Biọn̄ọ Ukwan̄ Ekikere!

KE INI afanikọn̄ ekesịmde Job, ufan esie ita—Eliphaz, Bildad, ye Zophar—ẹma ẹdi ndise enye. Mmọ ẹkedi nditua ye enye nnyụn̄ ndọn̄ enye esịt. (Job 2:11) Owo oro ekenen̄erede ọwọrọ iso akan ke otu mmọ, eyedi enye okonyụn̄ okpon akan, ekedi Eliphaz. Enye ekebem iso etịn̄ ikọ, ndien enye okonyụn̄ etịn̄ ikọ akan. Eliphaz eketịn̄ ikọ utịm ikata, edi ofụri se enye eketịn̄de okowụt nso?

Eliphaz ama etịn̄ aban̄a owo eke spirit oro enye okokụtde, ete: “[“Spirit,” NW] kiet asan̄a mi ke iso ebe; idet onyụn̄ enen̄ede ada mi ke idem: Enye atuak ada, edi ndiọn̄ọke nte etiede: mbiet n̄kpọ odu mi ke enyịn, ndien n̄kop sụn̄-sụn̄ uyo.” (Job 4:15, 16) Nso orụk spirit ikanam Eliphaz etịn̄ se enye eketịn̄de? Idiọk usụn̄ oro enye eketịn̄de ikọ enen̄ede owụt ke spirit oro ikedịghe edinen angel Abasi. (Job 4:17, 18) Ekedi idiọk edibotn̄kpọ eke spirit. Edieke mîkpekedịghe ntre, ntak emi Jehovah akasuade ọnọ Eliphaz ye nsan̄a esie iba ọdọhọ ke mmọ ẹkesu nsu? (Job 42:7) Ih, demon akanam Eliphaz etịn̄ se enye eketịn̄de. Ikọ esie ikekemke ye ekikere Abasi.

Nso ke ikọ Eliphaz owụt? Ntak emi edide akpan n̄kpọ ndikpeme idem mbiọn̄ọ ukwan̄ ekikere? Ndien nso ke ikpanam man ibiọn̄ọ ukwan̄ ekikere?

“Enye Ibuọtke Idem ye Ikọt Esiemmọ”

Ke ofụri utịm ikata oro Eliphaz eketịn̄de ikọ, enye ọkọdọhọ ke Abasi oyom n̄kpọ akaha oto nnyịn tutu idụhe se ededi oro mme asan̄autom esie ẹnamde oro enemde enye esịt. Enye ọkọdọhọ Job ete: “Sese, enye ibuọtke idem ye ikọt esiemmọ; enye onyụn̄ odori mme angel esie ndudue.” (Job 4:18) Ekem Eliphaz ama etịn̄ aban̄a Abasi ete: “Sese, Enye ibuọtke idem esie ye edisana ikọt esiemmọ, mme heaven inyụn̄ isanake ke enyịn esiemmọ.” (Job 15:15) Ndien enye ama obụp ete: “Nte enem Abasi Ibom esịt koro afo enende?” (Job 22:3) Bildad ama enyịme ye Eliphaz ete: “Sese, ọfiọn̄ n̄ko: enye iyamake: ntantaọfiọn̄ n̄ko inyụn̄ isanake [Abasi] ke enyịn.”—Job 25:5.

Nnyịn ikpenyene ndikpeme idem mbiọn̄ọ utọ ekikere oro. Utọ ekikere oro ekeme ndinam nnyịn ikere ke se Abasi oyomde oto nnyịn ẹwak ẹkaha. Ekikere emi ekeme ndinen̄ede mbiat itie ebuana nnyịn ye Jehovah. Akan oro, edieke nnyịn inyenede utọ ekikere emi, nnyịn idinam n̄kpọ didie ke ini ẹnọde nnyịn ntụnọ? Utu ke ndisụhọde idem mbọ ntụnọ, nnyịn imekeme ndikam ‘nyat esịt ye Jehovah,’ nnyụn̄ ntọhọ ye enye. (Mme N̄ke 19:3) Emi ekpenen̄ede abiat itie ebuana nnyịn ye Abasi!

“Nte Owo Ekeme Ndidori Abasi Udori?”

Ndidọhọ ke se Abasi oyomde oto nnyịn ẹwak ẹkaha etie nte ndidọhọ ke enye ọdọhọ  ke owo iwọrọke n̄kpọ. Ke ini Eliphaz eketịn̄de ikọ ọyọhọ utịm ikata, enye ama obụp ete: “Nte owo ekeme ndidori Abasi udori, koro enyene-ibuot owo odorode idem esie udori?” (Job 22:2) Ikọ Eliphaz okowụt ke owo iwọrọke n̄kpọ ke iso Abasi. Kpasụk ntre, Bildad ama obụp ete: “Owo anam didie enen ye Abasi? Owo emi n̄wan amande onyụn̄ anam didie asana?” (Job 25:4, 5) Ikọ emi owụt ke Job, kpa ikpîkpu owo ikpedehede ikere ke imenen ke iso Abasi.

