Eti Mbụk Odude ọnọ Mme Owo Ẹtode Kpukpru Idụt

“Mbufo ẹyedi mme ntiense mi . . . tutu esịm ke ata utịt ikpehe isọn̄.”—UTOM 1:8.

1. Sia idide mbon oro ẹsikpepde mme owo Bible, nso ke nnyịn isinen̄ede ikere iban̄a, ndien ntak-a?

 NTI mme andikpep isikereke n̄kukụre iban̄a se mmọ ẹkpepde nditọ ukpepn̄kpọ mmọ, edi ẹsikere n̄ko ẹban̄a nte mmọ ẹkpepde mmọ n̄kpọ. Se nnyịn isinamde edi oro ke ini isikpepde mme owo akpanikọ Bible. Nnyịn imesikere iban̄a etop oro ikwọrọde ọkọrọ ye usụn̄ oro ikwọrọde enye. Eti mbụk Obio Ubọn̄ Abasi oro nnyịn ikwọrọde ikpụhọkede, edi nnyịn imesikpụhọde usụn̄ oro ikwọrọde enye. Ntak-a? Man ikpọkwọrọ ikọ inọ ata ediwak owo nte ikekeme.

2. Ke ini nnyịn ikpụhọrede usụn̄ ukwọrọikọ nnyịn, anie ke nnyịn ikpebe?

² Ndikpụhọde usụn̄ ukwọrọikọ nnyịn owụt ke imekpebe mme asan̄autom Abasi eke eset. Ke uwụtn̄kpọ, kere ban̄a apostle Paul. Enye ọkọdọhọ ete: “Mma n̄kabade ntie nte owo Jew nnọ mme Jew, . . . Ye mmọ oro mînyeneke ibet mma n̄kabade ntie nte owo eke mînyeneke ibet, . . . Mma n̄kabade ndi owo mmemidem nnọ mbon mmemidem, man n̄kpanyan̄a mmọ eke ẹmemde idem. Mma n̄kabade ndi kpukpru n̄kpọ nnọ kpukpru orụk owo, man ke usụn̄ ekededi n̄kpanyan̄a ndusụk mmọ.” (1 Corinth 9:19-23) Paul ama enyene uforo ke ndikokpụhọde usụn̄ ukwọrọikọ esie n̄kekem ye mme idaha oro enye okosobode. Nnyịn n̄ko iyenyene uforo edieke ikpụhọrede usụn̄ ukwọrọikọ nnyịn ekekem ye owo oro nnyịn ikwọrọde ikọ inọ.

Ndikwọrọ Ikọ ke “Kpukpru Mme Idụt Ererimbot”

3. (a) Nso n̄kpọ-ata ke nnyịn isobo ke utom ukwọrọikọ? (b) Didie ke ikọ Isaiah 45:22 osu mfịn?

³ Akpan n̄kpọ-ata oro mme ọkwọrọ eti mbụk ẹsobode edi akaka efakutom oro mmọ ẹnyenede ndikwọrọ ikọ—kpa “ofụri isọn̄.” (Matthew 24:14) Ke isua ikie oro osụk ebede, ediwak mme asan̄autom Jehovah ẹma ẹsịn ọkpọsọn̄ ukeme ndika idụt en̄wen man ẹkesuan eti mbụk. Nso ikedi utịp? Ẹma ẹnam n̄wọrọnda n̄kọri ke ofụri ererimbot. Ke ntọn̄ọ ntọn̄ọ ọyọhọ isua ikie 20, ẹkesikwọrọ ikọ ke  ibat ibat idụt kpọt, edi idahaemi, Mme Ntiense Jehovah ke ẹkwọrọ ikọ ke idụt 235! Ke akpanikọ, ẹkwọrọ eti mbụk Obio Ubọn̄ ke “kpukpru mme idụt ererimbot.”—Isaiah 45:22.

