‘Ndibụk Eti Mbụk Eti N̄kpọ’

“Ukot owo eti mbụk eye didie ke enyọn̄ ikpọ obot! ukot owo eke . . . obụkde eti n̄kpọ.”—ISAIAH 52:7.

1, 2. (a) Nso ndiọi n̄kpọ ẹsitịbe kpukpru usen? (b) Didie ke ediwak owo ẹsinam n̄kpọ ke ini ẹkopde ndiọi mbụk kpukpru ini?

 MFỊN esitie mme owo ke ofụri ererimbot nte ke ndiọi mbụk awak akaha. Ke ini ẹkpọhọrede ekebe utịn̄ikọ, mmọ ẹsiwak ndikop enyene-ndịk mbụk aban̄ade udọn̄ọ n̄kpa oro ọnọmọde isọn̄. Ke ini ẹkpọhọrede ekebe ndise, mmọ ẹsikụt enyene-ndịk ndise nditọwọn̄ oro ẹtuan̄ade ẹyom un̄wam ke ntak ọkpọsọn̄ biọn̄. Ndien ke n̄wedmbụk n̄kpọntịbe, mmọ ẹsikot ẹban̄a bọmb oro obomode owụri mme ufọk, owotde ata ediwak mbon oro mîduehe.

² Ih, idụhe usen emi n̄kpọndịk mîtịbeke. Ke akpanikọ, idaha ererimbot emi ke okpụhọrede ọdiọk akan nte ekedide. (1 Corinth 7:31) Magazine mbụk n̄kpọntịbe ke Edem Usoputịn Europe ọkọdọhọ ke esitie ndusụk ini nte ke ofụri ererimbot “ọmọn̄ obụrede asak.” Eyịghe idụhe ata ediwak owo ẹkopde mfụhọ! Owo kiet oro ẹkebụpde ekikere esie kaban̄a mbụk n̄kpọntịbe oro ẹsikotde ke ekebe ndise ke United States ama etịn̄ ekikere ata ediwak owo ke ndikọdọhọ ete: ‘Mmesinen̄ede n̄kop mfụhọ ke mma n̄kokop mbụk ke ekebe ndise. Kpukpru ẹsidi ndiọi mbụk. Esinyene ndịk etieti.’

Mbụk Oro Anade Kpukpru Owo Ẹkop

3. (a) Ewe eti mbụk ke Bible atan̄a? (b) Ntak emi afo adade eti mbụk Obio Ubọn̄ ke ọsọn̄urua?

³ Ndi eti mbụk ekeme ndidu ke utọ idiọk ererimbot emi? Ih, ekeme ndidu! Edi n̄kpọ ndọn̄esịt ndifiọk ke Bible atan̄a eti mbụk. Edi eti mbụk ndifiọk ke Obio Ubọn̄ Abasi eyetre udọn̄ọ, biọn̄, ubiatibet, ekọn̄, ye kpukpru orụk ufịk. (Psalm 46:9; 72:12) Ndi idịghe utọ mbụk emi ke ana kpukpru owo ẹkop? Mme Ntiense Jehovah ẹnen̄ede ẹkere ke ana kpukpru owo ẹkop mbụk emi. Ntre, mme owo ke kpukpru ebiet ẹdiọn̄ọ mmọ nte mbon oro ẹsịnde ukeme ndibuana eti mbụk Obio Ubọn̄ Abasi ye mme owo ke kpukpru idụt.—Matthew 24:14.

