Se Ikpanamde man Ikara Ekikere Nnyịn

NDI etikwo etikwo ekikere ẹsikan fi ubọk ndusụk ini? Ndi esịt esisọp etịmede fi, mîdịghe, ndi emesisọp ayat esịt m̀mê okụt edikpu? Ndi ekikere uwem emi esida fi idem? Ke edide ntre, nso ke akpanam?

Idụhe owo oro mîsikopke editịmede esịt. Ke ini owo mîyakke editịmede esịt akan enye ubọk, emi esinam uwem enen̄ede enem. Nte ededi, Bible ọdọhọ ke “ufịk [esinam] enyene-ibuot owo akabade edi ndisịme.” (Ecclesiastes 7:7) Anie ke afai, ye n̄kpọntịbe unana idotenyịn oro ẹyọhọde ererimbot emi mîsifịnake? Nte ededi, N̄wed Abasi etịn̄ n̄ko ete: “Eti n̄kpọ idụhe ikan nte owo adatde esịt ke se enye anamde.” (Ecclesiastes 3:22) Man uwem nnyịn enen̄ede enem, ana nnyịn ikpep ndidat esịt ebe ke ndinyene nti ekikere. Didie ke nnyịn ikeme ndinyene nti ekikere nnyụn̄ ntre ndiọi ekikere?

Ndinam n̄kpọ man ikan ndiọi ekikere esiwak ndisụhọde udomo ndiọi ekikere oro inyenede. Ke uwụtn̄kpọ, ke ini esịt etịmerede nnyịn aban̄a n̄kpọ oro nnyịn mîkemeke ndinam n̄kpọ mban̄a, ndi ikpakam ifọnke ndikpụhọ nte isinamde n̄kpọ mîdịghe, ikpụhọ ebiet oro idude utu ke ndiyak editịmede esịt emen nnyịn emen? Ndinam isan̄, ndikpan̄ utọn̄ n̄kop inem inem ikwọ, ndinen̄ede nsịn̄ede idem, m̀mê ndinam n̄kpọ nnọ mbon oro ẹyomde un̄wam ẹkeme ndinam nnyịn ikop idem inem esisịt.—Utom 20:35.

Nte ededi, mfọnn̄kan usụn̄ nditre etikwo etikwo ekikere edi ndibuọt idem nnyịn ke Andibot. Ke ini etikwo etikwo ekikere ẹkade iso ndifịna nnyịn, nnyịn ikpenyene ndibọn̄ akam nnyụn̄ ‘ntop kpukpru editịmede esịt nnyịn ndori Abasi ke idem.’ (1 Peter 5:6, 7) Bible ọn̄wọn̄ọ ọnọ nnyịn ete: “Jehovah emekpere mmọ eke esịt obụn̄ọde mmọ . . . Ediwak ukụt ẹsịm eti owo; edi Jehovah osio enye ke mmọ kpukpru.” (Psalm 34:18, 19) Nnyịn ikeme ndisan̄a didie nnyene mbuọtidem ke Abasi ‘ayan̄wam onyụn̄ anyan̄a nnyịn’? (Psalm 40:17) Imekeme ndinyene utọ mbuọtidem oro edieke ikpepde Bible inyụn̄ ikere iban̄a nte Abasi ekekerede aban̄a mfọnọn̄kpọ mme asan̄autom esie.