Ẹka Iso Ẹsan̄a nte Jesus Christ Akasan̄ade
Ẹka Iso Ẹsan̄a nte Jesus Christ Akasan̄ade
“Owo emi ọdọhọde ete ke idu ke ebuana ye [Abasi] enyene mbiomo n̄ko ke idemesie ndika iso nsan̄a kpa nte enye oro [Jesus] akasan̄ade.”—1 JOHN 2:6.
1, 2. Nso ibuana ke ndiwụk enyịn nse Jesus?
APOSTLE PAUL ekewet ete: “Ẹyak nnyịn ifehe mbuba eke ẹnịmde nnyịn ke iso ye ime, nte nnyịn iwụkde enyịn ise Jesus, Akpan Isụn̄utom ye Andinam mbuọtidem nnyịn ọfọn ama.” (Mme Hebrew 12:1, 2) Oyom iwụk enyịn ise Jesus Christ man ikeme ndisan̄a ke akpanikọ.
2 Akpasarade ikọ oro ẹkabarede ‘iwụk enyịn ise’ ke N̄wed Abasi Christian Usem Greek ọwọrọ “ndiwụk ntịn̄enyịn ketket ke n̄kpọ,” “ndiwụk enyịn nse n̄kpọ kiet kpọt,” “ndiwụk enyịn nse n̄kpọ ye unana edifep enyịn.” N̄wed ndụn̄ọde kiet ọdọhọ ete: “Owo Greece oro efehede mbuba ke an̄wambre esitek ukot itọk ndondo oro enye ọwọn̄ọrede enyịn ese otuowo onyụn̄ etrede ndiwụk ntịn̄enyịn ke mbuba itọk ye ke utịtmbuba esie. Kpasụk ntre ke edi ye mme Christian.” Mme n̄kpọ oro ẹwọn̄ọrede owo ntịn̄enyịn ẹkeme ndibiọn̄ọ n̄kọri nnyịn ke n̄kan̄ eke spirit. Ana nnyịn iwụk enyịn ise Jesus Christ. Ntak emi nnyịn iwụkde enyịn ise Akpan Isụn̄utom emi? Ikọ Greek oro ẹkabarede “akpan isụn̄utom” ọwọrọ “akpan adausụn̄, owo oro adade usụn̄ ke n̄kpọ ekededi, ndien ke ntem enịmde uwụtn̄kpọ ọnọ mbon en̄wen.” Oyom itiene uwụtn̄kpọ Jesus man ikeme ndiwụk enyịn nse enye.
3, 4. (a) Nso ke oyom nnyịn inam man isan̄a nte Jesus Christ akasan̄ade? (b) Mme mbụme ewe ẹdot ikere iban̄a?
3 Bible ọdọhọ ke “owo emi ọdọhọde ete ke idu ke ebuana ye [Abasi] enyene mbiomo n̄ko ke idemesie ndika iso nsan̄a kpa nte enye oro [Jesus] akasan̄ade.” (1 John 2:6) Ana nnyịn idu ke ebuana ye Abasi ebe ke ndinịm mbet Jesus kpa nte enye ekenịmde mbet Ete esie.—John 15:10.
4 Ntem man isan̄a nte Jesus akasan̄ade, oyom iwụk enyịn ise enye nte Akpan Adausụn̄ inyụn̄ itiene nde ikpat esie ketket. Mme akpan mbụme oro ikpobụpde ke afan̄ emi ẹdi: Didie ke Christ ada nnyịn usụn̄ mfịn? Ndikpebe usụn̄ oro enye akasan̄ade akpanam nnyịn inam n̄kpọ didie? Nso idi mme ufọn edinen̄ede ntiene uwụtn̄kpọ Jesus Christ?
