Jehovah Edi Andibọk Nnyịn

“Jehovah edi andibọk mi, ndinanake n̄kpọ.”—PSALM 23:1.

1-3. Ntak emi mîkpaha owo idem ndikụt David emende Jehovah odomo ye ekpemerọn̄?

 NSO ke afo ekpetịn̄ edieke ẹkpedọhọde fi etịn̄ nte Jehovah esede aban̄a ikọt esie? Afo ekpemen ima ima usụn̄ oro Jehovah esede aban̄a mme anam-akpanikọ asan̄autom esie odomo ye nso? Se iwakde ibe isua 3,000 emi ẹkebede, Edidem David emi eketienede ewet psalm ama ewet aban̄a Jehovah ke inem inem usụn̄, adade uwụtn̄kpọ oto utom ini uyen esie.

² David ekedi ekpemerọn̄ ke ini enye ekedide akparawa, ntre enye ama ọfiọk nte esikpemede erọn̄. Enye ama enen̄ede ọfiọk ke edieke owo mîsehe mme erọn̄ enyịn, ke edi mmemmem n̄kpọ mmọ ndisop, inọ ndiyịp, m̀mê ndiọi unam ndiwai mmọ. (1 Samuel 17:34-36) Edieke eti ekpemerọn̄ mîsehe iban̄a mme erọn̄, mmọ idinyeneke mbiet se ẹtade. Ke David ama ọkọsọn̄, enye okosụk eteti ekese ini oro enye ekesibiatde ada mme erọn̄ usụn̄, ekpeme, onyụn̄ ọbọk mmọ.

³ Ikpaha owo idem ndikụt David eketide utom ukpeme erọn̄, ke ini spirit Abasi akadade enye usụn̄ nditịn̄ mban̄a nte Jehovah esede aban̄a ikọt esie. Psalm ọyọhọ 23 oro David ekewetde ọtọn̄ọ ntem: “Jehovah edi andibọk mi, ndinanake n̄kpọ.” Ẹyak idụn̄ọde ntak oro ikọ emi enen̄erede odot. Ndien, nte idụn̄ọrede Psalm 23, nnyịn iyokụt mme usụn̄ oro Jehovah esede aban̄a mme andituak ibuot nnọ enye, kpa nte ekpemerọn̄ esisede aban̄a mme erọn̄ esie.—1 Peter 2:25.

Uwụtn̄kpọ Oro Odotde

4, 5. Didie ke Bible etịn̄ aban̄a nte mme erọn̄ ẹtiede?

⁴ Jehovah enyene ediwak udorienyịn̄ ke Bible, edi udorienyịn̄ oro enen̄erede otụk owo edi “Andibọk” m̀mê Ekpemerọn̄. (Psalm 80:1) Man itịm ifiọk ntak emi odotde ẹkot Jehovah Andibọk m̀mê Ekpemerọn̄, ọfọn ifiọk n̄kpọ iba: akpa edi nte mme erọn̄ ẹtiede, udiana edi mme utom ye mme edu eti ekpemerọn̄.

⁵ Bible esiwak nditịn̄ mban̄a nte mme erọn̄ ẹtiede, ọdọhọde ke mme erọn̄ ẹsisọp ẹma ekpemerọn̄ oro anamde n̄kpọ ye mmọ ke ima ima usụn̄ (2 Samuel 12:3), ke mmọ ẹsitie ifụre ifụre (Isaiah 53:7), ẹnyụn̄ ẹsịne ke otu n̄kpri ufene oro mîkemeke ndinyan̄a idemmọ. (Micah 5:8) Ewet n̄wed kiet emi ọbọkde erọn̄ ke ediwak isua ọkọdọhọ ete: “Mme erọn̄ ‘isikam isehe iban̄a idemmọ’ nte ndusụk owo ẹsikerede. Oyom ẹnen̄ede ẹnọ mmọ ntịn̄enyịn ẹnyụn̄  ẹnen̄ede ẹse ẹban̄a mmọ ẹkan ufene ekededi.” Oyom ima ima ekpemerọn̄ ese aban̄a ufene oro mîkemeke ndinyan̄a idem mi, mbak n̄kpọ edinam mmọ.—Ezekiel 34:5.

