Nte Afo Oyowụt Ubọn̄ Abasi?
Nte Afo Oyowụt Ubọn̄ Abasi?
‘Nnyịn iwụt ubọn̄ Jehovah nte ukụtiso.’—2 CORINTH 3:18.
1. Nso ke Moses okokụt, ndien nso iketịbe ke oro ebede?
N̄KUKỤT emi ekedi kiet ke otu n̄kukụt oro ekenen̄erede enyene uten̄e akan. Ẹma ẹnam esen esen eben̄e Moses ke ini enye okodude ikpọn̄ ke etịn̄e Obot Sinai. Ẹma ẹyak enye okụt se akanam owo mîkwe—ubọn̄ Jehovah. Nte ededi, Moses ikekwe Jehovah. Iso Abasi enen̄ede esem tutu owo ndomokiet ikemeke ndikụt nnyụn̄ ndu uwem. Utu ke ndiyak Moses okụt imọ, Jehovah ama ada “ubọk” okụbi Moses iso tutu enye Abasi asan̄a ebe; ndien etie nte Abasi akada angel esie anam emi. Ekem, Jehovah ama ayak Moses okụt mbukpọn̄ ubọn̄ imọ. Jehovah ama onyụn̄ ada angel esie etịn̄ ikọ ye Moses. Bible etịn̄ se iketịbede ke oro ebede ete: ‘Edikem, ke adan̄aemi Moses otode ke Obot Sinai osụhọde, enye ifiọkke ite ke ikpa iso imọ esem, ke ntak emi enye ekenemede nneme ye Jehovah.’—Exodus 33:18–34:7, 29.
2. Nso ke apostle Paul ekewet aban̄a ubọn̄ oro mme Christian ẹwụtde?
2 Kere nte okpokodude ye Moses ke Obot Sinai. Nso n̄kpọ nduaidem ke ekpekedi ntem ndikụt ubọn̄ Ata Ọkpọsọn̄ nnyụn̄ n̄kop uyo esie! Nso akwa ifet ke ekpekedi ntem ndisan̄a ye Moses emi ekedide esịne-ufọt Ibet ediomi, nto ke Obot Sinai nsụhọde! Ndi afo ama ọfiọk ke enyene usụn̄ oro ata mme Christian ẹkam ẹwụtde ubọn̄ Abasi ẹkan nte Moses okowụtde? Ẹkụt ikọ oro anamde owo ekere n̄kpọ do ke leta oro apostle Paul ekewetde. Enye ọkọdọhọ ke mme Christian oro ẹyetde aran ‘ẹwụt ubọn̄ Jehovah nte ukụtiso.’ (2 Corinth 3:7, 8, 18) Enyene usụn̄ emi mme Christian oro ẹdoride enyịn ndidụn̄ ke isọn̄ ẹtienede ẹwụt ubọn̄ Abasi n̄ko.
Nte Mme Christian Ẹwụtde Ubọn̄ Abasi
3. Didie ke nnyịn ifiọk Jehovah ikan nte Moses ọkọfiọkde?
3 Didie ke nnyịn ikeme ndiwụt ubọn̄ Abasi? Akanam nnyịn ikwe Jehovah inyụn̄ ikopke uyo esie nte Moses okokopde. Nte ededi, nnyịn imọfiọk Jehovah ikan nte Moses ọkọfiọkde. Jesus ekedi isọn̄ nte Messiah ke n̄kpọ nte isua 1,500 ẹma ẹkebe tọn̄ọ Moses akakpa. Ntre, Moses ikọfiọkke nte Ibet edisude ke idem Jesus, emi akakpade man afak mme owo osio ke enyene-ndịk ufụn idiọkn̄kpọ ye n̄kpa. (Rome 5:20, 21; Galatia 3:19) Ke adianade do, Moses ekenyene esisịt ifiọk aban̄a nyayama uduak Jehovah oro enyenede ebuana ye Obio Ubọn̄ Messiah, ọkọrọ ye Paradise oro enye edidade edi ke isọn̄. Ke ntem, nnyịn idaha ata enyịn ikụt ubọn̄ Jehovah, edi ida enyịn mbuọtidem oro ọkọn̄ọde ke mme ukpepn̄kpọ Bible, ikụt. N̄ko-n̄ko, Jehovah idaha angel itịn̄ ikọ inọ nnyịn, edi ada Bible, akpan akpan mme Gospel emi ẹnamde nnyịn ifiọk ukpepn̄kpọ ye utom Jesus ke ata inem inem usụn̄.
