Anie ke Jesus Christ Edi?

KERE nte idem akaduaide akparawa Jew oro ekekerede Andrew akpa ini oro enye okokopde ikọ Jesus eyen Nazareth! Bible ọdọhọ ke Andrew ama efehe ebịne eyeneka esie ọkọdọhọ ete: “Nnyịn imokụt Messiah [m̀mê, Christ].” (John 1:41) Ke usem Hebrew ye Greek, ikọ oro ẹsiwakde ndikabade “Messiah” ye “Christ” ẹwọrọ “Enye Oro Ẹyetde Aran.” Jesus ekedi Enye Oro Ẹyetde Aran, m̀mê Enye Oro Abasi Emekde—kpa Ọbọn̄ oro ẹken̄wọn̄ọde. (Isaiah 55:4) N̄wed Abasi ọdọn̄ọ mme ntịn̄nnịm ikọ oro ẹban̄ade enye ndien mme Jew ẹketetie ẹbet enye ini oro.—Luke 3:15.

Nnyịn isan̄a didie ifiọk ke Jesus ekenen̄ede edi Enye Oro Abasi Emekde? Ọfọn, kere se iketịbede ke isua 29 E.N. ke ini Jesus ekedide isua 30. Enye ama ebịne John Andinịm Owo Baptism ete enịm imọ baptism ke Akpa Jordan. Bible ọdọhọ ete: “Ke Jesus ama akana baptism kpa idaha oro enye ọwọrọ ke mmọn̄ ọdọk; ndien, sese! enyọn̄ eberede, ndien enye okụt spirit Abasi osụhọrede nte ibiom edidoro enye ke idem. Sese! N̄ko, uyo oto ke enyọn̄ ọdọhọ ete: ‘Emi edi edima Eyen mi, emi ami nnyịmede.’” (Matthew 3:16, 17) Ke ama okokop nte Abasi enyịmede Jesus, ndi John ekpekenyene eyịghe ekededi ke Jesus ekedi Enye Oro Abasi Emekde? Ebede ke Jehovah Abasi ndin̄wan̄a edisana spirit esie nduọk Jesus, Enye ama eyet enye aran, m̀mê emek enye, ete edi Edidem Obio Ubọn̄ Esie. Mmọdo, Jesus ama akabade edi Jesus Christ, m̀mê Jesus Oro Ẹyetde Aran. Nte ededi, didie ke Jesus ekedi Eyen Abasi? Enye ọkọwọrọ ini ewe?

Ediwọrọ Esie Okodu “Tutuko”

Ẹkeme ndibahade uwem Jesus nsịn ke ikpehe ita. Akpa ọkọtọn̄ọ ata anyan ini mbemiso enye akamanade nte owo. Micah 5:2 ọdọhọ ke ediwọrọ esie ‘okodu tutuko, kpa ke eyo eset.’ Jesus ke idemesie ọkọdọhọ ete: “Ami nto ke ikpehe eke enyọn̄”—oro edi, heaven. (John 8:23) Enye okodu nte ọkpọsọn̄ owo eke spirit ke heaven.

Sia kpukpru edibotn̄kpọ ẹnyenede ntọn̄ọ, odu ini emi Abasi okodude ikpọn̄. Nte ededi, ke anana-ibat isua emi ẹkebede, Abasi ama ọtọn̄ọ ndibot n̄kpọ. Anie edi akpa owo emi enye okobotde? Akpatre n̄wed Bible ọdọhọ ke Jesus edi “ntọn̄ọ edibot n̄kpọ Abasi.” (Ediyarade 3:14) Jesus edi “akpan ke otu kpukpru edibotn̄kpọ.” Oro edi ntre “koro oto ke enye ke ẹkebot kpukpru n̄kpọ eken ke heaven ye ke isọn̄, se ẹkemede ndikụt ye se owo mîkemeke ndikụt.” (Colossae 1:15, 16) Ih, Jesus edi n̄kukụre owo emi Abasi okobotde nnennen nnennen ke idemesie. Mmọdo, ẹkot enye “ikpọn̄-ikpọn̄ edibon Eyen.” (John 3:16) Akpan emi enyene n̄ko udorienyịn̄ emi, “Ikọ.” (John 1:14) Ntak-a? Koro mbemiso enye akamanade nte owo, enye ekesitịn̄ ikọ ke heaven ke ibuot Abasi.