6. N̄wed ukabadeikọ Bible kiet ọdọhọ ke ekpemerọn̄ eset ekesinam nso kpukpru usen?

⁶ Nso ke ekpemerọn̄ eset ekesinam kpukpru usen? N̄wed ukabadeikọ Bible kiet ọdọhọ ete: “Enye ama esimen otuerọn̄ esie ọwọrọ ke ufọk tụhi-tụhi usenubọk aka ebiet oro mmọ ẹditade mbiet. Enye ama esitie do ekpeme mmọ tutu eyo okụt, okụtde ete ke erọn̄ ndomokiet iyoho ikpọn̄ otuerọn̄, ndien edieke erọn̄ oyode ọkpọn̄ otuerọn̄ ke ini enye efepde enyịn, enye ama esitịn̄ enyịn oyom erọn̄ oro tutu okụt onyụn̄ ada enye edisịn ke otuerọn̄. . . . Enye ama esida otuerọn̄ ọnyọn̄ edi ufọkerọn̄ ke ini eyo okụtde, onyụn̄ abat mmọ nte mmọ ẹbede ẹdụk ufọkerọn̄ man okụt ete ke erọn̄ ndomokiet ikosopke. . . . Enye ama esikpeme otuerọn̄ ke okoneyo mbak ndiọi unam, m̀mê mme inọ oro ẹsisan̄ade ẹyom se ẹyịpde.” *

7. Ntak okoyomde ekpemerọn̄ enen̄ede eme ime onyụn̄ anam n̄kpọ ke ima ima usụn̄ ndusụk ini?

⁷ Ama odu mme ini oro okoyomde ẹnen̄ede ẹme ime ẹnyụn̄ ẹse ẹban̄a mme erọn̄ ke ima ima usụn̄, akpan akpan mme uman erọn̄ oro ẹkeyomode ọkọrọ ye nditọ erọn̄. (Genesis 33:13) N̄wed ndụn̄ọde kiet oro etịn̄de n̄kpọ aban̄a Bible ọdọhọ ete: “Erọn̄ esiwak ndiman eyen anyan ebiet ko ke mben obot. Ekpemerọn̄ esitịn̄ enyịn ekpeme uman erọn̄ oro amande eyen onyụn̄ emen eyenerọn̄ ekesịn ke otuerọn̄. Enye ekeme ndikama eyenerọn̄ oro ediwak usen ke ubọk m̀mê ke ewụra esie oro enye owobide ọkọhọ tutu eyenerọn̄ ekeme ndisan̄a.” (Isaiah 40:10, 11) Nte an̄wan̄ade, ama oyom eti ekpemerọn̄ okop odudu onyụn̄ enyene ima.

8. David ọdọhọ ke mme ntak ewe ẹkenam imọ ibuọt idem ye Jehovah?

⁸ “Jehovah edi andibọk mi”—ikọ emi enen̄ede odot ye Ete nnyịn eke heaven didie ntem! Nte nnyịn idụn̄ọrede Psalm 23, nnyịn iyokụt usụn̄ oro Abasi adade odudu ye ima esie ese aban̄a nnyịn, ukem nte ekpemerọn̄ esinamde. David owụt ke Ps 23 ufan̄ikọ 1 ke imọ imenyene mbuọtidem ke Abasi idiyakke mme erọn̄ esie ‘ẹnana n̄kpọ.’ Ke ufan̄ikọ 2 esịm 5, David asiak ntak ita oro ẹnamde imọ inyene mbuọtidem: Jehovah esida mme erọn̄ esie usụn̄, ekpeme, onyụn̄ ọbọk mmọ. Ẹyak ineme mme ntak emi ke adiana ke adiana.