4. Ewe ikpehe utom ukwọrọikọ nnyịn ke idineme ke ibuotikọ emi ye ibuotikọ oro etienede?

⁴ Do, nso ke nnyịn ikeme ndinam man ika iso ibuana edifọn edifọn ke ndikwọrọ eti mbụk—idem ke mme efakutom oro owo mîsitịmke inọ n̄kpan̄utọn̄? (Luke 8:15) Nte eyịghe mîdụhe, ndineme ibio ibio mban̄a akpan ikpehe ita ke utom ukwọrọikọ nnyịn ayan̄wam. Nnyịn imekeme ndidụn̄ọde (1) ntak emi ikwọrọde ikọ; (2) etop m̀mê se nnyịn ikwọrọde; ye (3) mme usụn̄, m̀mê nte ikwọrọde ikọ. Edieke inyenede eti uduak, ikwọrọde etop nnyịn in̄wan̄-in̄wan̄, inyụn̄ idade usụn̄ oro enyenede uforo ikwọrọ ikọ, oro ayanam ediwak owo ẹnyene ifet ndikop mfọnn̄kan mbụk—kpa eti mbụk Obio Ubọn̄ Abasi. *

 Ntak Emi Isikwọrọde Eti Mbụk

5. (a) Nso idi ata akpan ntak oro anamde nnyịn ikwọrọ ikọ? (b) Ntak emi ikemede ndidọhọ ke ndinam ewụhọ Bible oro ọdọhọde ikwọrọ ikọ owụt ke imama Abasi?

⁵ Ẹyak ineme akpa ikpehe—se inamde nnyịn ikwọrọ ikọ. Ntak emi isikwọrọde eti mbụk? Ukem ntak emi akanamde Jesus ọkwọrọ eti mbụk anam nnyịn isikwọrọ n̄ko. Enye ọkọdọhọ ete: “Ami mmama Ete.” (John 14:31; Psalm 40:8) Ima oro imade Abasi edi ata akpan ntak oro ikwọrọde ikọ. (Matthew 22:37, 38) Bible owụt ke ima oro imade Abasi ye utom ukwọrọikọ ẹdi itai ye aban̄, koro enye ọdọhọ ete: “Emi edi se ndima Abasi ọwọrọde, ete nnyịn inịm ibet esie; ndien ibet esie idobike owo mbiomo.” (1 John 5:3; John 14:21) Ndi ewụhọ Abasi esịne ewụhọ oro ọdọhọde ‘ẹka ẹkenam mme mbet’? (Matthew 28:19) Ih. Edi akpanikọ, Jesus eketịn̄ ikọ oro, edi enye enen̄ede edi ikọ Jehovah. Didie? Jesus ama anam an̄wan̄a ete: “Nnamke baba n̄kpọ kiet ke odudu idemmi; edi kpa nte Ete ekekpepde mi kpa ntre ke ntịn̄ mme n̄kpọ emi.” (John 8:28; Matthew 17:5) Ntem, ke ndinam ewụhọ oro ọdọhọde ikwọrọ ikọ, nnyịn iwụt Jehovah ke imama enye.

6. Didie ke ima oro imade Abasi onụk nnyịn ikwọrọ ikọ?

⁶ Ke adianade do, ima oro imade Jehovah anam nnyịn ikwọrọ ikọ sia iyom ndiwụt ke se Satan etịn̄de aban̄a enye ẹdi nsu. (2 Corinth 4:4) Satan ọdọhọ ke ukara Abasi inenke. (Genesis 3:1-5) Nte Mme Ntiense Jehovah, enen̄ede ọdọn̄ nnyịn nditiene nyarade edidọk Satan nnyụn̄ nnam enyịn̄ Abasi asana ke iso ofụri ubonowo. (Isaiah 43:10-12) Akan oro, nnyịn ikwọrọ ikọ sia imọfiọk mme edu ye mme usụn̄ Jehovah. Imasan̄a ikpere enye onyụn̄ enen̄ede ọdọn̄ nnyịn ndisian mbon en̄wen mban̄a Abasi nnyịn. Ke akpanikọ, mfọnido Jehovah ye ndinen usụn̄ esie ẹnen̄ede ẹnọ nnyịn inemesịt tutu nnyịn ikemeke nditre nditịn̄ ikọ mban̄a enye. (Psalm 145:7-12) Enen̄ede ọdọn̄ nnyịn nditoro enye nnyụn̄ ntịn̄ “nti ido” esie nnọ mbon oro ẹmade ndikop.—1 Peter 2:9; Isaiah 43:21.