4. (a) Didie ke mme Christian oro ẹyetde aran ẹwụt ubọn̄ Abasi? (b) Didie ke mbon oro ẹnyenede idotenyịn ndidu ke isọn̄ ẹwụt ubọn̄ Abasi?
4 Okposụkedi ubọn̄ Abasi mîsemke mme Christian ke iso ke ata ata usụn̄, iso mmọ esiyama nte mmọ ẹnamde mme owo ẹfiọk ubọn̄ ubọn̄ edu ye uduak Jehovah. Prọfet Isaiah ama ebem iso etịn̄ aban̄a eyo nnyịn ete ke ikọt Abasi “ẹyetan̄a ubọn̄ [Jehovah] ke otu mme idụt.” (Isaiah 66:19) Ke adianade do, nnyịn ikot ke 2 Corinth 4:1, 2 ite: “Sia nnyịn inyenede utom emi . . . , nnyịn imọkpọn̄ mme ndedịbe n̄kpọ oro ẹnamde owo okop bụt, isan̄ake ke n̄kari, inyụn̄ ibuakke n̄kpọ ke ikọ Abasi, edi ebede ke ndiyarade akpanikọ ke inam kpukpru owo ẹda ubieresịt mmọ ẹfiọk nnyịn ke iso Abasi.” Paul eketịn̄ akpan akpan aban̄a mme Christian oro ẹyetde aran, emi ẹdide “mme asan̄autom obufa ediomi.” (2 Corinth 3:6) Edi utom oro mmọ ẹnamde otụk ata ediwak mbon oro ẹdoride enyịn ndidu uwem nsinsi ke isọn̄. Utom otu mbiba emi abuana ediwụt ubọn̄ Jehovah ke se mmọ ẹkpepde ye ke nte mmọ ẹdude uwem. Edi akwa ifet oro asan̄ade ye mbiomo ndiwụt ubọn̄ Ata Edikon̄ Abasi nte ukụtiso!
5. Uforo eke spirit nnyịn edi uyarade nso?
5 Mfịn, ẹkwọrọ ubọn̄ ubọn̄ eti mbụk Obio Ubọn̄ Abasi ke ofụri isọn̄ nte Jesus ekebemde iso etịn̄. (Matthew 24:14) Mme owo ẹtode kpukpru idụt, esien, obio, ye usem ẹnyịme eti mbụk ye idatesịt, ẹnyụn̄ ẹkpụhọde uwem mmọ man ẹnam uduak Abasi. (Rome 12:2; Ediyarade 7:9) Mmọ ikemeke nditre nditịn̄ mban̄a se mmọ ẹkụtde ẹnyụn̄ ẹkopde kpa nte akpa mme Christian mîketreke. (Utom 4:20) Se iwakde ibe miliọn owo itiokiet ke ẹwụt ubọn̄ Abasi mfịn, ndien idụhe emana oro mbon oro ẹwụtde ubọn̄ Abasi ẹwakde ntem. Ndi afo edi kiet ke otu mmọ? Uforo eke spirit oro ikọt Abasi ẹnyenede enen̄ede owụt ke Jehovah ọdiọn̄ onyụn̄ ekpeme mmọ. N̄kpọsọn̄ odudu oro ẹn̄wanade ye nnyịn ẹnen̄ede ẹwụt ke nnyịn imenyene spirit Jehovah. Ẹyak ise ntak idọhọde ntre.
