Bọ Ukpep Oro Ọfọnde Akan!

BIBLE ọdọhọ ke Jehovah Abasi okobot kpukpru n̄kpọ, ọkọrọ ye owo. (Genesis 1:27; Ediyarade 4:11) Nte “Akwa Anditeme,” enye ama ọnọ Adam ye Eve ukpep onyụn̄ etịm mmọ idem ndidu uwem ke ediye In̄wan̄ Eden. Enye akaduak ndika iso nnọ mmọ ukpep nnyụn̄ nse mban̄a mmọ ke nsinsi. (Genesis 1:28, 29; 2:15-17; Isaiah 30:20, 21, NW) Kam kere nte oro ekpeketiede!

Nte ededi, edi n̄kpọ mfụhọ nditịn̄ ke akpa owo iba oro ẹma ẹtop kpukpru emi ẹduọn̄ọ. Nsọn̄ibuot mmọ ama anam ubonowo abiara ke ido uwem ye ke ikpọkidem. (Genesis 3:17-19; Rome 5:12) Bible etịn̄ nte uwem eketiede esisịt ini ke ẹma ẹkebot owo ete: “Jehovah okụt idiọk-n̄kpọ owo nte okponde ke isọn̄, kpukpru n̄kpọ ke ekikere esịt esie ẹnyụn̄ ẹsụk ẹdi idiọk kpukpru ini.”—Genesis 6:5.

N̄kpọ nte isua 4,500 ẹmebe idahaemi tọn̄ọ Jehovah ọkọdọhọ ke owo osụk ekere idiọk kpukpru ini, ndien idaha ubonowo etetịm ọdiọk idahaemi. Ediwak owo ẹsu nsu inyeneke iso bụt, ẹyịp inọ, mîdịghe ẹnọ mbon en̄wen unan. Afanikọn̄ ke ọkọkọri kpukpru usen, ke adan̄aemi ima oro ẹmade ekemmọ owo osụhọrede. Ndi ukwe mme owo ẹnen̄erede ẹnyene mfịna ye kiet eken, idem ke ubon? Edi idịghe Abasi anam n̄kpọ etie ntem, inyụn̄ idịghe nte ke enye ikereke iban̄a afanikọn̄ oro nnyịn isobode mfịn. Idụhe ini oro Jehovah mîkereke iban̄a mfọnọn̄kpọ owo, ndien enye eben̄e idem ndinọ mbon oro ẹyomde ndausụn̄ esie ukpep man mmọ ẹkeme ndidu inem inem uwem. Enye ama osio Jesus Christ Eyen esie ọnọ edi isọn̄ ke n̄kpọ nte isua 2,000 emi ẹkebede, onyụn̄ owụt ke imoyom ndinọ mbon oro ẹyomde ndikụt unen ke uwem, ukpep. Sia Akwa Anditeme akadade anana-ibat isua ekpep Jesus n̄kpọ, Jesus ama enịm uwụtn̄kpọ ọnọ nnyịn ke ndinọ ukpep oro ọfọnde akan.

Ata Ido Ukpono Christ Ọnọ Ukpep

Jesus Christ ọkọtọn̄ọ ata Ido Ukpono Christ, kpa usụn̄ uwem oro ọkọn̄ọde ke ima. Kpukpru ekikere ye se ẹnamde ke ido ukpono emi ẹdu ke n̄kemuyo ye uduak Abasi, ẹnyụn̄ ẹda ukpono ye ubọn̄ ẹsọk enyịn̄ esie. (Matthew 22:37-39; Mme Hebrew 10:7) Jehovah Ete Jesus ekekpep Jesus usụn̄ uwem emi enye akadade ekpep mme owo. Nnyịn ikot ntem ke John 8:29 iban̄a ibetedem oro Abasi ọkọnọde enye: “Enye emi ọkọdọn̄de mi odu ye ami; enye ikọkpọn̄ke mi ikpọn̄, koro nnamde n̄kpọ eke enemde enye esịt kpukpru ini.” Ih, Ete esie ama ọnọ enye ibetedem ye ndausụn̄ ke ofụri ini oro enye ọkọkwọrọde ikọ ke isọn̄. Ẹma ẹnọ akpa mme anditiene Jesus ndausụn̄ ke nte ẹkpeyọde afanikọn̄. Jehovah akada Eyen esie ọnọ mmọ ukpep. Mmọ ndinam se Jesus ekekpepde nnyụn̄ ntiene uwụtn̄kpọ esie ama anam mmọ ẹdi nti owo. Ntre ke edi ye mme mbet esie mfịn.—Se ekebe oro “Odudu Oro Jesus ye Ukpepn̄kpọ Esie Ẹnyenede,” ke page 6.

