Mbụk Eyouwem

Mma Mbọ ‘Se Esịt Mi Oyomde’

NTE DOMINIQUE MORGOU OBỤKDE

Ke akpatre, mma ndi Africa ke December 1998! Mma nyụhọ udọn̄ oro n̄kenyenede toto ke uyen. Ama esinen̄ede ọdọn̄ mi ndikụt nte isọn̄ Africa etiede ye ndiye unamikọt Africa. Ke emi, mma ndidu mi ke idemmi! Mma nnyụn̄ nyụhọ udọn̄ en̄wen n̄ko—ndinam utom ukwọrọikọ uyọhọ ini ke esenidụt. Emi eketie ediwak owo nte se mîkemeke nditịbe. Ami nsinen̄ekede n̄kụt usụn̄, ndien ebua emi ẹkenọde ukpep ndisida owo usụn̄ ke ikpọ obio Europe esida mi usụn̄ ke mme efak emi owo mîsịnke itai ke mme obio-in̄wan̄ Africa. Yak nsian fi nte n̄kekemede ndidi ndinam utom ke Africa ye nte Jehovah ọkọnọde mi ‘se esịt mi oyomde.’—Psalm 37:4.

 N̄KAMANA ke June 9, 1966, ke usụk usụk France. Ami n̄kedi ekperedem eyen ke otu nditọ itiaba—iren iba ye iban ition—emi edima ete ye eka ẹkebọkde. Nte ededi, n̄kpọ mfụhọ ama etịbe ke ini n̄kedide ekpri eyen. Enyene udọn̄ọ emi eka eka mi, eka mi, ye eyeneka mi an̄wan kiet ẹnyenede; ami n̄ko mmenyene udọn̄ọ emi ẹdade-da ẹmana mi, ndien emi esinam owo ọdọn̄ọ nnan.

Ke ini n̄kedide uyen, n̄kenyene ndiyọ usua eke orụk, asari, ye mbubịk ido, ndien emi ama anam mi ndu uwem nsọn̄ibuot. Ke ini afanikọn̄ emi ke nnyịn ikọwọrọ ikodụn̄ ke obio Hérault. Utịbe utịbe n̄kpọ ama etịbe do.

Usenubọk Sunday kiet, Mme Ntiense Jehovah iba ẹma ẹdi ufọk nnyịn. Mama ama ọfiọk mmọ onyụn̄ ọdọhọ mmọ ẹdụk ẹdi ufọk. Kiet ke otu mmọ ama obụp Mama m̀mê enye eti ke  enye ama ọn̄wọn̄ọ ke imọ iyọtọn̄ọ ukpepn̄kpọ Bible usen kiet. Mama ama eti onyụn̄ obụp ete, “Itọn̄ọ ini ewe?” Mmọ ẹma ẹnyịme ndisisobo kpukpru usenubọk Sunday, ntem ke Mama ọkọtọn̄ọ ndikpep “akpanikọ eti mbụk.”—Galatia 2:14.

Ndikọ Ifiọk

Mama ama enen̄ede esịn ifịk man ọfiọk onyụn̄ eti se enye ekekpepde. Enye ekenyene ndimụm kpukpru n̄kpọ ndọn̄ ke ibuot sia enye ekedide nnan. Mme Ntiense oro ẹma ẹnen̄ede ẹnyene ime ye enye. Ami n̄kesidedịbe ke ubet mi ini ekededi oro Mme Ntiense oro ẹdide, nnyụn̄ n̄wọrọ ndi ke mmọ ẹma ẹkenyọn̄ọ. Nte ededi, Eugénie emi edide kiet ke otu Mme Ntiense oro ama okụt mi uwemeyo usen kiet onyụn̄ enyene nneme ye ami. Enye ama asian mi ke Obio Ubọn̄ Abasi eyetre kpukpru mbubịk ido, usua, ye asari ke ererimbot emi. Enye ama ọdọhọ ete: “Abasi ikpọn̄ ekeme ndinam emi.” Enye ama onyụn̄ obụp m̀mê ami n̄kpama ndifiọk n̄kpọ efen efen mban̄a oro? Ukpepn̄kpọ Bible okịmmọ ama ọtọn̄ọ ndan̄nsiere.

