Ndi Nte Mbon En̄wen Ẹsede Nnyịn Edi Akpan N̄kpọ?

EKPERE ndidi kpukpru owo ẹsima ẹtoro mmimọ. Itoro ekeme ndinam nnyịn ikop inemesịt, onyụn̄ anam ikere ke imanam n̄kpọ oro enyenede ufọn. Itoro akam ekeme ndinam nnyịn inam n̄kọri. Nnyịn ikemeke ndinam n̄kọri edieke ifiọkde ke ndusụk owo imaha nnyịn. Edieke owo ọbọrọde nnyịn ikọ nte mîfọnke, m̀mê enen̄erede ọtọk nnyịn, oro ekeme ndinam idem emem nnyịn. Nte mbon en̄wen ẹsede nnyịn enen̄ede enyene n̄kpọ ndinam ye nte nnyịn isede idem nnyịn.

Ekpedi ata ndudue ndifụmi nte mbon en̄wen ẹsede nnyịn. Nnyịn imekeme ndinen̄ede mbọ ufọn edieke iyakde mbon en̄wen ẹdụn̄ọde nte edu uwem nnyịn etiede. Ekikere mbon oro ẹmade ata nti ido uwem ekeme ndinen̄ede nnyene ufọn nnọ nnyịn onyụn̄ an̄wam nnyịn inam se inende. (1 Corinth 10:31-33) Nte ededi, ekikere mme owo isiwakke ndinen. Kere idiọk ekikere oro ikpọ oku ye mbon en̄wen ẹkenyenede ẹban̄a Jesus Christ ke ini mmọ ẹkefioride ẹte: “Kọn̄ ke eto! Kọn̄ enye ke eto!” (Luke 23:13, 21-25) Nnyịn ikpenyeneke ndifịna idem mban̄a ikọ oro mîdịghe akpanikọ, m̀mê ikọ oro ẹtịn̄de ke ntak ufụp m̀mê ke ntak asari. Ntre, nnyịn ikpenyene ndikpeme idem nnyụn̄ nda eti ibuot nnam n̄kpọ mban̄a se mme owo ẹtịn̄de ẹban̄a nnyịn.

Ekikere Anie Edi Akpan N̄kpọ?

Nnyịn imesima ata mme andituak ibuot oro ẹkperede nnyịn idem, ẹtoro nnyịn. Mmọ ẹsịne mbonubon nnyịn oro ẹdude ke akpanikọ, ọkọrọ ye nditọete nnyịn ke esop. (Rome 15:2; Colossae 3:18-21) Ima ye ukpono oro ekemmọ mme andinịm ke akpanikọ ẹnyenede ẹnọ nnyịn ọkọrọ ye “nsịnudọn̄ eke otode edem mbiba” ẹsinen̄ede ẹnam nnyịn ikop inemesịt. (Rome 1:11, 12) Nnyịn ‘ida nsụhọdeidem ibat ite mbon efen ẹfọn ẹkan nnyịn.’ (Philippi 2:2-4) Akan oro, nnyịn imesiyom inyụn̄ ima “mbon oro ẹdade usụn̄” ke otu nnyịn—mbiowo esop—ẹtoro nnyịn.—Mme Hebrew 13:17.

Nnyịn imesima n̄ko ndidi mme “owo oro mbon an̄wa ẹtịn̄de eti ikọ ntiense ẹban̄a.” (1 Timothy 3:7) Esinem nnyịn didie ntem ke ini mme iman, mme nsan̄autom, ye mme mbọhọidụn̄ nnyịn oro mînịmke ke akpanikọ ẹkponode nnyịn! N̄ko, ndi nnyịn isidomoke ndidu eti uwem man mbon oro ikwọrọde ikọ inọ ẹma ndikop etop Obio Ubọn̄? Edieke ẹfiọkde nnyịn ke obio nte mbon oro ẹdude eti uwem, ẹnyenede edinen ido, ẹnyụn̄ ẹnamde akpanikọ, oro ọyọnọ Abasi ubọn̄. (1 Peter 2:12) Nte ededi, tutu amama nnyịn idibiatke mme edumbet Bible man mme owo ẹtoro nnyịn; idinyụn̄ idụhe uwem mbubịk man inem mme owo esịt. Ana nnyịn ifiọk ke nnyịn ikemeke ndinem kpukpru owo esịt. Jesus ọkọdọhọ ete: “Edieke mbufo ẹkpedide ubak ererimbot, ererimbot akpama se inyenede enye. Edi sia mbufo mîdịghe ubak ererimbot, edi n̄kemekde mbufo nsio ke ererimbot, ke ntak oro ererimbot asua mbufo.” (John 15:19) Ndi odu se ikpanamde man mbon oro ẹbiọn̄ọde nnyịn ẹkpono nnyịn?