4, 5. (a) Mmanie ẹnen̄ede ẹtịp ẹsịn ke ndisuan eti mbụk? (b) Nso ke ndusụk ọfis n̄kọk itieutom ẹtịn̄ ẹban̄a mbon oro ẹtode idụt en̄wen ẹdikwọrọ ikọ ke idụt oro mmọ ẹsede enyịn?

⁴ Nso inam utọ n̄kọri oro odu? Ediwak n̄kpọ ẹnam n̄kọri emi odu. Mme isụn̄utom oro ẹkebọde ukpep ke Ufọkn̄wed Enyọn̄-Ukpeme Ukpep Bible eke Gilead ye se iwakde ibe owo 20,000 oro ẹkụrede ukpep ke ndondo emi ke Ufọkn̄wed Unọ Mme Asan̄autom Ukpep ẹnen̄ede ẹtịp ẹsịn ke n̄kọri emi. Mbon efen oro ẹtịpde ẹsịn ke n̄kọri emi ẹdi Mme Ntiense oro ẹbiatde okụk idemmọ ẹwọrọ ẹkenam utom ke idụt oro ẹnen̄erede ẹyom mme asuanetop Obio Ubọn̄. Mme utọ Christian oro ẹwade idem do—iren ye iban, n̄kpri ye ikpọ, mme ọdọ ndọ ye mbon oro mîdọhọ—ẹnen̄ede ẹtịp ẹsịn ke ndikwọrọ etop Obio Ubọn̄ ke ofụri isọn̄. (Psalm 110:3; Rome 10:18) Ẹnen̄ede ẹwụt esịtekọm ke se mmọ ẹnamde. Kop se ndusụk ọfis n̄kọk itieutom ẹkewetde ẹban̄a mbon oro ẹketode idụt en̄wen ẹdikwọrọ ikọ ke ebiet oro udọn̄ okponde akan ke idụt emi mme n̄kọk itieutom emi ẹsede enyịn.

⁵ “Ndima Ntiense emi ẹda usụn̄ ndikwọrọ ikọ ke mme nsannsan ebiet, ẹn̄wam ndisiak mbufa esop, ẹnyụn̄ ẹn̄wam nditọete oro ẹdude do ẹkọri ke n̄kan̄ eke spirit.” (Ecuador) “Edieke ediwak nditọete oro ẹtode-to ẹdi mi ẹkpenyọn̄ọde, mme esop ikpetịmke isọn̄ idem aba. Mmọ ndidu ye nnyịn edi edidiọn̄.” (Dominican Republic) “Nditọete iban ẹwak ẹkan ke ediwak esop, edieke owo 100 ẹdude ke esop, ndusụk ini 70 ẹsidi nditọete iban. (Psalm 68:11) Ibịghike ata ediwak mmọ ẹkebọ akpanikọ, ndien mme asiakusụn̄ oro ẹdide  nditọete iban oro mîdọhọ ndọ ẹto mme idụt en̄wen ẹdinọ mbufa nditọete emi ata eti ukpep. Nditọete iban emi ẹtode isenidụt mi ẹdi ata enọ Abasi!” (Idụt Kiet ke Edem Usiahautịn Europe) Ndi akanam emekere ndika n̄kanam utom ukwọrọikọ ke idụt en̄wen? *—Utom 16:9, 10.

“Owo Duop Eke Ẹtode ke Kpukpru Usem”