Owo Idikemeke Nditre Utom Ikọt Abasi
6. Ntak emi oyomde mbuọtidem ye uko man ikeme ndisọn̄ọ nda ye Jehovah?
6 Yak idọhọ ke ẹkot fi editie ntiense ke esop man owụt ke owo edi ata idiọk abiatibet. Afo ọmọfiọk ke abiatibet oro enyene esop oro okopde odudu, ye nte ke enye ayanam se ekekeme ndibiọn̄ọ fi mbak uduyarade imọ. Oyoyom enyene uko onyụn̄ enyene mbuọtidem ke ukara eyekpeme fi mbak enye edinam fi ibak, mbemiso ekemede nditịn̄ ke owo oro enen̄ede edi abiatibet. Nnyịn idu ke ukem idaha oro. Nte itiede ntiense iban̄a Jehovah ye mme uduak esie, nnyịn iwụt owo emi Satan kpa Devil edide, iyararede ke enye edi owotowo ye osu nsu oro adade ofụri isọn̄ otụn usụn̄. (John 8:44; Ediyarade 12:9) Oyom mbuọtidem ye uko man ikeme ndisọn̄ọ nda ye Jehovah nnyụn̄ mbiọn̄ọ Devil.
7. Odudu Satan okpon adan̄a didie, ndien nso ke enye odomo ndinam?
7 Ke akpanikọ, Jehovah edi Ata Edikon̄. Enye enen̄ede enyene odudu akan Satan. Nnyịn imenyene mbuọtidem ke Jehovah ekeme onyụn̄ enen̄ede enyene udọn̄ ndikpeme nnyịn adan̄a nte nnyịn isọn̄ọde ida inam n̄kpọ esie. (2 Chronicles 16:9) Edi, Satan akara mme demon ye ererimbot oro adianarede ọkpọn̄ Abasi. (Matthew 12:24, 26; John 14:30) Sia ẹma ẹkesio Satan ẹduọk ke isọn̄, enye ada “akwa iyatesịt” enen̄ede ọbiọn̄ọ mme asan̄autom Jehovah, onyụn̄ ada ererimbot oro enye akarade odomo ndikpan kpukpru mbon oro ẹkwọrọde eti mbụk. (Ediyarade 12:7-9, 12, 17) Didie ke enye anam emi? Enye ada n̄kpọ ita, ke nsụhọde n̄kaha, anam emi.
8, 9. Didie ke Satan ada idiọk ima anam n̄kpọ, ndien ntak emi ikpetịn̄de enyịn imek mme nsan̄a nnyịn?
8 Ekikere uwem emi edi n̄kpọ kiet oro Satan adade odomo ndiwọn̄ọde ntịn̄enyịn nnyịn. Mme owo ke mme akpatre usen emi ẹdi mme ama okụk, mme ama idem, ye mme ama inemesịt. Mmọ imaha Abasi. (2 Timothy 3:1-4) Sia ekikere uwem adiade ata ediwak owo idem, mmọ “ifiọkke” eti mbụk oro idade isọk mmọ. Mmọ ikam inyeneke-nyene udọn̄ ndikpep akpanikọ Bible. (Matthew 24:37-39) Utọ edu oro ekeme ndibe nnyịn, anamde nnyịn ikabade ifu ke n̄kan̄ eke spirit. Edieke nnyịn imade mme n̄kpọ obụkidem ye inem uwem, ima oro imade Abasi eyebịt.—Matthew 24:12.
9 Ke ntak emi, mme Christian ẹkpenyene nditetịn̄ enyịn mmek mbon oro mmọ ẹdade ẹdụk nsan̄a. Edidem Solomon ekewet ete: “Owo eke asan̄ade ye mme enyene-ibuot eyenyene ibuot: edi nsan̄a mbon ndisịme ọyọdiọn̄ ọdiọk.” (Mme N̄ke 13:20) Nnyịn ikpakam ‘isan̄a’ ye mbon oro ẹwụtde ubọn̄ Abasi. Enen̄ede edi inem inem n̄kpọ ndinam emi! Nte nnyịn isopde idem ye nditọete nnyịn eke spirit ke mme mbono esop ye ke mme ini en̄wen; ima, mbuọtidem, idatesịt, ye ọniọn̄ mmọ, ẹsisịn udọn̄ ẹnọ nnyịn. Utọ eti nsan̄a oro ọsọn̄ọ ubiere nnyịn ndika iso nnam utom Abasi.