‘Enye Ada Mi Usụn̄’

9. Nso orụk ebiet oro etiede emem emem ke David etịn̄ aban̄a, ndien didie ke mme erọn̄ ẹkeme ndidu ke utọ ebiet oro?

⁹ Akpa, Jehovah esida ikọt esie usụn̄. David ewet ete: “Enye ayanam mi nsụhọde nna ke awawa mbiet: ayada mi aka ke mmọn̄ nduọk-odudu. Enye eyedemede ukpọn̄ mi: eyeteme mi [m̀mê, ada mi] usụn̄ eti ido aban̄a enyịn̄ esie.” (Psalm 23:2, 3) David ndidọhọ ke otuerọn̄ ẹsụhọde ẹna emem emem ke awawa mbiet ọwọrọ edikop uyụhọ, edinyene nduọkodudu, ye edidu ke ifụre. Ikọ Hebrew oro ẹkabarede “awawa mbiet” ekeme ndiwọrọ “ebiet oro ofụrede.” Etie nte mme erọn̄ oro mînyeneke andikpeme idikemeke ndifiọk ebiet oro ọnọde nduọkodudu man ẹkesụhọrede ẹna ke emem. Ana andikpeme mmọ ada mmọ aka utọ “ebiet oro ofụrede” do.

10. Didie ke Abasi owụt ke imenyene mbuọtidem ke idem nnyịn?

¹⁰ Didie ke Jehovah ada nnyịn usụn̄ mfịn? Usụn̄ kiet oro enye anamde emi edi ke ndinịm uwụtn̄kpọ. Ikọ esie esịn udọn̄ ọnọ nnyịn ete idi “mme andikpebe Abasi.” (Ephesus 5:1) Mme ufan̄ikọ emi ẹkande Ephesus 5:1 ẹkụk ẹsiak mbọm, edifen nnọ, ye ima. (Ephesus 4:32; 5:2) Ke akpanikọ, Jehovah edi akakan uwụtn̄kpọ nti edu emi. Ndi enye oyom inam n̄kpọ oro akande ukeme nnyịn ke ndidọhọ ikpebe imọ? Baba-o. Ikọ eke odudu spirit oro enen̄ede owụt ke enye enyene mbuọtidem ke idem nnyịn. Ke nso usụn̄? Ẹnam nnyịn ke mbiet Abasi, ọwọrọde ke idada nti edu ye ukeme ndituak ibuot nnọ Abasi imana. (Genesis  1:26) Ntem, Jehovah ọfiọk ke okposụkedi nnyịn idide mme anana-mfọnmma owo, ke nnyịn imekeme ndinyene mme edu oro imọ inyenede. Kam kere ban̄a emi—edima Abasi nnyịn enyene mbuọtidem ke nnyịn imekeme nditie nte imọ. Edieke nnyịn ikpebede uwụtn̄kpọ esie, enye ayada nnyịn aka ‘ebiet oro ofụrede owo ke idem.’ Nnyịn iyodụn̄ ke “ifụre” ke ererimbot afai emi inyụn̄ inyene emem ke ntak ifiọkde ke imenyene unyịme Abasi.—Psalm 4:8; 29:11.

11. Nso ke Jehovah esikere aban̄a ke ini enye adade mme erọn̄ esie usụn̄, ndien didie ke ẹkụt emi ke se enye oyomde oto nnyịn?

