Nso Orụk Ukpep Ekeme Ndinam Fi Okụt Unen?

NDI akanam mfịna akan fi ubọk tutu etie nte ke eden̄ ke usọpmmọn̄? Kere orụk ufen oro ọkpọbọde edieke akpanamde ndudue ke nte odomode ndiyọ kiet m̀mê ediwak orụk mfịna oro! Idụhe owo oro amanade ye ukeme ndikọk kpukpru mfịna uforo uforo nnyụn̄ nnam nti ubiere kpukpru ini. Ntak edi oro mme owo ẹsibọde ukpep. Edi m̀mọ̀n̄ ke afo ekeme ndibọ ukpep oro ekemede nditịm fi idem man ọyọ mme mfịna uwem?

Ediwak owo, n̄kpri ye ikpọ, ẹdọhọ ke enen̄ede ọfọn owo aka n̄wed. Ndusụk ntaifiọk ẹkam ẹdọhọ ke mmimọ “imenen̄ede inịm ke afo udukemeke ndinyene [eti] utom edieke mûnyeneke n̄weditoro ufọkn̄wed ntaifiọk.” Edi odu ediwak n̄kpọ oro owo oyomde emi inyene obụkidem kpọt mîkemeke ndinọ. Ke uwụtn̄kpọ, ndi ukpep ufọkn̄wed ntaifiọk ekeme ndinam owo edi eti ete, eti nsan̄a, m̀mê eti ufan? Ke akpanikọ, mbon oro mme owo ẹmade ke ntak ifiọkn̄wed mmọ ẹkeme ndinyene ndiọi edu, inyụn̄ ikam ikemeke ndise mban̄a ubon mmọ, m̀mê ẹkam ẹwot idem.

Ndusụk owo ẹyom ndausụn̄ ẹto ukpep ido ukpono man ẹfiọk se ẹkpenamde, edi ido ukpono esikpu mmọ sia mînọhọ eti item oro an̄wamde mmọ ẹkeme ndise mban̄a mfịna mmọ. Ke uwụtn̄kpọ, Emilia * emi otode Mexico ọdọhọ ete: “Isua 15 emi ẹkebede, n̄kekere ke ami ye ebe mi idikemeke ndidụn̄ aba ọtọkiet. Nnyịn ima isineni eneni kpukpru ini. N̄kekemeke ndinam enye etre mmịn. Mma nsikpọn̄ n̄kpri nditọ nnyịn ke ufọk ikpọn̄ nsan̄a nyom ebe mi. Ibuot ama oyon̄ mi. Mma nsika ufọkabasi ediwak ini m̀mê ẹyeteme mi se ikemede ndin̄wam mi. Okposụkedi ẹkesikotde Bible ndusụk ini, owo ikọnọhọ mi item ndomokiet oro ekenen̄erede otụk mfịna mi; owo ndomokiet ikonyụn̄ isianke mi se n̄kpanamde. Nditie ke ufọkabasi nnyụn̄ ntiene ntịn̄ akam oro ẹkebọn̄de ikan̄wamke mi.” Idem esimem ndusụk owo ndikụt mme adaiso ido ukpono mmọ ẹdude ndiọi uwem. Ntre, ediwak owo inyeneke mbuọtidem aba ke ido ukpono ekeme ndinọ ukpep oro mmimọ iyomde man ikụt unen ke uwem.

Mmọdo, afo emekeme ndibụp idemfo ete, ‘Nso orụk ukpep ke n̄kpọbọ man n̄keme ndikụt unen ke uwem?’ Ndi ata Ido Ukpono Christ ekeme ndibọrọ akpan mbụme emi? Ẹyebọrọ mbụme emi ke ibuotikọ oro etienede.

[Ikọ idakisọn̄]