Ndusụk owo mfịn ẹnyene etikwo etikwo ekikere ẹban̄a idemmọ. Se isinamde owo enyene utọ ekikere emi aban̄a idemesie ekeme ndidi nte ẹkebọkde enye, mme afanikọn̄ emi enye osobode mîdịghe, usua eke orụk m̀mê eke ekpụk. Edi, Satan ye mme demon esie n̄ko ẹma ndinam owo ekere ke imọ iwọrọke n̄kpọ. Edieke mmọ ẹkemede ndinam owo ekere ke se ededi oro imọ inamde inemke Ata Ọkpọsọn̄ Abasi esịt, utọ ekikere emi ekeme ndinam enen̄ede etie nte owo inyeneke idotenyịn. Nte ini akade, utọ owo emi ekeme ndifiọrọ n̄kpọn̄ usụn̄, idem ọwọn̄ọrede ọkpọn̄ Abasi uwem.—Mme Hebrew 2:1; 3:12.

Usọn̄ ye udọn̄ọ ẹkeme ndibiọn̄ọ nnyịn ndinam se ikpanamde. Se nnyịn inamde ke utom Obio Ubọn̄ ekeme ndinen̄ede n̄kpri ke imende idomo ye se ikesinamde ke ini ikedide n̄kparawa, ikokopde nsọn̄idem, ikonyụn̄ inen̄erede ikop idem. Enen̄ede odot ifiọk ke Satan ye mme demon esie ẹyom nnyịn ikere ke se inamde ikemeke ndinem Abasi esịt! Ana nnyịn ibiọn̄ọ utọ ekikere oro.

Nte Ikemede Ndibiọn̄ọ Ukwan̄ Ekikere

Kpa ye ofụri ndutụhọ oro Satan kpa Devil okotụhọrede Job, Job ọkọdọhọ ete: “Ndisioho mfọn-mma ke idem mi mfep tutu ndikpa.” (Job 27:5) Ke ntak ima oro enye akamade Abasi, Job ama ebiere ndika iso nsọn̄ọ nda inamke n̄kpọ m̀mê nso iketịbe, ndien enye ikayakke n̄kpọ ndomokiet okpụhọde ubiere esie. Ata akpan n̄kpọ oro ekemede ndin̄wam nnyịn ibiọn̄ọ ukwan̄ ekikere edi oro. Ana nnyịn inen̄ede ifiọk nte Abasi amade owo inyụn̄ inen̄ede iwụt esịtekọm iban̄a oro. Ana nnyịn inen̄ede ima Abasi n̄ko. Ndikpep Ikọ Abasi kpukpru ini nnyụn̄ nda akam ntie n̄kere se ikpepde ekeme ndin̄wam nnyịn inam emi.

Ke uwụtn̄kpọ, John 3:16 ọdọhọ ete: “Abasi ama enen̄ede ama ererimbot tutu enye ọnọ ikpọn̄-ikpọn̄ edibon Eyen esie.” Jehovah enen̄ede ama ubonowo, ndien nte enye anamde n̄kpọ ye mme owo ke anyan ini owụt emi. Nditie n̄kere nte Jehovah akanamde n̄kpọ ye mme owo ke eset ekpenyene ndinam nnyịn inen̄ede iwụt esịtekọm inọ enye inyụn̄ inen̄ede ima enye; emi ayan̄wam nnyịn ibiọn̄ọ ukwan̄ m̀mê ndiọi ekikere ekededi.

Kere nte Jehovah akanamde n̄kpọ ye Abraham ke ini Enye okoyomde ndisobo Sodom ye Gomorrah. Abraham ama obụp Jehovah mbụme utịm ikatiaita aban̄a ubiereikpe Esie. Jehovah ikedehede iyat esịt m̀mê ndiwụt ke imakpa mba ndien. Utu ke oro, ibọrọ esie ẹma ẹdọn̄ Abraham esịt. (Genesis 18:22-33) Ke Abasi ama akanyan̄a Lot ye ubon esie osio ke Sodom, Lot ama eben̄e ete ifehe ika obio oro okodude ke mbọhọ oro utu ke ndika obot oro ẹkedọhọde imọ ika. Jehovah ama ọbọrọ ete: “Sese, mmenyịme fi n̄kpọ emi nde, ndinyụn̄ nsoboke obio emi afo ọdọhọde.” (Genesis 19:18-22) Ndi mbụk emi owụt ke Jehovah edi andikara oro oyomde n̄kpọ akaha, mîmaha ima, onyụn̄ akarade ukara ufịk? Baba. Mbụk oro owụt se enye enen̄erede edi—ima ima, ọfọn-ido Andikara oro esituade owo mbọm onyụn̄ enyenede eti ibuot.