Akpan n̄kpọ kiet oro odude ke ata Ido Ukpono Christ edi ke enye ekpep mme owo n̄kpọ ke usụn̄ oro otụkde ekikere ye esịt mmọ onyụn̄ anam mmọ ẹkpụhọde ke esịt esịt. (Ephesus 4:23, 24) Yak ineme uwụtn̄kpọ kiet—se Jesus ekekpepde aban̄a edinam akpanikọ nnọ nsan̄a  ndọ: “Mbufo ẹma ẹkop ẹte ẹkedọhọ ẹte, ‘Kûsịn efịbe.’ Edi ndọhọ mbufo nte owo ekededi eke owụkde enyịn ese n̄wan tutu udọn̄ idan̄ edemede enye, enye esesịn efịbe ama ke esịt esie ye enye.” (Matthew 5:27, 28) Jesus akada ikọ emi ekpep mbet esie ete ke mmọ ẹkpenyene ndinam esịt mmọ asana, ye nte ke ndiọi ekikere ye ndiọi udọn̄, kpa ye oro owo mînamke kan̄a, ẹkeme ndiman akamba afanikọn̄. Ndi idịghe akpanikọ ke ndiọi ekikere ẹkeme ndinam owo anam mme n̄kpọ oro ẹyatde Abasi ye mbon en̄wen esịt?

Ke ntre, Bible ọnọ item emi: “Ẹkûnyụn̄ ẹbiet editịm n̄kpọ emi, edi ẹkpụhọde oto ke edinam ekikere mbufo edi obufa, man mbufo ẹkpedomo ẹfiọk uduak Abasi eke edide eti onyụn̄ enemde enye esịt onyụn̄ ọfọnde ama.” (Rome 12:2) Afo emekeme ndibụp ete: ‘Ndi odu ukpep oro ekemede ndinam ekikere owo okpụhọde edi obufa?’ Owo ekeme ndikpụhọde ekikere esie nnam edi obufa ke ndiyak mme edumbet Abasi ye Ikọ Abasi ẹdụn̄ enye ke esịt, ẹnam enye ọtọn̄ọ ndikere n̄kpọ ke usụn̄ efen. Emi ekeme nditịbe edieke owo enyịmede ndibọ ukpep oro Abasi adade Ikọ esie ọnọ.

Ama Anam Mmọ Ẹkpụhọrede

“Ikọ Abasi enyene uwem onyụn̄ enyene odudu.” (Mme Hebrew 4:12) Ikọ Abasi ke enyenyene ọkpọsọn̄ odudu ke idem mme owo, ntem owụtde ke item esie idịghe n̄kpọ eset. Enye ekeme ndinam owo okpụhọrede uwem esie, ọtọn̄ọ ata Ido Ukpono Christ, onyụn̄ akabade edi eti owo. Mme uwụtn̄kpọ oro ẹtienede mi ẹwụt nte ukpep oro Bible ọnọde ọfọnde.

Emilia oro ikasiakde ke ibuotikọ oro ekebemde iso ọdọhọ ete: “Ndisịn ukeme ke idem mi kpọt ikekemeke ndikọk mfịna ubon mi. Ke ini n̄kọtọn̄ọde ndikpep Bible ye Mme Ntiense Jehovah, mma ndifiọk ke idotenyịn odu, nnyụn̄ n̄kpụhọde edu uwem mi. Mma n̄kpep ndinen̄ede mme ime nnyụn̄ ntre ikpon esịt. Nte ini akakade, ebe mi ama etiene mi ekpep Bible. Ikememke utom inọ enye nditre mmịn, edi enye ama etre ke akpatre. Emi ama anam nnyịn ifiak itọn̄ọ ndọ nnyịn ke obufa usụn̄. Idahaemi, nnyịn idi mme Christian oro ikopde inemesịt, ke inyụn̄ isiak nti edumbet Bible inọ nditọ nnyịn.”—Deuteronomy 6:7.