6. Didie ke Zechariah 8:23 owụt ke usem ayakama n̄kpọ-ata ke utom ukwọrọikọ?

⁶ Akamba n̄kpọ-ata en̄wen edi nsio nsio usem oro ẹsemde ke isọn̄. Ikọ Abasi ama ebem iso etịn̄ ete: “Ke mme usen oro ke owo duop eke ẹtode ke kpukpru usem mme idụt ẹdimụm, kpa mmọ ẹdimụm eyen Judah kiet utọn̄ ọfọn̄idem, ẹte, Ẹyak nnyịn ika ye mbufo: koro nnyịn imokop ite ke Abasi odu ye mbufo.” (Zechariah 8:23) Ke ndisu ntịn̄nnịm ikọ emi ke eyomfịn, iren duop oro ẹda ẹban̄a akwa otuowo, oro ẹkebemde iso ẹtịn̄ ẹban̄a ke Ediyarade 7:9. Nte ededi, tịm fiọk ke ntịn̄nnịm ikọ Zechariah idọhọke n̄kukụre ke “iren duop” ẹdito kpukpru idụt, edi ọdọhọ n̄ko ke mmọ ẹdito ‘kpukpru usem mme idụt.’ Ndi nnyịn imokụt nte akpan n̄kpọ emi ke ntịn̄nnịm ikọ oro osude? Ke akpanikọ, imokụt.

7. Ibat ewe ẹwụt ke ẹda eti mbụk ẹsọk mme owo eke “ẹtode ke kpukpru usem”?

⁷ Kere ban̄a ibat oro iyomde ndisiak mi. Isua 50 emi ẹkebede, ẹkesimịn̄ n̄wed nnyịn ke usem 90. Mfịn, ibat oro awak ebe 400. “Ofụn emi anamde akpanikọ” esịn ofụri ukeme ndikụt ke imemịn̄ n̄wed ke idem usem oro mme andisem mîwakke. (Matthew 24:45) Ke uwụtn̄kpọ, mme n̄wed Bible ẹdu idahaemi ke usem Greenlandic (emi owo 47,000 ẹsemde), Palauan (emi owo 15,000 ẹsemde), ye Yapese (emi mme andisem mîkam isịmke 7,000).

“Akwa Usụn̄” Oro Adade Esịm Mbufa Ifet

8, 9. Nso idaha ebererede “akwa usụn̄” ọnọ nnyịn, ndien nso ke ediwak tọsịn Mme Ntiense ẹnam ẹban̄a oro?

⁸ Nte ededi, idahaemi, idiyomke nnyịn ikaka esenidụt mbemiso ikwọrọde eti mbụk inọ mme owo oro ẹtode kpukpru usem. Ke mme isua ndondo emi, ediwak miliọn owo ye mbon itọkekọn̄ ẹkpọn̄ obio emana mmọ ẹkedụn̄ ke mme obio oro ẹforode, ndien emi anam ẹnyene mme odudụn̄ oro ẹsemde nsio nsio usem ke mme obio emi. Yak ida Paris ke France ke uwụtn̄kpọ; ẹsem usem 100 do. Ke Toronto ke Canada, ẹsem usem 125, ke adan̄aemi ẹsemde se iwakde ibe usem 300 ke London ke England! Mme odudụn̄ oro ẹdude ke nsio nsio efakutom esop ẹmebererede “akwa usụn̄” oro anamde ẹnyene mbufa ifet ndibuana eti mbụk ye mme owo oro ẹtode kpukpru usem.—1 Corinth 16:9.

⁹ Ediwak tọsịn Mme Ntiense ẹkpep mme usem efen man ẹkeme ndisuan eti mbụk ke mme usem emi. Emi isidịghe mmemmem n̄kpọ inọ ekese mmọ, edi idatesịt oro mmọ  ẹsinyenede ke ndin̄wam mme odudụn̄ emi ẹkpep akpanikọ oro ẹkụtde ke Ikọ Abasi iyakke ẹti ufen oro ẹkebọde ẹkpep mme usem emi. Ke mme isua ndondo emi, edieke owo 100 ẹkenade baptism ke kiet ke otu idụt Edem Usoputịn Europe, n̄kpọ nte owo 40 ke otu oro ẹkedi mme odudụn̄.

10. Didie ke afo ada ekpri n̄wed Good News for People of All Nations ọkwọrọ ikọ? (Se ekebe oro “Se Isịnede ke Ekpri N̄wed Good News for People of All Nations,” ke page 26.)

