“Un̄wam Mi Oto Jehovah”

Akwa Udịmowo Ẹnyịme Ndituak Ibuot Nnọ Jehovah

MME ntịn̄nnịm ikọ Bible oro ẹban̄ade eyo nnyịn ẹma ẹwụt ke mme owo oro ẹtode kpukpru idụt ẹyebụn̄ọ ọkwọkudịm ẹdinyịme edikon̄ utuakibuot Jehovah. Ke uwụtn̄kpọ, Jehovah Abasi ama ada prọfet Haggai etịn̄ ete: “[Nyenyen̄e] kpukpru mme idụt, ndien se mme idụt ẹyomde ẹyedi: ndien nyesịn ubọn̄ ke ufọk emi nyọhọ.” (Haggai 2:7) Isaiah ye Micah ẹma ẹtịn̄ ẹte ke eyo nnyịn—“utịt eyo” m̀mê “akpatre ini”—mme idụt ye mme owo ẹyetuak ibuot ẹnọ Jehovah ke usụn̄ oro enye enyịmede.—Isaiah 2:2-4; Micah 4:1-4.

Ndi mme ntịn̄nnịm ikọ oro ke ẹsu mfịn? Ẹyak ise se itịbede. Ke isua duop kpọt emi ẹbede, se iwakde ibe mbufa owo 3,110,000 ẹkeyak idemmọ ẹnọ Jehovah ke se iwakde ibe idụt 230. Ke nditịm ntịn̄, owo itiokiet ke otu Mme Ntiense Jehovah duop oro ẹnamde utom idahaemi ke ofụri ererimbot ẹkena baptism ke isua duop emi ẹsụk ẹbede. Ke isua 2004, owo 258,845 ẹkedụk esop Christian ẹnyụn̄ ẹyak idem ẹnọ ẹkabarede ẹdi mme asan̄autom Abasi! *

Kpa nte ekedide ke akpa isua ikie, mfịn “ediwak owo emi ẹkabarede ẹdi mme andinịm ke akpanikọ ẹwọn̄ọde ẹtiene Ọbọn̄.” Okposụkedi mîdịghe ibatowo owụt ke ẹnyene edidiọn̄ Abasi, edi emi ọnọ uyarade ke “ubọk Jehovah” odu ye ikọt esie. (Utom 11:21) Nso inam ata ediwak owo ẹtuak ibuot ẹnọ Jehovah? Ndien didie ke emi otụk fi ọkpọkpọ?

Mbon Oro Ẹnyenede Eti Esịt Ẹma Akpanikọ

Jesus eketịn̄ ata nnennen nnennen ete: “Baba owo kiet ikemeke nditiene mi ibọhọke Ete, emi ọkọdọn̄de mi, odụri enye edi.” (John 6:44) Ke ntre, Jehovah edi Enye emi odụride “mbon oro ẹnyenede eti esịt ndinyene nsinsi uwem.” (Utom 13:48) Spirit Abasi ekeme ndinam mme owo ẹkere ẹban̄a unana mmọ ke n̄kan̄ eke spirit. (Matthew 5:3) Esịt oro obiomde owo, ọkpọsọn̄ udọn̄ ndinyene idotenyịn, m̀mê mfịna emi adiade owo idem ekeme ndinam ndusụk owo ẹyom Abasi ẹnyụn̄ ẹkpep ẹban̄a uduak esie kaban̄a ubonowo.—Mark 7:26-30; Luke 19:2-10.

Ediwak owo ẹtuak ibuot ẹnọ Jehovah ke ntak emi ndutịm ukpepn̄kpọ Bible oro ẹsinịmde ke esop Christian an̄wamde mmọ ẹnyene ibọrọ mbụme oro ẹfịnade mmọ.

“Edieke Abasi odude, ntak emi ẹkade iso ndifịk mme owo?” Mbụme oro ama otụhọde Davide, anyam-n̄kpọsọn̄ ibọk ke Italy. Enye ikenen̄ekede inyene udọn̄ ke mme n̄kpọ ẹban̄ade ido ukpono, ntre enye ekesibụp ọkpọsọn̄ mbụme emi man edemede eneni. Enye ọdọhọ ete: “N̄kesikere ke ndinyeneke ibọrọ oro enyenede se ọwọrọde. Edi Ntiense oro ekenyenede nneme ye ami ama enen̄ede enyene ime onyụn̄ ada itien̄wed Bible ọsọn̄ọ se enye eketịn̄de. Nneme oro ama enen̄ede otụk mi.” Mfịn emi, Davide emenen̄ede usụn̄ uwem esie onyụn̄ anam n̄kpọ Jehovah.