Nte Christ Adade Mme Anditiene Enye Usụn̄
5. Mbemiso Jesus ọkọdọkde aka heaven, nso ke enye ọkọn̄wọn̄ọ ọnọ mme anditiene enye?
5 Mbemiso ọkọdọkde aka heaven, Jesus Christ oro ẹkenamde eset ama owụt mme mbet esie idem onyụn̄ ọnọ mmọ akpan utom ẹnam. Enye ọkọdọhọ ete: “Ẹka ẹkenam mme owo ke kpukpru idụt ẹdi mbet mi.” Ke ini Akpan Adausụn̄ emi eketịn̄de ikọ oro, enye ama ọn̄wọn̄ọ n̄ko ke imọ iyodu ye mbet imọ nte mmọ ẹnamde utom oro. Enye ọkọdọhọ ete: “Sese! Ami ndodu ye mbufo kpukpru usen tutu esịm utịt editịm n̄kpọ emi.” (Matthew 28:19, 20) Didie ke Jesus Christ odu ye mme anditiene enye ke utịt editịm n̄kpọ emi?
6, 7. Didie ke Jesus ada edisana spirit ọnọ nnyịn ndausụn̄?
6 Jesus ọkọdọhọ ete: “Edi andin̄wam, kpa edisana spirit, emi Ete edinọde edi ke enyịn̄ mi, enye oro eyekpep mbufo kpukpru n̄kpọ onyụn̄ anam mbufo ẹti kpukpru n̄kpọ eke n̄ketịn̄de nnọ mbufo.” (John 14:26) Edisana spirit oro ẹnọde ke enyịn̄ Jesus, ọnọ nnyịn ndausụn̄ onyụn̄ ọsọn̄ọ nnyịn idem mfịn. Enye ọnọ nnyịn un̄wana eke spirit onyụn̄ akam an̄wam nnyịn ifiọk “mme ntotụn̄ọ n̄kpọ Abasi.” (1 Corinth 2:10) Akan oro, mme edu Abasi nte “ima, idatesịt, emem, anyanime, mfọnido, eti ido, mbuọtidem, ifụre ifụre ido, mfara ke idem” ẹnam “mbun̄wụm spirit.” (Galatia 5:22, 23) Edisana spirit ekeme ndin̄wam nnyịn inyene mme edu emi.
7 Nte nnyịn ikpepde N̄wed Abasi inyụn̄ idomode ndida se ikpepde nsịn ke edinam, spirit Jehovah an̄wam nnyịn idọdiọn̄ ikọri ke eti ibuot, mbufiọk, asian, ifiọk, ye ekikere. (Mme N̄ke 2:1-11) Edisana spirit an̄wam nnyịn n̄ko ndiyọ idomo ye afanikọn̄. (1 Corinth 10:13; 2 Corinth 4:7; Philippi 4:13) Ẹteme mme Christian ẹte ‘ẹyet kpukpru se isabarede obụkidem ye spirit ẹfep, ẹnyụn̄ ẹnam edisana idaha mmọ ọfọn ama.’ (2 Corinth 7:1) Ndi nnyịn imekeme ndinen̄ede nsana nte Abasi oyomde edieke edisana spirit mîn̄wamke nnyịn? Edisana spirit—oro Jehovah Abasi ọnọde Eyen esie ada anam n̄kpọ—edi usụn̄ kiet oro Jesus adade ọnọ nnyịn ndausụn̄ mfịn.—Matthew 28:18.
8, 9. Didie ke Christ ada “ofụn emi anamde akpanikọ onyụn̄ enyenede ọniọn̄” ọnọ ndausụn̄?
8 Kere ban̄a usụn̄ en̄wen oro Christ adade ọnọ esop ndausụn̄ mfịn. Ke ini Jesus eketịn̄de aban̄a edidu esie ye utịt editịm n̄kpọ emi, enye ọkọdọhọ ete: “Anie enen̄ede edi ofụn emi anamde akpanikọ onyụn̄ enyenede ọniọn̄ emi eteufọk esie ekemekde ete ese aban̄a mbonufọk imọ, onyụn̄ ọnọ mmọ udia ke edikem ini? Ofụn oro oyokop inemesịt edieke eteufọk esie ke edide edisịm okụt enye anamde ntre! Ke akpanikọ ke ndọhọ mbufo nte, Enye eyemek enye ete ese aban̄a kpukpru inyene esie.”—Matthew 24:3, 45-47.
