“Un̄wam Mi Oto Jehovah”

Idọhọ Ndọ edi Ẹkop Inemesịt ke Utom Jehovah

N̄WAN kiet ke Spain emi edide Christian oro mîdọhọ ndọ ọkọdọhọ ete: “Ediwak nnyịn imenen̄ede ikop inemesịt okposụkedi nnyịn mîdọhọ ndọ.” Nso inọ enye inemesịt? Kop se enye etịn̄de: “Enenem nnyịn ndibọhọ editịmede esịt oro mme ọdọ ndọ ẹsinyenede man ikeme ndinam n̄kpọ Jehovah Abasi nnyịn ọyọhọ ọyọhọ.”

Utọ ekikere oro ekem ye se Ikọ Abasi etịn̄de aban̄a mbon oro mîdọhọ ndọ. Ke ini apostle Paul ekenemede aban̄a ndọ, spirit Abasi ama onụk enye ndinọ ọniọn̄ ọniọn̄ item emi ete: “Ndọhọ mmọ eke mîdọhọ ndọ ye mme ebeakpa nte, ọfọn mmọ ndika iso ntie nte ami.” Paul ke idemesie ikọdọhọ ndọ. Edi ntak emi enye ọkọdọhọde ke ọfọn nditre ndidọ ndọ? Enye ọkọdọhọ ke ekikere owo oro ọdọde ndọ asiaha iba, edi owo oro mîdọhọ ndọ “ekere aban̄a mme n̄kpọ Ọbọn̄.” (1 Corinth 7:8, 32-34) Utom Jehovah edi akpan n̄kpọ oro ọnọde owo oro mîdọhọ ndọ inemesịt ye uyụhọ.

Eti Ntak Nditre Ndidọ Ndọ

Ekeme ndidi ikọ Paul idin̄wan̄ake mme owo ke idụt oro ẹkerede ke ndidọ ndọ nnyụn̄ nnyene nditọ edi ata akpan n̄kpọ ke uwem. Nte ededi, Jesus Christ ke idemesie emi mîkọdọhọ ndọ ama okop inemesịt ye uyụhọ, enye ama etịn̄ eti ntak oro anamde mme Christian ẹkûdọ ndọ. Enye ọkọdọhọ ete: “Mme eunuch ẹdu emi ẹnamde idemmọ eunuch ke ntak obio ubọn̄ heaven. Yak owo eke ekemede ndinam ufan̄ nnọ oro anam ufan̄ ọnọ.”—Matthew 19:12.

Kpa nte ikọ emi owụtde, ediwak owo ẹkụt ke mbon oro mîdọhọ ndọ ẹkeme ndinam n̄kpọ Abasi ye unana n̄kpọ ndiwọn̄ọde ntịn̄enyịn mmọ nte esiwọn̄ọrede mme ọdọ ndọ. (1 Corinth 7:35) Ediwak tọsịn mme Christian oro mîdọhọ ndọ ke ẹtuak ibuot ẹnọ Jehovah ke inemesịt, ndien mmọ ẹkop inemesịt ndin̄wam mbon en̄wen. *

Ediwak mme Christian oro mîdọhọ ndọ ẹfiọk ke idịghe mme ọdọ ndọ kpọt ẹsikop inemesịt, inyụn̄ idịghe mbon oro mîdọhọ ndọ kpọt ẹsikop mfụhọ. Otu mbiba emi ẹsikop inemesịt ye mfụhọ ndusụk ini. Ke akpanikọ, Bible etịn̄ in̄wan̄-in̄wan̄ ete ke mbon oro ẹdọde ndọ “ẹyekụt ukụt ke obụkidem.”—1 Corinth 7:28.

Mbon Oro Idaha Mmọ Mîyakke Ẹdọ Ndọ

Ediwak owo ẹtre ndidọ ndọ ke ntak emi idaha mîyakke mmọ ẹdọ, idịghe ke ntak emi ẹmade-ma. Ekeme ndidọn̄ mmọ ndinyene ufiop ufiop itie ebuana ye ima oro mme ọdọ ndọ ẹsimade kiet eken. Nte ededi, okụk m̀mê mme n̄kpọ efen ẹkeme ndibiọn̄ọ ndusụk owo ndidọ ndọ idahaemi. Ndusụk Christian—ediwak ẹdide ndima nditọete nnyịn iban—idọhọ ndọ sia mmọ ẹbierede ndinam item Bible oro ọdọhọde ẹdọ “ke Ọbọn̄ ikpọn̄-ikpọn̄.” (1 Corinth 7:39) Mmọ ẹyom nsan̄a ndọ ke otu mme andituak ibuot nnọ Jehovah oro ẹma ẹkeyak idem ẹnọ ẹnyụn̄ ẹna baptism.