“Ikọ” okodu ye Jehovah Abasi “ke editọn̄ọ,” ke ini ‘ẹkebotde enyọn̄ ye isọn̄.’ Enye ke Abasi ọkọdọhọ ete: “Ẹyak nnyịn inam owo isịn ke mbiet nnyịn.” (John 1:1; Genesis 1:1, 26) Akpan Jehovah okodu enye ke n̄kan̄ anam utom ifịk ifịk ye enye. Ke Mme N̄ke 8:22-31, ẹwụt ke enye ọkọdọhọ: “[N̄kodu ye Andibot] ke n̄kan̄, eyen emi enye ọkọde: n̄konyụn̄ ndi se idatde enye esịt ofụri usen; ndara ke iso esie kpukpru ini.”

 Anaedi Jehovah Abasi ye ikpọn̄-ikpọn̄ edibon Eyen esie ẹkemehe ye kiet eken didie ntem nte mmọ ẹkenamde utom ọtọkiet! N̄kpet n̄kpet itie ebuana oro enye ekenyenede ye Jehovah ke anana-ibat isua ama enen̄ede otụk Eyen Abasi. Okopitem Eyen emi ekebiet Ete esie, kpa Jehovah. Ke nditịm ntịn̄, Colossae 1:15 okot Jesus “mbiet Abasi oro enyịn mîkwe.” Emi edi ntak kiet oro anade ifiọk Jesus edieke anade iyụhọ udọn̄ eke spirit nnyịn ye ndammana udọn̄ oro inyenede ndifiọk Abasi. Kpukpru n̄kpọ oro Jesus akanamde ke ini enye okodude ke isọn̄ ẹdi ukem ukem se Jehovah okoyomde enye anam. Ntre, ndifiọk Jesus ọwọrọ n̄ko ndifiọk Jehovah. (John 8:28; 14:8-10) Edi Jesus akasan̄a didie edidu ke isọn̄?

Uwem Esie nte Owo

Udiana ikpehe uwem Jesus ọkọtọn̄ọ ke ini Abasi ọkọnọde enye edi isọn̄. Jehovah akanam emi ebe ke ndisio uwem Jesus ke heaven ndisịn ke idịbi Mary, anam-akpanikọ eyenan̄wan Jew emi mîkọfiọkke erenowo. Jesus ama ọfọn ama sia enye mîkenyeneke ata ete ke isọn̄. Edisana spirit, m̀mê anamutom odudu Jehovah ama odoro Mary ke idem, odudu Abasi onyụn̄ “ofụk” enye, anam enye oyomo idịbi ke utịbe utịbe usụn̄. (Luke 1:34, 35) Ke ntem, Mary akaman mfọnmma eyen. Nte eyen oro Joseph anamusọ ekemende akama, ẹkebọk Jesus ke ufọk ubuene, enye okonyụn̄ edi akpa eyen.—Isaiah 7:14; Matthew 1:22, 23; Mark 6:3.