Ndinam Mbon Oro Ẹbiọn̄ọde Nnyịn Ẹkpono Nnyịn

Jesus ama odụri mme mbet esie utọn̄ ete: “Mbufo ẹyenyụn̄ ẹdi mbon emi kpukpru owo ẹsuade ke ntak enyịn̄ mi; edi ẹyenyan̄a owo emi ediyọde tutu esịm utịt.” (Matthew 10:22)  Usua emi esinam ẹdori nnyịn ikọ idiọk idiọk ndusụk ini. Ikpọ owo ukara oro mîmaha nnyịn ẹkeme ndidọhọ ke nnyịn isọn̄ ibuot ye ukara, m̀mê ke iyom ndibiat ukara. Mme andibiọn̄ọ oro mîsidịpke inua ẹkeme ndidọhọ ke nnyịn idi n̄ka afanikọn̄ ndien ke ana ẹtre utom nnyịn. (Utom 28:22) Nnyịn imekeme ndibọrọ edori ikọ emi ndusụk ini. Didie? Ke ndinam item apostle Peter emi: “Ẹdu ke mben̄eidem . . . ndiwụt owo ekededi eke oyomde ntak idotenyịn emi mbufo ẹnyenede, edi ẹnam ntre ke ifụre ifụre ido ye ntotụn̄ọ ukpono.” (1 Peter 3:15) Akan oro, nnyịn ikpenyene nditịn̄ “eti ikọ eke owo mîkemeke nditịn̄ n̄kpọ mbiat, man bụt akpanam owo eke esịnde ubiọn̄ọ, sia mînyeneke obukpo ikọ ndomokiet nditịn̄ ndian nnyịn.”—Titus 2:8.

Ke adan̄aemi idomode ndinam enyịn̄ nnyịn asana, nnyịn ikpenyeneke ndiyak idem emem nnyịn m̀mê ndiyak esuene emen nnyịn emen ke ini ẹtịn̄de ikọ ẹbiat nnyịn. Mme owo ẹma ẹdori Jesus emi akakam edide mfọnmma Eyen Abasi ikọ ẹte ke osụn̄i Abasi, ọsọn̄ ibuot ye ukara, onyụn̄ obụp ekpo. (Matthew 9:3; Mark 3:22; John 19:12) Ẹma ẹbiat apostle Paul enyịn̄. (1 Corinth 4:13) Jesus ye Paul ikọdọn̄ke utọn̄ ke utọ ikọ oro, edi ẹma ẹsịn idem ẹnam utom mmọ. (Matthew 15:14) Mmọ ẹma ẹfiọk ke mmimọ ikemeke ndinem mme asua mmimọ esịt, sia “ofụri ererimbot esịne ke idak odudu andidiọk.” (1 John 5:19) Se nnyịn isisobode mfịn edi oro. Ntre, idem ikpenyekke nnyịn ke ini mme andibiọn̄ọ ẹsude nsu ẹdori nnyịn.—Matthew 5:11.

Ekikere Owo Oro Enen̄erede Edi Akpan N̄kpọ

Mme owo ẹsikere nsio nsio n̄kpọ ẹban̄a nnyịn, etiene se isịnede mmọ ke esịt ye se mmọ ẹkopde ẹban̄a nnyịn. Ndusụk mmọ ẹsitoro ẹnyụn̄ ẹkpono nnyịn, ke adan̄aemi mbon eken ẹsisụn̄ide ẹnyụn̄ ẹsuade nnyịn. Nte ededi, amakam edi imayak mme edumbet Bible ẹda nnyịn usụn̄, nnyịn ikpenyene ndidat esịt nnyụn̄ nyak ekikere nnyịn ana sụn̄.

Apostle Paul ekewet ete: “Abasi ọkọnọ odudu ẹda ẹwet ofụri N̄wed Abasi ndien enye ọfọn ndida nnọ ukpep, nsua nnọ owo, nnen̄ede mme n̄kpọ, nnọ ntụnọ ke edinen ido, man owo Abasi etịm odot, eben̄e idem ọyọhọ ọyọhọ ndinam eti utom ekededi.” (2 Timothy 3:16, 17) Edieke nnyịn inyịmede ndiyak Ikọ Abasi ada nnyịn usụn̄ ke kpukpru se inamde, Jehovah Abasi ye Jesus Christ Eyen esie, ẹyema nnyịn. Idem n̄kpọ, nte Jehovah ye Eyen esie ẹsede nnyịn edi akpan n̄kpọ akan. Nte mmọ ẹsede nnyịn enen̄erede owụt nte nnyịn itiede. Nnyịn inyene uwem ke ntak emi mmọ ẹmade nnyịn.—John 5:27; James 1:12.

[Se Ẹwetde ke Ikpọ Abisi ke page 30]

“Bụt esinam mi ke ini mme owo ẹtorode mi, koro mmesida n̄kari nyom itoro.”—EWET UTO EYEN INDIA ORO EKEREDE RABINDRANATH TAGORE

[Mme Ndise ke page 31]

Nte ekemmọ mme andituak ibuot ẹsede nnyịn edi akpan n̄kpọ

[Ebiet Ẹdade Ndise Ẹto ke page 30]

Ndise Culver