Ndusụk ini, ndusụk mmọ ẹsikop ndobo. Ke ama ekenyịme ke imọ imesikop ndobo, Christian  an̄wan oro mîdọhọ ndọ ọkọdọhọ ete: “Nnyịn imọfiọk mbet Jehovah ndien nnyịn iyomke ndiyat Jehovah esịt ke baba usụn̄ kiet. Ekeme ndidọn̄ nnyịn ndinyene nsan̄a ndọ, edi inamke n̄kpọ m̀mê adan̄a ediwak ini didie ke mbon ererimbot ẹdomo ndiyom nsan̄a ndọ nnọ nnyịn, nnyịn imebiere ndisọn̄ọ nda. Ikam idọn̄ke-dọn̄ nnyịn ndidụk ndụk ye mbon oro mînịmke ke akpanikọ—edide iren m̀mê iban.” Imotoro mme utọ Christian oro ke ndida item Bible nsịn ke edinam nnyụn̄ n̄ka iso ndu eti uwem man ẹnem Jehovah esịt kpa ye mfịghe oro mmọ ẹsobode ke n̄kan̄ eke ntụk.

Jehovah Enen̄ede An̄wam

Jehovah ama mbon oro ẹmade enye tutu mmọ ikemeke ndidọ owo ekededi oro mîdịghe andituak ibuot nnọ enye. Ke etide se iketịbede inọ enye, Edidem David ọkọdọhọ ete: “Afo [Jehovah] eyenyene ima ye mbon ima fo; onyụn̄ ọfọn ama ye owo eke ọfọnde ama.” (Psalm 18:25) Abasi onyụn̄ ọn̄wọn̄ọ ọnọ mbon oro ẹsọn̄ọde ẹda ẹkop uyo esie ete: “Ndikpọn̄ke fi, ndinyụn̄ nsịnke fi.” (Mme Hebrew 13:5) Nnyịn imekeme ndikpebe Jehovah ke ndinen̄ede ntoro kpukpru Christian oro mîdọhọ ndọ, emi ẹsọn̄ọde ẹda ẹnam item Ikọ Abasi. Nnyịn imekeme n̄ko ndiben̄e Jehovah ọsọn̄ọ mmọ idem ndiyọ mme n̄kpọ-ata oro mmọ ẹsobode.—Judges 11:30-40.

Ediwak mme Christian oro mîdọhọ ndọ ẹkụt ke ndisịn idem n̄kpep mme owo Bible anam uwem mmimọ enyene se ọwọrọde. Ke uwụtn̄kpọ, kere ban̄a Patricia, eyenete an̄wan oro mîdọhọ ndọ. Enye edi n̄kpọ nte isua 35, onyụn̄ edi asiakusụn̄, m̀mê ọkwọrọikọ uyọhọ ini. Enye ọdọhọ ete: “Okposụkedi nditre ndidọ ndọ asan̄ade ye idomo, oro ọnọ mi ifet ndidi asiakusụn̄ ofụri ini. Sia mmendọhọ ndọ, mmekeme ndikpụhọde ndutịm mi nte mmama, ndien emi ọnọ emi ekese ifet ndikpep n̄kpọ. Ami n̄ko mmekpep ndinen̄ede mberi edem ke Jehovah, akpan akpan ke ini idomo.”

Utọ ekikere oro ọkọn̄ọ ke un̄wọn̄ọ Bible emi: “Kpat usụn̄ fo nọ Jehovah, nyụn̄ buọt idem fo ye enye, ndien enye ayanam” n̄kpọ. (Psalm 37:5) Ke akpanikọ, kpukpru mme anam-akpanikọ andituak ibuot nnọ Jehovah, edide mbon oro ẹdọde ndọ m̀mê mbon oro mîdọhọ, ẹkeme ndibọ ndọn̄esịt nto ikọ eke odudu spirit emi: “Un̄wam mi oto Jehovah.”—Psalm 121:2, NW.

[Ikọ idakisọn̄]

[Se Ẹwetde ke Ikpọ Abisi ke page 9]

“Erenowo emi mîdọhọ ndọ ekere aban̄a mme n̄kpọ Ọbọn̄, nte enye edisan̄ade enyene unyịme Ọbọn̄.”—1 CORINTH 7:32

[Ekebe ke page 8]

NTE MBON ORO MÎDỌHỌ NDỌ ẸKEMEDE NDIDA IDAHA MMỌ NNAM N̄KPỌ UFORO UFORO

Jesus oro mîkọdọhọ ndọ ọkọdọhọ ete: “Udia mi edi ndinam uduak enye emi ọkọdọn̄de mi nnyụn̄ nnam utom esie mma.”—John 4:34.

Nditọiban Philip mbinan̄ oro mîkọdọhọ ndọ ẹma ẹsịn idem ‘ẹtịn̄ ntịn̄nnịm ikọ.’—Utom 21:8, 9.

Mme Christian iban oro mîdọhọ ndọ, emi ẹtan̄ade etop Obio Ubọn̄, ẹdi ubak ‘akamba udịm iban emi ẹkwọrọde eti mbụk.’—Psalm 68:11.