10. Mme usụn̄ ewe ke Satan ada nsahi ọbiọn̄ọ mbon oro ẹwụtde ubọn̄ Abasi?
10 Nsahi edi ọyọhọ n̄kpọ iba oro Satan adade odomo nditre kpukpru Christian ndiwụt ubọn̄ Abasi. Idem ikpakpaha nnyịn iban̄a emi. Ke ini Jesus Christ okodude ke isọn̄ ọkwọrọ ikọ, mme owo ẹma ẹsak enye nsahi, ẹmịnede, ẹmiom, ẹnyụn̄ ẹfiari enye etap. (Mark 5:40; Luke 16:14; 18:32) Ẹma ẹsak akpa mme Christian nsahi n̄ko. (Utom 2:13; 17:32) Ẹsisuene mme asan̄autom Jehovah eke eyomfịn kpasụk ntre. Apostle Peter ọdọhọ ke ẹyekam ẹkot mmọ mme prọfet nsu. Peter ama ebem iso etịn̄ ete: “Ke mme ukperedem usen mbon nsahi ẹyeda nsahi mmọ ẹdi, ẹsan̄ade nte ekemde ye idiọk udọn̄ mmọ ẹnyụn̄ ẹdọhọ ẹte: ‘Edidu esie emi ẹken̄wọn̄ọde, enye? Kamse, . . . kpukpru n̄kpọ ẹka iso ukem nte ẹketiede toto ke ntọn̄ọ edibot n̄kpọ.’” (2 Peter 3:3, 4) Ẹsisak ikọt Abasi ke mmọ ifiọkke se ikade iso ke ererimbot. Mme owo ẹda mme idaha ido uwem oro Bible ekpepde nte ido eset. Ediwak owo ẹda etop oro ikwọrọde nte ndisịme. (1 Corinth 1:18, 19) Sia idide mme Christian, ẹkeme ndisak nnyịn nsahi ke ufọkn̄wed, ke itieutom, ye idem ke ubon ndusụk ini. Sia emi mînamke idem emem nnyịn, nnyịn ika iso ida utom ukwọrọikọ nnyịn iwụt ubọn̄ Abasi, ifiọkde kpa nte Jesus ọkọfiọkde ke Ikọ Abasi edi akpanikọ.—John 17:17.
11. Didie ke Satan ada ukọbọ odomo ndinam mme Christian ẹtre utom mmọ?
11 Ubiọn̄ọ m̀mê ukọbọ edi ọyọhọ n̄kpọ ita oro Devil adade odomo nditre utom nnyịn. Jesus ọkọdọhọ mme anditiene enye ete: “Mme owo ẹyeda mbufo ẹyak ẹnọ ukụt ẹnyụn̄ ẹwot mbufo, ndien mbufo ẹyedi mbon emi kpukpru mme idụt ẹsuade ke ntak enyịn̄ mi.” (Matthew 24:9) Ke akpanikọ, sia idide Mme Ntiense Jehovah, ẹkọbọ nnyịn idiọk idiọk ke ediwak ikpehe ererimbot. Nnyịn imọfiọk ke Jehovah ama etetịn̄ anyan ini ko ke usua oyodu ke ufọt mbon oro ẹnamde n̄kpọ imọ ye mbon oro ẹnamde n̄kpọ Satan kpa Devil. (Genesis 3:15) Nnyịn imọfiọk n̄ko ke ini isọn̄ọde ida ke idomo, nnyịn iwụt ke Jehovah enyene unen ndikara ekondo. Ndifiọk emi ekeme ndinam nnyịn isọn̄ idem ke ini isobode ata ndiọi idaha. Idụhe ukọbọ oro ekemede nditre utom nnyịn ke nsinsi nsinsi edieke nnyịn ibierede ndiwụt ubọn̄ Abasi.