¹¹ Jehovah owụt ima onyụn̄ eme ime nte enye adade nnyịn usụn̄. Ekpemerọn̄ esifiọk ke mme erọn̄ inyeneke odudu, ntre enye esida mmọ usụn̄ “sụn̄-sụn̄,” inyụn̄ isọpke isan̄ ikan mmọ. (Genesis 33:14) Kpasụk ntre, Jehovah esida mme erọn̄ esie usụn̄ “sụn̄-sụn̄” etiene nte mmọ ẹsiode ikpat. Enye esikere aban̄a mme ukeme ye mme idaha nnyịn. Ke nditịm ntịn̄, enye isisọpke isan̄ ikan nnyịn; akanam enye idọhọke inam n̄kpọ oro akande ukeme nnyịn. Enye oyom inam utom ke ofụri ukpọn̄. (Colossae 3:23) Edi nso edieke edide ọmọsọn̄ unyụn̄ ukemeke aba ndinam se ekesinamde? Mîdịghe nso edieke idiọk udọn̄ọ mîyakke anam ekese aba? Utọ idaha emi ke enen̄ede ọnọ ndọn̄esịt ndinam utom ofụri ukpọn̄. Idụhe ukpọn̄ iba oro ẹdide ata ukem. Ndinam utom ke ofụri ukpọn̄ ọwọrọ ndida ofụri ukeme ye odudu fo nnam ofụri se ekemede ke utom Abasi. Okposụkedi mmeme nnyịn mîyakke inam ekese, Jehovah ama nte nnyịn ituakde ibuot inọ enye ke ofụri esịt.—Mark 12:29, 30.

12. Ewe uwụtn̄kpọ ke Ibet Moses owụt ke Jehovah esida mme erọn̄ esie usụn̄ “sụn̄-sụn̄” etiene nte mmọ ẹsiode ikpat?

¹² Man owụt ke Jehovah esida mme erọn̄ esie usụn̄ “sụn̄-sụn̄” etiene nte mmọ ẹsiode ikpat, kere se Ibet Moses etịn̄de aban̄a ndusụk uwa idiọkido. Jehovah okoyom ẹwa eti uwa oro otode esịt oro ọyọhọde ye ekọm. Ke ukem ini oro, andiwa uwa ekesiwa n̄kpọ oro mîkokponke ikan ukeme esie. Ibet ọkọdọhọ ete: “Edieke ubọk mîkemke enye ke eke n̄kpri ufene, yak enye ada mbomo n̄kuku iba, m̀mê nditọ ibiom iba.” Ndien nso edieke enye mîkakam inyeneke ibiom iba? Do enye ekeme ndida “eti ndom-uyo.” (Leviticus 5:7, 11) Emi owụt ke Abasi ikọdọhọke andiwa uwa ọnọ se ikande ukeme esie. Sia Abasi mîkpụhọkede, nnyịn imekeme ndibọ ndọn̄esịt ndifiọk ke akananam enye idọhọke inọ se nnyịn mîkemeke ndinọ; utu ke oro, enye okop inemesịt ndibọ se ededi oro ikemede ndinọ. (Malachi 3:6) Edi n̄kpọ inemesịt didie ntem ndinyene utọ eti Ekpemerọn̄ oro nte Adausụn̄ nnyịn!

“Ndifeheke Idiọk: Koro Afo Odude ye Ami”

13. Didie ke se David etịn̄de ke Psalm 23:4 owụt ke enye ama enen̄ede ekpere Jehovah idem, ndien ntak emi mîkpaha owo idem?

¹³ David etịn̄ ọyọhọ ntak iba oro anamde enye enyene mbuọtidem ke Jehovah: Jehovah esikpeme mme erọn̄ esie. Nnyịn ikot ite: “Ndien n̄ko ke ini ndisan̄ade ke itịghede mfụt n̄kpa, ndifeheke idiọk: koro afo odude ye ami;  edi eto fo ye esan̄ fo ẹdidọn̄ mi esịt.” (Psalm 23:4) Mi David ada ikọ oro “afo,” owụtde ke enye enen̄ede ekpere Jehovah idem. Emi ikpaha owo idem, koro David etịn̄ aban̄a nte Abasi akan̄wamde imọ iyọ afanikọn̄. David ama asan̄a ke ediwak itịghede mfụt n̄kpa—kpa mme ini emi uwem esie okodude ke itiendịk. Edi enye ikayakke ndịk akan enye ubọk, koro enye ama ọfiọk ke Abasi akakama “eto” ye “esan̄” kpukpru ini ekpeme imọ. Sia David ọkọfiọkde ke Jehovah ekpeme imọ, emi ama ọdọn̄ enye esịt onyụn̄ anam enye enen̄ede asan̄a ekpere Jehovah. *

