Mme Mbụme Ẹtode Mme Andikot

Sia Edidem Solomon eke Israel eset mîkanamke akpanikọ inọ Abasi ke ini usọn̄ esie, ndi nnyịn imekeme ndidọhọ ke owo idinamke enye eset?—1 Ndidem 11:3-9.

Okposụkedi Bible asiakde enyịn̄ ndusụk iren ye iban mbuọtidem oro ẹdinamde ẹset, enye itịn̄ke nnennen nnennen ke kpukpru owo oro imọ isiakde enyịn̄ ẹnyene idotenyịn ndiset. (Mme Hebrew 11:1-40) Nte ededi, ke se iban̄ade Solomon, nnyịn imekeme ndifiọk ubiereikpe Abasi ke ndimen se iketịbede inọ Solomon ke ini enye akakpade ndomo ye se iketịbede inọ ndusụk mme anam-akpanikọ ke ini mmọ ẹkekpan̄ade.

N̄wed Abasi etịn̄ aban̄a n̄kpọ iba kpọt oro ẹkemede nditịbe nnọ akpan̄kpa—ndikpa ke ibio ini ye ndikpa ke nsinsi. Ẹtop mbon oro ẹbierede ikpe ẹnọ ke idotke ndiset ke n̄kpa ẹduọk ke “Gehenna,” m̀mê ke “n̄kpọdiọhọ ikan̄.” (Matthew 5:22; Mark 9:47, 48; Ediyarade 20:14) Mbon emi ẹsịne akpa owo iba oro, Adam ye Eve, owo mbia oro Judas Iscariot, ye ndusụk mbon oro Abasi okosobode, utọ nte mbon eyo Noah ye mbon oro ẹkedụn̄de ke Sodom ye Gomorrah. * Ke ini mbon oro ẹdinamde ẹset ẹkpan̄ade, mmọ ẹsika udi ofụri ubonowo—Sheol, m̀mê Hades. Bible etịn̄ aban̄a mbon oro ẹdinamde ẹset ete: “Inyan̄ asana mme akpan̄kpa oro ẹdude mmọ ke esịt ayak, n̄kpa ye Hades ẹnyụn̄ ẹsana mme akpan̄kpa emi ẹdude mmọ ke esịt ẹyak, ndien ẹkpe ikpe mmọ owo kiet kiet nte ekemde ye mme edinam mmọ.”—Ediyarade 20:13.

Do, mme anam-akpanikọ oro ẹtịn̄de ẹban̄a ke Mme Hebrew ibuot 11 ẹdu ke Sheol, m̀mê Hades, ẹbetde ẹnam mmimọ iset. Mmọ ẹsịne mme anam-akpanikọ asan̄autom Abasi nte Abraham, Moses, ye David. Yak ise se Bible etịn̄de aban̄a mmọ ke ini mmọ ẹkekperede n̄kpa. Jehovah ọkọdọhọ Abraham ete: “Edi afo eyetiene mme usọ ke emem; oyobụhọ ke ata usọn̄.” (Genesis 15:15) Jehovah ọkọdọhọ Moses ete: “Sese, afo ọmọn̄ edina ye mme usọ.” (Deuteronomy 31:16) Bible etịn̄ aban̄a David, ete Solomon, ete: “David [ede] idap ye mme ete esie, onyụn̄ obụhọ ke obio David.” (1 Ndidem 2:10) Ntem, ndidọhọ ke ‘owo etiene mme ete esie’ edi usụn̄ en̄wen ndidọhọ ke owo oro aka Sheol.

Nso iketịbe inọ Solomon ke ini enye akakpade? Bible ọbọrọ ete: “Mme usen emi Solomon akadade ubọn̄ ofụri Israel ke Jerusalem ẹdi isua aba. Ekem Solomon osụhọde ana ye mme ete esie ede, onyụn̄ obụhọ ke obio David ete esie.” (1 Ndidem 11:42, 43) Mmọdo, owụt ifiọk ndidọhọ ke Solomon odu ke Sheol, m̀mê Hades ebet ẹnam imọ iset.

Emi ọwọrọ ke ekeme ndidi ẹyenam mbon en̄wen oro N̄wed Abasi etịn̄de nnennen nnennen ete ke ‘mmọ ẹma ẹsụhọde ẹna ye mme ete mmọ,’ ẹset. Ke nditịm ntịn̄, N̄wed Abasi ọdọhọ ke ediwak ndidem oro ẹkedade itie Solomon, okposụkedi mmọ mîkanamke akpanikọ, ẹma ẹsụhọde ẹna ye mme ete mmọ. Emi ikpaha owo idem, koro “ndinen owo ye mme anam ukwan̄n̄kpọ ẹyeset ke n̄kpa.” (Utom 24:15) Nte ededi, edidi n̄kukụre ke ẹma ẹkenam “kpukpru mme andidu ke udi editi” ẹset ke nnyịn idinen̄ede ifiọk mbon oro ẹnamde ẹset. (John 5:28, 29) Ntre, utu ke ndisọn̄ọ ntịn̄ owo oro ẹdinamde eset ke otu mbon oro ẹkekpan̄ade ke eset, ọfọn nnyịn ibet inyụn̄ inyene mbuọtidem ke Jehovah eyebiere n̄kpọ emi ke mfọnmma usụn̄.

[Ikọ idakisọn̄]