12. Ntak emi ikpadatde esịt ke ini isọn̄ọde ida iyọ ubiọn̄ọ Satan?
12 Ndi afo ke an̄wana ọbiọn̄ọ mme etabi ererimbot onyụn̄ anam akpanikọ kpa ye nsahi ye ubiọn̄ọ? Do, afo ekpenyene ndidat esịt. Jesus ama ọnọ mme anditiene enye nsọn̄ọ emi ete: “Inemesịt edi eke mbufo ke ini mme owo ẹsụn̄ide mbufo ẹnyụn̄ ẹkọbọde mbufo ẹnyụn̄ ẹtịn̄de kpukpru orụk idiọkn̄kpọ ke nsu ẹdian mbufo ke ntak enyịn̄ mi. Ẹdara ẹnyụn̄ ẹfrọ ke idatesịt, koro utịp mbufo ke heaven omokpon; koro kpa ntem ke mmọ ẹkekọbọ mme prọfet emi ẹkebemde mbufo iso ẹdu.” (Matthew 5:11, 12) Ime fo owụt ke okopodudu edisana spirit Jehovah odu ye afo, ọnọde fi odudu ndiwụt ubọn̄ Abasi.—2 Corinth 12:9.
Jehovah Ọnọ Nnyịn Ukeme Ndiyọ
13. Nso idi akpan ntak emi nnyịn ikade iso inam utom ukwọrọikọ nnyịn?
13 Ima oro imade Jehovah ye idatesịt oro inyenede ke ndiwụt ubọn̄ esie edi akpan ntak emi nnyịn ikade iso ke utom ukwọrọikọ. Mme owo ẹsima ndikpebe mbon oro mmọ ẹmade ẹnyụn̄ ẹkponode, ndien idụhe owo oro odotde ẹkpebe nte Jehovah Abasi. Akwa ima esie akanam enye ọnọ Eyen esie edi isọn̄ man editie ntiense ọnọ akpanikọ onyụn̄ afak okopitem ubonowo. (John 3:16; 18:37) Kpa nte ọdọn̄de Abasi, ọdọn̄ nnyịn n̄ko ndikụt ke kpukpru orụk owo ẹkabarede esịt ẹnyene edinyan̄a; ntak edi oro isikwọrọde ikọ inọ mmọ. (2 Peter 3:9) Udọn̄ emi ye ubiere nnyịn ndikpebe Abasi ẹnam ika iso ida utom Christian nnyịn iwụt ubọn̄ Abasi.
14. Didie ke Jehovah ọsọn̄ọ nnyịn idem ndika iso nnam utom ukwọrọikọ nnyịn?
14 Nte ededi, ke ofụri ofụri, Jehovah ọnọ nnyịn ukeme ndika iso ke utom ukwọrọikọ nnyịn. Enye ada spirit esie, esop esie, ye Ikọ esie, kpa Bible, ọsọn̄ọ nnyịn idem. Jehovah ọnọ mbon oro ẹmade ndiwụt ubọn̄ esie ukeme ndime ime. Enye esibọrọ akam nnyịn onyụn̄ ọnọ nnyịn ọniọn̄ ndida nyọ idomo. (Rome 15:5; James 1:5) Akan oro, Jehovah iyakke ẹdomo nnyịn ẹbe se nnyịn ikemede ndiyọ. Edieke nnyịn iberide edem ke Jehovah, enye oyosio usụn̄ ubọhọ ọnọ nnyịn man ikeme ndika iso n̄wụt ubọn̄ esie.—1 Corinth 10:13.
15. Nso in̄wam nnyịn iyọ?
15 Nnyịn ndika iso nnam utom ukwọrọikọ nnyịn owụt ke spirit Abasi odu ye nnyịn. Ke uwụtn̄kpọ: Yak idọhọ ke owo ọnọ fi bred ete asan̄a ke enyịnusụn̄ ke enyịnusụn̄ edeme ọnọ mme owo ke mfọn. Ẹdọhọ ada okụk ye ini fo anam oro. Ke adianade do, afo emedifiọk ke ediwak owo imaha bred fo; ndusụk owo ikam iyakke fi edeme bred oro. Ndi afo akpanam utom oro ke ediwak ọfiọn̄ m̀mê ke ediwak isua? Etie nte ukpanamke. Edi, ekeme ndidi afo amada ini ye okụk fo atan̄a eti mbụk ke ediwak isua idahaemi. Ntak-a? Ndi idịghe koro amade Jehovah, enye onyụn̄ adade spirit esie ọdiọn̄ ukeme fo ke ndin̄wam fi aka iso ọyọ? Ke akpanikọ, edi ntre!