Nte Abasi akanamde n̄kpọ ye Aaron, David, ye Manasseh eke Israel eset ẹwụt ke Enye idịghe okụt-ndudue oro owo mîkemeke ndinem enye esịt. Aaron ama anam ikpọ idiọkn̄kpọ ita. Enye akanam eyen enan̄ o-gold, adiana ye Miriam eyeneka esie osụk Moses uyo, ikonyụn̄ ikponoke Abasi ke Meribah. Kpa ye oro, Jehovah ama okụt eti n̄kpọ ke idem Aaron oro akanamde enye ayak Aaron aka iso anam  utom nte akwa oku tutu akpa.—Exodus 32:3, 4; Numbers 12:1, 2; 20:9-13.

Edidem David ama anam ikpọ idiọkn̄kpọ ke ini enye akakarade. Enye ama esịn efịbe, odụk odu man ẹwot owo oro mîduehe, onyụn̄ abat owo emi ibet mîkọdọhọke ẹbat. Nte ededi, Jehovah ama okụt ke David akabade esịt, ntre enye ama ọsọn̄ọ ada ke ediomi Obio Ubọn̄ oro enye akanamde ye David, ebe ke ndiyak enye aka iso akara tutu esịm usen n̄kpa esie.—2 Samuel 12:9; 1 Chronicles 21:1-7.

Edidem Manasseh eke Judah ama anam itieuwa ọnọ Baalim, ọfọp nditọ esie ke ikan̄, esịn udọn̄ ọnọ ubre idiọn̄, onyụn̄ anam mme itieuwa ọnọ mme nsunsu abasi ke okụre temple. Nte ededi, ke enye ama ekenen̄erede akabade esịt, Jehovah ama efen ọnọ enye, osio enye ke ntan̄mfep, onyụn̄ afiak ọnọ enye itie ubọn̄. (2 Chronicles 33:1-13) Ndi emi owụt ke Abasi edi owo oro owo ndomokiet mîkemeke ndinem enye esịt? Baba!

Andidori Abasi Ikọ Akam Edi Idiọkowo

Ikpakpaha nnyịn idem ndifiọk ke Satan akam enen̄ede edi se enye odoride Jehovah. Satan ọsọn̄ ido onyụn̄ oyom n̄kpọ akaha oto owo. Ẹkeme ndikụt emi in̄wan̄-in̄wan̄ ke nte ẹkesiwade nditọwọn̄ ẹnọ mme nsunsu abasi ke eset. Nditọ Israel oro ẹkedide mbon mfiakedem ẹma ẹsifọp nditọiren ye nditọiban mmọ ke ikan̄—kpa n̄kpọ emi mîkakam idụkke-dụk Jehovah ke esịt.—Jeremiah 7:31.

Satan edi okụt-ndudue, idịghe Jehovah. Ediyarade 12:10 okot Satan “andidori nditọete nnyịn ikọ . . . , emi odoride mmọ ikọ uwemeyo ye okoneyo ke iso Abasi nnyịn!” Ke n̄kan̄ eken, kop se andiwet psalm ọkọkwọde aban̄a Jehovah: “O Jehovah, afo ekpese mme idiọk ido, O Ọbọn̄, anie ekpekeme ndida? Koro edidahado enyenede fi.”—Psalm 130:3, 4.

Ini Oro Owo Mîdinyeneke Aba Ukwan̄ Ekikere

Mme angel ẹkenem esịt didie ntem ke ini ẹkesiode Satan kpa Devil ye mme demon esie ẹfep ke heaven! (Ediyarade 12:7-9) Ke oro ebede, ndiọi spirit emi ikekemeke aba nditịmede se mme angel Jehovah ke heaven ẹkenamde.—Daniel 10:13.

Mme andidụn̄ isọn̄ ẹyedat esịt ke n̄kpet ini iso. Ibịghike, angel oyoto heaven akama ukpọhọde editụn̄ọ ukpe ye n̄kpọkọbi edikọbi Satan ye mme demon esie onyụn̄ otop mmọ ọdọn̄ ke editụn̄ọ ukpe oro mmọ mîdikemeke ndinam baba n̄kpọ kiet. (Ediyarade 20:1-3) Nso inemesịt ke nnyịn idinyene ntem ini oro!

Kan̄a ke emi, ana nnyịn ikpeme ibiọn̄ọ ukwan̄ ekikere. Ini ekededi oro ikụtde ke ukwan̄ m̀mê idiọk ekikere ẹnyọni ẹdụk nnyịn esịt, nnyịn ikpenyene ndibiọn̄ọ utọ ekikere oro ebe ke ndikere mban̄a nte Jehovah amade nnyịn. Ke inamde ntre, ‘emem Abasi emi akande kpukpru ekikere eyekpeme esịt ye ukeme ukeren̄kpọ nnyịn.’—Philippi 4:6, 7.

[Ndise ke page 26]

Job ama ọbiọn̄ọ etikwo etikwo ekikere

[Ndise ke page 28]

Lot ama ọfiọk ke Jehovah edi Andikara oro enyenede eti ibuot