Mme Mbụme Ẹtode Mme Andikot

Deuteronomy 14:21 okot ete: “Mbufo ẹkûta baba unam kiet eke akpade ikpọn̄.” Ndi emi atuaha ye Leviticus 11:40, emi okotde ete: “Owo eke atade okpo esie enyene ndiyet edisịne-n̄kpọ esie, onyụn̄ edi edidehe tutu esịm mbubịteyo”?

Itien̄wed emi ituahake ye kiet eken. Deuteronomy 14:21 afiak etịn̄ ewụhọ oro ọdọhọde owo okûta obukpo unam, eyedi se unam akawaide. (Exodus 22:31; Leviticus 22:8) Leviticus 11:40 etịn̄ se eyen Israel akpakanamde edieke enye mîkokohokoi ibiat ewụhọ oro.

Ibet ndikakpan n̄kpọ ikọwọrọke ke owo ikesibiatke ibet oro ndusụk ini. Ke uwụtn̄kpọ, ibet ama akpan uyịpinọ, uwotowo, editie ntiense nsu, ye ntre ntre eken. Ama odu ufen oro ẹkesinọde owo edieke enye abiatde mbet Abasi. Mme utọ ufen oro ẹma ẹnam mbet oro ẹnen̄ede ẹnyene odudu ẹnyụn̄ ẹwụt ke mmọ ikedịghe n̄kpọ mbubru.

Owo oro akabiatde ewụhọ oro akakpande edita obukpo unam ama edehe ke enyịn Jehovah, ndien enye ekenyene ndinam idemesie asana ke nnennen usụn̄. Edieke enye okokpude ndinam idemesie asana ke nnennen usụn̄, enye ekenyene ‘ndibiom ukwan̄-n̄kpọ esie.’—Leviticus 17:15, 16.