Anyan Isan̄ Ama Ada Edidiọn̄ Edi

ẸTỌT ke nditọeka iban iba emi ẹtode Democratic Republic of Congo ẹma ẹbiere ndito obio mmọ oro ekọn̄ akan̄wanade n̄kodụk Mbono District “Ẹnọ Abasi Ubọn̄” ke Lisala oro ekenen̄erede oyom usụn̄ ọkpọn̄ obio mmọ. Ke adianade ye item eke spirit oro mmọ ẹkedoride enyịn ndibọ ọkọrọ ye ebuana oro mmọ ẹkedoride enyịn ndinyene ye nditọete ke mbono oro, mmọ ẹma ẹdori enyịn n̄ko ndisobo nditọete oro ẹketode ọfis n̄kọk itieutom Mme Ntiense Jehovah ke Kinshasa ẹdi mbono oro. Ekọn̄ ikayakke mmọ ẹkeme ndikụt owo ndomokiet oro otode n̄kọk itieutom ke ediwak isua, ntre mmọ ẹkeyom ndida ifet emi n̄kokụt nditọete emi.

Nditọeka iba emi ẹma ẹdụk ubom ke obio Basankusu ẹwat ẹbe inyan̄ iba ẹnyụn̄ ẹsan̄a ke akai ẹkesịm Lisala; isan̄ emi ekedi n̄kpọ nte kilomita 300. Akada mmọ urua ita ndika n̄kesịm Lisala. Sia mmọ mbiba ẹdide mme asiakusụn̄ ofụri ini—kiet asiak usụn̄ ke isua 3, ke adan̄aemi enye eken asiakde ke isua 19—mmọ ẹma ẹda ifet emi ẹtan̄a eti mbụk Obio Ubọn̄ ke usụn̄ isan̄ mmọ. Mmọ ẹma ẹda hour 110 ẹkwọrọ ikọ ẹnọ mme owo oro mmọ ẹkesobode ke usụn̄, ẹnyụn̄ ẹnịm tract 200 ye magazine 30.

Mmọ ẹkenyene ndibe inyan̄ emi mme isantịm ye mme fiom ẹdude; mme unam emi ẹyọyọhọ n̄kan̄ oro. Edi mmọ ikekemeke ndiwat okoneyo ke ntak ndiọi unam emi! Mmọ ẹma ẹnyụn̄ ẹbe ediwak itie ndụn̄ọde oro mbonekọn̄ ẹkedude.

Okposụkedi isan̄ emi ọkọniọn̄de onyụn̄ anamde mmọ ẹkpa mba, esịt ama enem nditọeka iba emi ke ukeme oro mmọ ẹkesịnde ndika mbono oro. Esịt ama enen̄ede enem mmọ mbiba ndidụk mbono oro ke Lisala. Mmọ ẹma ẹnen̄ede ẹnyene ifiopesịt ẹban̄a akpanikọ, ndien ama enem mmọ ke idem ndidu ye nditọete iren ye iban 7,000 oro ẹkedụkde mbono oro. Ke mbono ama akasuana, mmọ ẹma ẹfiak ẹsan̄a nte mmọ ẹkesan̄ade ẹdi ẹnyọn̄ọ, ẹnyụn̄ ẹfiak ẹkesobo mbonubon mmọ ye nsọn̄idem.