9 “Eteufọk” oro edi Jesus Christ. “Ofụn” oro edi otu mme Christian oro ẹyetde aran emi ẹdude ke isọn̄. Ẹnọ otu ofụn emi utom edise mban̄a inyene Jesus ke isọn̄ ye edinọ udia eke spirit ke edikem ini. Ẹmek ekpri otu mme esenyịn oro ẹdotde ke otu “ofụn emi anamde akpanikọ onyụn̄ enyenede ọniọn̄” ẹte edi Otu Ukara, ndien mmọ ẹda ke ibuot otu ofụn oro. Mmọ ẹnọ ndausụn̄ ke utom edikwọrọ Obio Ubọn̄ ke ofụri ererimbot ye ke ndinọ udia eke spirit ke edikem ini. Ntem, Christ ada “ofụn emi anamde akpanikọ onyụn̄ enyenede ọniọn̄,” emi ẹyetde aran ke spirit ye Otu Ukara esie, ọnọ esop ndausụn̄.
10. Didie ke nnyịn ikpese mbiowo, ndien ntak-a?
10 Christ ada “mme owo nte enọ”—mbiowo m̀mê mme esenyịn Christian—ọnọ ndausụn̄ n̄ko. Ẹmek mmọ “man ẹnen̄ede ndisana owo, man ẹsan̄a utom, man ẹbọp idem Christ ẹnam ọkọri.” (Ephesus 4:8, 11, 12) Mme Hebrew 13:7 etịn̄ nte ikpanamde n̄kpọ ye mmọ ete: “Ẹti mmọ eke ẹdade usụn̄ ke otu mbufo, emi ẹtịn̄de ikọ Abasi ẹnọ mbufo, ndien nte mbufo ẹtịmde ẹse nte edu uwem mmọ etiede, ẹkpebe mbuọtidem mmọ.” Mbiowo ẹda usụn̄ ke esop. Sia mmọ ẹkpebede Christ Jesus, odot ẹkpebe mbuọtidem mmọ. (1 Corinth 11:1) Nnyịn ikeme ndiwụt esịtekọm mban̄a mbiowo oro ẹmekde, ebe ke ndikop uyo nnyụn̄ nsụk ibuot nnọ mmọ, kpa “mme owo nte enọ.”—Mme Hebrew 13:17.
11. Mme usụn̄ ewe ke Christ ada ọnọ mme anditiene enye ndausụn̄ mfịn, ndien ndisan̄a ye enye abuana nso?
11 Ih, Jesus Christ ada edisana spirit, “ofụn emi anamde akpanikọ onyụn̄ enyenede ọniọn̄,” ye mbiowo esop ọnọ mme anditiene enye ndausụn̄ mfịn. Man isan̄a nte Christ akasan̄ade, oyom ifiọk usụn̄ oro enye adade ọnọ ndausụn̄ mi inyụn̄ inyịme usụn̄ oro. Oyom itiene isan̄a nte enye akasan̄ade. Apostle Peter ekewet ete: “Ẹkekot mbufo kaban̄a ntak emi, koro Christ ama akam okụt ukụt kaban̄a mbufo, ọkpọn̄de uwụtn̄kpọ enịm ọnọ mbufo man ẹtiene nde ikpat esie ketket.” (1 Peter 2:21) Ke ikpehe ewe ke nnyịn ikpetiene mfọnmma uwụtn̄kpọ Jesus?
