Ẹma ke Ntak Emi Ẹnyenede Udọn̄ ke Bible

MARIANNA emi edide kiet ke otu Mme Ntiense Jehovah ke edem usụk Italy, edi isua 18 onyụn̄ odu ke akpatre isua ke ufọkn̄wed sekọndri. Ndusụk n̄kpri Ntiense efen ẹtiene ẹka ufọkn̄wed emi enye akade.

Marianna ewet ete: “Ke ediwak isua idahaemi, ndusụk nnyịn imesikot itien̄wed Bible eke usen ke Ẹdụn̄ọde N̄wed Abasi ke Usen ke Usen ke ini mbre udia. N̄kukụre ebiet oro nnyịn ikesikemede ndinam oro ekedi ke usụn̄otop emi ekperede ọfis mme andikpep. Uyom ama esikpon do. Ata ediwak mme andikpep ẹma ẹsikụt nnyịn ke ini mmọ ẹsan̄ade ẹbe, ndien ndusụk ẹma ẹsituak ẹda ẹse se nnyịn inamde. Emi ama esinọ nnyịn ifet ndibọrọ mme mbụme mmọ. Idụhe usen emi andikpep kiet ke nsụhọde n̄kaha mîkatuakke ida inyene nneme ye nnyịn. Ediwak ẹma ẹtuak ẹda ẹkop nte nnyịn inemede itien̄wed Bible eke usen, ẹnyụn̄ ẹnen̄ede ẹma nte nnyịn Mme Ntiense inyenede udọn̄ ke mme n̄kpọ eke spirit. Isan̄ kiet, udiana akamba etubom ama ọdọhọ nnyịn idineme itien̄wed nnyịn ke ọfis mme andikpep.

“Sia okokụtde orụk ebiet oro nnyịn ikesinemede itien̄wed eke usen, andikpep mi ama eben̄e akamba etubom ete ayak nnyịn isineme ke ubet ukpepn̄kpọ kiet, sia uyom mîdidụhe do. Akamba etubom ama enyịme, ndien andikpep mi ama otoro nnyịn ke iso ofụri nditọ ubet ukpepn̄kpọ nnyịn ke ntak eti uwụtn̄kpọ oro nnyịn inịmde. Kpukpru nnyịn imenen̄ede inemesịt iban̄a ifet oro Jehovah ọnọde nnyịn.”