14. Nso un̄wọn̄ọ ke Bible ọn̄wọn̄ọ ọnọ nnyịn aban̄a ukpeme Jehovah, edi nso ke emi mîwọrọke?

¹⁴ Didie ke Jehovah ekpeme mme erọn̄ esie mfịn? Bible ọn̄wọn̄ọ ọnọ nnyịn ke andibiọn̄ọ ndomokiet—demon m̀mê owo—idikwe unen ke ndisọhi mme erọn̄ Jehovah mfep ke isọn̄. Jehovah idiyakke oro etịbe tutu amama. (Isaiah 54:17; 2 Peter 2:9) Nte ededi, emi iwọrọke ke Andikpeme nnyịn eyekpeme nnyịn ọbiọn̄ọ kpukpru afanikọn̄. Nnyịn imesisobo mme afanikọn̄ oro ẹsịmde kpukpru owo, inyụn̄ isobo ubiọn̄ọ oro ẹsịmde kpukpru ata Christian. (2 Timothy 3:12; James 1:2) Odu mme ini oro ẹtiede nte ke nnyịn isan̄a ke “itịghede mfụt n̄kpa.” Ke uwụtn̄kpọ, ukọbọ m̀mê udọn̄ọ ekeme ndinam nnyịn ikpere n̄kpa. Mîdịghe owo ima nnyịn ekeme ndikpere n̄kpa m̀mê akam ebet efere. Idem ke ini etiede nte ke n̄kpọ ọsọn̄ ye nnyịn akaha, Andikpeme nnyịn odu ye nnyịn, oyonyụn̄ ekpeme nnyịn. Didie?

15, 16. (a) Ke mme usụn̄ ewe ke Jehovah an̄wam nnyịn iyọ mme afanikọn̄? (b) Bụk ifiọkutom owụtde nte Jehovah esin̄wamde nnyịn ke ini idomo.

¹⁵ Jehovah in̄wọn̄ọke ke iyekpeme nnyịn ke utịbe utịbe usụn̄. * Edi nnyịn imekeme nditịm nnịm ke Jehovah ayan̄wam nnyịn ikan ubiọn̄ọ ekededi oro isobode. Enye ekeme ndinọ nnyịn ọniọn̄ ndiyọ “nsio nsio idomo.” (James 1:2-5) Ekpemerọn̄ isidaha eto m̀mê esan̄ esie ibịn ndiọi unam kpọt edi esida n̄ko atuak mme erọn̄ esie sụn̄sụn̄ man ẹdụk nnennen afan̄. Jehovah ekeme ndida ekemmọ andituak ibuot ‘ntuak nnyịn sụn̄sụn̄’ man ida item Bible oro ekemede ndikpụhọde idaha nnyịn, isịn ke edinam. Ke adianade do, Jehovah ekeme ndinọ nnyịn ukeme ndiyọ. (Philippi 4:13) Enye ekeme ndida edisana spirit esie nnọ nnyịn “odudu eke ebede ukeme owo.” (2 Corinth 4:7) Spirit Abasi ekeme ndinam nnyịn iyọ idomo ekededi oro Satan edidade itiene nnyịn. (1 Corinth 10:13) Ndi nnyịn ikopke ndọn̄esịt ndifiọk ke Jehovah eben̄e idem ndin̄wam nnyịn?

