“Okụre”

KE ISUA 2002, Mme Ntiense Jehovah ẹma ẹnịm mbono district ke obio Mbandaka ke ikpehe edere edere n̄kan̄ edem usoputịn Democratic Republic of Congo. Ke ini ẹkesiode N̄wed Abasi Christian Usem Greek Edikabade eke Obufa Ererimbot ke usem Lingala ke mbono oro, mbon oro ẹkedụkde ẹma ẹfrọ ke enyọn̄ ke ntak idatesịt, ke adan̄aemi mmọn̄eyet idatesịt akasiahade ndusụk owo. Ekem, mme owo ẹma ẹfehe ẹka mbot utịn̄ikọ man ẹkenen̄ede ẹse obufa Bible oro, ẹnyụn̄ ẹfiori ẹte: “Basuki, Basambwe,” emi ọwọrọde ete: “Okụre! Mmọ ẹdia bụt!”

Ntak emi otuowo ẹkekopde nduaidem ntre, ndien nso ke ikọ mmọ ọkọwọrọ? Mme Ntiense Jehovah ikesikemeke ndidep Bible ke usem Lingala ke ndusụk ikpehe Mbandaka. Ntak-a? Koro ufọkabasi ikesimaha ndinyam Bible nnọ mmọ. Mme Ntiense ẹkesidọhọ mbon oro mîdịghe Ntiense ẹdep ẹnọ mmimọ. Ke emi mmọ ẹma ẹnen̄ede ẹkop inemesịt sia ufọkabasi mîkekemeke aba ndibiọn̄ọ mmọ ndinyene Bible.

Obufa edikabade emi idinyeneke ufọn inọ Mme Ntiense Jehovah kpọt, edi eyenyene ọnọ kpukpru owo n̄ko. Eren kiet emi eketiede ke ufọk esie okop edinam mbono oro ekewet ntem ọnọ ẹsọk ọfis n̄kọk itieutom Mme Ntiense Jehovah: “Esịt enen̄ede enem mi aban̄a Bible emi mbufo ẹsiode mi. Enye ayanam nnyịn ifiọk ekese n̄kpọ. Ami ndịghe kiet ke otu Mme Ntiense Jehovah, edi ntetie mbet Bible emi mbufo ẹsụk ẹsiode mi.”

Ofụri New World Translation of the Holy Scriptures odu idahaemi ke usem 33 ndien N̄wed Abasi Christian Usem Greek odu ke usem 19, esịnede usem Lingala. Edieke afo akpamade ndinyene ata eti Bible emi ke Ikọ Efịk, mbọk bụp kiet ke otu Mme Ntiense Jehovah.