Ukpep oro ata Ido Ukpono Christ ọnọde ekeme ndinam owo etre ndiọi ye oburobụt usụn̄ uwem. Se iketịbede inọ Manuel * edi oro. Enye ama efehe ọkpọn̄ ufọk ke ini ekedide isua 13 onyụn̄ ọtọn̄ọ ndin̄wọn̄ ikọn̄ekpo. Nte ini akakade, enye ama ọtọn̄ọ ndida ọkpọsọn̄ ibọk oro ẹkotde heroin. Enye ama enyịme ndinam idan̄ ye iren ye iban man ẹnọ enye itie udakibuot ye okụk. Ndusụk ini, Manuel ekesiwo mme owo ada odu uwem. Enye ama esida n̄kpọsọn̄ ibọk kpukpru ini. Afai afai edu esie ama anam enye esika n̄kpọkọbi ndien ndien.  Ini kiet, enye ama odu isua inan̄ ke ufọk-n̄kpọkọbi, onyụn̄ etiene abuana ke ndinyam mme n̄kpọekọn̄ do, emi ekedide n̄kpọmbet. Ke Manuel ama ọkọdọ ndọ, usụn̄ uwem esie ama aka iso esịn enye ke afanikọn̄. Enye ọdọhọ ete: “Nnyịn ikedidụn̄ ke akani ufọkunen. Ke nteti nte n̄wan mi ekesitemde udia ke enyọn̄ kọrikọri. Idaha nnyịn ama enen̄ede ọdiọk tutu mbonubon mi ẹdọhọ n̄wan mi ọkpọn̄ mi.”

Nso ikokpụhọrede uwem esie? Manuel ke idemesie ọbọrọ ete: “Ufan kiet ama edi ufọk nnyịn edineme Bible. Mma ndọhọ enye odụk edi man n̄wụt enye ke Abasi oro ekerede aban̄a owo idụhe. N̄kada idem mi nte ata uwụtn̄kpọ kiet. Idem ama akpa mi aban̄a nte Ntiense oro ekemede ime onyụn̄ ọfọnde ido tutu nnyịme ndidụk mbono esop ke Ufọkmbono Obio Ubọn̄. Okposụkedi ndusụk owo do ẹkediọn̄ọde utọ owo oro n̄kedide, mmọ ẹma ẹkọm mi nte ufan. Mmọ ẹkeda mi nte kiet ke otu mmọ. Emi ama enen̄ede ọdọn̄ mi esịt. Edu emi ama enen̄ede otụk mi tutu mbiere nditre mbubehe n̄kpọsọn̄ ibọk nnyụn̄ ntọn̄ọ ndinam eti utom. Ke ọfiọn̄ inan̄ ẹma ẹkebe tọn̄ọ n̄kọtọn̄ọ ndikpep Bible, mma ndot nditiene n̄kwọrọ ikọ, ndien ke ọfiọn̄ inan̄ efen ẹma ẹkebe, mma nna baptism nte kiet ke otu Mme Ntiense Jehovah.”

Nso ke ata Ido Ukpono Christ anam ọnọ Manuel ye ubon esie? Enye ọdọhọ ete: “Ke akpanikọ, mîkpedịghe ukpepn̄kpọ Bible n̄kpakakpa ediwak isua ko ke edem. Usụn̄ uwem oro Jesus ekekpepde anam mi mfiak nda ubon mi nnyene. Akpan ye adiaha mi idibọhọ utọ ufen oro n̄kọbọde ke ini n̄kedide akparawa. Mmenen̄ede n̄kop inemesịt nnyụn̄ n̄wụt esịtekọm nnọ Jehovah mban̄a eti itie ebuana oro nnyenede idahaemi ye n̄wan mi. Ndusụk n̄kani nsan̄a mi ẹtoro mi ẹnyụn̄ ẹdọhọ ke nte ndude uwem idahaemi ọfọn akan.”

Usụn̄ uwem Christian oyom mme owo ẹsana ke ido uwem ye ke ikpọkidem. John emi odụn̄de ke ikpehe oro mme owo ẹbuenede  etieti ke South Africa ama edifiọk ke emi edi akpanikọ. Enye ọdọhọ ete: “Ndusụk ini adiaha nnyịn ikesiyereke mmọn̄ ke ofụri urua kiet, ndien oro ikebeheke nnyịn.” N̄wan esie ọdọhọ ke ufọk mmimọ ama esidehe etieti. Edi ukpep oro Ido Ukpono Christ ọnọde ama anam mmimọ ikpụhọde. John ama adianade nsan̄a ye mbon oro ẹkesiyịpde ubomisọn̄, onyụn̄ ọtọn̄ọ ndinen̄ede nse mban̄a ubon esie. Enye ọdọhọ ete: “Nnyịn ima ikpep ke ana idem ye ọfọn̄ nnyịn ẹsana sia idide Christian. Mmama se 1 Peter 1:16 ọdọhọde, emi etemede nnyịn ete isana koro Jehovah Abasi edide edisana. Idahaemi, nnyịn imodomo ndinam ufọk nnyịn eye onyụn̄ asana.”