7. Ke adianade ye ndima Abasi, nso idi akpan ntak en̄wen oro anamde nnyịn ikwọrọ ikọ?

⁷ Akpan ntak efen odu oro anamde nnyịn ika iso ikwọrọ ikọ: Enen̄ede ọdọn̄ nnyịn ndinọ mbon oro ẹkopde ekese ndiọi mbụk ikọ ndọn̄esịt, nnyụn̄ ndọn̄ mbon oro ẹbọde ufen ke ntak kiet m̀mê eken, esịt. Ke ndinam emi, nnyịn idomo ndikpebe Jesus. Ke uwụtn̄kpọ, se se ẹtịn̄de ke Mark 6.

8. Didie ke mbụk Mark ibuot 6 owụt nte Jesus ekekerede aban̄a mme owo?

⁸ Ke mme apostle ẹma ẹkenyọn̄ọ ukwọrọikọ ẹdi, mmọ ẹma ebụk ẹnọ Jesus se mmọ ẹkenamde ẹnyụn̄ ẹkpepde. Jesus ama okụt ke idem ama emem mme apostle, onyụn̄ ọdọhọ mmọ ẹtiene imọ “ẹdiduọk odudu esisịt.” Ntre mmọ ẹma ẹdụk ubom ẹdiere ẹka ndobo ndobo ebiet. Mme owo ẹma ẹfehe ke mbeninyan̄ ẹtiene mmọ, ndien ikebịghike ẹma ẹkesịm mmọ. Nso ke Jesus akanam? Mbụk oro ọdọhọ ete: “Enye okụt akwa otuowo, edi enye atua mmọ mbọm, koro mmọ ẹbietde erọn̄ eke  mînyeneke andikpeme. Ndien enye ọtọn̄ọ ndikpep mmọ ediwak n̄kpọ.” (Mark 6:31-34) Mbọm akanam Jesus aka iso ọkwọrọ eti mbụk kpa ye oro enye akakpade mba. Ih, Jesus ama atua mme owo mbọm.

9. Nso ke nnyịn ikpep ito mbụk Mark ibuot 6 kaban̄a nnennen ntak oro isikwọrọde ikọ?

⁹ Nso ke nnyịn ikpep ito mbụk emi? Nte mme Christian, nnyịn imọfiọk ke obiomo nnyịn ndikwọrọ eti mbụk nnyụn̄ nnam mme mbet. Ih, nnyịn imọfiọk ke edi utom nnyịn nditan̄a eti mbụk, sia edide uduak Abasi “nte kpukpru orụk owo ẹkpenyene edinyan̄a.” (1 Timothy 2:4) Nte ededi, nnyịn ikwọrọke ikọ n̄kukụre sia obiomode nnyịn ndinam oro, edi ikwọrọ n̄ko ke ntak mbọm. Edieke mbọm mme owo enen̄erede anam nnyịn nte akanamde Jesus, ọyọdọn̄ nnyịn ndinam se ikekeme man ika iso ibuana eti mbụk ye mmọ. (Matthew 22:39) Edieke utọ eti ntak oro anamde nnyịn ikwọrọ ikọ, oro ọwọrọ ke nnyịn iditreke ndikwọrọ eti mbụk.

Etop Nnyịn Edi Eti Mbụk Obio Ubọn̄ Abasi

10, 11. (a) Nso ke Isaiah etịn̄ aban̄a etop oro ikwọrọde? (b) Didie ke Jesus okobụk eti n̄kpọ, ndien didie ke mme asan̄autom Abasi eyomfịn ẹtiene uwụtn̄kpọ esie?