¹⁶ Ih, inamke n̄kpọ m̀mê ewe itịghede mfụt n̄kpa ke nnyịn isan̄a, nnyịn isan̄ake ikpọn̄. Andikpeme nnyịn odu ye nnyịn, an̄wamde nnyịn ke usụn̄ oro nnyịn mîkenen̄ekede ifiọk. Kere ban̄a se iketịbede inọ ebiowo kiet, emi ẹkekụtde ke idiọk mbufịt ofụt enye ke mfre. Enye ọdọhọ ete: “Ke nditịn̄ akpanikọ, ke mbemiso eketie mi nte Jehovah ayat esịt ye ami m̀mê ke enye ikam imaha mi. Edi mma mbiere ke ndikpọn̄ke Jehovah. Utu ke oro, mma ntịn̄ nnọ enye nte etiede mi ke idem. Jehovah ama an̄wam mi, ediwak ini adade nditọete eke spirit ọdọn̄ mi esịt. Ediwak mmọ ẹma ẹsian mi se ikan̄wamde mmọ ẹyọ idiọk udọn̄ọ, oro ama an̄wam mi n̄ko. Nti ikọ mmọ ẹma ẹti mi ke idịghe ami ndi akpa owo oro ọdọn̄ọde utọ udọn̄ọ emi. Un̄wam oro mmọ ẹkenọde mi ọkọrọ ye nte mmọ ẹkefọnde ido ye mi, ẹma ẹnam mi mfiọk ke Jehovah ikayatke esịt ye ami. Nte ededi, nnyene ndika iso nyọ udọn̄ọ mi, nnyụn̄ mfiọkke se ididide utịt. Edi mmenịm ke Jehovah odu ye ami, enye oyonyụn̄ aka iso an̄wam mi nyọ udọn̄ọ emi.”

“Afo Eyebri Okpokoro Ọnọ Mi”

17. Ke Psalm 23:5, David ọdọhọ ke Jehovah etie nte anie, ndien ntak emi mîtuahake ye uwụtn̄kpọ aban̄ade ekpemerọn̄?

¹⁷ Idahaemi David asiak ọyọhọ ntak ita oro  anamde enye ọbuọt idem ke Andibọk enye: Jehovah ọbọk mme erọn̄ esie, ndien enye ada ọkpọmiọk udia ọbọk mmọ. David ewet ete: “Afo eyebri okpokoro ọnọ mi ke iso mme asua mi: ayada aran eyet mi ke ibuot; cup mi ọyọhọ ọduọi.” (Psalm 23:5) Ke ufan̄ikọ emi, David ọdọhọ ke Andibọk imọ etie nte enyeneufọk emi atatde ubọk ọnọ ọkpọmiọk udia ye mmịn. Uwụtn̄kpọ iba emi—ima ima ekpemerọn̄ ye enyeneufọk oro atatde ubọk—ituahake ye kiet eken. Kamse, ana eti ekpemerọn̄ ọfiọk ebiet emi awawa mbiet odude onyụn̄ ọfiọk ebiet emi edin̄wọn̄ mmọn̄ odude barasuene mbak otuerọn̄ esie ‘edinana n̄kpọ.’—Psalm 23:1, 2.

