Ndi Ọfọn Ndinam Akpanikọ?
Ndi Ọfọn Ndinam Akpanikọ?
“OKỤK oro esikpede ke insurance awak akaha”; Karl, emi edide owo insurance eketịn̄ ikọ emi. * Enye ama aka iso ete: “Edieke anamde insurance ye nnyịn, afo ayafam euro 15 (n̄kpọ nte ₦2,640), emi edide ediwak okụk, kpukpru ọfiọn̄.”
Jens ama ọbọrọ enye ete: ‘Ekeme ndidi ntre, edi mmanam insurance ye ufọkutom emi ediwak isua idahaemi. Mmọ ẹma ẹnen̄ede ẹn̄wam mi ke ini edem, ntre nyomke ndikpọn̄ mmọ.’
Karl ama ọbọrọ ete: ‘Ih, ọfọn owo anam akpanikọ. Edi edinam akpanikọ emi ke adia okụk fo!’
Karl ama enen. Ediwak ini, owo ekeme ndibiat okụk ke ntak edinam akpanikọ nnọ owo en̄wen. Ndinam akpanikọ ekeme n̄ko ndibọ owo ini ye odudu, onyụn̄ ekeme ndiyom ẹma owo ke ofụri esịt. Ndi ọfọn ẹnam akpanikọ?
Ediwak Owo Ẹma Akpanikọ edi Inamke
Ke ndụn̄ọde oro Itieutom Unam Ndụn̄ọde ke Allensbach ke Germany akanamde, owo 96 ke otu owo 100 oro ẹkedade ẹnam ndụn̄ọde ẹkedọhọ ke mme owo ẹnen̄ede ẹma akpanikọ. Ọyọhọ ndụn̄ọde iba oro itieutom emi akanamde ye n̄kparawa oro ẹdide isua 18 esịm 24 okowụt ke owo 2 ke otu owo 3 oro ẹkedade ẹnam ndụn̄ọde emi ẹda akpanikọ nte edu oro mme owo ẹnen̄erede ẹma.
Okposụkedi mme owo ẹmade akpanikọ ke kpukpru ebiet, mmọ isinamke akpanikọ. Ke uwụtn̄kpọ, ke ediwak idụt ke Europe, mme ọdọ ndọ m̀mê mbonubon isiwakke ndinam akpanikọ nnọ kiet eken. Mme ufan isiwakke ndinam akpanikọ nnọ kiet eken. N̄ko-n̄ko, akpanikọ oro ekesidiande eteutom ye nditọutom m̀mê mme anyamurua ye mbonurua ọtọkiet, idụhe aba. Ntak-a?
Ndusụk ini, uwem oro etiede itọk itọk isiyakke owo enyene ini m̀mê ukeme ndise mban̄a itie ebuana oro enen̄erede oyom edinam akpanikọ. Ndusụk ini, mbon oro mme owo ẹkebian̄ade isimaha ndinam akpanikọ aba nnọ owo ekededi. Mbon en̄wen isimaha ndinyene itie ebuana ye owo mbịghi mbak ẹdiyak idem ẹnọ owo.
Se ededi oro edide ntak, mme owo ẹsiwak ndidọhọ ke akpanikọ ọfọn, edi inamke. Ntre, mme mbụme ẹdemerede ẹdi: Ndi ọfọn ndinam akpanikọ? Ke edide ntre, anie ke nnyịn ikpanam akpanikọ inọ, ndien didie? Nso idi ufọn edinam akpanikọ?
[Ikọ idakisọn̄]
^ ikp. 2 Ẹkpụhọ ndusụk enyịn̄ ke ibuotikọ emi ye ke ibuotikọ oro etienede.
[Se Ẹwetde ke Ikpọ Abisi ke page 3]
Mme owo ẹsiwak ndidọhọ ke akpanikọ ọfọn, edi inamke