¹⁰ Edi akpanikọ ke ata ediwak nnyịn ikemeke ndikpep usem obio owo. Kpa ye oro, nnyịn imekeme nditiene n̄n̄wam mme odudụn̄ ke ndida obufa ekpri n̄wed oro, Good News for People of All Nations, * emi esịnede inem inem etop Bible ke nsio nsio usem, n̄n̄wam mmọ. (John 4:37) Ndi afo ke ada ekpri n̄wed emi ọkwọrọ ikọ?

Ke Ini Mme Owo Mîmaha Ndikpan̄ Utọn̄

11. Ewe n̄kpọ-ata efen efen ke ẹsobo ke ndusụk efakutom?

¹¹ Nte odudu Satan okponde ke isọn̄, odu n̄kpọ-ata efen oro isiwakde ndisobo—ndikwọrọ ikọ ke efakutom oro mme owo mîtịmke ima ndikpan̄ utọn̄. Ke akpanikọ, emi ikpaha nnyịn idem sia Jesus ama ebem iso etịn̄ ke mme utọ owo oro ẹyedu. Kop se enye eketịn̄de aban̄a eyo nnyịn: “Ima ediwak owo eyebịt.” (Matthew 24:12) Ke akpanikọ, ediwak owo inịmke ke Abasi odu inyụn̄ iwụtke ukpono inọ Bible. (2 Peter 3:3, 4) Oro edi ntak emi ibat mbon oro ẹkabarede ẹdi mbet Christ ke ndusụk idụt mîwakke. Nte ededi, oro iwọrọke ke ndima nditọete nnyịn oro ẹsọn̄ọde ẹda ẹkwọrọ ikọ ke mme utọ efakutom oro ẹkpa utom ikpîkpu. (Mme Hebrew 6:10) Ntak-a? Kere ban̄a se iyomde ndineme emi.

12. Nso idi akpan uduak iba oro ẹnamde nnyịn ikwọrọ ikọ?

¹² Gospel Matthew owụt akpan uduak iba oro ẹnamde nnyịn ikwọrọ ikọ. Akpa edi nte ke ikwọrọ ikọ man inam “mme owo ke kpukpru idụt ẹdi mbet.” (Matthew 28:19) Ọyọhọ iba edi nte ke ikwọrọ etop Obio Ubọn̄ emi nte “ntiense.” (Matthew 24:14) Uduak mbiba emi ẹdi akpan n̄kpọ, edi ọyọhọ iba oro enen̄ede enyene se ọwọrọde. Ntak-a?

13, 14. (a) Nso idi akpan ikpehe ke idiọn̄ọ edidu Christ? (b) Nso ke nnyịn ikpeti akpan akpan ke ini ikwọrọde ikọ ke mme efakutom oro owo mîsitịmke inọ n̄kpan̄utọn̄?

¹³ Matthew oro eketienede ewet Bible ama ewet se mme apostle ẹkebụpde Jesus ete: “Ini ewe ke mme n̄kpọ emi ẹditịbe, nso idinyụn̄ idi idiọn̄ọ edidu fo ye eke utịt editịm n̄kpọ emi?” (Matthew 24:3) Jesus ọkọbọrọ ete ke akpan ikpehe idiọn̄ọ oro edidi edikwọrọ ikọ ke ofụri ererimbot. Ndi enye eketịn̄ aban̄a ndinam mme mbet? Baba. Enye ọkọdọhọ ete: “Ẹyenyụn̄ ẹkwọrọ eti mbụk obio ubọn̄ emi ke ofụri isọn̄ nte ntiense ẹnọ kpukpru mme idụt.” (Matthew 24:14) Ntem Jesus ọkọdọhọ ke utom ukwọrọikọ ke idemesie edidi akpan ikpehe idiọn̄ọ oro.