¹⁰ Nso kaban̄a ọyọhọ ikpehe iba ke utom ukwọrọikọ nnyịn—oro edi etop nnyịn? Nso idi se nnyịn ikwọrọde? Prọfet Isaiah ama etịn̄ ke inem inem usụn̄ aban̄a etop oro ikwọrọde ete: “Ukot owo eti mbụk eye didie ke enyọn̄ ikpọ obot! ukot owo eke ọkwọrọde emem, eke obụkde eti n̄kpọ, eke ọkwọrọde edinyan̄a; ọdọhọ Zion, ete, Abasi fo ada ubọn̄!”—Isaiah 52:7.

¹¹ Ọkpọikọ itien̄wed oro, “Abasi fo ada ubọn̄,” eti nnyịn etop oro inyenede ndikwọrọ, oro edi, eti mbụk Obio Ubọn̄ Abasi. (Mark 13:10) Tịm fiọk n̄ko ete ke ufan̄ikọ emi owụt ke etop nnyịn akpaban̄a nti n̄kpọ. Isaiah etịn̄ aban̄a “edinyan̄a,” “eti mbụk,” “emem,” ye “eti n̄kpọ.” Ediwak isua ikie ke Isaiah ama akakpa, ke akpa isua ikie E.N., Jesus Christ ama osu ntịn̄nnịm ikọ emi ke n̄wọrọnda usụn̄ ke ndinịm uwụtn̄kpọ editan̄a mbụk eti n̄kpọ—kpa Obio Ubọn̄ Abasi oro edidide. (Luke 4:43) Ke eyomfịn, akpan akpan ọtọn̄ọde ke 1919, Mme Ntiense Jehovah ẹtiene uwụtn̄kpọ Jesus ke ndisịn ifịk ntan̄a eti mbụk aban̄ade Obio Ubọn̄ Abasi oro ama ọkọtọtọn̄ọ ndikara ọkọrọ ye mme edidiọn̄ oro enye edidade edi.

12. Didie ke eti mbụk Obio Ubọn̄ otụk mbon oro ẹnyịmede ndikop?

¹² Didie ke eti mbụk Obio Ubọn̄ otụk mbon oro ẹmade ndikop? Kpa nte ekedide ke eyo Jesus, eti mbụk emi ọdọn̄ mme owo esịt onyụn̄ ọnọ mmọ idotenyịn mfịn. (Rome 12:12; 15:4) Enye ọnọ mbon oro ẹnyenede esịt akpanikọ idotenyịn koro mmọ ẹfiọk ke eti ntak odu ndinịm ke ini iso ọyọfọn akan emi. (Matthew 6:9, 10; 2 Peter 3:13) Utọ idotenyịn oro enen̄ede  an̄wam mbon oro ẹten̄ede Abasi ndika iso n̄kop inemesịt. Andiwet psalm ọdọhọ ke “idiọk etop idinamke [mmọ] ndịk.”—Psalm 112:1, 7.

Etop Oro ‘Edibọpde Mmọ Eke Esịt Obụn̄ọde’

13. Didie ke prọfet Isaiah owụt mme edidiọn̄ oro mbon oro ẹnyịmede eti mbụk ẹnyenede idahaemi?

¹³ Ke adianade do, eti mbụk oro ikwọrọde ada ufọn ye edidiọn̄ ọsọk mbon oro ẹkpan̄de utọn̄ ẹnọ enye. Didie? Prọfet Isaiah ama ebem iso etịn̄ ndusụk edidiọn̄ emi ke ini enye ọkọdọhọde ete: “Spirit Ọbọn̄ Jehovah odoro mi: koro, Jehovah emeyet mi aran enịm, man mbụk eti mbụk nnọ mbon nsụk-esịt; ọmọdọn̄ mi, ete mbọp mmọ eke esịt mmọ obụn̄ọde, n̄kwọrọ uwọrọ-ufịn nnọ mbuot ekọn̄, n̄kwọrọ nsana-nyak nnọ mmọ eke ẹkọbide; n̄kwọrọ isua mfọnido Jehovah, ye usen usiene Abasi nnyịn; ndọn̄ kpukpru mme atua-eyet esịt.”—Isaiah 61:1, 2; Luke 4:16-21.

