“Ẹdu ke Ukpeme”—Ini Ikpe Edisịm!
“Ẹdu ke Ukpeme”—Ini Ikpe Edisịm!
Ẹda ukpepn̄kpọ emi ẹto ediye uduot ekpri n̄wed Ẹdu ke Ukpeme!, emi ẹkesiode ke mbono district oro Mme Ntiense Jehovah ẹkenịmde ke isua 2004 ye 2005 ke ofụri ererimbot.
“Ẹdu ke ukpeme koro mbufo mîfiọkke usen eke Ọbọn̄ mbufo edidide.”—Matthew 24:42.
1, 2. Jesus ọkọdọhọ ke imọ ididi nte nso?
NSO ke akpanam edieke ọkpọfiọkde ke inọ ke edịbe akan ke efak, onyụn̄ obụn̄ ufọk mme owo? Afo okpodu ke edidemede onyụn̄ ekpeme mbak n̄kpọ edinam mbonima fo ye inyene fo. Idem n̄kpọ, inọ isiwetke n̄wed isian owo ini emi enye edidide. Utu ke oro, enye esidedịbe edi ke ini owo mîdorike enyịn.
2 Jesus ama esiwak ndida usụn̄ oro inọ esikade ufọk owo ọnọ uwụtn̄kpọ. (Luke 10:30; John 10:10) Jesus ama odụri owo utọn̄ aban̄a se iditịbede ke utịt ini, oro edidade esịm usen oro enye edidide edibiere ikpe ọnọ ererimbot, ete: “Ẹdu ke ukpeme koro mbufo mîfiọkke usen eke Ọbọn̄ mbufo edidide. Edi ẹfiọk n̄kpọ kiet emi, ẹte, edieke enyeneufọk ọkpọfiọkde ini emi inọ edidide, enye okpodu ke edidemede ikponyụn̄ iyakke ẹbụn̄ ufọk esie ẹdụk.” (Matthew 24:42, 43) Jesus ọkọdọhọ ke imọ ididi nte inọ—ke ini owo mîdorike enyịn.
3, 4. (a) Nso ibuana ke ndinam item Jesus aban̄ade nte enye edidide? (b) Ewe mbụme ẹdemerede?
3 Uwụtn̄kpọ oro ama odot koro owo mîfiọkke ata usen oro Jesus edidide. Jesus ama ebebem iso etịn̄ ke ntịn̄nnịm ikọ oro ete: “Kaban̄a usen ye hour oro baba owo kiet ifiọkke, mme angel ke heaven ifiọkke, Eyen inyụn̄ ifiọkke, ke mîbọhọke Ete ikpọn̄.” (Matthew 24:36) Ntre, Jesus ama esịn udọn̄ ọnọ mme anditiene enye ete: “Ẹdu ke mben̄eidem.” (Matthew 24:44) Mbon oro ẹnamde item Jesus ẹyedu ke mben̄eidem ẹnyụn̄ ẹkama idem nte odotde inamke n̄kpọ m̀mê ini ewe ke enye edidi edibiere ikpe ọnọ ererimbot nte Ebiereikpe oro Jehovah osiode ọdọn̄.
4 Ndusụk akpan mbụme oro ẹdemerede ẹdi: Ndi item Jesus enyene mbon ererimbot kpọt, mîdịghe ndi ata mme Christian n̄ko ẹkpenyene ‘ndidu ke ukpeme’? Ntak emi enen̄erede oyom ‘idu ke ukpeme’ idahaemi, ndien nso ke emi abuana?
Ntọt Emi Enyene Mmanie?
