Mme Mbụme Ẹtode Mme Andikot

Ke Israel eset, nso ke utịbe utịbe un̄wana oro ẹsikotde ndusụk ini Shechinah, oro ekesiyamade ke Ata Edisana ke ataya ye ke temple akada aban̄a?

Jehovah, kpa edima Ete ye Andikpeme ikọt esie, ama enen̄ede anam Israel okụt ke imọ imodu ye mmọ. Usụn̄ kiet oro enye akanamde emi ekedi ndinam obubịt enyọn̄ oro ekenyenede ebuana ye itie utuakibuot esie ayama.

Nyayama un̄wana oro okowụt ke Jehovah odu do ke spirit. Un̄wana oro ama esiyama ke Ata Edisana ke ataya ye ke temple oro Solomon ọkọbọpde. Utịbe utịbe un̄wana oro ikowụtke ke Jehovah okodụn̄ do. Abasi ikemeke ndidụn̄ ke ufọk oro ubọk owo ọbọpde. (2 Chronicles 6:18; Utom 17:24) Utịbe utịbe un̄wana emi akayamade ke edisana ebiet Abasi ama ekeme ndinọ akwa oku ye ofụri nditọ Israel nsọn̄ọ ke Jehovah odu ye mmọ onyụn̄ ese aban̄a mmọ.

Ke Aramaic oro ẹkesemde ke ẹma ẹkewet Bible ẹkụre, ẹkekot un̄wana emi Shechinah (shekhi·nahʹ), kpa ikọ oro ọwọrọde “enye oro odụn̄de” m̀mê “ufọkidụn̄.” Ikọ emi idụhe ke Bible edi ẹkụt enye ke edikabade N̄wed Abasi Usem Hebrew ke usem Aramaic, kpa edikabade emi ẹkotde n̄ko Targum.

Ke ini ọkọnọde item aban̄a edibọp ataya, Jehovah ọkọdọhọ Moses ete: “Ndien afo nyụn̄ da itie usio-isop dori ke enyọn̄ ekebe; nyụn̄ men n̄kpọ-ntiense emi ndinọde fi, sịn ke ekebe. Ndien nyosobo ye afo do, nnyụn̄ ntie ke enyọn̄ itie usio-isop, ke ufọt mme cherubim iba emi (ẹdorode) ke enyọn̄ ekebe n̄kpọ-ntiense, nneme ye afo mban̄a kpukpru se nditemede fi nnọ nditọ Israel.” (Exodus 25:21, 22) Ekebe oro ẹsiakde mi ekedi ekebe oro ẹfụkde gold ke Ata Edisana. Cherub o-gold iba ẹma ẹdu ke okukịp Ekebe oro.

Jehovah eketie ke m̀mọ̀n̄ etịn̄ ikọ? Enye ama ọbọrọ mbụme oro ke ini ọkọdọhọde Moses ete: “Nyowụt idem mi ke [obubịt] enyọn̄ itie-usio-isop.” (Leviticus 16:2) Obubịt enyọn̄ emi okodu ke enyọn̄ edisana Ekebe oro ke ufọt cherub o-gold iba oro. Bible itịn̄ke adan̄a nte obubịt enyọn̄ oro akadahade ọkpọn̄ cherub iba oro.

Nyayama obubịt enyọn̄ emi ọkọnọ un̄wana ke Ata Edisana. Ke nditịm ntịn̄, enye ekedi n̄kukụre se ikọnọde un̄wana ke ubet oro. Un̄wana emi ama anam akwa oku ekeme ndikụt usụn̄ ke ini enye okodụkde ata esịt ubet ke Usen Usio-Isop. Enye akada ke iso Jehovah.

Ndi utịbe utịbe un̄wana emi enyene se ọwọrọde ọnọ mme Christian? Apostle John ama okụt n̄kukụt obio oro ‘okoneyo mîdụhe.’ Obio oro edi Obufa Jerusalem, emi mme Christian oro ẹyetde aran oro ẹnamde ẹset, emi ẹdikarade ye Jesus, ẹnamde. Un̄wana ndamban̄a obio emi itoho utịn m̀mê ọfiọn̄. Ubọn̄ Jehovah Abasi ọnọ un̄wana ke esop emi, ukem nte obubịt enyọn̄ Shechinah ọkọnọde un̄wana ke Ata Edisana. N̄ko-n̄ko, Eyenerọn̄ oro, Jesus Christ, edi “utuenikan̄” obio oro. Ndien “obio” emi ọnọ mbon oro ẹfakde ẹsio ke kpukpru idụt un̄wana eke spirit man ọnọ mmọ ndausụn̄.—Ediyarade 21:22-25.

Mme andituak ibuot nnọ Jehovah ẹkeme ndinyene mbuọtidem ke Jehovah edi Andikpeme mmimọ ye edima Ete mmimọ, sia mmọ ẹbọde utọ edidiọn̄ oro ẹto enye.