Owo ifiọkke ekese n̄kpọ iban̄a ini uyen Jesus, edi enyene n̄kpọ kiet emi edide n̄wọrọnda. Ke ini Jesus ekedide isua 12, ete ye eka esie ẹma ẹda enye ẹka Jerusalem nte ẹsikade ke isua ke isua man ẹkedụk usọrọ Passover. Enye ama abiat ekese ini do ke temple, “etiede ke ufọt mme andikpep akpan̄ utọn̄ ọnọ mmọ onyụn̄ obụp mmọ mbụme.” Akan oro, ‘idem ama ọdọdiọn̄ akpa kpukpru mmọ emi ẹkekpan̄de utọn̄ ẹnọ enye aban̄a ifiọk ye mme ibọrọ esie.’ Ih, idịghe mme mbụme oro ẹnamde owo ekere n̄kpọ ke n̄kan̄ eke spirit kpọt ke ekpri Jesus okobụp, edi ama ọnọ nti ibọrọ oro ẹkekpade mbon en̄wen idem. (Luke 2:41-50) Nte enye ọkọkọride ke Nazareth, enye ama ekpep utomusọ; nte eyịghe mîdụhe, ekekpep emi oto Joseph emi ekemende enye akama.—Matthew 13:55.

Jesus okodụn̄ ke Nazareth tutu esịm isua 30. Ekem, enye ama aka ebịne John ete enịm imọ baptism. Ke Jesus ama akana baptism, enye ama ọtọn̄ọ ifịk ifịk utom ukwọrọikọ esie. Ke ufan̄ isua ita ye ubak, enye ama asan̄a ke ofụri obio emana esie atan̄a eti mbụk Obio Ubọn̄ Abasi. Enye ama ọsọn̄ọ ke Abasi ọkọdọn̄ imọ. Didie? Ke ndinam ediwak utịben̄kpọ—mme utom odudu oro ẹkekande ukeme owo.—Matthew 4:17; Luke 19:37, 38.

Jesus ekedi owo oro ekenen̄erede ekere aban̄a mme owo. Nte enye ekesede onyụn̄ anamde n̄kpọ ye mme owo ama owụt ke enye ama enen̄ede ekere aban̄a mmọ. Mme owo ẹma ẹma Jesus sia enye ọkọfọnde ido onyụn̄ edide se ẹkemede ndisan̄a n̄kpere.  Idem nditọwọn̄ ẹma ẹnyene ifụre ndisan̄a n̄kpere enye. (Mark 10:13-16) Jesus ama ọnọ iban ukpono, okposụkedi ndusụk owo ke eyo esie ẹkesede mmọ ke usụhọde. (John 4:9, 27) Enye ama an̄wam mme ubuene ye mbon oro ẹfịkde ‘ẹkụt nduọkodudu ẹnọ ukpọn̄ mmọ.’ (Matthew 11:28-30) Ukpepn̄kpọ esie ama an̄wan̄a, emem onyụn̄ enyene ufọn. Ndien se enye ekekpepde okowụt udọn̄ ofụri esịt oro enye ekenyenede ndinam mme andikpan̄ utọn̄ nnọ enye ẹfiọk ata Abasi, kpa Jehovah.—John 17:6-8.

Jesus ama ada edisana spirit Abasi anam mme utịben̄kpọ, ke ntem, ọkọkde mme owo udọn̄ọ mmọ ke ntak mbọm. (Matthew 15:30, 31) Ke uwụtn̄kpọ, owo emi ọdọn̄ọde akpamfia ama edi edidọhọ enye ete: “Edieke afo akam amade, emekeme ndinam mi nsana.” Nso ke Jesus akanam? Enye ama anyanarede ubọk otụk eren oro, ete: “Mmama. Sana.” Idem ama onyụn̄ ọsọn̄ eren oro.—Matthew 8:2-4.

Kere n̄ko ban̄a ini emi otuowo ẹkedide ẹdidu ye Jesus ke ofụri usen ita inyụn̄ idiaha udia. Enye ama atua mmọ mbọm onyụn̄ ọnọ “owo tọsịn inan̄, isịneke iban ye n̄kpri nditọwọn̄” udia ke utịbe utịbe usụn̄. (Matthew 15:32-38) Isan̄ efen, Jesus ama etre oyobio emi ekedịghede uwem mme ufan esie. (Mark 4:37-39) Enye ama anam mbon oro ẹkekpade ẹset. * (Luke 7:22; John 11:43, 44) Jesus ama akam enyịme ndinọ mfọnmma uwem esie man otodo anana-mfọnmma ubonowo ekpenyene idotenyịn kaban̄a ini iso. Nso akwa ima ke Jesus akama mme owo ntem!

