Nnyịn Iyasan̄a ke Enyịn̄ Jehovah Abasi Nnyịn
Nnyịn Iyasan̄a ke Enyịn̄ Jehovah Abasi Nnyịn
“Nnyịn iyonyụn̄ isan̄a ke enyịn̄ Jehovah Abasi nnyịn ke nsinsi-nsinsi.” —Micah 4:5.
1. Mme owo ẹkedu uwem didie ke eyo Noah, ndien didie ke Noah ekedi isio?
ENOCH edi akpa owo emi Bible asiakde ke ama asan̄a ye Abasi. Udiana owo oro akasan̄ade ye Abasi edi Noah. Bible asian nnyịn ete: “Noah enen onyụn̄ ọfọn ama ke eyo esie, Noah asan̄a ye Abasi.” (Genesis 6:9) Etisịm eyo Noah, ofụri ubonowo ama ọwọn̄ọde ọkpọn̄ edisana utuakibuot. Idaha oro ama etetịm ọdiọk ke ntak emi mme angel oro mîkanamke akpanikọ ẹkedide ẹdidọ iban, ẹnyụn̄ ẹbon nditọ emi ẹkekotde Nephilim, kpa “ata n̄kpọsọn̄ owo uko,” m̀mê “mbon etop,” ke eyo oro. Eyịghe idụhe afai ọkọyọhọde isọn̄! (Genesis 6:2, 4, 11) Kpa ye oro, Noah ama ọfọn ama, enye ama onyụn̄ “ọkwọrọ edinen ido.” (2 Peter 2:5) Ke ini Abasi okowụkde Noah ete ọkọn̄ ubom man enịm mme owo ye mme unam uwem, enye ama okop uyo Abasi onyụn̄ “anam kpukpru se Abasi eketemede enye, ntem ke enye anam.” (Genesis 6:22) Ke akpanikọ, Noah ama asan̄a ye Abasi.
2, 3. Nso eti uwụtn̄kpọ ke Noah ekenịm ọnọ nnyịn mfịn?
2 Paul ama esịn Noah ke udịm mbon oro ẹkenyenede mbuọtidem ke ini enye ekewetde ete: “Oto mbuọtidem Noah, ke Abasi ama ọkọnọ enye ntọt aban̄a mme n̄kpọ oro owo mîkwe kan̄a, owụt mbak Abasi onyụn̄ ọbọp ubom ndida nnyan̄a mbonufọk esie; ndien ebede ke mbuọtidem emi, enye obiom ererimbot ikpe, onyụn̄ akabade edi andinyene edinen ido eke asan̄ade ye mbuọtidem.” (Mme Hebrew 11:7) Nso eti uwụtn̄kpọ ke enye ekenịm ntem! Sia enye ekenen̄erede enịm ke ikọ Jehovah oyosu, Noah ama ada ini, odudu, ye inyene esie anam ewụhọ Abasi. Kpasụk ntre mfịn, ediwak owo ẹsịn mme ifet oro mmọ ẹkpenyenede ke ererimbot ẹnyụn̄ ẹyak ini, odudu, ye inyene mmọ ẹsịn ke ndinam ewụhọ Jehovah. Mmọ ẹnyene n̄wọrọnda mbuọtidem, ndien emi ayanam mmọ ẹnyan̄a idemmọ ye mbon en̄wen.—Luke 16:9; 1 Timothy 4:16.
3 Anaedi ama ọsọn̄ Noah ye ubon esie ndiwụt mbuọtidem, kpa nte ọkọsọn̄de Enoch, ete ete Noah, emi ikenemede ke akpa ibuotikọ. Ke eyo Noah, kpa nte ekedide ke eyo Enoch, ata mme andituak ibuot nnọ Abasi ikawakke—owo itiaita kpọt ẹkenyene mbuọtidem, ndien mmọ kpọt ẹkebọhọ Ukwọ. Noah ọkọkwọrọ edinen ido ke ererimbot oro afai ye oburobụt ido ẹkeyọhọde. Akan oro, enye ye ubon esie ẹma ẹkọn̄ ata akamba ubom ẹben̄e Ukwọ ofụri ererimbot, okposụkedi akananam baba owo kiet mîkekwe orụk Ukwọ oro. Anaedi oro ekedi ata esen esen n̄kpọ ọnọ mbon eken.