5. Nnyịn isan̄a didie ifiọk ke ata mme Christian ke ẹkedọhọ “ẹdu ke ukpeme”?
5 Enen̄ede edi akpanikọ ke edidi Ọbọn̄ edibabuat mbon ererimbot nte inọ koro mmọ mîmaha ndibiọn̄ utọn̄ ke ntọt oro ẹnọde ẹban̄a nsobo oro edide. (2 Peter 3:3-7) Nte ededi, nso kaban̄a ata mme Christian? Apostle Paul ekewet ekemmọ mme andinịm ke akpanikọ ete: “Mbufo ke idem mbufo ẹmetịm ẹfiọk ẹte usen Jehovah ke edi ukem nte inọ ke okoneyo.” (1 Thessalonica 5:2) Nnyịn imenen̄ede ifiọk ke “usen Jehovah ke edi.” Edi nte oro owụt ke ikpanaha idu aba ke ukpeme? Tịm fiọk ke Jesus eketịn̄ ikọ emi ọnọ mme mbet esie: “Ke hour emi mbufo mîkekereke, Eyen owo eyedi.” (Matthew 24:44) Mbemiso Jesus eketịn̄de ikọ emi, enye ama esịn udọn̄ ọnọ mme mbet esie ete ẹka iso ẹyom Obio Ubọn̄, onyụn̄ adian ikọ item emi: “Ẹben̄e idem, koro Eyen owo eyedi ke hour eke mbufo mîdorike enyịn.” (Luke 12:31, 40) Ndi inaha in̄wan̄-in̄wan̄ ke mme mbet esie ke Jesus ọkọdọhọ: “Ẹdu ke ukpeme”?
6. Ntak emi ‘ikpodude ke ukpeme’?
6 Ntak emi nnyịn ‘ikpodude ke ukpeme’ inyụn̄ ‘idu ke mben̄eidem’? Jesus etịn̄ ntak ete: “Owo iba ẹyedu ke in̄wan̄: ẹyeda kiet ẹdaha ẹnyụn̄ ẹkpọn̄ enye eken; iban iba ẹyekọk n̄kpọ ke n̄kpọ ukọk n̄kpọ: ẹyeda kiet ẹdaha ẹnyụn̄ ẹkpọn̄ enye eken.” (Matthew 24:40, 41) “Ẹyeda” mbon oro ẹdude ke mben̄eidem “ẹdaha,” oro edi, ẹyenyan̄a mmọ, ke ini ẹdisobode idiọk ererimbot emi. Ẹyenyụn̄ “ẹkpọn̄” mbon eken ẹnọ nsobo koro mmọ ẹbịnede udọn̄ idemmọ. Emi ekeme ndisịne mbon oro ẹkedude ke akpanikọ ini kiet ko, edi oro mîkamaha ndidu ke ukpeme.
7. Nditre ndifiọk ini emi utịt edidide ọnọ nnyịn ifet ndinam nso?
7 Nnyịn nditre ndifiọk ata usen oro akani editịm n̄kpọ emi edisịmde utịt ọnọ nnyịn ifet ndiwụt ke inam n̄kpọ Abasi ke eti esịt. Ntak idọhọde ntre? Ekeme nditie nte ke utịt editịm n̄kpọ emi ebịghi akaha ndidi. Edi n̄kpọ mfụhọ nditịn̄ nte ke ndusụk Christian oro ẹkerede ke utịt ebịghi akaha inyeneke ifịk aba ke utom Jehovah. Edi nnyịn ikayak idem nnyịn ofụri ofụri inọ Jehovah ndinam n̄kpọ esie kpukpru ini. Mbon oro ẹtịmde ẹdiọn̄ọ Jehovah ẹfiọk ke enye idikopke inemesịt ye mbon oro ẹbetde tutu ekpere ndisịm utịt mbemiso mmọ ẹtọn̄ọde ndisịn ifịk ke utom Esie. Enye ese se isịnede owo ke esịt.—1 Samuel 16:7.
8. Didie ke ima oro imade Jehovah anam nnyịn idu ke ukpeme?
8 Esịt enen̄ede enem nnyịn ndinam uduak Jehovah sia imenen̄ede ima enye. (Psalm 40:8; Matthew 26:39) Ndien nnyịn iyom ndinam n̄kpọ Jehovah ke nsinsi. Nnyịn ndibet esisịt n̄kan nte ikekerede inamke idotenyịn nsinsi uwem okûsọn̄ urua aba. Ata akpan ntak oro anamde idu ke ukpeme edi koro imenen̄ede iyom ndikụt nte usen Jehovah edisude uduak esie. Ọkpọsọn̄ udọn̄ oro inyenede ndinem Abasi esịt anam nnyịn inam se Ikọ esie etemede inyụn̄ ibem iso iyom Obio Ubọn̄ esie. (Matthew 6:33; 1 John 5:3) Ẹyak ineme nte edidu ke ukpeme ekemede nditụk ubiere oro inamde ye nte idude uwem ke usen ke usen.