¹⁴ Mmọdo, nte nnyịn ikwọrọde eti mbụk Obio Ubọn̄, nnyịn ikpenyene nditi ke idem edieke nnyịn mîsikemeke ndinam mme mbet kpukpru ini, nnyịn imanam n̄kpọ kiet: imọnọ ikọ “ntiense.” Inamke n̄kpọ m̀mê mme owo ẹma ndikop m̀mê imaha, mmọ ẹfiọk se inamde, ntre nnyịn imetiene isu  ntịn̄nnịm ikọ Jesus. (Isaiah 52:7; Ediyarade 14:6, 7) Jordy, uyen Ntiense kiet ke Edem Usoputịn Europe, ọkọdọhọ ete: “Esịt esinem mi ndifiọk ke Jehovah etiene ada mi osu Matthew 24:14.” (2 Corinth 2:15-17) Eyịghe idụhe ke esitie fi ntre n̄ko ke idem.

Ke Ini Ẹbiọn̄ọde Etop Nnyịn

15. (a) Jesus ekebem iso odụri mme anditiene enye utọn̄ aban̄a nso? (b) Nso in̄wam nnyịn ndika iso n̄kwọrọ ikọ kpa ye ubiọn̄ọ?

¹⁵ N̄kpọ-ata efen oro isisobode ke ini ikwọrọde eti mbụk Obio Ubọn̄ edi ubiọn̄ọ. Jesus ama ebebem iso odụri mme anditiene enye utọn̄ ete: “Mbufo ẹyedi mbon emi kpukpru mme idụt ẹsuade ke ntak enyịn̄ mi.” (Matthew 24:9) Kpa nte ekedide ye akpa mme Christian, mme anditiene Jesus mfịn ẹsobo ubiọn̄ọ, usua, ye ukọbọ n̄ko. (Utom 5:17, 18, 40; 2 Timothy 3:12; Ediyarade 12:12, 17) Idahaemi, ke ndusụk idụt, ukara odori ukpan ke utom mmọ. Kpa ye oro, ata mme Christian oro ẹdude ke mme utọ idụt oro ke ẹka iso ẹkop uyo Abasi ẹnyụn̄ ẹkwọrọ eti mbụk Obio Ubọn̄. (Amos 3:8; Utom 5:29; 1 Peter 2:21) Nso inọ mmọ ye Mme Ntiense eken ke ofụri ererimbot odudu ndinam emi? Jehovah ada edisana spirit esie ọnọ mmọ odudu.—Zechariah 4:6; Ephesus 3:16; 2 Timothy 4:17.

16. Didie ke Jesus okowụt ke spirit Abasi ye utom ukwọrọikọ ẹdi itai ye aban̄?

¹⁶ Jesus ama owụt ke spirit Abasi ye utom ukwọrọikọ ẹdi itai ye aban̄, ke ini enye ọkọdọhọde mme anditiene enye ete: “Mbufo ẹyebọ odudu ke ini edisana spirit edide edidoro mbufo ke idem, ndien mbufo ẹyedi mme ntiense mi . . . ke ofụri Judea ye Samaria tutu esịm ke ata utịt ikpehe isọn̄.” (Utom 1:8; Ediyarade 22:17) Usụn̄ oro ẹtịn̄de ikọ emi ke adiana ke adiana edi akpan n̄kpọ. Akpa, mme mbet ẹma ẹbọ edisana spirit, ekem mmọ ẹma ẹtọn̄ọ ndinọ ikọ ntiense ke ofụri ererimbot. Ke mîkpekedịghe spirit Abasi, mmọ ikpekekemeke ndika iso nnọ ‘kpukpru mme idụt ikọ ntiense.’ (Matthew 24:13, 14; Isaiah 61:1, 2) Oro edi ntak Jesus ọkọdọhọde ke edisana spirit edi “andin̄wam.” (John 15:26) Enye ọkọdọhọ ke spirit Abasi eyekpep onyụn̄ ọnọ mme mbet imọ ndausụn̄.—John 14:16, 26; 16:13.

