Bible Ekeme Ndinam Fi Okop Idatesịt

OKPOSỤKEDI Bible mîdịghe n̄wed ibọkusọbọ, enye etịn̄ nte ekikere—eti m̀mê idiọk—ekemede nditụk ukeme ukere n̄kpọ ye nsọn̄idem owo. Bible ọdọhọ ete: “Idatesịt ọfọn owo ke idem: edi esịt mfụhọ an̄wan owo ọkpọ.” Nnyịn ikot n̄ko ite: “Esịt ama ọduọ fi ke usen ukụt, odudu fo akabade ekpri.” (Mme N̄ke 17:22; 24:10) Edieke nnyịn ikerede ke owo inọhọ nnyịn nsịnudọn̄, emi ekeme ndinam idem emem nnyịn, onyụn̄ anam nnyịn ikere ke ufọn idụhe ndikpụhọde m̀mê ndiyom un̄wam.

Unana nsịnudọn̄ ekeme ndifịna owo ke n̄kan̄ eke spirit n̄ko. Mbon oro ẹkerede ke mmimọ iwọrọke n̄kpọ ẹsikere ke mmimọ ikemeke ndinyene eti itie ebuana ye Abasi ye nte ke enye ikemeke ndima mmimọ. Simone, oro ikasiakde ke ibuotikọ oro ekebemde iso, ikenịmke ke imọ idi “utọ owo oro Abasi ekemede ndima.” Nte ededi, ke ini isede Ikọ Abasi, kpa Bible, nnyịn imokụt ke Abasi ama mbon oro ẹsịnde ukeme ndinem Enye esịt.

Abasi Enen̄ede Ekere Aban̄a

Bible asian nnyịn ete ke “Jehovah emekpere mmọ eke esịt obụn̄ọde mmọ; onyụn̄ anyan̄a mmọ eke esịt ọduọde.” Abasi isịnke “edibụn̄ọ ye edinuaha esịt ke ndek,” edi ọn̄wọn̄ọ “[ndidemede] spirit mmọ eke ẹsụhọrede idem mmọ ẹnịm, nnyụn̄ ndemede esịt mmọ eke ẹtụkde idem mmọ.”—Psalm 34:18; 51:17; Isaiah 57:15.

Ini kiet, Jesus Eyen Abasi ama anam mme mbet esie ẹfiọk ke Abasi esikụt eti n̄kpọ ke idem mme asan̄autom Esie. Ke uwụtn̄kpọ, enye ama etịn̄ ke Abasi ọfiọk ini eke akadan̄abasi ọduọde ke isọn̄—kpa n̄kpọ oro ediwak owo ẹbatde nte ata ekpri n̄kpọ. Enye ama etịn̄ n̄ko ete ke Abasi ọfiọk kpukpru n̄kpọ  aban̄a owo, ye idem ibat idet oro ẹdude mmọ ke ibuot. Jesus ekeberi uwụtn̄kpọ esie ntem: “Ke ntre ẹkûfehe ndịk: Mbufo ẹmesọn̄ urua ẹkan ediwak akadan̄abasi.” (Matthew 10:29-31) * Jesus ọkọdọhọ ke mbon oro ẹdude ke mbuọtidem ẹdi n̄kpọuto ke enyịn Abasi ọkpọkọm nso ke mmọ ẹkere ẹban̄a idemmọ. Ke nditịm ntịn̄, apostle Peter afiak eti nnyịn ke “Abasi inamke asari, edi ke kpukpru idụt enye enyenyịme owo eke abakde enye onyụn̄ anamde edinen ido.”—Utom 10:34, 35.

Nyene Ekikere Oro Adade Ukem Ukem

Ikọ Abasi eteme nnyịn ete inyene ekikere oro adade ukem ukem iban̄a idem nnyịn. Apostle Paul akada odudu spirit ewet ete: “Nda mfọnido oro owo mîdotke emi ẹkenọde mi ntịn̄ nnọ kpukpru owo do ke otu mbufo nte owo okûkere aban̄a idemesie akan nte enye ekpekerede; edi yak ekere nte enyene-ibuot owo ekpekerede, nte ekemde ye udomo mbuọtidem oro Abasi ọnọde owo kiet kiet.”—Rome 12:3.

