“Ekeme Ndidi Ẹkpekesana Mmọ Ẹyak Iwiwa”

GENEVIÈVE DE GAULLE, eyen eyeneka Charles de Gaulle, akani adaibuot ukara France, okosobo ye Mme Ntiense Jehovah iso ye iso ke itienna ekikere Nazi ke Ravensbrück ke edere edere Germany. Enye ekewet ikọ eke enyọn̄ emi ke leta esie ke August 1945.

Ẹkesana mbon oro ẹkedude ke itienna ekikere Auschwitz ke Poland ẹyak ke January 27, 1945. Toto ke 1996, January 27 edi usen emi ẹsitide mbon oro ẹkebọde ufen ke ini Ukara Hitler.

Ke utịn̄ikọ editi kiet ke January 27, 2003, Peter Straub, adaibuot Ufọkmbet Stet Baden-Württemberg, ọkọdọhọ ete: “Odot nnyịn inen̄ede ikpono kpukpru mbon oro ẹkekọbọde ke ntak ukpepn̄kpọ ido ukpono m̀mê eke ukaraidem, oro ẹkenyụn̄ ẹmekde ndikpa utu ke ndida nnọ ukara Hitler, ndien inua ikemeke nditịn̄ orụk ukpono oro. Mme Ntiense Jehovah kpọt ẹkedi n̄kukụre ido ukpono oro ẹkesịnde ofụri ofụri ndidi ubak ukara Hitler: Mmọ ikemenekede ubọk inọ Hitler. Mmọ ẹma ẹsịn nditan̄a en̄wọn̄ọ nsụkibuot nnọ ‘Andikara ye Idụt,’ kpa nte mmọ ẹkesịnde ndinam utom ekọn̄ ye utom ufịk. Nditọ mmọ ikonyụn̄ ibuanake ke N̄ka N̄kparawa Hitler.”

Jesus Christ eketịn̄ aban̄a mme anditiene enye ete: “Mmọ idịghe ubak ererimbot, kpa nte ami mmendịghe ubak ererimbot.” (John 17:16) Do, ofụri edinam Mme Ntiense Jehovah ọkọkọn̄ọ ke Ikọ Abasi. Straub ama aka iso ete: “Mme Ntiense Jehovah oro ẹkediande ekpri ọsọbọ-ita ọfọn̄—emi enyenede uduot mmọn̄ibọn̄—ke ọfọn̄ n̄kpọkọbi mmọ ke itienna ekikere, ẹkedi n̄kukụre mbon oro ẹkpeketrede n̄kpọkọbi ye n̄kpan̄a mmọ. Mmọ ndikakam nsịn ubọk ke n̄wed n̄kan̄ mbuọtidem ekedi n̄kukụre se ẹkeyomde.”

Ata ediwak Mme Ntiense ikekereke-kere iban̄a edikan̄ mbuọtidem mmọ. Mmọdo, n̄kpọ nte owo 1,200 ke otu mmọ ẹma ẹkpan̄a ke ini ukara Nazi. Ẹma ẹwot Mme Ntiense 270 oro ẹkesịnde ndidụk ekọn̄ ke ntak mbuọtidem mmọ. Mmọ ẹma ẹnam ikọ emi: “Nnyịn inyene ndikop uyo Abasi nte andikara utu ke uyo owo.”—Utom 5:29.

Mme Ntiense Jehovah ikedịghe mme utịbe utịbe owo, kpa nte Ulrich Schmidt, adaibuot Ufọkmbet Stet North Rhine-Westphalia, ọkọdọhọde. Ke etịn̄de aban̄a ikọ esie, ediye uduot ekpri n̄wed oro Landtag Intern ọkọdọhọ ke mmọ ẹkedi mme owo nte nnyịn, oro ẹketienede ubieresịt mmọ, ẹkenyụn̄ ẹsọn̄ọde ẹda ke edinịm ke akpanikọ ido ukpono mmọ, ẹnyụn̄ ẹsịnde ekikere Nazi ke ntak edinịm ke akpanikọ Christian mmọ.” Nnyịn imekeme ndisọn̄ọ nnịm ke Jehovah Abasi adat esịt aban̄a kpukpru mbon oro ẹnamde akpanikọ ẹnọ enye ke ini ẹdude ke n̄kpọsọn̄ idaha. Nnyịn ikot ke Mme N̄ke 27:11 ite: “Eyen mi, nyene ibuot, nyụn̄ dat mi esịt, man n̄kụt se ndibọrọde owo eke osụn̄ide mi.”

[Ebiet Ẹdade Ndise Ẹto ke page 30]

Ẹbọ ẹto United States Holocaust Memorial Museum