4. Jesus ọkọdọhọ ke mbon eyo Noah ẹkekpu ndinam nso?
4 Nte enemde, ke ini Jesus eketịn̄de aban̄a eyo Noah, enye iketịn̄ke iban̄a afai, nsunsu ido ukpono, m̀mê oburobụt ido—okposụkedi mme edinam emi ẹkenen̄erede ẹdiọk. Ndudue oro Jesus eketịn̄de aban̄a ekedi ke mme owo ikanamke ntọt oro ẹkenọde. Enye ọkọdọhọ ke mmọ ẹma “ẹdia ẹnyụn̄ ẹn̄wọn̄, irenowo ẹdọ ndọ ẹnyụn̄ ẹda iban ẹnọ ke ndọ, tutu esịm usen emi Noah odụkde ke ubom.” Nso ikakwan̄a ke ndidia udia, ndin̄wọn̄ n̄kpọ, ndidọ ndọ, m̀mê ndida owo nnọ ke ndọ? Mmọ ẹkekere ke mmimọ ikodu uwem nte akpanade idu! Edi Ukwọ ke akasan̄a ekpere, Noah ke okonyụn̄ ọkwọrọ edinen ido. Ikọ ye edu uwem Noah ẹkpekenyene ndidụri mmọ utọn̄. Kpa ye oro, “mmọ [ikonyụn̄] ifiọkke tutu ukwọ edi edikpọri mmọ kpukpru efep.”—Matthew 24:38, 39.
5. Mme edu ewe ke okoyom Noah ye ubon esie ẹnyene?
5 Edieke ikerede iban̄a eyo oro, nnyịn iyokụt ke usụn̄ uwem Noah ama owụt ifiọk. Nte ededi, ke mme usen oro ẹkebemde Ukwọ iso, ama oyom uko man owo edi isio. Ama oyom ọkpọsọn̄ mbuọtidem man Noah ye ubon esie ẹkọn̄ ata akamba ubom ẹnyụn̄ ẹdọn̄ nyara ye uman kpukpru orụk unam. Ndi ama esidọn̄ ndusụk ke otu owo itiaita oro ndikpebe mbon eyo mmọ nnyụn̄ ndu uwem nte mmọ ẹkedude? Idem ọkpọkọm orụk ekikere oro ama odụk mmọ esịt, mmọ ẹma ẹka iso ẹsọn̄ọ ẹda. Ke ata ediwak isua ẹma ẹkebe—isua emi ẹwakde ẹkan se owo nnyịn ekededi ediyọde ke editịm n̄kpọ emi—mbuọtidem Noah ama anyan̄a enye ebe Ukwọ. Edi Jehovah ama osobo kpukpru mbon oro ẹkekerede ke ikodu uwem nte akpanade idu, emi mîkonyụn̄ ifiọkke ke ererimbot oro ọmọn̄ esịm utịt.
Afai Afiak Ọnọmọ Ubonowo
6. Ke Ukwọ ama ekebe, nso idaha ikosụk idu?
6 Ke mmọn̄ Ukwọ ama akasat, ubonowo ama afiak ọtọn̄ọ obufa. Nte ededi, mme owo ẹkesụk ẹdi mme anana-mfọnmma, ndien ‘ekikere esịt owo okosụk ọdọdiọk toto ke uyen esie.’ (Genesis 8:21) Ke ẹsiode oro ẹfep, okposụkedi mme demon mîkekemeke ndifiak mmen idem eke obụk nsịne, mmọ ẹkesụk ẹnyenyene odudu. Ererimbot unana uten̄e Abasi oro ama ọsọsọp owụt ke imọ ikesịne “ke idak odudu andidiọk,” ndien kpa nte edide mfịn, ata mme andituak ibuot nnọ Abasi ẹkenyene ndin̄wana ye “n̄kari Devil.”—1 John 5:19; Ephesus 6:11, 12.