14. (a) Nso ke ikọ oro ‘ndibọp mmọ eke esịt obụn̄ọde’ owụt aban̄a etop Obio Ubọn̄? (b) Didie ke nnyịn iwụt ke imekere iban̄a mmọ eke esịt obụn̄ọde, nte Jehovah esikerede aban̄a?

¹⁴ Ntịn̄nnịm ikọ oro owụt ke Jesus edida eti mbụk ibọp “mmọ eke esịt mmọ obụn̄ọde.” Nso eti uwụtn̄kpọ ke Isaiah ada etịn̄ ikọ ntem! N̄wed ukabadeikọ Bible kiet ọdọhọ ke ẹsiwak nditịn̄ ikọ Hebrew oro ẹkabarede ‘bọp’ “ke ini ẹyomde ‘ndibọp’ owo unan nsọbọ.” Ọnọ-usọbọ oro etịmde ekere aban̄a owo udọn̄ọ ekeme ndida ọfọn̄ ubọp unan mbọp owo nde-unan man omụm unan oro akama. Kpasụk ntre, ke ini ẹkwọrọde etop Obio Ubọn̄, mme asuanetop oro ẹkerede ẹban̄a mme owo ẹsin̄wam kpukpru mbon oro ẹkpan̄de utọn̄ oro ẹkụtde ndutụhọ. Ndien ke ndin̄wam mbon oro ẹyomde un̄wam, mmọ ẹwụt ke imekere iban̄a mme owo nte Jehovah esikerede aban̄a. (Ezekiel 34:15, 16) Kop se andiwet psalm eketịn̄de aban̄a Abasi: “Edi enye ọkọk mmọ eke esịt mmọ anuahade, onyụn̄ ofụk mmọ unan.”—Psalm 147:3.

Nte Etop Obio Ubọn̄ Okpụhọrede Mme Owo

15, 16. Ewe uwụtn̄kpọ eyouwem ẹwụt nte etop Obio Ubọn̄ an̄wamde onyụn̄ ọsọn̄ọde mbon mmemidem, idem?

¹⁵ Ata ekese uwụtn̄kpọ eyouwem ẹwụt nte etop Obio Ubọn̄ enen̄erede an̄wam onyụn̄ ọsọn̄ọde mmọ eke esịt obụn̄ọde, idem. Kere ban̄a Oreanna, akanian̄wan kiet ke Edem Usụk America, emi ekekerede ke ufọn idụhe imọ ndidu uwem aba. Kiet ke otu Mme Ntiense Jehovah ama ọtọn̄ọ ndisika n̄kese Oreanna nnyụn̄ n̄kot Bible ye N̄wed Mi eke Mme Mbụk Bible * nnọ enye. Ke ntọn̄ọ ntọn̄ọ, n̄wan emi okokopde mfụhọ mi ekesibọbọp enyịn ana ke bed akpan̄ utọn̄ okop se ẹkotde, esinyụn̄ asiama ke ini ke ini. Nte ededi, ikebịghike, enye ama odomo ndidaha nda ntetie ke bed ke ini ẹkotde n̄wed oro ẹnọ enye. Nte ini akakade, enye ama esiwọrọ editie ke akpakaha ke ufọtufọk ebet Ntiense oro ekesikpepde enye Bible. Ekem, enye ama ọtọn̄ọ ndisidụk mme mbono esop Christian ke Ufọkmbono Obio Ubọn̄. Sia se enye ekekpepde ke mme mbono esop emi ekesịnde udọn̄ ọnọ enye, enye ama ọtọn̄ọ ndisinọ owo ekededi oro ekebede ke enyịnusụn̄ esie mme n̄wed Bible. Ekem, Oreanna ama ana baptism nte kiet ke otu Mme Ntiense Jehovah ke ini ekedide isua 93. Etop Obio Ubọn̄ ama anam enye afiak oyom ndidu uwem.—Mme N̄ke 15:30; 16:24.