Ẹwụt Eti Ibuot ke nte Ẹkamade Odudu
12. Ewe uwụtn̄kpọ Christ enen̄ede ebehe mbiowo ke esop?
12 Okposụkedi Ete ọkọnọde enye anana-mbiet odudu, Jesus ama owụt eti ibuot ke usụn̄ oro enye akakamade odudu emi. Kpukpru owo ke esop—akpan akpan mme esenyịn—ẹkpenyene ‘ndiyak kpukpru owo ẹdiọn̄ọ eti ibuot mmọ.’ (Philippi 4:5; 1 Timothy 3:2, 3) Sia mbiowo ẹnyenede ndusụk udomo odudu ke esop, edi akpan n̄kpọ mmọ nditiene nde ikpat Christ ke ini ẹdade odudu emi ẹnam n̄kpọ.
13, 14. Ke nso usụn̄ ke mbiowo ẹkeme ndikpebe Christ nte mmọ ẹsịnde udọn̄ ẹnọ mbon en̄wen ẹnam n̄kpọ Abasi?
13 Jesus ama ekere aban̄a mmeme mme mbet esie. Enye ikọdọhọke mmọ ẹnam n̄kpọ oro akande ukeme mmọ. (John 16:12) Utu ke ndikenyenyịk mmọ, Jesus ama esịn udọn̄ ọnọ mme anditiene enye ete ‘ẹn̄wan̄wana ọkpọsọn̄’ man ẹnam uduak Abasi. (Luke 13:24) Enye akanam emi ke ndinọ mmọ ndausụn̄ nnyụn̄ nsịn udọn̄ nnọ mmọ. Kpasụk ntre mfịn, mbiowo Christian isitịn̄ke ikọ isuene mbon en̄wen m̀mê ndinam esịt obiom mmọ man ẹnam n̄kpọ Abasi. Utu ke oro, mmọ ẹsesịn udọn̄ ẹnọ mmọ ẹnam n̄kpọ Jehovah ke ntak ima oro mmọ ẹmade enye ye Jesus, ye ke ntak ima oro mmọ ẹmade ekemmọ owo.—Matthew 22:37-39.
14 Jesus ikadaha odudu oro ẹkenọde enye ifịk mme owo. Enye ikenịmke idaha oro okokon̄de akan mme owo ndisịm m̀mê ndinam anana-utịt ibet nnọ mmọ. Utu ke oro, enye ekesisesịn udọn̄ ọnọ mme owo ebe ke ndisịm esịt mmọ nnyụn̄ nnam mmọ ẹfiọk mme edumbet oro ẹkarade Ibet Moses. (Matthew 5:27, 28) Sia mbiowo ẹkpebede Jesus Christ, mmọ ẹfep ndinam mbet idemmọ m̀mê ndisọn̄ọ nyịre ke mme ekikere idemmọ. Ke mme n̄kpọ ẹban̄ade ọfọn̄ ye ukamaidem m̀mê mme edinam ini nduọkodudu ye unọ idem inemesịt, mbiowo ẹsidomo ndida mme edumbet Abasi nsịm esịt nditọete mmọ; mme utọ edumbet oro ẹdu ke Micah 6:8; 1 Corinth 10:31-33; ye 1 Timothy 2:9, 10.