7. Didie ke afai ọkọkọri ke Ukwọ ama ekebe?
7 Ntem ke Ukwọ ama ekebe, ke nsụhọde n̄kaha ọtọn̄ọde ke eyo Nimrod, mme owo ẹma ẹfiak ẹda afai ẹyọhọ isọn̄. Ndien sia mme owo ẹkade iso ndiwak nnyụn̄ nnam n̄kọri ke ifiọk ubotn̄kpọ, afai emenen̄ede ọkọri nte mme isua ẹbede. Ke eset, akan̄kan̄, eduat, idan̄ ye utịgha, ye chariot ẹkedu. Ke ata ndondo emi, se idude ẹdi ikan̄ ye ọtọmbe, ikan̄ ọbọn ye mme awak-n̄kukọhọ n̄kpọekọn̄ eke ntọn̄ọ ntọn̄ọ ọyọhọ isua ikie 20. Ẹma ẹsion̄o mbufa n̄kpọekọn̄ ẹdi ke ini akpa ekọn̄ ererimbot, utọ nte ubomofụm ekọn̄, ubomisọn̄ ekọn̄, nsụn̄ikan̄ ekọn̄ emi awatde ke idak mmọn̄, ye idiọk ofụm n̄kpa. Mme n̄kpọekọn̄ emi ẹma ẹda uwem ediwak miliọn owo ke ekọn̄ oro. Ndi oro ekedi n̄kpọ n̄kpaidem? Baba.
8. Didie ke Ediyarade 6:1-4 osu?
8 Ke isua 1914, Jesus ama ada ubọn̄ nte Edidem Obio Ubọn̄ Abasi eke heaven, “usen Ọbọn̄” ama onyụn̄ ọtọn̄ọ. (Ediyarade 1:10) Ke n̄kukụt oro ẹwetde ke n̄wed Ediyarade, ẹwụt Jesus nte Edidem emi akande onyụn̄ awatde ke afia enan̄-mbakara. Mme awat enan̄-mbakara efen, emi kiet kiet ke otu mmọ owụtde afanikọn̄ oro edisịmde ubonowo, ẹtiene enye ke edem. Kiet ke otu mmọ awat ididuot enan̄-mbakara, ẹnyụn̄ ẹnọ enye “odudu ndisio emem mfep ke isọn̄ man mmọ ẹkpewot kiet eken; ẹnyụn̄ ẹnọ enye akwa akan̄kan̄.” (Ediyarade 6:1-4) Enan̄-mbakara emi ye andiwat enye ẹda ẹban̄a ekọn̄, ndien akwa akan̄kan̄ oro ada aban̄a anana—mbiet nsobo oro mme ekọn̄ eyomfịn ye mme okopodudu n̄kpọekọn̄ mmọ ẹkamade. Mfịn mme n̄kpọekọn̄ emi ẹsịne mme n̄kpọekọn̄ nuclear, emi ẹkemede ndisobo ata ediwak owo; mme rọket emi ẹkemede ndimen mme n̄kpọekọn̄ oro nsan̄a ediwak tọsịn kilomita n̄kesịm ebiet oro ẹyomde; ọkọrọ ye awak-n̄kukọhọ n̄kpọekọn̄ mmọn̄ibọk ye mbon oro ẹnyenede n̄kpri unam udọn̄ọ, emi ẹkemede ndiwot ata ediwak owo.
Nnyịn Imanam Ntọt Jehovah
9. Didie ke ererimbot mfịn ebiet ererimbot oro okodude mbemiso Ukwọ?
9 Ke eyo Noah, Jehovah ama osobo ubonowo ke ntak enyene-ndịk afai oro ndiọi owo ye mme Nephilim ẹkenamde. Nso kaban̄a mfịn? Nte afai osụhọde ke isọn̄ akan nte ekedide ke eyo Noah? Ke akpanikọ isụhọkede! Akan oro, kpa nte ekedide ke eyo Noah, mfịn mme owo ke ẹka iso ke mbubehe mmọ eke usen ke usen, inyụn̄ inamke ntọt oro ẹnọde. (Luke 17:26, 27) Ndi ntak ndomokiet odu ndiyịk m̀mê Jehovah ayafiak osobo ubonowo? Baba-o.
10. (a) Nso ntọt ke ẹnọ ndien ndien ke ntịn̄nnịm ikọ Bible? (b) Nso idi n̄kukụre usụn̄ uwem oro owụtde eti ibuot mfịn?
