Ndi Jesus Ekedi Abasi m̀mê Owo?

“AMI ndi un̄wana ererimbot. Owo eke etienede mi idisan̄ake ke ekịm tutu amama, edi eyenyene un̄wana uwem.” (John 8:12) Jesus Christ eketịn̄ ikọ emi. Ọfiọk-n̄wed owo ke akpa isua ikie ekewet ntem aban̄a enye: “Ke enye ke ẹtịm ẹdịp ofụri inyene ọniọn̄ ye ifiọk.” (Colossae 2:3) Akan oro, Bible ọdọhọ ete: “Nsinsi uwem ọwọrọ mmọ ndinyene ifiọk mban̄a fi, ata Abasi kierakiet, ye enye emi afo okosiode ọdọn̄, kpa Jesus Christ.” (John 17:3) Man iyụhọ udọn̄ eke spirit nnyịn, oyom inyene nnennen ifiọk iban̄a Jesus.

Mme owo ke ofụri ererimbot ẹkop n̄kpọ ẹban̄a Jesus Christ. Kpukpru owo ẹfiọk odudu oro enye enyenede ke idem ubonowo. Ke nditịm ntịn̄, n̄wed usenọfiọn̄ oro ẹkamade ke ata ediwak ebiet ke ererimbot ọkọn̄ọ ke isua oro ẹkerede nte Jesus akamanade. “Ediwak owo ẹkot usenọfiọn̄ emi ẹkedude mbemiso isua oro B.C., m̀mê before Christ [M.C., mbemiso Christ],” ntem ke The World Book Encyclopedia ọdọhọ. “Mmọ ẹdian A.D., m̀mê anno Domini (ke isua Ọbọn̄ nnyịn), ke usenọfiọn̄ emi ẹtọn̄ọde ke isua oro ẹkerede nte enye akamanade.”

Kpa ye oro, mme owo ẹnyene nsio nsio ekikere ẹban̄a owo emi Jesus ekedide. Ediwak owo ẹda enye n̄kukụre nte n̄wọrọnda owo emi akanamde n̄kpọ enịm mbụk; ke adan̄aemi mbon en̄wen ẹtuakde ibuot ẹnọ enye nte Ata Ọkpọsọn̄ Abasi. Ndusụk mbon Hindu ẹdọhọ ke Jesus Christ edi ukem ye abasi Hindu ẹkotde Krishna, emi ediwak mmọ ẹdọhọde ke edi abasi emi amanade nte owo. Ndi Jesus ekedi ata owo, mîdịghe ndi enye ekedi owo emi ẹkpetuakde ibuot ẹnọ? Anie ke enye ekenen̄ede edi? Enye okoto m̀mọ̀n̄? Enye eketie didie? Ndien enye odu m̀mọ̀n̄ idahaemi? Nte nnyịn idikụtde ke ibuotikọ oro etienede, n̄wed oro etịn̄de ekese aban̄a Jesus ọnọ ibọrọ emi ẹdide akpanikọ ke mme mbụme emi.