Ẹnyene Esịtmbọm Ẹnyụn̄ Ẹfen Ẹnọ Owo
15. Jesus akanam n̄kpọ didie aban̄a ndudue mme mbet esie?
15 Christ ama ọkpọn̄ uwụtn̄kpọ enịm ọnọ nnyịn nditiene ke nte enye akanamde n̄kpọ aban̄a ndudue mme mbet esie. Kere ban̄a n̄kpọ iba oro ẹketịbede ke akpatre okoneyo oro enye okodude ke isọn̄. Ke Jesus ama ekesịm In̄wan̄ Gethsemane, enye ama “ada Peter ye James ye John adaha” onyụn̄ ọdọhọ mmọ “ẹkpeme.” Ekem “ke asan̄ade esisịt aka iso enye ọduọ ke isọn̄ onyụn̄ ọtọn̄ọ ndibọn̄ akam.” Ke ama akafiak edi, enye ama okụt “nte mmọ ẹdede idap.” Jesus akanam n̄kpọ didie? Enye ọkọdọhọ ete: “Spirit, ke akpanikọ, enyịme, edi obụkidem ememem.” (Mark 14:32-38) Utu ke ndisọn̄ọ nsua nnọ Peter, James, ye John, mbọm mmọ ama anam enye! Kpa okoneyo oro, Peter ama akan̄ Jesus utịm ikata. (Mark 14:66-72) Jesus akanam n̄kpọ didie ye Peter ke n̄kpọ oro ama ekebe? Bible ọdọhọ ete: “Ọbọn̄ ama eset, ama onyụn̄ owụt Simon [Peter] idem!” (Luke 24:34) “Enye ama owụt Cephas [Peter] idem, ekem owụt mbet duopeba.” (1 Corinth 15:5) Utu ke Jesus ndikakama udu, enye ama efen ọnọ apostle oro akatuade n̄kpọfiọk do onyụn̄ ọsọn̄ọ enye idem. Ke ukperedem, Jesus ama ọnọ Peter ikpọ ifetutom.—Utom 2:14; 8:14-17; 10:44, 45.
16. Didie ke nnyịn ikeme ndisan̄a nte Jesus akasan̄ade ke ini ekemmọ mme andinịm ke akpanikọ ẹkpude m̀mê ẹduede nnyịn?
16 Ke ini ekemmọ mme andinịm ke akpanikọ ẹkpude nnyịn m̀mê ẹduede nnyịn ke ntak unana mfọnmma, ndi ikpanaha itua mmọ mbọm inyụn̄ ifen inọ mmọ nte Jesus ekefende? Peter ama eteme ekemmọ mme andinịm ke akpanikọ ete: “Kpukpru mbufo ẹnyene ekikere kiet, ẹwụt edikere mban̄a, ẹnyene ima nditọete, ẹtua owo mbọm, ẹsụhọde idem, ẹkûda idiọk ẹsio owo usiene idiọk, m̀mê ndisụn̄i owo eke osụn̄ide mbufo, edi, utu ke oro, ẹnọ edidiọn̄.” (1 Peter 3:8, 9) Nso edieke owo mînamke n̄kpọ ye nnyịn nte Jesus akpanamde, ẹsịnde nditua nnyịn mbọm m̀mê ndifen nnọ nnyịn? Idem kpa ye oro, obiomo nnyịn ndisịn ukeme n̄kpebe Jesus nnyụn̄ nnam n̄kpọ nte enye akpanamde.—1 John 3:16.
Ẹnịm Mme Ufọn N̄kpọ Obio Ubọn̄ Akpa
17. Nso iwụt ke Jesus akada edinam uduak Abasi nte ata akpan n̄kpọ ke uwem esie?
17 Odu usụn̄ en̄wen oro nnyịn ikemede ndisan̄a nte Jesus Christ akasan̄ade. Jesus akada editan̄a eti mbụk Obio Ubọn̄ Abasi nte ata akpan n̄kpọ ke uwem esie. Ke ama ọkọkwọrọ ikọ ọnọ n̄wan Samaria ke mbọhọ obio Sychar ke Samaria, Jesus ama ọdọhọ mme mbet esie ete: “Udia mi edi ndinam uduak enye emi ọkọdọn̄de mi nnyụn̄ nnam utom esie mma.” (John 4:34) Jesus ndikanam uduak Ete esie ama ọsọn̄ọ enye idem; enye akada edinam uduak Ete esie nte eti udia emi oyụhọde owo onyụn̄ ọnọde owo odudu. Ndi ndikpebe Jesus ebe ke nditịn̄ enyịn nnam uduak Abasi idinamke nnyịn idu uwem oro enyenede se ọwọrọde onyụn̄ ọnọde uyụhọ?