Kpukpru n̄kpọ oro n̄kekpepde ẹkedi mbufa. Mma ndifiọk ke nti ntak ẹnam Abasi ayak idiọkido odu ke isọn̄ ke ibio ini. (Genesis 3:15; John 3:16; Rome 9:17) Mma n̄kpep n̄ko ke Jehovah ọnọ nnyịn idotenyịn. Enye ọn̄wọn̄ọ utịbe utịbe un̄wọn̄ọ nsinsi uwem ke Paradise isọn̄ ọnọ nnyịn. (Psalm 37:29; 96:11, 12; Isaiah 35:1, 2; 45:18) Enyịn mi ayafiak an̄wan̄a ke Paradise oro.—Isaiah 35:5.

Nditọn̄ọ Utom Uyọhọ Ini

Mma nyarade uyakidem mi nnọ Jehovah ke baptism mmọn̄ ke December 12, 1985, ke ndikpebe uwụtn̄kpọ Marie-Claire eyeneka mi. Ikebịghike, Jean-Pierre eyeneka mi ye eka mi ẹma ẹtiene ẹna baptism n̄ko.

Ediwak mme asiakusụn̄ ofụri ini m̀mê mme ọkwọrọikọ uyọhọ ini ẹma ẹdu ke esop oro n̄kodude. Idatesịt ye nsịnifịk mmọ ke utom ukwọrọikọ ẹma ẹsịn udọn̄ ẹnọ mi. Akam edi Marie-Claire eyeneka mi emi mîketịmke ikụt usụn̄, okonyụn̄ esịnede n̄kpọ unen̄ede ọkpọ ke ukot kiet, ama odụk utom uyọhọ ini. Uwụtn̄kpọ esie osụk esesịn udọn̄ ọnọ mi tutu mfịn emi. Sia mme asiakusụn̄ ẹkewakde ke esop ye ke ubon nnyịn, emi ama anam mi nnyene ọkpọsọn̄ udọn̄ ndibuana ke utom uyọhọ ini. Ntre, mma ntọn̄ọ utom usiakusụn̄ ke obio Béziers ke November 1990.—Psalm 94:17-19.

Ndiyọ Mmemidem

Mme asiakusụn̄ oro ẹkesitịn̄de enyịn ẹkpeme mi ẹma ẹn̄wam mi ke utom ukwọrọikọ. Kpa ye oro, idem ama esimem mi ke ini ke ini ke ntak mfịna enyịn mi, mma nnyụn̄ n̄kere nte n̄kpanamde n̄kan se nsinamde. Nte ededi, Jehovah ama omụm mi akama ke ini mmemidem oro. Mma nnam ndụn̄ọde ke Watch Tower Publications Index, nyom mbụk eyouwem mme asiakusụn̄ oro ẹnyenede mfịna enyịn nte ami. Idem ama akpa mi ndikụt nte mmọ ẹkewakde! Mbụk oro ẹnyenede ufọn ẹnyụn̄ ẹnọde nsịnudọn̄ mi ẹma ẹkpep mi ndiwụt esịtekọm mban̄a se n̄kekemede ndinam nnyụn̄ ntre ndifịna idem mban̄a se mmen̄kekemeke ndinam.