Ke akpanikọ, inaha nnyịn ikere iban̄a idem nnyịn ikan nte ikpekerede tutu anam ibat idem nnyịn ke n̄kpọ ikaha; inyụn̄ inaha ikere ke nnyịn iwọrọke n̄kpọ. Utu ke oro, akpana inyene ekikere oro adade ukem ukem iban̄a idem nnyịn, kpa ekikere oro owụtde ke imenyene mmeme ye ukeme. Eyenete an̄wan kiet eketịn̄ ntem aban̄a oro: “Ami ndịghe ata idiọkowo; nnyụn̄ mfọnke n̄kan mbon en̄wen. Mmenyene nti ye ndiọi edu, ndien ntre ke kpukpru owo ẹtie.”

Edi akpanikọ, imemke ndinyene utọ ekikere oro adade ukem ukem do. Ekeme ndiyom inen̄ede isịn ukeme man ikan ata ukwan̄ ekikere oro ikenyenede iban̄a idem nnyịn ke ediwak isua. Edi, ye un̄wam Abasi nnyịn imekeme ndikpụhọde edu ye ekikere nnyịn ke uwem. Ke nditịm ntịn̄, Ikọ Abasi esịn udọn̄ ọnọ nnyịn ete inam oro. Nnyịn ikot ite: “[Ẹsio] akani owo ẹduọk emi asan̄ade ekekem ye akani ido uwem mbufo ke eyo oko emi onyụn̄ ọdiọn̄de-diọn̄ abiara nte ekemde ye mme abian̄a abian̄a udọn̄ esie; edi man mbufo ẹkabade ẹdi obufa ke odudu oro onụkde ekikere mbufo, ẹkpenyụn̄ ẹmen obufa owo ẹsịne emi ẹkebotde nte ekemde ye uduak Abasi ke ata edinen ido ye akpanikọ.”—Ephesus 4:22-24.

Ebede ke ndisịn ukeme ndikpụhọde ‘odudu oro onụkde ekikere nnyịn,’ oro edi ofụri ekikere nnyịn, nnyịn imekeme ndikpụhọde n̄kpọn̄ edinyene ukwan̄ ekikere n̄kabade nnyene nti ekikere. Lena, oro ikasiakde ke ibuotikọ oro ekebemde iso, ama edifiọk ke ibọhọke imọ itre ndikere ke mbon efen ikemeke ndima m̀mê ndin̄wam imọ, ke n̄kpọ ndomokiet ikemeke ndikpụhọde se imọ ikerede iban̄a idem imọ. Ewe item oro ẹkụtde ke Bible akan̄wam Lena, Simone, ye mbon eken ndinam utọ ukpụhọde oro?

 Mme Edumbet Bible Oro Ẹnamde Owo Enen̄ede Okop Idatesịt

“Top mbiomo fo nọ Jehovah, ndien enye ayakama fi.” (Psalm 55:22) Akpa kan̄a, akam ekeme ndinam nnyịn inyene ata idatesịt. Simone ọdọhọ ete: “Ami mmesiyom un̄wam nto Jehovah ini ekededi oro idem ememde mi. Ke kpukpru idaha, mmesikụt odudu ye ndausụn̄ esie.” Ke ini andiwet psalm esịnde udọn̄ ọnọ nnyịn ete itop mbiomo nnyịn inọ Jehovah, enye eti nnyịn ke Jehovah ikereke iban̄a nnyịn kpọt, edi abat nnyịn n̄ko nte mbon oro ẹdotde ndibọ un̄wam ye ibetedem nto enye. Ke okoneyo usen Passover 33 E.N., mme mbet Jesus ẹma ẹfụhọ ke ini Jesus eketịn̄de ọnọ mmọ ke imọ imọn̄ inyọn̄. Jesus ama esịn udọn̄ ọnọ mmọ ete ẹbọn̄ akam ẹnọ Ete, onyụn̄ adian do ete: “Ẹben̄e ndien mbufo ẹyebọ, man ẹkpenam idatesịt mbufo ọyọhọ.”—John 16:23, 24.