¹⁶ Etop Obio Ubọn̄ enen̄ede an̄wam idem mbon oro ẹfiọkde ke udọn̄ọ ekeme ndiwot mmimọ ini ekededi. Da Maria emi otode Edem Usoputịn Europe ke uwụtn̄kpọ. Enye ọkọdọn̄ọ udọn̄ọ n̄kpa, ndien enye ikodorike enyịn aba ke iyodu uwem. Enye ama enen̄ede okop mfụhọ ke ini Mme Ntiense Jehovah ẹkesobode ye enye. Nte ededi, ke ini enye ekedide edifiọk uduak Abasi, uwem esie ama afiak enyene uduak. Enye ama ana baptism onyụn̄ akabade edi enyene-ifịk ọkwọrọikọ. Ke akpatre isua iba oro enye okodude uwem, enye ama enen̄ede enyene idotenyịn onyụn̄  okop idatesịt. Maria ama akpa onyụn̄ enen̄ede odori enyịn ke imọ iyeset.—Rome 8:38, 39.

17. (a) Didie ke etop Obio Ubọn̄ okpụhọde uwem mbon oro ẹnyịmede enye? (b) Ke usụn̄ ewe ke afo ke idemfo okụt ke Jehovah “emenede mmọ eke ẹnụhọde”?

¹⁷ Utọ ifiọkutom oro ẹwụt nte etop Obio Ubọn̄ ekemede ndikpụhọde uwem mbon oro ẹkopde nsatitọn̄ akpanikọ Bible. Mbon oro ẹfụhọde n̄kpa owo ima mmọ ẹsifiak ẹkop nsọn̄idem ke ẹma ẹkefiọk idotenyịn ediset ke n̄kpa. (1 Thessalonica 4:13) Mme ubuene oro ẹn̄wanade-n̄wana ẹyom se ubon mmọ ẹdidiade ẹsifiak ẹnyene uku ye uko ke ẹma ẹkedi ẹdifiọk ke Jehovah idifreke mmimọ edieke mmimọ ikade iso ima enye. (Psalm 37:28) Jehovah ọnọ ediwak mbon oro ẹkopde ọkpọsọn̄ mfụhọ ukeme ndiyọ, ndien ke ndusụk idaha, emi esin̄wam mmọ ndikan mfụhọ mmọ. (Psalm 40:1, 2) Ke akpanikọ, idem idahaemi, Jehovah ada odudu oro Ikọ esie enyenede “emenede mmọ eke ẹnụhọde.” (Psalm 145:14) Ini ekededi oro ikụtde nte eti mbụk Obio Ubọn̄ ọnọde mmọ eke esịt obụn̄ọde ndọn̄esịt ke efakutom nnyịn ye ke esop Christian, emi esiti nnyịn ke nnyịn inyene mfọnn̄kan mbụk mfịn!—Psalm 51:17.

“Eben̄e Oro Mben̄ede Abasi Nnọ Mmọ”

18. Eketie Paul didie ke idem ke ini mme Jew ẹkesịnde eti mbụk, ndien ntak-a?

¹⁸ Okposụkedi etop nnyịn esịnede mfọnn̄kan mbụk, ediwak owo imaha ndikop. Didie ke emi ekeme nditụk nnyịn? Editụk nnyịn nte okotụkde apostle Paul. Enye ama esiwak ndikwọrọ ikọ nnọ mme Jew, edi ata ediwak mmọ ikesimaha ndikop etop edinyan̄a emi. Emi ama enen̄ede afịna Paul. Enye ọkọdọhọ ete: “Mmokop ọkpọsọn̄ mfụhọ ye ubiak eke mîdoboke ke esịt mi.” (Rome 9:2) Mbọm mme Jew oro Paul ọkọkwọrọde ikọ ọnọ ama anam enye. Enye ama ofụhọ ke ntak emi mmọ ẹkesịnde eti mbụk.

