“Mmọ Ikakan̄ke Mbuọtidem”

JESUS CHRIST ọkọdọhọ mme mbet esie ete: “Inemesịt edi eke mbufo ke ini mme owo ẹsụn̄ide mbufo ẹnyụn̄ ẹkọbọde mbufo ẹnyụn̄ ẹtịn̄de kpukpru orụk idiọkn̄kpọ ke nsu ẹdian mbufo ke ntak enyịn̄ mi.” (Matthew 5:11) Mme Ntiense Jehovah ẹkop inemesịt mfịn sia mmọ nditiene ukpepn̄kpọ ye uwụtn̄kpọ Christ iyakke mmọ ẹdi “ubak ererimbot.” Mmọ ẹnen̄ede ẹda san̄asan̄a ẹkpọn̄ mbre ukara, ẹnyụn̄ ẹsọn̄ọ ẹda ke kpukpru orụk idaha ẹnam akpanikọ ẹnọ Abasi.—John 17:14; Matthew 4:8-10.

Kaban̄a nte Mme Ntiense Jehovah ẹkesọn̄ọde ẹda ke ini ukara Soviet Union ye ke Estonia, Toomas Paul emi edide ekpep ukpepn̄kpọ ido ukpono Lutheran ye akabade Bible ewet ke n̄wed esie oro Kirik keset küla (Ufọkabasi Emi Odude ke Ufọt Obio) ete: “Ata esisịt ibat owo ẹkop se iketịbede tụhi-tụhi usenubọk April 1, 1951. Ẹma ẹdụk odu man ẹbịn Mme Ntiense Jehovah ye kpukpru mbon oro ẹberede ye mmọ ẹsion̄o ke obio—ẹma ẹmụm owo 279 ẹnọ ẹka Siberia . . . Ẹma ẹnọ mmọ ifet ndisịn ubọk ke babru n̄kan̄ mbuọtidem mbak ẹdibịn mmọ ẹsion̄o ke obio m̀mê mbak ẹdisịn mmọ ke ufọk-n̄kpọkọbi. . . . Ẹma ẹkọbi owo 353, esịnede mbon oro ẹma ẹkebebem iso ẹmụm, ndien n̄kpọ nte owo 171 ke otu emi ẹkedi mbon oro ẹketọn̄ọde-tọn̄ọ ndidụk mme mbono esop mmọ. Mmọ ikakan̄ke mbuọtidem—idem ke ini ẹkebịnde mmọ ẹka Siberia. . . . Ediwak mbon Ufọkabasi [Lutheran eke Estonia] ikenyeneke orụk mbuọtidem oro Mme Ntiense Jehovah ẹkenyenede.”

Mme Ntiense Jehovah ke ofụri ererimbot ẹberi edem ke Abasi man an̄wam mmọ ẹsọn̄ọ ẹda ẹnam akpanikọ ẹnyụn̄ ẹsụk ibuot ẹnọ enye kpa ye ukọbọ. Mmọ ẹdat esịt sia ẹfiọkde ke utịp edinam akpanikọ mmimọ okpon.—Matthew 5:12.