Ntak ediyom se uwem ọwọrọde ye uduak  esie anam ediwak owo ẹdụk ikpehe esop Jehovah ke isọn̄. Ke ini abia udọn̄ọ ibuot kiet ke Zagreb ke Croatia okoyomde usọbọ, enye ama aka ebịne abia udọn̄ọ ibuot efen emi ekenen̄erede ọwọrọ etop. Ama akpa enye idem ndikụt ke abiausọbọ oro ọkọnọ imọ nọmba urụk ukopikọ n̄kọk itieutom Mme Ntiense Jehovah ke Zagreb, ọkọrọ ye enyịn̄ Ntiense oro enye ọkọfiọkde. Enye ọkọdọhọ ete: “Sese, mbon oro ẹdin̄wamde fi ẹdi oro. Edieke ndọhọde fi aka ufọkabasi, afo edikụt mme mbiet kpọt—baba owo kiet inyụn̄ ifiọkke n̄kpọ ndomokiet. Ufọkabasi idikemeke ndin̄wam fi. Mmọnọ ediwak owo ẹka ẹbịne Mme Ntiense Jehovah, mmonyụn̄ nnịm ke mmọ ẹyen̄wam fi n̄ko.” Mme Ntiense ẹma ẹka ẹbịne enye ke unyịmesịt ẹnyụn̄ ẹtọn̄ọ ukpepn̄kpọ Bible ye enye. Ke ufan̄ urua ifan̄, abiausọbọ oro okoyomde un̄wam do ama ọdọhọ ye idatesịt ke imọ ndifiọk uduak Abasi amanam uwem imọ enyene uduak.—Ecclesiastes 12:13.

Ke ini mme owo ẹnyenede ọkpọkpọ mfịna, ediwak mmọ ẹmekụt ke akpanikọ Bible kpọt ekeme ndinọ ata ndọn̄esịt. Eyeneren isua itiaba ke Greece ama oto enyọn̄ ọkọm ufọkn̄wed mmọ ediduọ akpa. Ke ọfiọn̄ ifan̄ ẹma ẹkebe, Ntiense iba ẹma ẹsobo ye eka esie ẹnyụn̄ ẹdomo ndida idotenyịn ediset ke n̄kpa ndọn̄ enye esịt. (John 5:28, 29) Oro ama anam n̄wan oro atua. Nditọete iban oro ẹma ẹbụp enye ẹte: “Oyom nnyịn ifiak idi nso usen idisian fi n̄kpọ efen efen iban̄a Bible?” N̄wan oro ama ọbọrọ ete: “Ata idahaemi.” Enye ama ada Mme Ntiense oro aka ufọk esie, mmọ ẹnyụn̄ ẹtọn̄ọ ukpepn̄kpọ Bible ye enye. Ofụri ubon esie ke ẹnam n̄kpọ Jehovah mfịn emi.

Ndi ke Etiene Abuana?

Mme utọ ifiọkutom oro ẹyọyọhọ ofụri ererimbot. Jehovah ke atan̄ akwa otuowo emi ẹtuakde ibuot ẹnọ enye, emi ẹtode ata ediwak idụt obok, onyụn̄ ọnọ mmọ ukpep. Otu emi ẹtode ofụri ererimbot mi ẹnyene inem inem idotenyịn edibọhọ utịt idiọk editịm n̄kpọ emi asan̄ade ekpere mi, nnyụn̄ mbe ndụk edinen obufa ererimbot.—2 Peter 3:13.

Anana-mbiet utom editan̄ mme owo mbok ke asan̄a aka utịt esie ediye ediye ye unana ubiọn̄ọ, ke ntak un̄wam Jehovah. (Isaiah 55:10, 11; Matthew 24:3, 14) Ndi afo ke esịn idem ifịk ifịk ke utom edikwọrọ Obio Ubọn̄ emi? Ke edide ntre, afo emekeme nditịm nnịm ke Abasi ọyọnọ fi ibetedem, afo omonyụn̄ ekeme nditiene ntịn̄ ikọ andiwet psalm emi: “Un̄wam mi oto Jehovah.”—Psalm 121:2, NW.

[Ikọ idakisọn̄]

[Ekebe ke page 8]

ANIE ANAM N̄KỌRI EMI ODU?

“Ke mîbọhọke Jehovah ọbọp ufọk, mmọ eke ẹbọpde ẹkpa utom ikpîkpu ke esịt.” —Psalm 127:1.

“Abasi aka iso ndinam enye ọkọri; ntre ndien idịghe anditọ edi n̄kpọ, inyụn̄ idịghe andibọk ke mmọn̄, edi edi Abasi emi anamde enye ọkọri.”—1 Corinth 3:6, 7.

[Se Ẹwetde ke Ikpọ Abisi ke page 9]

“Baba owo kiet ikemeke nditiene mi ibọhọke Ete, emi ọkọdọn̄de mi, odụri enye edi.”—JOHN 6:44