19. (a) Ntak emi an̄wan̄ade owo edieke nnyịn ifụhọde ndusụk ini? (b) Nso ikan̄wam Paul aka iso ke utom ukwọrọikọ esie?

¹⁹ Mbọm n̄ko anam nnyịn ikwọrọ eti mbụk. Ntre, an̄wan̄a owo edieke nnyịn ifụhọde ke ini ediwak owo ẹsịnde etop Obio Ubọn̄ oro ikwọrọde. Ndifụhọ ntre owụt ke nnyịn imenen̄ede ikere iban̄a mfọnọn̄kpọ eke spirit mbon oro ikwọrọde ikọ inọ. Nte ededi, nnyịn ikpenyene nditi uwụtn̄kpọ apostle Paul. Nso ikan̄wam enye aka iso ke utom ukwọrọikọ esie? Okposụkedi enye okofụhọde onyụn̄ okopde ubiak ke ntak emi mme Jew mîkamaha ndikop eti mbụk, Paul ikosion̄oke idem ikpọn̄ kpukpru mme Jew, ekerede ke ufọn idụhe ndin̄wam mmọ. Enye ama odori enyịn ke ndusụk mmọ ẹyenyịme Christ. Ntem, enye ama ewet nte enye ekekerede aban̄a mme Jew kiet kiet ete: “Eti uduak esịt mi ye  eben̄e oro mben̄ede Abasi nnọ mmọ, edi nte mmọ ẹnyene edinyan̄a.”—Rome 10:1.

20, 21. (a) Didie ke nnyịn ikeme ndikpebe Paul ke utom ukwọrọikọ nnyịn? (b) Ewe ikpehe ukwọrọikọ nnyịn ke ẹdineme ke ibuotikọ oro etienede?

²⁰ Kere ban̄a n̄kpọ iba oro Paul okosiode owụt. Enye akaduak ke esịt esie ete ndusụk owo ẹnyene edinyan̄a, ntre enye ama eben̄e Abasi an̄wam mmọ ẹnyene edinyan̄a. Mfịn, nnyịn itiene uwụtn̄kpọ Paul. Enen̄ede ọdọn̄ nnyịn ndikụt owo ekededi oro edimade ndikop eti mbụk. Nnyịn ika iso ibọn̄ akam inọ Jehovah ite nnyịn ikpakam ikụt utọ mme owo oro, man ikpan̄wam mmọ ẹdu uwem oro edidade esịm edinyan̄a.—Mme N̄ke 11:30; Ezekiel 33:11; John 6:44.

²¹ Nte ededi, man ikeme ndikwọrọ etop Obio Ubọn̄ nnọ ediwak owo nte ikekeme, iyomke nnyịn inọ ntịn̄enyịn kpọt ke ntak oro ikwọrọde ikọ ye se ikwọrọde, edi oyom inọ ntịn̄enyịn n̄ko ke nte ikwọrọde ikọ. Ẹyeneme emi ke ibuotikọ oro etienede.

[Mme Ikọ idakisọn̄]

Nso ke Afo Ekpep?

• Ntak emi ikwọrọde ikọ?

• Nso idi akpan etop oro ikwọrọde?

• Nso edidiọn̄ ke mbon oro ẹnyịmede etop Obio Ubọn̄ ẹnyene?

• Nso idin̄wam nnyịn ika iso ke utom ukwọrọikọ nnyịn?

[Mme Mbụme Ukpepn̄kpọ]

[Mme ndise ke page 18]

Eti mbụk Obio Ubọn̄ ọnọ mmọ eke esịt obụn̄ọde odudu

[Mme ndise ke page 20]

Akam an̄wam nnyịn ika iso ke utom ukwọrọikọ nnyịn