Mme Mbụme Ẹtode Mme Andikot

Ndi ndibre mbre kọmputa oro ẹwụtde afai ekeme ndibiat itie ebuana owo ye Jehovah?

Edidem David eke Israel eset ekewet ete: “Jehovah odomo edinen owo: ndien ama edi idiọk owo, ye owo eke amade afai, ukpọn̄ esie asua mmọ.” (Psalm 11:5) Ikọedinam Hebrew oro ẹkabarede “asua” ke itien̄wed emi ekeme n̄ko ndiwọrọ “owo emi edide asua.” Ntre, owo ekededi oro amade afai anam idem esie asua Abasi. Mmọdo, mbụme oro ikpobụpde edi: Ndi ndusụk mbre kọmputa ẹkeme ndinam owo ama afai?

Mbre afai ke kọmputa enen̄ede otoro edikama n̄kpọ afai. Mbre emi esiwak ndikpep andibre nte ẹn̄wanade ekọn̄. Magazine kiet ẹkotde The Economist ọdọhọ ete: “Mbonekọn̄ America ẹnen̄ede ẹda mbre kọmputa ẹbọ ukpep. Ndusụk mbre kọmputa oro mbonekọn̄ emi ẹsidade ẹbọ ukpep ẹdu idahaemi ke urua.”

Edi akpanikọ, idịghe ata owo ke mbon oro ẹbrede mbre afai ke kọmputa ẹsinọmọ. Edi nso ke utọ edinam unọ idem inemesịt emi owụt aban̄a se idude ke esịt andibre? (Matthew 5:21, 22; Luke 6:45) Didie ke afo akpada owo oro amade ndibre mbre kọmputa oro ẹkịmde owo ke ikwa, ẹtopde owo ke ikan̄, ẹbiomode owo ndo, m̀mê ẹkam ẹwotde-wot owo? Nso edieke owo emi abiatde ediwak hour kpukpru urua esịn idem ebre mbre afai emi, akam ọtọn̄ọde ndinyene mbumehe mbre emi? Idem edieke mûdudọhọke ke enye enen̄ede edi owo afai, afo ọyọdọhọ ke enye ama afai, kpa nte owo oro esede ndise idan̄ amade oburobụt udọn̄.—Matthew 5:27-29.

Jehovah asua owo oro amade afai adan̄a didie? David ọkọdọhọ ke Jehovah enen̄ede “asua” orụk owo oro. Ke eyo Noah, Jehovah ama owụt adan̄a nte imọ ikenen̄erede isua mbon oro ẹmade afai. Jehovah ọkọdọhọ Noah ete: “Utịt kpukpru obụk owo emedi ke iso mi, koro oto mmọ afai ọyọhọ ke isọn̄; ndien, sese, ami mmọn̄ nsobo mmọ ke isọn̄.” (Genesis 6:13) Ata Abasi okosobo ofụri ubonowo ke ntak afai. Enye akanyan̄a Noah ye ubon esie kpọt—oro edi owo itiaita oro mîkamaha afai.—2 Peter 2:5.

Mbon oro ẹyomde ndidi ufan Jehovah ẹda “ofụt mmọ ẹdom n̄kpọ ufụn̄ isọn̄, ẹda eduat mmọ ẹdom ikwa udiọn̄ vine.” Utu ke ndikpep ndima afai, mmọ ikam “ikpepke aba ekọn̄.” (Isaiah 2:4) Edieke iyomde ndika iso ndi mme ufan Abasi utu ke mme asua esie, ana nnyịn ‘iwọn̄ọde ikpọn̄ se idiọkde inyụn̄ inam se ifọnde.’ Ana ‘iyom emem inyụn̄ ibịne enye.’—1 Peter 3:11.

Nso ke ikpanam edieke edide ima isibre mbre afai ke vidio? Do, ana nnyịn inen̄ede ibiere ndinem Jehovah esịt ebe ke nditre ndinam se enye asuade. Ih, ana ibọn̄ akam iben̄e Abasi spirit esie man an̄wam nnyịn itre utọ idiọk edu oro abiatde idaha eke spirit owo do. Nnyịn imekeme nditre idiọk edu emi edieke idade mme utọ edu Abasi nte emem, mfọnido, ye mfara ke idem, idu uwem.—Luke 11:13; Galatia 5:22, 23.