“Iwakke Usen Oro Ekenemde Mi Ntre”

ITIEUTOM ukara ke Australia oro esede aban̄a mme uyen oro ẹkopde mfụhọ ọdọhọ ke “mfụhọ edi kiet ke otu akpan mfịna oro ẹsinọmọde mme uyen.” Ndụn̄ọde owụt ke n̄kpọ nte uyen 100,000 ke Australia ẹsikop mfụhọ kpukpru isua.

Mme uyen Christian ẹsikop mfụhọ n̄ko. Nte ededi, mbuọtidem oro mmọ ẹnyenede ke Jehovah aman̄wam ediwak mmọ ẹkan mfụhọ ẹnyụn̄ ẹdu uwem oro enyenede ufọn. Utọ uwem emi esinen̄ede otụk mbon en̄wen ke eti usụn̄. Didie?

Yak ikere iban̄a ifiọkutom Claire—eyenan̄wan emi edide isua 18. Claire ye eka esie ẹdu ke esop Mme Ntiense Jehovah ke Melbourne. Ke ini ete esie ọkọkpọn̄de mmọ, Claire ama okop mfụhọ. Edi mbuọtidem oro enye ekenyenede ke Jehovah, kpa Ete esie eke heaven, okosụk ọsọsọn̄. Usen kiet, Lydia, abiausọbọ oro esisede ubon mmọ idem ama edi ndise eka Claire oro ọkọdọn̄ọde. Ke ama ekese enye idem, abiausọbọ emi ama ọdọhọ Claire edidụk ubomisọn̄ imen enye ika urua. Nte mmọ ẹkesụk ẹkade ke usụn̄, abiausọbọ oro ama obụp Claire m̀mê enye enyene ufan erenowo. Claire ama ọdọhọ ke sia imọ idide kiet ke otu Mme Ntiense Jehovah, ke imọ isidụkke ndụk ye irenowo ntịme ntịme. Idem ama akpa abiausọbọ emi. Do, Claire ama anam an̄wan̄a nte Bible an̄wamde imọ inam nti ubiere. Ke akpatre, Claire ama ọdọhọ abiausọbọ oro ke imọ iyọnọ enye n̄wed oro ọkọn̄ọde ke Bible, emi enen̄erede an̄wam imọ. N̄wed oro ekere Mme Mbụme N̄kparawa Owo Ẹbụpde—Mme Ibọrọ Ẹnyenede Ufọn.

Ke usen ita ẹbede tọn̄ọ Lydia ọkọbọ n̄wed oro, enye ama okot eka Claire ke urụk ukopikọ ndisian enye nte imọ imade n̄wed oro. Enye ama ọdọhọ ẹnọ imọ idem itiokiet man inọ mme nsan̄autom imọ. Ke Claire ama akada n̄wed oro ọsọk enye, abiausọbọ emi ama etịn̄ nte mbuọtidem Claire okotụkde imọ. Claire ama ọdọhọ ke ikpama ndikpep Bible ye enye, enye ama onyụn̄ enyịme.

Ke ediwak ọfiọn̄, Claire ama esida ini udia uwemeyo enịm ukpepn̄kpọ Bible ye abiausọbọ oro. Ekem Lydia ama obụp Claire m̀mê enye akpama nditịn̄ mban̄a mfụhọ oro ọnọmọde mme uyen, ke mbono ubọ ukpep oro ẹkediomide. Okposụkedi idem ekenyekde Claire, enye ama enyịme. Se iwakde ibe owo 60 ẹkedụk mbono oro. Nta ibọkusọbọ inan̄—ikpọ owo—ẹma ẹnọ utịn̄ikọ. Ama edikem ini oro Claire editịn̄de ikọ. Enye ama etịn̄ ke enen̄ede ọfọn mme uyen ẹnyene itie ebuana ye Abasi. Enye ama anam an̄wan̄a ke Jehovah Abasi enen̄ede ekere aban̄a mme uyen, esinyụn̄ an̄wam kpukpru mbon oro ẹkade ẹbịne enye man ẹbọ un̄wam ye ndọn̄esịt. Ke adianade do, enye ama ọsọn̄ọ etịn̄ ke Jehovah ọyọsọp osio kpukpru orụk udọn̄ọ efep ke isọn̄. (Isaiah 33:24) Nso ikedi utịp inem inem ikọ ntiense emi?

Claire ọkọdọhọ ete: ‘Ediwak owo ẹma ẹbịne mi ke mbono oro ama akasuana ẹdidọhọ ke ama enen̄ede enem mmimọ ndikop uyen enemede n̄kpọ aban̄a Abasi. Mma nnịm n̄wed N̄kparawa Owo Ẹbụp 23. N̄kaiferi ita oro ẹketienede ẹdụk mbono oro ẹma ẹnọ mi nọmba urụk ukopikọ mmọ. Kiet ke otu mmọ ke ekpep Bible idahaemi. Iwakke usen oro ekenemde mi ntre.’