Nso ke Afo Ebịne ke Uwem?
9. Ntak emi oyomde mbon ererimbot ẹsọsọp ẹfiọk se mme n̄kpọntịbe eyo nnyịn ẹnen̄erede ẹwọrọ?
9 Mfịn ediwak owo ẹkụt nte ikpọ afanikọn̄ ye mme n̄kpọntịbe oro ẹkamade oyomonsia ẹtịbede kpukpru usen, ndien ekeme ndidi mmọ ikam inemke esịt iban̄a se mmọ ẹbịnede ke uwem. Nte ededi, ndi mmọ ẹfiọk se mme n̄kpọntịbe ererimbot emi ẹnen̄erede ẹwọrọ? Ndi mmọ ẹfiọk ke nnyịn idu uwem ke “utịt editịm n̄kpọ emi”? (Matthew 24:3) Ndi mmọ ẹfiọk ke ibụk, afai, ye idem ndiọi edu oro ẹyọhọde ererimbot mfịn ẹdi idiọn̄ọ “mme akpatre usen”? (2 Timothy 3:1-5) Oyom mmọ ẹsọsọp ẹfiọk se kpukpru emi ẹwọrọde ẹnyụn̄ ẹkere ẹban̄a se mmọ ẹnen̄erede ẹbịne ke uwem.
10. Nso ke nnyịn ikpanam man ikụt ite ke imodu ke ukpeme?
10 Nso kaban̄a nnyịn? Kpukpru usen, nnyịn imesisobo mme idaha oro oyomde inam ubiere iban̄a utom oro ikpanamde, usọbọidem, ubon, ye utuakibuot nnyịn. Nnyịn imọfiọk se Bible etịn̄de imonyụn̄ idomo ndida se enye etịn̄de nsịn ke edinam. Ntre, nnyịn ikpenyene ndibụp idem nnyịn ite: ‘Ndi mmayak editịmede esịt uwem emi anam mi mfre enyịn mban̄a mme utịtmbuba eke spirit mi? Ndi ukpepn̄kpọ akwaifiọk ye ekikere ererimbot emi ẹbiere se mmekde ndinam?’ (Luke 21:34-36; Colossae 2:8) Nnyịn inyene ndika iso n̄wụt ke imọbuọt idem ke Jehovah ke ofụri esịt nnyịn, inyụn̄ iberike edem ke asian nnyịn. (Mme N̄ke 3:5) Ke inamde ntre, nnyịn iyaka iso ‘isọn̄ọ imụm ata uwem ikama’—kpa nsinsi uwem ke obufa ererimbot Abasi.—1 Timothy 6:12, 19.
11-13. Nso ke nnyịn ikeme ndikpep nto se iketịbede (a) ke eyo Noah? (b) ke eyo Lot?
11 Bible ọdọn̄ọ ekese ntọt ye uwụtn̄kpọ, emi ẹkemede ndin̄wam nnyịn idu ke ukpeme. Kere ban̄a se iketịbede ke eyo Noah. Abasi ama okụt ete ke ẹnọ ntọt ke anyan ini mbemiso enye okosobode emana oro. Edi ke ẹsiode Noah ye ikọtufọk esie ẹfep, mbon eken ikọdọn̄ke utọn̄. (2 Peter 2:5) Kop se Jesus eketịn̄de aban̄a emi: “Kpa nte mme usen Noah ẹkedide, kpasụk ntre ke edidu Eyen owo edidi. Koro kpa nte mmọ ẹkedude ke mme usen oro ẹkebemde ukwọ iso, ẹdia ẹnyụn̄ ẹn̄wọn̄, irenowo ẹdọ ndọ ẹnyụn̄ ẹda iban ẹnọ ke ndọ, tutu esịm usen emi Noah odụkde ke ubom; mmọ inyụn̄ ifiọkke tutu ukwọ edi edikpọri mmọ kpukpru efep, kpasụk ntre ke edidu Eyen owo edidi.” (Matthew 24:37-39) Nso ke nnyịn ikeme ndikpep nto oro? Edieke owo nnyịn ekededi ayakde mme n̄kpọ eke obụk—idem mbon oro mîdiọkke—ẹda itie n̄kpọ eke spirit oro Abasi ọdọhọde inịm akpa ke uwem, ana enye enen̄ede ekere aban̄a idaha esie.—Rome 14:17.