17. Didie ke edisana spirit esin̄wam nnyịn ke ini ẹbiọn̄ọde nnyịn idiọk idiọk?

¹⁷ Ke nso usụn̄ ke spirit Abasi an̄wam nnyịn mfịn ke ini isobode ọkpọsọn̄ ubiọn̄ọ nte ikwọrọde eti mbụk? Spirit Abasi ọsọn̄ọ nnyịn idem, ke adan̄aemi ọbiọn̄ọde mbon oro  ẹkọbọde nnyịn. Ke ndinam emi an̄wan̄a, yak ineme iban̄a se iketịbede inọ Edidem Saul.

Spirit Abasi Ọbiọn̄ọ Enye

18. (a) Didie ke Saul akakabarede ọdiọk? (b) Nso usụn̄ ke Saul akada ọkọbọ David?

¹⁸ Saul emi ekedide akpa edidem Israel ama ọfọn ke ntọn̄ọ, edi nte ini akakade, enye ama ọsọn̄ ibuot ye Jehovah. (1 Samuel 10:1, 24; 11:14, 15; 15:17-23) Nte utịp, spirit Abasi ikodụhe aba ye enye. Saul ama enen̄ede ayat esịt ye David, kpa enye emi ẹkeyetde aran man edi ọyọhọ edidem iba, ntre spirit Abasi akakabade odu ye David. (1 Samuel 16:1, 13, 14) Eketie nte David edi owo oro ẹkemede ndisọsọp n̄wot. Kamse, n̄kukụre se enye akakamade ekedi ndido ke adan̄aemi Saul akakamade eduat. Ntre, nte David okosụk ebrede ndido esie usen kiet, “Saul otop eduat, ete, Nyekịm David ndian ke ibibene. Ndien David efep ọbọhọ enye ke iso utịm ikaba.” (1 Samuel 18:10, 11) Ke oro ebede, Saul ama akpan̄ utọn̄ ọnọ Jonathan eyen esie, emi ekedide ufan David, onyụn̄ ọn̄wọn̄ọ ete: “Ma uwem Jehovah, [David] idikpaha.” Ekem Saul ama afiak “oyom ndida eduat esie n̄kịm David ndian ke ibibene.” Nte ededi, David ama “efep ọbọhọ ke iso Saul, ndien enye ekịm ibibene ke eduat.” David ama efehe, edi Saul ama efehe ebịne enye. Ini oro, spirit Abasi ọkọbọbiọn̄ọ Saul. Ke nso usụn̄?—1 Samuel 19:6, 10.

19. Didie ke spirit Abasi ekekpeme David?

¹⁹ David ama efehe aka ọtọ prọfet Samuel, edi Saul ama ọdọn̄ ikọt esie ẹkemụm David. Nte ededi, ke mmọ ẹma ẹkesịm ọtọ emi David ekedịbede, “spirit Abasi odụk mme isụn̄utom Saul ke idem, ndien mmọ ẹnyụn̄ ẹnam prophecy.” Spirit Abasi ama odụk mmọ idem tutu mmọ ẹfre se ẹkedọn̄de mmọ. Saul ama afiak ọdọn̄ ikọt esie utịm ikaba ẹkemụm David, edi se iketịbede akpa ama afiak etịbe utịm ikaba oro. Ke akpatre, Edidem Saul ama adaha ke idemesie ebịne David, edi Saul ikekemeke ndibiọn̄ọ spirit Abasi. Ke nditịm ntịn̄, edisana  spirit ama ọbọ enye odudu ke “ofụri uwemeyo oro, ye ke ofụri okoneyo oro”—ọnọde David ifet ndifehe.—1 Samuel 19:20-24.