Utom Oro Owo Mîdifreke
16. Nso ufọn ke ndika iso nnam utom Abasi anam ọnọ nnyịn ye mbon oro ẹkopde uyo nnyịn?
16 Utom obufa ediomi emi edi ata anana-mbiet enọ. (2 Corinth 4:7) Utom oro mme erọn̄ en̄wen ẹnamde ke ofụri ererimbot edi ata n̄kpọuto n̄ko. Nte afo akade iso anam utom ukwọrọikọ fo, afo emekeme ndinyan̄a “idemfo ye mmọ eke ẹkopde uyo fo,” kpa nte Paul akasiande Timothy. (1 Timothy 4:16) Kere se oro ọwọrọde. Eti mbụk oro afo ọkwọrọde ọnọ mme owo ifet ndinyene nsinsi uwem. Afo emekeme ndidi ufan oro ebietde itai ye aban̄ ye mbon oro afo an̄wamde ke n̄kan̄ eke spirit. Kere nte edinemde ndidu ke nsinsi ke Paradise ye mbon oro afo akan̄wamde ẹkpep ẹban̄a Abasi! Ke akpanikọ, tutu amama mmọ idifreke nte ekesịnde ukeme an̄wam mmimọ. Nso ntak ndikop inemesịt ke emi edi ntem!
17. Ntak emi eyo nnyịn edide n̄wọrọnda ke mbụk ubonowo?
17 Afo odu uwem ke ata n̄wọrọnda ini ke mbụk ubonowo. Tutu amama owo idifiakke ikwọrọ eti mbụk inọ ererimbot oro adianarede ọkpọn̄ Abasi mi. Noah okodu ke utọ ererimbot oro, ndien enye ama okụt nte ererimbot oro ebede efep. Enyene ndidi esịt ama enen̄ede enem enye ndikụt ke ima isọn̄ọ ida inam uduak Abasi ke ndikọn̄ ubom emi ẹkedade ẹnyan̄a enye ye ubon esie! (Mme Hebrew 11:7) Afo n̄ko emekeme ndinyene utọ inemesịt oro. Kere nte editiede fi ke idem ke obufa ererimbot ke ini etide utom oro akanamde ke mme akpatre usen emi, ọfiọkde ke ama anam se ekekemede man anam mme ufọn n̄kpọ Obio Ubọn̄ ẹkọri.
18. Nso un̄wọn̄ọ ye nsịnudọn̄ ke Jehovah ọnọ mme asan̄autom esie?
18 Mmọdo, ẹyak ika iso iwụt ubọn̄ Abasi. Tutu amama, nnyịn idifreke ke ima inam emi. Jehovah n̄ko eti utom nnyịn. Bible ọnọ nnyịn ikọ nsịnudọn̄ emi: “Abasi ikwan̄ake nte efrede utom ye ima eke mbufo ẹwụtde ẹban̄a enyịn̄ esie, ke emi mbufo ẹkesan̄ade utom ẹnọ ndisana owo ẹnyụn̄ ẹsụk ẹkade iso ẹsan̄a. Edi nnyịn iyom owo mbufo kiet kiet owụt utọ ifịk oro man ekpenyene ọyọhọ nsọn̄ọ aban̄a idotenyịn tutu esịm utịt, mbak mbufo ẹdikabade ẹfu ifu, edi ẹdi mme andikpebe mbon oro otode ke mbuọtidem ye ime mmọ ẹbọ mme un̄wọn̄ọ ẹnyene.”—Mme Hebrew 6:10-12.
Nte Afo Emekeme Ndinam An̄wan̄a?
• Didie ke mme Christian ẹwụt ubọn̄ Abasi?
• Nso idi ndusụk usụn̄ oro Satan adade odomo nditre utom ikọt Abasi?
• Nso iwụt ke spirit Abasi odu ye nnyịn?
[Mme Mbụme Ukpepn̄kpọ]
[Ndise ke page 15]
Iso Moses ama owụt ubọn̄ Abasi
[Mme ndise ke page 16, 17]
Nnyịn iwụt ubọn̄ Abasi ke utom ukwọrọikọ nnyịn