Afo Emekeme Ndibọ Ukpep Oro Ọfọnde Akan

Se ẹtịn̄de ke enyọn̄ emi ẹdi ọsọ n̄kpọ. Ukpepn̄kpọ Bible anam ediwak tọsịn owo ẹkpep ndidu uwem oro ọfọnde. Mme eteutom mmọ ẹsima mmọ ke ntak edinam akpanikọ mmọ ye ke ntak oro mmọ ẹsisịnde ifịk ẹnam utom. Mmọ ẹkabade ẹdi nti mbọhọidụn̄ ye nti ufan, ẹyomde mfọnọn̄kpọ ekemmọ owo. Mmọ ẹbiere ndifep ndiọi ido ye udọn̄ obụkidem, anamde mmọ ẹnen̄ede ẹnọ ntịn̄enyịn ke nsọn̄idem mmọ ke n̄kan̄ eke ikpọkidem, eke ekikere, ye eke ntụk. Utu ke nditahade inyene mmọ ke ntak ndiọi ido, mmọ ẹda inyene mmọ ẹse ẹban̄a idemmọ ye ubon mmọ. (1 Corinth 6:9-11; Colossae 3:18-23) Ke akpanikọ, utịp oro ẹbọde ke ntak edidu uwem nte Jehovah etemede ke Bible owụt ke edidu uwem ekekem ye ukpepn̄kpọ ata Ido Ukpono Christ edi mfọnn̄kan usụn̄ uwem, kpa usụn̄ uwem oro asan̄ade ye ukpep oro ọfọnde akan. Kop se Bible etịn̄de aban̄a owo eke odude uwem ekekem ye ibet Abasi: “Kpukpru se enye anamde ọwọrọ usụn̄.”—Psalm 1:3.

Edi n̄kpọ inemesịt ndifiọk ke Ata Ọkpọsọn̄ Abasi, kpa Jehovah, enyịme ndinọ nnyịn ukpep. Enye etịn̄ ntem aban̄a idemesie: “Ami ndi Jehovah Abasi fo, emi n̄kpepde fi usụn̄ udori, nda fi usụn̄ eke afo edisan̄ade.” (Isaiah 48:17) Ih, Jehovah amada uwụtn̄kpọ oro Eyen esie Jesus Christ ekenịmde ye se enye ekekpepde owụt nnyịn usụn̄ eke ikpasan̄ade. Se Eyen esie ekekpepde ama anam ediwak mbon oro ẹkediọn̄ọde enye ke ini enye okodude ke isọn̄, ẹkpụhọde uwem mmọ, ndien ntre n̄ko ke edi mfịn ye ediwak mbon oro ẹdude uwem ekekem ye se enye ekekpepde. Ntak emi mûdaha ini ukpep ekese uban̄a se Jesus ekekpepde? Mme Ntiense Jehovah ke mbọhọ mbufo ẹyekop inemesịt ndin̄wam fi ọbọ mfọnn̄kan ukpep oro.

[Ikọ idakisọn̄]

[Ekebe/Ndise ke page 6]

Odudu Oro Jesus ye Ukpepn̄kpọ Esie Ẹnyenede

Zacchaeus ama ada utom ubọ tax esie oforo ke nditụk nnyụn̄ n̄wo mme usụhọde owo. Edi enye ama ada se Jesus ekekpepde esịn ke edinam ndien emi ama anam enye okpụhọde uwem esie.—Luke 19:1-10.

Saul eke Tarsus ama etre ndikọbọ mme Christian onyụn̄ akabade edi Christian, ndien ẹkedikot enye apostle Paul.—Utom 22:6-21; Philippi 3:4-9.

Ndusụk Christian ke Corinth ẹkedi ‘mbon use, mme okpono ndem, mme esịn efịbe, mme adan̄ ukemuduot, mme inọ, mbon idiọkitọn̄, mme akpammịn, mme osụn̄i isụn̄i, ye mbon n̄kanubọk.’ Edi ke ẹma ẹkekpep n̄kpọ ẹkabade ẹdi ata mme Christian, ‘ẹma ẹyet mmọ, ẹnam mmọ ẹsana, ẹbat mmọ ke edinen ke enyịn̄ Ọbọn̄ mmọ Jesus Christ.’—1 Corinth 6:9-11.

[Ndise ke page 7]

Bible ekeme ndikpep fi nte okpokụtde unen