20. Nso ke nnyịn ikeme ndikpep nto mbụk aban̄ade nte Saul ọkọkọbọde David?

²⁰ Mbụk aban̄ade Saul ye David mi esịne ukpepn̄kpọ oro ọsọn̄ọde owo idem: Mbon oro ẹkọbọde mme asan̄autom Abasi idikwe unen ke ini spirit Abasi ọbiọn̄ọde mmọ. (Psalm 46:11; 125:2) Jehovah okoyom David edi edidem Israel, ndien owo ndomokiet ikekemeke ndikpụhọde oro. Ke eyo nnyịn emi, Jehovah oyom “ẹkwọrọ eti mbụk obio ubọn̄.” Idụhe owo ndomokiet oro ekemede nditre utom emi.—Utom 5:40, 42.

21. (a) Didie ke ndusụk mme andibiọn̄ọ mfịn ẹsinam n̄kpọ? (b) Nso ke nnyịn itịm ifiọk?

²¹ Ndusụk mme adaiso ido ukpono ye mme andikara ẹda nsu ye afai ẹdomo ndibiọn̄ọ nnyịn. Nte ededi, kpa nte Jehovah ekekpemede David ke n̄kan̄ eke spirit, Enye eyekpeme ikọt esie mfịn n̄ko. (Malachi 3:6) Mmọdo, nnyịn itịn̄ uko uko nte David ite: “Mmọbuọt idem mi ke Abasi: ndịk idinamke mi. Nso ke owo ekeme ndinam mi?” (Psalm 56:11; 121:1-8; Rome 8:31) Jehovah akpakam an̄wam nnyịn ika iso iyọ inyụn̄ ikan kpukpru n̄kpọ-ata oro isobode nte inamde utom oro enye ọnọde ete ikwọrọ eti mbụk Obio Ubọn̄ inọ mme owo ẹtode kpukpru idụt.

[Mme Ikọ idakisọn̄]

Nte Afo Emekeme Nditi?

• Ntak emi nnyịn isikpụhọrede mme usụn̄ oro ikwọrọde ikọ?

• “Akwa usụn̄” oro adade esịm mme ifet ewe ebererede?

• Nso utịp ke utom ukwọrọikọ nnyịn enyene, idem ke mme efakutom oro mme owo mîsitịmke ima ndikpan̄ utọn̄?

• Ntak emi andibiọn̄ọ ndomokiet mîkemeke nditre utom edikwọrọ eti mbụk Obio Ubọn̄?

[Mme Mbụme Ukpepn̄kpọ]

[Ekebe ke page 22]

Ata Uyụhọ

“Mmọ ẹkop inemesịt ẹnyụn̄ ẹdara ndidiana kiet nnam utom Jehovah.” Nte n̄kpọ etiede ye ubon oro ẹkekpọn̄de Spain ẹkedụn̄ ke Bolivia edi oro. Eyeneren mmọ ekebem iso aka do man akan̄wam ekpri otu Ntiense oro ẹkedude do. Idatesịt oro enye okokopde ama enen̄ede otụk ete ye eka esie tutu ofụri ubon—esịnede nditọiren 4 oro ẹdide isua 14 ẹsịm 25—ẹma ẹtiene ẹkenam utom do. Ita ke otu n̄kparawa oro ẹdi mme asiakusụn̄ idahaemi, ndien ke ndondo emi, enye oro ekebemde iso aka do ama odụk Ufọkn̄wed Unọ Mme Asan̄autom Ukpep.

Angelica, eyen Canada emi edide isua 30, oro anamde utom ke Edem Usiahautịn Europe ọdọhọ ete: ‘Ediwak n̄kpọ-ata ẹdu, edi mmesikop uyụhọ ndin̄wam mme owo ke an̄wautom. Mmesinyụn̄ n̄kop inemesịt n̄ko ke ntak ediwak ikọ esịtekọm oro Mme Ntiense oro ẹtode do ẹsitịn̄de; mmọ ẹsiwak ndikọm mi ke ndikedi ndin̄wam mmimọ.’

