Enyịn̄ Abasi Esịne ke Akani Bible Usem German
Enyịn̄ Abasi Esịne ke Akani Bible Usem German
ỌKPỌKPỌ enyịn̄ Abasi, Jehovah, odu ediwak tọsịn itie ke New World Translation of the Holy Scriptures, emi ẹkesiode ke usem German ke 1971. * Nte ededi, emi ikedịghe akpa Bible usem German oro enyịn̄ Abasi ekesịnede. Etie nte Johann Eck, ọwọrọiso ekpep ukpepn̄kpọ ido ukpono owo Roman Catholic, okosio akpa Bible usem German oro enyịn̄ Jehovah ekesịnede ke se ikperede ndisịm isua 500 emi ẹkebede.
Johann Eck akamana ke 1486 ke usụk usụk Germany. Etisịm isua 24, enye ama akabade edi prọfesọ ukpepn̄kpọ ido ukpono ke ufọkn̄wed ntaifiọk Ingolstadt, ifetutom oro enye akakamade tutu enye akpa ke 1543. Eck ekedi ubọk n̄ka Martin Luther, mmọ mbiba ẹkenyụn̄ ẹdi ufan ke esisịt ini. Nte ededi, Luther ama akabade edi adaiso Edinam Unam Ukpụhọde, ke adan̄aemi Eck ekedide andin̄wana nnọ Ufọkabasi Catholic.
Andikara Bavaria ama ọdọhọ Eck akabade Bible esịn ke usem German, ndien ẹkesio Bible oro ke 1537. N̄wed oro Kirchliches Handlexikon ọdọhọ ke edikabade esie ama etiene akpasarade uwetn̄kpọ ketket onyụn̄ “enen̄ede odot ẹtoro ẹkan nte ẹtorode idahaemi.” Edikabade Eck okot ntem ke Exodus 6:3: “Ami ndi Ọbọn̄ oro okowụtde Abraam, Isaac, ye Jacob idem nte Ata Ọkpọsọn̄ Abasi: edi n̄kasiakke Adonai enyịn̄ mi nnọ mmọ.” Ikọ mben n̄wed oro Eck ekewetde aban̄a ufan̄ikọ oro ọdọhọ ete: “Enyịn̄ oro edi Adonai Jehoua.” Ediwak nditọ ukpepn̄kpọ Bible ẹdọhọ ke emi edi akpa ini oro ẹkewetde ọkpọkpọ enyịn̄ Abasi ke Bible usem German.
Nte ededi, ẹma ẹdiọn̄ọ ẹnyụn̄ ẹsikot ọkpọkpọ enyịn̄ Abasi ke ediwak tọsịn isua. Usem Hebrew edi mbịghi-n̄kan̄ usem oro ẹkewetde enyịn̄ oro; ndien “Jehovah” edi enyịn̄ oro ẹdade ẹdiọn̄ọ ata Abasi kierakiet. (Deuteronomy 6:4) Ke se ikperede ndisịm isua 2,000 emi ẹkebede, ẹma ẹwet ikọ oro Jesus ọkọdọhọde ke imọ ima iyararede enyịn̄ Abasi inọ mme owo, ke usem Greek. (John 17:6) Toto ke ini oro, ẹwet enyịn̄ emi ke ediwak usem, ndien ibịghike Psalm 83:18 oyosu, emi ọdọhọde ke kpukpru owo ẹyefiọk ke enye emi enyịn̄ esie ekerede Jehovah edi Ata Edikon̄ ke ofụri ererimbot.
[Ikọ idakisọn̄]
^ ikp. 2 Mme Ntiense Jehovah ẹkesio; ẹkebem iso ẹsio ke Ikọmbakara ke 1961. Idahaemi enye odu ofụri ofụri m̀mê ubak ubak ke se iwakde ibe usem 50.
[Ndise ke page 32]
Nsiondi Bible Eck eke 1558, owụtde ikọ mben n̄wed aban̄ade enyịn̄ Jehovah ke Exodus 6:3