10 Ediwak isua ikie mbemiso Ukwọ, Enoch ama etịn̄ ntịn̄nnịm ikọ aban̄a nsobo oro anade esịm eyo nnyịn. (Jude 14, 15) Jesus n̄ko ama etịn̄ aban̄a “akwa ukụt” oro edidide. (Matthew 24:21) Mme prọfet eken ẹma ẹtọt ẹban̄a usen oro. (Ezekiel 38:18-23; Daniel 12:1; Joel 2:31, 32) Nnyịn imonyụn̄ ikot ke n̄wed Ediyarade nte ẹtịn̄de in̄wan̄-in̄wan̄ ẹban̄a akpatre nsobo oro. (Ediyarade 19:11-21) Nte owo kiet kiet, nnyịn imekpebe Noah inyụn̄ isịn ifịk ikwọrọ edinen ido. Nnyịn imanam ntọt Jehovah, ima onyụn̄ anam nnyịn in̄wam mme mbọhọidụn̄ nnyịn. Ntem, ukem nte Noah, nnyịn isan̄a ye Abasi. Ke akpanikọ, edi ata akpan n̄kpọ ọnọ owo oro oyomde uwem ndika iso nsan̄a ye Abasi. Didie ke nnyịn ikeme ndinam oro kpa ye afanikọn̄ oro isobode kpukpru usen? Oyom nnyịn inyene ọkpọsọn̄ mbuọtidem ke Abasi ayanam uduak esie.—Mme Hebrew 11:6.
Ka Iso San̄a ye Abasi ke Ini Afanikọn̄
11. Didie ke nnyịn ikpebe mme Christian akpa isua ikie?
11 Ke akpa isua ikie, ẹkedọhọ ke mme Christian oro ẹyetde aran ẹsan̄a ke “Usụn̄ Oro.” (Utom 9:2) Ofụri usụn̄ uwem mmọ ọkọkọn̄ọ ke mbuọtidem mmọ ke Jehovah ye Jesus Christ. Mmọ ẹkesan̄a ke usụn̄ oro Eteufọk mmọ akasan̄ade. Mme anam-akpanikọ Christian ẹsan̄a kpasụk ke usụn̄ oro mfịn.
12. Nso iketịbe ke Jesus ama ọkọnọ otuowo udia ke utịbe utịbe usụn̄?
12 Se iketịbede ke ini utom ukwọrọikọ Jesus owụt nte edide akpan n̄kpọ ndinyene mbuọtidem. Isan̄ kiet, Jesus ama ọnọ otuowo oro ẹwakde ẹsịm n̄kpọ nte iren 5,000 udia ke utịbe utịbe usụn̄. Emi ama akpa mmọ idem, mmọ ẹnyụn̄ ẹdat esịt. Edi kop se iketịbede ke oro ebede. Nnyịn ikot ite: “Ke ini mme owo ẹkụtde idiọn̄ọ oro enye akanamde, mmọ ẹtọn̄ọ ndidọhọ ẹte: ‘Emi ke akpanikọ edi prọfet oro ekenyenede ndidi ke ererimbot.’ Ntre ke Jesus ọfiọkde ete mmọ ẹyom ndimụm imọ nnịm ke edidem, enye afiak ọnyọn̄ ke obot sụk enye ikpọn̄.” (John 6:10-15) Enye ama adaha aka ebiet efen okoneyo oro. Anaedi Jesus ndikesịn ndidi edidem ama abiak ediwak owo. Kamse, enye ama owụt ke imọ imenyene ọniọn̄ ikem ndidi edidem ye nte ke imọ imenyene odudu ndinọ se mme owo ẹyomde. Edi ini oro Jehovah ekenịmde ọnọ enye ndidi Edidem ikekemke kan̄a. Akan oro, Obio Ubọn̄ Jesus ekenyene ndidi eke heaven, idịghe eke isọn̄.
13, 14. Nso ekikere ke ediwak owo ẹkenyene, ndien didie ke emi ekesịn mbuọtidem mmọ ke udomo?
13 Kpa ye oro, John ọdọhọ ke otuowo oro ẹma ẹyom Jesus ẹnyụn̄ ẹkekụt enye ‘ke edem inyan̄ eken.’ Ntak emi mmọ ẹketienede enye ke enye ama ekesịn ndidi edidem? Ediwak mmọ ẹkekere n̄kpọ obụkidem, ẹtịn̄de in̄wan̄-in̄wan̄ ẹban̄a udia oro Jehovah ọkọnọde ke wilderness ke eyo Moses. Ọwọrọ ke mmọ ẹkeyom Jesus aka iso ọnọ mmimọ udia. Sia Jesus ọkọdiọn̄ọde ukwan̄ ekikere mmọ, enye ama ọtọn̄ọ ndikpep mmọ akpanikọ eke spirit oro ekpekenen̄erede ekikere mmọ. (John 6:17, 24, 25, 30, 31, 35-40) Ke ndinam n̄kpọ mban̄a oro, ndusụk mmọ ẹma ẹsụk enye uyo, akpan akpan ke ini enye ọkọnọde uwụtn̄kpọ emi: “Ke ata akpanikọ ke ndọhọ mbufo, Ibọhọke mbufo ẹta obụkidem Eyen owo ẹnyụn̄ ẹn̄wọn̄ iyịp esie, mbufo inyeneke uwem ke esịt mbufo. Owo eke atade obụkidem mi onyụn̄ ọn̄wọn̄de iyịp mi enyene nsinsi uwem, ndien nyanam enye eset ke akpatre usen.”—John 6:53, 54.
