Ndiyom Emem Esịtidem

ALBERT ekedi ọdọ ndọ oro okopde inemesịt onyụn̄ enyenede ndiye nditọ iba. Edi okosụk etie enye ke idem nte ke odu n̄kpọ oro imọ mînyeneke. Ke ini enye akasan̄ade oyom utom, enye ama akabade esịn idem ke mbre ukara onyụn̄ enyịme mme ekikere ukara n̄kaowo. Enye ama akam akabade edi enyene-ifịk andibuana ke n̄ka ukara Communist eke n̄kann̄kụk esie.

Nte ededi, ikebịghike Albert ama okop idiọkesịt aban̄a ukara Communist. Enye ama etre ndibuana ke mbre ukara onyụn̄ enen̄ede esịn ifịk ese aban̄a ubon esie. Akpan n̄kpọ oro ekebehede enye ke uwem ekedi ndikụt ke ubon imọ okop inemesịt. Kpa ye oro, okosụk etie Albert ke idem nte ke odu n̄kpọ oro imọ mînyeneke; enye ikosụk inyeneke emem esịtidem.

Se iketịbede inọ Albert edi ọsọ n̄kpọ mfịn ke ererimbot. Man ẹnen̄ede ẹfiọk se idide ata uduak uwem, ediwak miliọn owo ẹdomo nsio nsio ukara, ukpepn̄kpọ akwaifiọk, ye ido ukpono, ẹse. Ke N̄kan̄ Edem Usoputịn, mme ọsọn̄ibuot uyen eke iduọk isua 1960 ẹma ẹsịn nti ido uwem eset oro n̄kaowo akadade ke akpan n̄kpọ. Mme uyen akpan akpan ẹma ẹyom inemesịt ẹnyụn̄ ẹyom ndifiọk se uwem ọwọrọde ebe ke ndida n̄kpọsọn̄ ibọk nnyụn̄ ntiene mme ukpepn̄kpọ akwaifiọk oro inua-okot mme andikpep ye mme adaiso mme ọsọn̄ibuot uyen emi ẹkekpepde. Kpa ye oro, nsọn̄ibuot ikanamke mme uyen emi ẹnyene ata inemesịt. Utu ke oro, enye akanam mmọ ẹnyene mbumehe uda n̄kpọsọn̄ ibọk, ẹnyụn̄ ẹdu etịme etịme uwem; emi ama anam ido uwem n̄kaowo etetịm abiara.

Ke ediwak isua ikie emi ẹbede, ediwak owo ẹkere ke inyene, odudu, m̀mê ubọ ukpep  ẹkeme ndinọ mmimọ inemesịt. Mme n̄kpọ emi ẹsida ẹkesịm edikpu ke akpatre. Jesus ọkọdọhọ ete: “Idem ke ini owo enyenede n̄kpọ barasuene, uwem esie itoho ke mme n̄kpọ emi enye enyenede.” (Luke 12:15) Utu ke oro, edibiere ndinyene inyene esiwak ndisụn̄ọ ke unana inemesịt. Bible ọdọhọ ete: “Mbon oro ẹbierede ndinyene inyene ẹduọ ẹdụk idomo ye ekpọ ye ediwak ndisịme ye idiọk udọn̄, emi ẹdụride mme owo ẹsịn ke nsobo ye nditaha. Koro ima okụk edi orụn̄ kpukpru orụk idiọkn̄kpọ, ndien ke edinyanade mbịne ima emi, ndusụk owo . . . ẹkịm ofụri idem mmọ ẹnọ ediwak unan.”—1 Timothy 6:9, 10.

Didie ndien ke owo ekeme ndinyene emem esịtidem nnyụn̄ ndu uwem oro enyenede uduak? Ndi emi ọkọn̄ọ ke edidodomo mme n̄kpọ nse, nte edidomo ndiyom obubịt ebot ke okoneyo? Baba. Nte nnyịn idikụtde ke ibuotikọ oro etienede, ndinyene emem esịtidem ọkọn̄ọ ke ndiyụhọ ata akpan udọn̄, ndien ke nditịm ntịn̄, owo kpọt enyene udọn̄ emi.

[Ndise ke page 3]

Ndi uyom inyene, odudu, m̀mê ubọ ukpep ekeme ndinam owo enyene emem esịtidem?