“Inemesịt okpon ke ndinọnọ akan ke ndibọbọ.” (Utom 20:35) Nte Jesus ekekpepde, edinọ enọ edi akpan n̄kpọ kiet oro ekemede ndinam owo okop ata idatesịt. Edida akpanikọ Bible emi nsịn ke edinam an̄wam nnyịn ise iban̄a udọn̄ mbon en̄wen utu ke ndiwụk ekikere ke mme mmeme nnyịn. Nnyịn ke idem nnyịn imesikop inemesịt ke ini in̄wamde mbon en̄wen inyụn̄ ikụtde nte mmọ ẹwụtde esịtekọm. Lena enen̄ede enịm ke ndibuana eti mbụk oro odude ke Bible ye mbon en̄wen kpukpru ini an̄wam imọ ke usụn̄ iba. Enye ọdọhọ ete: “Akpa, emi ọnọ mi orụk inemesịt ye uyụhọ oro Jesus eketịn̄de aban̄a. Udiana, mbon en̄wen ẹsikpan̄ utọn̄ ẹnọ mi, emi an̄wam mi ndinyene idatesịt.” Edieke nnyịn inọde idem nnyịn unyịme unyịme, ikọ Mme N̄ke 11:25 emi oyosu nnyịn ke idem: “Andinọ mmọn̄ edikụt mmọn̄.”

“Kpukpru usen owo ukụt ẹdọdiọk: edi inemesịt edi usọrọ kpukpru ini.” (Mme N̄ke 15:15) Kpukpru nnyịn imenyene ifụre ndimek nte nnyịn isede idem ye mme idaha nnyịn. Nnyịn imekeme ndibiet owo oro esisede kpukpru n̄kpọ ke ukwan̄ usụn̄ onyụn̄ okopde mfịghe, mîdịghe nnyịn imekeme ndimek ndikere n̄kpọ ke eti usụn̄, nnyụn̄ n̄kop “inemesịt” nte n̄kpọ eke idiade usọrọ. Simone ọdọhọ ete: “Mmesidomo ukeme ndikere n̄kpọ ke eti usụn̄ nte n̄kekeme. Mmesisịn idem ke ọkpọkpọ ukpepn̄kpọ ye ke utom an̄wautom, nnyụn̄ n̄kọbọ ke edibọn̄ akam. Mmesinyụn̄ ndomo ukeme ndidu ye mbon oro ẹkopde inemesịt, nnyụn̄ ndomo ndin̄wam mbon efen.” Utọ ekikere oro esinam owo enyene ata idatesịt, kpa nte Bible esịnde udọn̄ ọnọ nnyịn ete: “Mbufo nti owo, ẹdara Jehovah, ẹnyụn̄ ẹbre: yak kpukpru mbon esịt kiet ẹnyụn̄ ẹsio n̄kpo idara.”—Psalm 32:11.

“Ufan amama ufan kpukpru ini, edi eyen-eka [eke amanade] ọnọ ini nnan-enyịn.” (Mme N̄ke 17:17) Ediyarade mfịna nnyịn nnọ owo oro imade m̀mê ọnọitem oro ibuọtde  idem ekeme ndin̄wam nnyịn in̄wana ikan ukwan̄ ekikere mbemiso mmọ ẹkande nnyịn ubọk. Ndineme mfịna nnyịn nnọ mbon en̄wen ekeme ndin̄wam nnyịn inyene ekikere oro adade ukem ukem. Simone ọdọhọ ete: “Nditịn̄ nnọ mbon en̄wen nte etiede mi ke idem esin̄wam etieti. Tịn̄ nọ owo nte etiede fi ke idem. Ediwak ini ndikam ntetịn̄ nte etiede fi ke idem nnọ mbon en̄wen ekem.” Ndinam emi ayan̄wam fi okụt nte n̄ke emi edide akpanikọ: “Mfụhọ ke esịt owo oyonụk enye ọduọ: edi eti ikọ ayadat enye.”—Mme N̄ke 12:25.

Se Afo Ekemede Ndinam

Nnyịn ineme ibat ibat ke otu ediwak utịbe utịbe edumbet Bible oro ẹkemede ndin̄wam nnyịn ikan ukwan̄ ekikere inyụn̄ ikop ata idatesịt. Edieke afo edide kiet ke otu mbon oro ẹsikerede ke mmimọ iwọrọke n̄kpọ, nnyịn imesịn udọn̄ inọ fi ite enen̄ede odụn̄ọde Ikọ Abasi, kpa Bible. Kpep ndinyene ekikere oro adade ukem ukem mban̄a idemfo ye itie ebuana fo ye Abasi. Nnyịn imenen̄ede idori enyịn ite ke ebede ke ndausụn̄ Ikọ Abasi, ke afo eyekeme ndikop ata idatesịt ke kpukpru se afo anamde.

[Ikọ idakisọn̄]

[Ndise ke page 7]

Ndida mme edumbet Bible nsịn ke edinam anam owo enen̄ede enyene idatesịt