Jesus Odu M̀mọ̀n̄ Idahaemi?

Jesus akakpa ke eto ndutụhọ ke ini ekedide isua 33 ye ubak. * Edi n̄kpa oro ikedịghe utịt uwem esie. Ọyọhọ ikpehe uwem esie ita ọkọtọn̄ọ ke n̄kpọ nte usen ita ẹma ẹkebe ke ini Jehovah Abasi akanamde enye eset nte owo eke spirit. Ke Jesus ama ekeset, enye ama owụt ata ediwak owo idem ke akpa isua ikie E.N. (1 Corinth 15:3-8) Ke oro ebede, enye ama “osụhọde etetie ke ubọk nnasia Abasi,” ebet ndida ubọn̄. (Mme Hebrew 10:12, 13) Ke ini oro ama ekedi edisịm, Jesus ama ọtọn̄ọ ndikara nte Edidem. Ntem, nnyịn ikpada Jesus didie mfịn? Ndi nnyịn ikpada enye nte owo emi ọbọde ndutụhọ, emi ẹnyụn̄ ẹyomde ndiwot? Mîdịghe ndi ikpada enye nte owo emi ẹkpetuakde ibuot ẹnọ? Idahaemi Jesus idịghe owo, inyụn̄ idịghe Ata Ọkpọsọn̄ Abasi. Utu ke oro, enye edi ọkpọsọn̄ edibotn̄kpọ eke spirit, Edidem oro akarade. Idibịghike, enye ayatat ukara esie esịm isọn̄ nnyịn oro afanikọn̄ ọyọhọde.

Ediyarade 19:11-16 ada ndamban̄a ikọ etịn̄ nte Jesus Christ emi edide edidem etiede ke afia enan̄-mbakara edi ndibiere ikpe nnyụn̄ n̄n̄wana ekọn̄ ke edinen ido. Enye enyene ‘anyan edisọp akan̄kan̄ man ada ekpen̄e mme idụt.’ Ih, Jesus ayada akwa odudu esie osobo ndiọi owo. Edi nso kaban̄a mbon oro ẹdomode ndikpebe uwụtn̄kpọ oro enye ekenịmde ke ini okodude ke isọn̄? (1 Peter 2:21) Enye ye Ete esie ẹyenịm mmọ uwem ẹbe “ekọn̄ akwa usen Abasi Ata Ọkpọsọn̄”—emi ẹwakde ndikot Armageddon—man ẹkpedu uwem ke nsinsi nte mme andidu ke isọn̄ ke idak Obio Ubọn̄ Abasi eke heaven.—Ediyarade 7:9, 14; 16:14, 16; 21:3, 4.

Ke ini ukara emem esie, nso utịben̄kpọ ke Jesus edinam ntem ọnọ ofụri ubonowo! (Isaiah 9:6, 7; 11:1-10) Enye ọyọkọk udọn̄ọ onyụn̄ etre n̄kpa. Abasi ayada Jesus anam anana-ibat owo ẹset, onyụn̄ ọnọ mmọ ifet ndidu uwem ke nsinsi ke isọn̄. (John 5:28, 29) Ọsọsọn̄ ndifiọk nte uwem edinemde iketre ke Obio Ubọn̄. Do, edi ata akpan n̄kpọ nnyịn ndika iso n̄kọ ifiọk Bible nnyụn̄ nnen̄ede mfiọk Jesus Christ.

[Mme Ikọ idakisọn̄]

 [Ekebe ke page 7]

NDI JESUS EDI ATA ỌKPỌSỌN̄ ABASI?