12 Kere n̄ko ban̄a eyo Lot. Obio Sodom oro Lot ye ubon esie ẹkedụn̄de, ama oforo ke n̄kan̄ eke obụk, edi ido uwem mbon obio oro ama abiara fap. Jehovah ama ọdọn̄ mme angel esie ẹkesobo obio oro. Mme angel oro ẹma ẹnyịk Lot ye ubon esie ẹte ẹfen̄e ẹwọn̄ọ ke Sodom, ẹkûnyụn̄ ẹse edem. Mmọ ẹma ẹkpọn̄ obio oro nte mme angel oro ẹketemede. Nte ededi, n̄wan Lot ikekemeke ndisio esịt n̄kpọn̄ ufọk esie ke obio Sodom. Enye ama ọsọn̄ ibuot ese edem, onyụn̄ akpa. (Genesis 19:15-26) Ke ini Jesus okodụride nnyịn utọn̄ aban̄a se iditịbede ke ini iso, enye ọkọdọhọ ete: “Ẹti n̄wan Lot.” Ndi nnyịn ke inam item emi?—Luke 17:32.
13 Ẹma ẹnyan̄a mbon oro ẹkekopde item Abasi—Noah ye ubon esie, ọkọrọ ye Lot ye nditọiban esie. (2 Peter 2:9) Nte nnyịn ikerede iban̄a ntọt oro mme uwụtn̄kpọ emi ẹnọde, nnyịn n̄ko imọbọ nsịnudọn̄ ito etop edinyan̄a oro Bible atan̄ade ọnọ mbon oro ẹmade edinen ido. Emi anam nnyịn inen̄ede inyene mbuọtidem ke un̄wọn̄ọ Abasi aban̄ade “mbufa enyọn̄ ye obufa isọn̄” emi “edinen ido” edidụn̄de, oyosu.—2 Peter 3:13.
‘Ini Ikpe Edisịm’
14, 15. (a) Nso ke “ini” ikpe abuana? (b) Nso ke ‘ndibak Abasi nnyụn̄ nnọ enye ubọn̄’ abuana?
14 Nso ke ikpodori enyịn ndikụt nte isụk idude ke ukpeme? N̄wed Ediyarade owụt nte uduak Abasi edisude ke adiana ke adiana. Oyom inam se Ediyarade etemede edieke anade idu ke mben̄eidem. Ntịn̄nnịm ikọ oro etịn̄ in̄wan̄-in̄wan̄ se itịbede ke “usen Ọbọn̄,” oro ọkọtọn̄ọde ke ini ẹkeyaride Christ ntinya ke heaven ke 1914. (Ediyarade 1:10) Ediyarade asian nnyịn aban̄a angel kiet oro ẹnọde utom ‘editan̄a nsinsi eti mbụk.’ Enye atan̄a ke ọkpọsọn̄ uyo ete: “Ẹbak Abasi ẹnyụn̄ ẹnọ enye ubọn̄, koro ini ikpe esie edisịm.” (Ediyarade 14:6, 7) “Ini” ikpe oro iniọn̄ke: enye edi ini oro ẹbierede ikpe ẹnyụn̄ ẹnamde se ẹbierede nte ẹwụtde ke ntịn̄nnịm ikọ oro. Ini oro ke nnyịn idu emi.