18. Mme edidiọn̄ ewe ke ẹsibọ ke ini ẹsịnde udọn̄ ẹnọ nditọ ẹdụk utom uyọhọ ini?
18 Ke ini mme ete ye eka ẹsịnde udọn̄ ẹnọ nditọ mmọ ẹdụk utom uyọhọ ini, mmọ ye nditọ mmọ ẹsibọ ediwak edidiọn̄. Ete kiet oro enyenede amanamba nditọiren ama esịn udọn̄ ọnọ nditọ esie toto ke uyen ndinịm utom usiakusụn̄ nte utịtmbuba mmọ. Ke nditọ oro ẹma ẹkekụre n̄wed, mmọ ẹma ẹkabade ẹdi mme asiakusụn̄. Ete mmọ ewet ntem aban̄a idatesịt oro emi adade ọsọk enye: “Nditọ nnyịn ikpụhu nnyịn. Nnyịn imokop inemesịt ndidọhọ ke ‘nditọ ẹdi udeme Jehovah.’” (Psalm 127:3) Didie ke nditọwọn̄ ẹbọ ufọn ẹto edinam utom uyọhọ ini? Eka nditọ ition ọdọhọ ete: “Utom usiakusụn̄ an̄wam kpukpru nditọ mi ẹnyene n̄kpet n̄kpet itie ebuana ye Jehovah, anam mmọ ẹnen̄ede ẹsịn idem ke ọkpọkpọ ukpepn̄kpọ, an̄wam mmọ ẹfiọk nte ẹkpedade ini mmọ ẹnam n̄kpọ ọniọn̄ ọniọn̄, onyụn̄ an̄wam mmọ ẹkpep ndinam mme n̄kpọ eke spirit ẹdi ebe iso n̄kpọ ke uwem mmọ. Okposụkedi akanade kpukpru mmọ ẹnam ediwak ukpụhọde, owo mmọ ndomokiet ituaha n̄kpọfiọk ke ntak ẹkedụkde utom usiakusụn̄.”
19. Nso ndutịm kaban̄a ini iso ke mme uyen ẹkpekere ẹban̄a ọniọn̄ ọniọn̄?
19 Mme uyen, nso ke mbufo ẹduak ẹban̄a ini iso? Ndi ẹyom ndiwọrọ etop ke ubọkọkọ oro mbufo ẹmekde? Mîdịghe ndi mbufo ẹmeben̄e idem ndinam utom uyọhọ ini edi ubọkọkọ mbufo? Paul eketeme ete: “Ẹtịm ẹkpeme nte mbufo ẹsan̄ade, mbak ẹdisan̄a nte mbon ndisịme edi ẹsan̄a nte mbon ọniọn̄, ẹdedep ifet ẹnọ idem mbufo, koro mme usen ẹdiọkde.” Enye ama adian do ete: “Mmọdo, ẹtre ndidi mme anana-ibuot owo, edi ẹka iso ẹfiọk se uduak Jehovah edide.”—Ephesus 5:15-17.
Ẹsọn̄ọ Ẹda
20, 21. Ke nso usụn̄ ke Jesus ọkọsọn̄ọ ada, ndien didie ke nnyịn ikeme ndikpebe nsọn̄ọnda esie?