Ediwak mbon ido ukpono ẹdọhọ ke Jesus edi Abasi. Ndusụk ẹte ke Abasi edi Ita-ke-Kiet. Nte ukpepn̄kpọ emi ọdọhọde, “Ete edi Abasi, Eyen edi Abasi, Edisana Spirit onyụn̄ edi Abasi, ndien kpa ye oro idịghe Abasi ita ẹdu edi Abasi kiet.” Ẹdọhọ ke owo ita emi “ẹdu ke nsinsi ẹnyụn̄ ẹdi n̄ka-n̄ka.” (The Catholic Encyclopedia) Nte utọ ekikere oro ẹnen?

Jehovah Abasi edi Andibot. (Ediyarade 4:11) Enye inyeneke ntọn̄ọ m̀mê utịt; enye onyụn̄ edi ata ọkpọsọn̄. (Psalm 90:2) Edi Jesus enyene ntọn̄ọ. (Colossae 1:15, 16) Ke ọdọhọde ke Abasi edi Ete imọ, Jesus ọkọdọhọ ete: “Ete omokpon akan mi.” (John 14:28) Jesus ama ọdọhọ n̄ko ke odu mme n̄kpọ emi Ete imọ ikpọn̄ ọfiọkde edi imọ m̀mê mme angel ifiọkke.—Mark 13:32.

Akan oro, Jesus ama ọbọn̄ akam ọnọ Ete esie ete: “Okûdi ke uduak mi, edi yak uduak fo ada itie.” (Luke 22:42) Anie ke Jesus ọkọbọn̄ akam ọnọ edieke mîdịghe Owo emi okponde akan enye? N̄ko-n̄ko, Abasi akanam Jesus eset, idịghe Jesus akanam idemesie eset. (Utom 2:32) Ke akpanikọ, Ete ye Eyen ikedịghe n̄ka mbemiso Jesus ekedide isọn̄ m̀mê ke ini enye okodude ke isọn̄. Nso kaban̄a emi Jesus ama ekeset aka heaven mi? Akpa Corinth 11:3 ọdọhọ ete: “Abasi onyụn̄ edi ibuot ọnọ Christ.” Ke akpanikọ, Eyen edidu ke idak Ete kpukpru ini. (1 Corinth 15:28) Ke ntem, N̄wed Abasi owụt ke Jesus idịghe Ata Ọkpọsọn̄ Abasi. Utu ke oro, enye edi Eyen Abasi.

Amaedi edisana spirit—kpa inua-okot ọyọhọ owo ita ke Abasi-Ita-ke-Kiet—enye idịghe owo. Andiwet psalm ọkọdọhọ ke akam oro enye ọkọbọn̄de ọnọ Abasi ete: “Afo ọdọn̄ spirit fo ọwọrọ, mmọ ẹboro.” (Psalm 104:30) Spirit emi ke idem esiemmọ idịghe Abasi; edi anamutom odudu emi enye ọnọde ọwọrọ m̀mê emi enye adade anam se ededi oro enye amade. Abasi akada enye obot ikpaenyọn̄, isọn̄, ye kpukpru odu-uwem n̄kpọ. (Genesis 1:2) Abasi akada edisana spirit esie ọnọ iren oro ẹkewetde Bible, odudu. (2 Peter 1:20, 21) Mmọdo, Abasi-Ita-ke-Kiet idịghe ukpepn̄kpọ N̄wed Abasi. * Bible ọdọhọ ete: “Jehovah Abasi nnyịn edi Jehovah kiet.”—Deuteronomy 6:4.

[Ikọ idakisọn̄]

[Ndise ke page 5]

Ke ini Jesus akanade baptism, enye ama akabade edi Enye Oro Abasi Emekde

[Ndise ke page 7]

Jesus akada ofụri ukeme esie anam utom Abasi

[Ndise ke page 7]

Jesus edi ọkpọsọn̄ Edidem idahaemi