Mme Mbụme Ẹtode Mme Andikot

Nso iwụt ke mme utọ ikọ nte enye “emi enye ikpọn̄ enyenede se mîkemeke ndikpa” ye enye “emi akanam baba owo kiet mîkwe mîdinyụn̄ ikemeke ndikụt” ẹda ẹban̄a Jesus utu ke Jehovah Abasi?

Apostle Paul ekewet ete: “Ediyarade emi n̄kukụre Andinyene Akwa Odudu emi okopde inemesịt ediwụtde ke edikem ini esie, enye emi edide Edidem mbon oro ẹkarade nte ndidem ye Ọbọn̄ mbon oro ẹkarade nte mbọn̄, emi enye ikpọn̄ enyenede se mîkemeke ndikpa, emi odụn̄de ke un̄wana eke owo mîkemeke ndisan̄a n̄kpere, emi akanam baba owo kiet mîkwe mîdinyụn̄ ikemeke ndikụt.”—1 Timothy 6:15, 16.

Mme etịn̄ n̄kpọ mban̄a Bible ẹsiwak ndikere ẹte: ‘Didie ke mme utọ ikọ nte enye “emi enye ikpọn̄ enyenede se mîkemeke ndikpa,” “n̄kukụre Andinyene Akwa Odudu,” ye enye “emi akanam baba owo kiet mîkwe mîdinyụn̄ ikemeke ndikụt” ẹkpeda ẹban̄a owo efen ke mîbọhọke Ata Ọkpọsọn̄?’ Edi akpanikọ ke ẹkeme ndida mme utọ ikọ oro ntịn̄ mban̄a Jehovah. Nte ededi, udọn̄ikọ owụt ke Paul ekenen̄ede etịn̄ aban̄a Jesus ke 1 Timothy 6:15, 16.

Ke utịt ufan̄ikọ 14, Paul etịn̄ aban̄a ‘Ọbọn̄ nnyịn Jesus Christ ndiyarade idem.’ (1 Timothy 6:14) Ntem, ke ini Paul ewetde ke 1Ti 6 ufan̄ 15 ete ke “ediyarade emi n̄kukụre Andinyene Akwa Odudu emi okopde inemesịt ediwụtde ke edikem ini esie,” enye etịn̄ aban̄a ediyarade Jesus, idịghe eke Jehovah Abasi. Anie ndien edi “n̄kukụre Andinyene Akwa Odudu”? Owụt ifiọk ndidọhọ ke Jesus edi Andinyene Akwa Odudu oro Paul etịn̄de aban̄a. Ntak-a? Udọn̄ikọ oro anam an̄wan̄a ke Paul emen Jesus odomo ye mme andikara ẹdide owo. Nte Paul ekewetde, Jesus enen̄ede edi “Edidem mbon oro ẹkarade nte ndidem ye Ọbọn̄ mbon oro ẹkarade nte mbọn̄.” * Ih, ke ẹmende mme andikara ẹdide owo ẹdomo ye Jesus, enye edi “n̄kukụre Andinyene Akwa Odudu.” Ẹnọ Jesus “ubọn̄, ye ukpono, ye itie-edidem, ẹte kpukpru mme idụt ye obio ye usem ẹnam n̄kpọ ẹnọ enye.” (Daniel 7:14) Idụhe andikara ndomokiet oro ekemede ndidọhọ ke ikọ emi ada aban̄a imọ!

Nso kaban̄a ikọ emi, enye “emi enye ikpọn̄ enyenede se mîkemeke ndikpa”? Ẹtọn̄ọ ntak ẹmen Jesus ẹdomo ye ndidem ẹdide owo. Idụhe andikara ndomokiet ke isọn̄ oro ekemede ndidọhọ ke imọ ikemeke ndikpa, edi Jesus ikemeke ndikpa aba. Paul ekewet ete: “Koro nnyịn imọfiọk ite Christ ikpaha aba, ke emi ẹma ẹkenam enye eset ke otu mme akpan̄kpa; n̄kpa ikarake enye aba.” (Rome 6:9) Ntem, Jesus edi akpa owo oro Bible ọdọhọde ke ikemeke ndikpa. Ke akpanikọ, ke ini Paul ekewetde n̄kpọ emi, Jesus ekedi n̄kukụre owo oro ẹkenọde uwem unana n̄kpa.

Ikpenyene nditi n̄ko nte ke akpakakwan̄a Paul ndikpọdọhọ ke Jehovah Abasi kpọt mîkemeke ndikpa, koro ke ini enye ekewetde mme ikọ oro Jesus n̄ko ikekemeke ndikpa. Edi Paul ama ekeme ndidọhọ ke Jesus kpọt mîkemeke ndikpa sia enye ekemende Jesus odomo ye mme andikara ke isọn̄.

Ke adianade do, enen̄ede edi akpanikọ ke Jesus ama ekeset ke n̄kpa onyụn̄ ọdọk heaven, ke ẹkeme ndidọhọ ke enye edi enye “emi akanam baba owo kiet mîkwe mîdinyụn̄ ikemeke ndikụt.” Edi akpanikọ ke mme mbet esie oro ẹyetde aran ẹyekụt Jesus ke mmọ ẹma ẹkekpan̄a ẹnyụn̄ ẹset ẹkedu uwem ke heaven nte mme edibotn̄kpọ eke spirit. (John 17:24) Edi baba owo kiet ke isọn̄ idikwe Jesus oro ẹnọde ubọn̄. Ntem, ẹkeme nditịn̄ nte enende ke toto Jesus ekeset ke n̄kpa onyụn̄ ọdọk heaven, ke “baba owo kiet” ikwe enye.

Edi akpanikọ, ekeme nditie nte ke ikọ oro ẹwetde ke 1 Timothy 6:15, 16 aban̄a Abasi, ata akpa ini oro ikotde itien̄wed emi. Edi udọn̄ikọ Paul—ọkọrọ ye mme nsọn̄ọ oro ẹkụtde ke mme itien̄wed efen—owụt ke Paul eketịn̄ aban̄a Jesus.

[Ikọ idakisọn̄]