18. Nso iwụt ke Jehovah edi enyeneufọk oro atatde ubọk?

¹⁸ Ndi Andibọk nnyịn edi n̄ko enyeneufọk emi atatde ubọk? Ih! Kam kere ban̄a akpakịp nti udia eke spirit oro nnyịn idiade idahaemi. Jehovah ada otu ofụn emi anamde akpanikọ onyụn̄ enyenede ọniọn̄ ọnọ nnyịn mme n̄wed un̄wam ukpep Bible ọkọrọ ye inem inem ndutịm ke mme mbono esop, n̄kpri ye ikpọ mbono—kpukpru emi ẹyụhọ udọn̄ nnyịn ke n̄kan̄ eke spirit. (Matthew 24:45-47) Ke akpanikọ, nnyịn imenyene ọkpọmiọk udia eke spirit. “Ofụn emi anamde akpanikọ onyụn̄ enyenede ọniọn̄” omosion̄o ediwak miliọn Bible ye mme n̄wed un̄wam ukpep Bible, ndien mme n̄wed emi ẹdu idahaemi ke usem 413. Jehovah ọmọnọ nnyịn nsio nsio udia eke spirit—ọtọn̄ọde ke “mmọn̄eba,” oro edi mme akpan ukpepn̄kpọ Bible, esịm “ọkpọsọn̄ udia,” kpa ntotụn̄ọ ukpepn̄kpọ Bible. (Mme Hebrew 5:11-14) Nte utịp, ke ini nnyịn isobode mfịna m̀mê iyomde ndinam ubiere, nnyịn imesikụt nnennen ndausụn̄ oro iyomde. N̄kpọ ekpetie didie ye nnyịn edieke nnyịn mîkpenyeneke mme utọ udia eke spirit emi? Ke akpanikọ, Andibọk nnyịn edi owo ntatubọk!—Isaiah 25:6; 65:13.

“Nyodụn̄ ke Ufọk Jehovah”

19, 20. (a) Nso mbuọtidem ke David owụt ke Psalm 23:6, ndien didie ke nnyịn ikeme ndinyene orụk mbuọtidem oro? (b) Nso ke ẹdineme ke ibuotikọ oro etienede?

¹⁹ Ke David ama eketie ekere aban̄a usụn̄ oro Andikpeme ye Andibọk esie esinamde n̄kpọ, enye eberi ete: “Mfọn ye ima ikpọn̄ ẹyebịne mi ke ofụri eyo uwem mi; ndien nyodụn̄ ke ufọk Jehovah ke nsinsi.” (Psalm 23:6) David etịn̄ ikọ ye esịt oro ọyọhọde ye ekọm onyụn̄ enyenede mbuọtidem—enye owụt esịtekọm ke etide se iketịbede ke eset onyụn̄ enyene mbuọtidem ke ini iso. David emi ekedide ekpemerọn̄ mi ikopke ndịk, koro enye ọfiọk ke adan̄a nte imọ isan̄ade ikpere Andibọk imọ eke heaven, nte n̄kpọ eke imọ idụn̄de ke ufọk Esie, ke Jehovah eyese aban̄a imọ ke ima ima usụn̄ kpukpru ini.

²⁰ Nnyịn iwụt esịtekọm didie ntem iban̄a ndinem ikọ oro ẹwetde ke Psalm 23! David ada ikọ oro enen̄erede odot etịn̄ aban̄a usụn̄ oro Jehovah adade mme erọn̄ esie usụn̄, ekpemede, onyụn̄ ọbọkde mmọ. Ẹwet ndinem ikọ David ẹnịm ke Bible man anam inyene mbuọtidem ke nnyịn n̄ko imekeme ndida Jehovah nte Andibọk nnyịn. Ih, adan̄a nte nnyịn isan̄ade ikpere Jehovah, enye eyese aban̄a nnyịn nte edima Ekpemerọn̄ “ke ofụri eyo uwem” nnyịn, idem ke nsinsi nsinsi. Nte ededi, sia nnyịn idide mme erọn̄ esie, obiomo nnyịn ndisan̄a ye akwa Andibọk nnyịn, Jehovah. Ẹyeneme se emi abuanade ke ibuotikọ oro etienede.

[Mme Ikọ idakisọn̄]

Nte Afo Emeti?

• Ntak odotde David ndimen Jehovah ndomo ye ekpemerọn̄?

• Didie ke nte Jehovah adade nnyịn usụn̄ owụt ke enye ọfiọk mmeme nnyịn?

• Ke mme usụn̄ ewe ke Jehovah an̄wam nnyịn iyọ mme idomo?

• Nso iwụt ke Jehovah edi Enyeneufọk oro atatde ubọk?

[Mme Mbụme Ukpepn̄kpọ]

[Ndise ke page 18]

Jehovah ada mme erọn̄ Esie usụn̄ ukem nte ekpemerọn̄ ke Israel