14 Uwụtn̄kpọ Jesus ẹma ẹsiwak ndinam mme owo ẹwụt m̀mê mmimọ imenen̄ede iyom ndisan̄a ye Abasi. Uwụtn̄kpọ enye emi akanam kpasụk ntre. Uwụtn̄kpọ emi ama enen̄ede afịna ediwak mbet. Nnyịn ikot ite: “Ke ini ediwak mbet esie ẹkopde emi, mmọ ẹdọhọ ẹte: ‘Ikọ emi akpa owo idem; anie ekeme ndikpan̄ utọn̄?’” Jesus ama anam an̄wan̄a ke mmọ ẹkpenyene ndidụn̄ọde mfiọk se ikọ imọ ọwọrọde ke n̄kan̄ eke spirit. Enye ọkọdọhọ ete: “Spirit ọnọ uwem; obụkidem inyeneke ufọn ndomokiet. Mme ikọ emi ntịn̄de nnọ mbufo ẹdi spirit ẹnyụn̄ ẹdi uwem.” Kpa ye oro, ediwak mmọ ikamaha ndikop, ndien mbụk oro ọdọhọ ete: “Ke ntak emi ediwak mbet esie ẹfiak edem ẹbịne mme n̄kpọ emi mmọ ẹkekpọn̄de inyụn̄ isan̄ake aba ye enye.”—John 6:60, 63, 66.
15. Nso eti ekikere ke ndusụk mme anditiene Jesus ẹkenyene?
15 Nte ededi, idịghe kpukpru mbet Jesus ẹkenam n̄kpọ ntre. Edi akpanikọ ke se Jesus eketịn̄de iketịmke in̄wan̄a mme anam-akpanikọ mbet esie. Kpa ye oro, mmọ ẹkesụk ẹnyenyene mbuọtidem ke Jesus. Peter, kiet ke otu mme anam-akpanikọ mbet oro, ama etịn̄ ekikere kpukpru mbon oro ẹkesọn̄ọde ẹda ye Jesus ke ini enye ọkọdọhọde ete: “Ọbọn̄, nnyịn idinyọn̄ ibịne anie? Afo enyene ikọ nsinsi uwem.” (John 6:68) Nso ata eti edu ye eti uwụtn̄kpọ ke oro edi ntem!
16. Didie ke ẹkeme ndidomo nnyịn, ndien nso nnennen ekikere ke nnyịn ikpenyene?
16 Mfịn, ẹkeme ndidomo nnyịn nte ẹkedomode akpa mme mbet Jesus. Ekeme ndibiak nnyịn edieke mme un̄wọn̄ọ Jehovah mîsọpke isu nte nnyịn ikpamade ẹsu. Ekeme nditie nnyịn ke nte ẹtatde mme itie N̄wed Abasi ke mme n̄wed nnyịn oro ẹkọn̄ọde ke Bible ẹsọn̄ ndifiọk. Edu uwem ekemmọ Christian ekeme ndidiọk nnyịn esịt. Ndi ekpenen iyak mme ntak emi m̀mê mme orụk ntak emi ẹnam nnyịn ikûsan̄a ye Abasi? Ke akpanikọ ikpenenke! Mme mbet oro ẹkekpọn̄de Jesus ẹkewụt ke mmimọ ikere n̄kpọ obụkidem. Ana nnyịn ifep ndikere n̄kpọ ntre.