15 Idahaemi, mbemiso ini ikpe oro esịmde utịt, ẹsịn udọn̄ ẹnọ nnyịn ẹte: “Ẹbak Abasi ẹnyụn̄ ẹnọ enye ubọn̄.” Nso ke emi abuana? Ata mbak Abasi ekpenyene ndinam nnyịn iwọn̄ọde ikpọn̄ idiọk. (Mme N̄ke 8:13) Edieke ikponode Abasi, nnyịn iyenen̄ede ikop item esie. Nnyịn idinanake ini ikaha ndikot Ikọ esie, kpa Bible, kpukpru ini. Nnyịn ididaha item oro enye ọnọde ete idụk mme mbono esop Christian nte n̄kpọ mbubru. (Mme Hebrew 10:24, 25) Nnyịn iyenen̄ede ima ifet oro inyenede nditan̄a eti mbụk Obio Ubọn̄ Messiah Abasi, inyụn̄ itan̄a enye ifịk ifịk. Nnyịn iyaka iso ibuọt idem ye Jehovah ke ofụri esịt. (Psalm 62:8) Sia ifiọkde ke Jehovah edi Andikara Ekondo, nnyịn imokpono enye ke ndisụk idem nnyịme enye akara nnyịn. Ndi afo emenen̄ede abak Abasi onyụn̄ ọnọ enye ubọn̄ ke kpukpru usụn̄ emi?
16. Ntak emi ikemede ndidọhọ ke Abasi ebebiere ikpe ọnọ Akwa Babylon nte ẹtịn̄de ke Ediyarade 14:8?
16 Ediyarade ibuot 14 aka iso owụt mme n̄kpọ efen oro ẹditịbede ke ini ikpe. Ẹbem iso ẹsiak Akwa Babylon, kpa ukara ererimbot eke nsunsu ido ukpono, ẹte: “Angel efen, ọyọhọ iba, etiene onyụn̄ ọdọhọ ete: ‘Enye ọmọduọ! Akwa Babylon ọmọduọ.’” (Ediyarade 14:8) Ih, ke enyịn Abasi, Akwa Babylon ọmọdọduọ. Ke 1919, ẹma ẹsio mme asan̄autom Jehovah oro ẹyetde aran ke ufụn ukpepn̄kpọ Babylon ye mme edinam esie, emi mme owo ye mme idụt ẹdụkde ufụn ẹnọ ke ediwak tọsịn isua idahaemi. (Ediyarade 17:1, 15) Ntre ọtọn̄ọde ke ini oro, mme asan̄autom Abasi emi ẹma ẹkeme ndisịn idem ofụri ofụri ke utuakibuot akpanikọ. Ẹkwọrọ eti mbụk Obio Ubọn̄ Abasi ke ofụri ererimbot toto ke ini oro.—Matthew 24:14.
17. Nso ke ndiwọrọ ke Akwa Babylon abuana?
17 Idịghe n̄kukụre se ibuanade ke ikpe oro Abasi edibierede ọnọ Akwa Babylon edi oro. Ẹmọn̄ ẹsọp ẹsobo enye taktak. (Ediyarade 18:21) Oro edi ntak emi Bible esịnde udọn̄ ọnọ mme owo ke kpukpru ebiet ete: “Ẹwọn̄ọ ke esịt [Akwa Babylon], edieke mbufo mîyomke nditiene enye mbuana ke mme idiọkn̄kpọ esie.” (Ediyarade 18:4, 5) Nso ke nnyịn ndiwọrọ ke Akwa Babylon abuana? Enye abuana n̄kpọ akan editre ndibuana ke nsunsu ido ukpono. Akwa Babylon enyene ubọk ke mme ọwọrọetop usọrọ ye ke mme ido edinam mfịn, ke nte ererimbot esede idan̄, ke nte ẹnamde unọ idem inemesịt oro ẹnyenede ebuana ye ubụpekpo atara, ye ntre ntre eken. Man idu ke ukpeme, ana ikụt ite ke mme edinam ye udọn̄ nnyịn ẹwụt ke nnyịn imenen̄ede idianade ikpọn̄ Akwa Babylon ke kpukpru usụn̄.
