyene “akwa orụk ọniọn̄.” (Ephesus 3:10) Nte afo unyịmeke ke edi ntre?

[Mme ndise ke page 31]

Jehovah esin̄wam nnyịn iyọ mme idomo nnyịn