20 Oyom ikpebe nsọn̄ọnda Jesus man ikeme ndisan̄a nte enye akasan̄ade. Bible etịn̄ ntem aban̄a nsọn̄ọnda Jesus: “Okposụkedi okodude ke mbiet Abasi, [enye ikekereke] ndiwamade mbọ, oro edi, oyomde ndidi n̄ka ye Abasi. Baba, edi enye ama asana emi ayak onyụn̄ emen mbiet ofụn esịne onyụn̄ edidu ke mbiet owo. Akan oro, ke ini enye okokụtde idemesie ke mbiet owo, enye osụhọde idem onyụn̄ akabade osụk ibuot tutu osụn̄ọ ke n̄kpa, ih, n̄kpa ke eto ndutụhọ.” Jesus ama ọsọn̄ọ ada ọnọ ukara Jehovah ebe ke ndisụk ibuot nnam se Abasi ọkọdọn̄de enye. Enye ama akabade osụk ibuot tutu osụn̄ọ ke n̄kpa ke eto ndutụhọ. Ana nnyịn ‘inyene orụk edu ukere n̄kpọ emi’ inyụn̄ isọn̄ọ ida inam uduak Abasi.—Philippi 2:5-8.
21 Jesus ama ọsọn̄ọ ada n̄ko ye mme anam-akpanikọ apostle esie. Kpa ye mmeme ye unana mfọnmma mmọ, Jesus ama ama mmọ “esịm utịt.” (John 13:1) Kpasụk ntre, nnyịn ikpayakke unana mfọnmma nditọete nnyịn anam nnyịn ikọbọ ke ndikụt ndudue nnọ mmọ.
Ẹnen̄ede Ẹtiene Uwụtn̄kpọ Jesus
22, 23. Nso idi mme ufọn edinen̄ede ntiene uwụtn̄kpọ Jesus?
22 Ke nditịn̄ akpanikọ, nnyịn ikemeke ndinen̄ede nsan̄a ketket ke nde ikpat mfọnmma Uwụtn̄kpọ nnyịn sia nnyịn idide mme anana-mfọnmma owo. Nte ededi, nnyịn imekeme ndidomo nditiene nde ikpat esie ketket. Man inam ntre, oyom ifiọk inyụn̄ isụk ibuot itiene usụn̄ oro Christ adade ọnọ ndausụn̄ inyụn̄ itiene uwụtn̄kpọ esie.
23 Ndikabade ndi mme andikpebe Christ ada ediwak edidiọn̄ edi. Enye anam uwem nnyịn enyene se ọwọrọde onyụn̄ ọnọ uyụhọ, sia nnyịn iwụkde ntịn̄enyịn ke edinam uduak Abasi utu ke uduak idem nnyịn. (John 5:30; 6:38) Anam inyene eti ubieresịt n̄ko, onyụn̄ anam mme owo ẹkpebe nte nnyịn isan̄ade. Jesus ama ọdọhọ kpukpru mbon oro ẹkekpade utom ẹnyụn̄ ẹbiomde ndodobi mbiomo ẹtiene imọ man ẹdikụt nduọkodudu ẹnọ ukpọn̄ mmọ. (Matthew 11:28-30) Edieke nnyịn itienede uwụtn̄kpọ Jesus, nnyịn n̄ko imekeme ndinọ mbon en̄wen nduọkodudu. Ke ntre, ẹyak nnyịn ika iso isan̄a nte Jesus akasan̄ade.
Nte Afo Emeti?
• Didie ke Christ ada mme anditiene enye usụn̄ mfịn?
• Didie ke mbiowo ẹkeme nditiene uwụtn̄kpọ Christ ke nte mmọ ẹkamade odudu oro Abasi ọnọde mmọ?
• Didie ke nnyịn ikeme ndikpebe uwụtn̄kpọ Jesus ke ini mbon en̄wen ẹduede nnyịn?
• Didie ke mme uyen ẹkeme ndinam mme n̄kpọ Obio Ubọn̄ ẹdi akpan n̄kpọ ke uwem mmọ?
[Mme Mbụme Ukpepn̄kpọ]
[Ndise ke page 23]
Mbiowo Christian ẹn̄wam nnyịn itiene ndausụn̄ Christ
[Mme ndise ke page 24, 25]
Mme uyen, nso ndutịm ke mbufo ẹnam man ẹdu uwem Christian oro ọnọde uyụhọ?