Iban iba emi ẹkperede ndisịm isua 30, emi ẹdide nditọeka ẹtode United States, emi ẹnamde utom ke Dominican Republic, ẹdọhọ ẹte: ‘Ikenyene ndikpep nsio nsio ido edinam. Nte ededi, nnyịn ima ika iso ke utom ukwọrọikọ nnyịn, ndien nditọ ukpepn̄kpọ nnyịn itiaba ẹsidụk mme mbono esop idahaemi.’ Nditọete iban iba emi ẹma ẹn̄wam ẹtịm otu mme asuanetop Obio Ubọn̄ ke obio oro esop ndomokiet mîdụhe.

Laura, eyenete an̄wan emi ekperede ndisịm isua 30 odu ke esenidụt anam utom idahaemi ke se ibede isua inan̄. Enye ọdọhọ ete: “N̄kokoi ndu mmemmem uwem. Emi an̄wam mme asuanetop ẹkụt ke ndidu mmemmem uwem edi usụn̄ uwem oro owụtde eti ibuot, emi owo emekde-mek, idịghe ke ntak ubuene. Ndikeme ndin̄wam mbon en̄wen, akpan akpan mme uyen ọnọ mi idatesịt, ndien idatesịt emi iyakke mi n̄kop ubiak nsọn̄ọn̄kpọ oro asan̄ade ye edinam utom ukwọrọikọ ke esenidụt. N̄kpamaha ndikpọn̄ mi n̄kanam n̄kpọ efen ekededi, ndien mmebiere ndidu mi adan̄a nte Jehovah enyịmede.”

[Ekebe/Mme ndise ke page 26]

Se Isịnede ke Ekpri N̄wed Good News for People of All Nations

Ekpri n̄wed Good News for People of All Nations esịne etop oro ẹmịn̄de ke page kiet kpọt, ndien ẹmịn̄ etop emi ke usem 92. Ẹwet etop emi nte afo etịn̄ ikọ oro. Ntre ke ini enyeneufọk okotde etop emi, editie nte ke afo enyene nneme ye enye.

Ndise ererimbot odu ke esịt ikpaedem n̄wed oro. Da ndise emi tọn̄ọ ufan ye enyeneufọk. Afo emekeme ndiwụt enye idụt emi afo odụn̄de, onyụn̄ ada idiọn̄ọ obụp enye idụt emi enye otode. Ke utọ usụn̄ emi, afo emekeme ndinam enye enyene ifụre nditịn̄ ikọ onyụn̄ etie ufan ufan.

Ebemiso ikọ ekpri n̄wed emi owụt nsio nsio usụn̄ oro nnyịn ikemede ndida nnen̄ede n̄n̄wam mbon oro ẹsemde usem oro nnyịn mîfiọkke. Mbọk tịn̄ enyịn kot nsio nsio usụn̄ emi nyụn̄ nen̄ede da mmọ sịn ke edinam.

Se isịnede owụt nsio nsio usem ye mme idiọn̄ọ oro ẹdade ẹnọ mme usem oro. Ikpehe emi ayan̄wam fi ọfiọk mme idiọn̄ọ oro ẹdade ẹnọ nsio nsio usem ke mme tract ye mme n̄wed nnyịn oro ẹsiode ke nsio nsio usem.

[Ndise]

Ndi afo ke ada ekpri n̄wed emi ọkwọrọ ikọ?

[Mme ndise ke page 23]

Ẹmịn̄ mme n̄wed Bible nnyịn idahaemi ke se ibede usem 400

GHANA

LAPLAND (SWEDEN)

PHILIPPINES

[Mme ndise ke page 24, 25]

Ndi afo emekeme ndika n̄kanam utom ukwọrọikọ ke ebiet oro udọn̄ okponde akan?

ECUADOR

DOMINICAN REPUBLIC