18. Ke ikerede iban̄a se Ediyarade 14:9, 10 etịn̄de, nso ke mme Christian oro ẹdude ke edidemede mînamke?
18 Nnyịn imekpep n̄kpọ efen ke Ediyarade 14:9, 10 iban̄a se iditịbede ke “ini ikpe.” Angel en̄wen ọdọhọ ete: “Edieke owo ekededi atuakde ibuot ọnọ idiọk unam oro ye mbiet esie, onyụn̄ ọbọde idiọn̄ọ ke ọkpọiso m̀mê ke ubọk esie, enye n̄ko ọyọn̄wọn̄ wine iyatesịt Abasi.” Ntak-a? Koro “idiọk unam oro ye mbiet esie” ẹda ẹban̄a ukara owo, oro mîmaha ndisụk ibuot nnọ ukara Jehovah. Mme Christian oro ẹdude ke edidemede ẹnen̄ede ẹkpeme mbak ẹdiyak edinam m̀mê edu uwem mmọ ebiet eke mbon oro mîmaha ndisụk ibuot nnọ akakan ukara ata Abasi, Jehovah, nte n̄kpọ eke mmọ ẹdụkde ufụn ẹnọ mbon oro mîmaha ndisụk ibuot nnọ ukara Abasi. Mme Christian ẹfiọk ke Obio Ubọn̄ Abasi ama ọtọtọn̄ọ ndikara ke heaven, ndien ke enye eyetre kpukpru ukara owo, onyụn̄ ada ke nsinsi.—Daniel 2:44.
Kûtek ke Ifịk!
19, 20. (a) Nte nnyịn inen̄erede isan̄a ikpere utịt mme akpatre usen emi, nso ke Satan edidomo ndinam? (b) Nso ke nnyịn ikpebiere ndinam?
19 Nte mme akpatre usen ẹsan̄ade ẹkpere utịt, afanikọn̄ ye mme idomo ẹyenen̄ede ẹsọn̄ ubọk. Adan̄a nte nnyịn idide mme anana-mfọnmma owo inyụn̄ idude ke akani editịm n̄kpọ emi, nnyịn iditreke ndisobo mme utọ mfịna nte udọn̄ọ, usọn̄, n̄kpa owo ima, idiọkesịt, mmemidem ke ntak oro mme owo mîmaha ndikop Ikọ Abasi oro ikwọrọde, ye mme mfịna efen efen. Kûfre ke Satan eyesịn ofụri ukeme ndida mme mfịna emi nnam idem emem nnyịn man itre ndikwọrọ eti mbụk m̀mê itre ndidu uwem n̄kekem ye mme edumbet Abasi. (Ephesus 6:11-13) Idịghe ini oro ikpetekde ke ifịk edi emi, akpan akpan sia idude uwem ke mme akpatre usen!
20 Jesus ama ọfiọk ke iyosobo ekese afanikọn̄ oro ẹkemede ndinam nnyịn itre ndinam n̄kpọ Abasi, ntre enye ama eteme nnyịn ete: “Ẹdu ke ukpeme koro mbufo mîfiọkke usen eke Ọbọn̄ mbufo edidide.” (Matthew 24:42) Mmọdo, ndien, ẹyak inen̄ede iti ke idu ke ata mme akpatre usen. Ẹyak ikpeme idem ye n̄kari oro Satan ekemede ndida nnam nnyịn itek ke ifịk, m̀mê itre utom nnyịn. Ẹyak ibiere ndinen̄ede nsịn ifịk n̄kwọrọ eti mbụk Obio Ubọn̄ Abasi. Ih, nnyịn ikpakam ika iso isịn ifịk ke utom Abasi inyụn̄ inam item Jesus emi: “Ẹdu ke ukpeme.” Ke inamde ntre, nnyịn iyada ukpono isọk Jehovah inyụn̄ isịne ke otu mbon oro ẹdibọde nsinsi edidiọn̄.
Didie ke Afo Ọkpọbọrọ?
• Nnyịn isan̄a didie ifiọk ke ata mme Christian ke Jesus ọkọdọhọ “ẹdu ke ukpeme”?
• Ewe ntọt ye uwụtn̄kpọ ke Bible ẹkeme ndin̄wam nnyịn ‘idu ke ukpeme’?
• Nso idi ini ikpe, ndien nso ke ẹdọhọ nnyịn inam mbemiso enye esịm utịt?
[Mme Mbụme Ukpepn̄kpọ]
[Ndise ke page 23]
Jesus ọkọdọhọ ke imọ ididi nte inọ
[Ndise ke page 24]
Nsobo Akwa Babylon ekpere
[Mme ndise ke page 25]
Ẹyak ibiere ndinen̄ede nsịn ifịk n̄kwọrọ ikọ n̄kan nte ikesikwọrọde