“Nnyịn Idịghe Utọ Mme Owo Oro Ẹdịghede Ẹfiak Edem”
17. Nso ikeme ndin̄wam nnyịn ika iso isan̄a ye Abasi?
17 Apostle Paul ekewet ete: “Abasi ọkọnọ odudu ẹda ẹwet ofụri N̄wed Abasi.” (2 Timothy 3:16) Jehovah asian nnyịn in̄wan̄-in̄wan̄ ke Bible ete: “Emi edi ọkpọusụn̄, mbufo ẹsan̄a ke esịt.” (Isaiah 30:21) Ndinam Ikọ Abasi an̄wam nnyịn ‘itịm ikpeme nte isan̄ade.’ (Ephesus 5:15) Ndikpep Bible nnyụn̄ ntie n̄kere se ikpepde an̄wam nnyịn ‘ika iso isan̄a ke akpanikọ.’ (3 John 3) Ke akpanikọ, nte Jesus ọkọdọhọde, “Spirit ọnọ uwem; obụkidem inyeneke ufọn ndomokiet.” N̄kukụre ndausụn̄ oro ẹkemede ndiberi edem, emi nnyịn ikemede ndida nnen̄ede ikpatisan̄ nnyịn edi ndausụn̄ eke spirit, emi Ikọ Jehovah, spirit esie, ye esop esie ẹnọde.
18. (a) Nso ke ndusụk owo ẹnam ke ntak unana ibuot? (b) Nso orụk mbuọtidem ke nnyịn inyene?
18 Mfịn, mbon oro ẹdiọkde esịt ke ntak ekikere obụkidem m̀mê ke ntak oro idotenyịn mmọ akpade mfụhọ, ẹsiwak ndiwọrọ n̄koyom inemesịt ke ererimbot. Sia mmọ mîfiọkke ke utịt ekpere, mmọ ikwe ufọn ‘edidu ke ukpeme,’ ndien mmọ ẹmek ndibịne mme ibụk ibụk utịtmbuba utu ke ndibem iso nyom Obio Ubọn̄. (Matthew 24:42) Ndisan̄a ntre edi ata akpatre ndisịme. Kop se apostle Paul eketịn̄de mi: “Nnyịn idịghe utọ mme owo oro ẹdịghede ẹfiak edem ẹka nsobo, edi idi utọ mme owo oro ẹnyenede mbuọtidem ẹsịm edinyan̄a ukpọn̄.” (Mme Hebrew 10:39) Ukem nte Enoch ye Noah, nnyịn idu ke ini afanikọn̄, imonyụn̄ inyene ifet edisan̄a ye Abasi. Ke inamde oro, nnyịn imenyene ọyọhọ idotenyịn ke iyokụt nte mme un̄wọn̄ọ Jehovah ẹsude, ẹsiode idiọkido ẹfep, ẹnyụn̄ ẹdade edinen obufa ererimbot ẹdi. Nso utịbe utịbe idotenyịn ke emi edi ntem!
19. Micah ọdọhọ ke usụn̄ uwem ata mme andituak ibuot nnọ Abasi etie didie?
19 Prọfet Micah oro ẹkenọde odudu spirit ama ọdọhọ ke mme idụt ererimbot “ẹyesan̄a ke enyịn̄ abasi mmọ.” Ekem enye ama ọdọhọ ke imọ ye mme anam-akpanikọ andituak ibuot eken “iyonyụn̄ isan̄a ke enyịn̄ Jehovah Abasi [mmimọ] ke nsinsi-nsinsi.” (Micah 4:5) Edieke ubiere fo edide ukem ye eke Micah, san̄a kpere Jehovah inamke n̄kpọ m̀mê afanikọn̄ awak adan̄a didie ke ini nnyịn. (James 4:8) Akpakam edi udọn̄ ofụri esịt kpukpru nnyịn ndisan̄a ye Jehovah Abasi nnyịn idahaemi ye ke nsinsi-nsinsi!
Didie ke Afo Ọkpọbọrọ?
• Didie ke eyo nnyịn ebiet eyo Noah?
• Nso orụk uwem ke Noah ye ubon esie ẹkedu, ndien didie ke nnyịn ikeme ndikpebe mmọ?
• Nso ukwan̄ ekikere ke ndusụk mme anditiene Jesus ẹkenyene?
• Nso ke ata mme Christian ẹbiere ndinam?
[Mme Mbụme Ukpepn̄kpọ]
[Mme ndise ke page 20]
Mme owo ẹduọ ẹnyịne mfịn ke mme edinam eke usen ke usen, ukem nte ekedide ke eyo Noah
[Ndise ke page 21]
Sia nnyịn idide mme andikwọrọ Obio Ubọn̄, “nnyịn idịghe utọ mme owo oro ẹdịghede ẹfiak edem”