N̄kesisan̄a ye Mme Ntiense eken nnam mme ufọkurua ẹsana man n̄kpese mban̄a idemmi. Usen kiet, mma n̄kụt ke mbon oro isinamde utom kiet ẹma ẹfiak ẹkekpọri ebiet oro mma n̄kọkpọkpọri. Ke akpanikọ, mma mbe n̄kpọn̄ ekese mbio. Mma n̄ka mbịne Valérie, asiakusụn̄ emi ekesede aban̄a otu nnyịn n̄kọdọhọ enye etịn̄ akpanikọ ọnọ mi m̀mê ndadian utom nnọ mmọ. Ke ntak mfọnido, enye ama ọdọhọ mi mbiere ke idemmi ini oro mmen̄kemeke ndinam utom oro aba. Mma ntre utom oro ke March 1994.

Ekikere unana ediwọrọ n̄kpọ ama afiak akan mi ubọk. Mma mbọn̄ akam ke ofụri esịt nnọ Jehovah, ndien mmọfiọk ke enye ama okop eseme mi. Edikpep Bible ye mme n̄wed Christian ama afiak an̄wam mi. Idem ke ini enyịn ọkọdiọn̄de-diọn̄ ekịm mi, n̄kọdọdiọn̄ nnyene udọn̄ ndinam n̄kpọ Jehovah. Nso ke n̄kpanam?

 Akpa N̄kenyene Ndibebet, Ekem Nnam Usọp Usọp Ubiere

Mma nsịn eben̄e ubọ ukpep ke Ebiet Ukpep Mme Nnan ye Mbon Oro Enyịn Mîtịmke Ifọn ke Nîmes, ndien ke akpatre ẹma ẹda mi ke ọfiọn̄ ita. Ọfiọn̄ ita oro ẹma ẹnyene ufọn. Mma ndi ndifiọk nte enyịn mi akabiarade eketre nnyụn̄ n̄kpep ndiyọ enye. Ndidụk nsan̄a ye mme owo emi ẹkenyenede kpukpru orụk udọn̄ọ ama anam mi mfiọk nte idotenyịn oro nnyenede ke Abasi edide akpan n̄kpọ. Ke nsụhọde n̄kaha, ami mma nnyene utịtmbuba nnyụn̄ n̄keme ndinam n̄kpọ oro enyenede ufọn. Mma n̄kpep ndikot n̄wed mme nnan ke usem French n̄ko.

Ke ini n̄kafiakde nnyọn̄ ufọk, ubon nnyịn ẹma ẹkụt ke ukpep oro ama enen̄ede an̄wam mi. Nte ededi, n̄kamaha afia esan̄ oro mme nnan ẹsikamade. Ama ọsọn̄ mi ndinyịme ke oyom n̄kama ekere esan̄ oro. Ọkpọfọn ndinyene n̄kpọ un̄wam efen—eyedi ebua emi esidade owo usụn̄.

Mma nsịn eben̄e nyom ebua, edi ẹma ẹdọhọ mi ke ata ediwak owo oro ẹyomde ebua ẹdodu. N̄ko-n̄ko, itieutom esede n̄kpọ aban̄a oro enyene ndinam ndụn̄ọde kan̄a. Owo isinọhọ owo eke ẹkokụt ebua emi esidade owo usụn̄. Usen kiet mma kiet oro esede enyịn ke n̄ka oro esede aban̄a mme nnan ama asian mi ke n̄ka mme ebre tenis ẹkeyom ndinọ nnan m̀mê owo emi mîtịmke ikụt usụn̄ ke edem nnyịn ebua emi esidade owo usụn̄. Enye ama ọdọhọ ke imọ ikenyene mi ke ekikere, onyụn̄ obụp m̀mê ami n̄kpama ndibọ. Mma nnịm ke ubọk Jehovah esịne ke n̄kpọ emi nnyụn̄ nnyịme ndibọ. Nte ededi, n̄kenyene nditetie mbet ebua oro.

Nsụk N̄kekere Mban̄a Africa

Ke adan̄aemi n̄ketiede mbet ebua oro, mma ntọn̄ọ ndikere mban̄a n̄kpọ en̄wen. Nte mma n̄ketetịn̄, ama enen̄ede ọdọn̄ mi ndika Africa toto ke ini n̄kedide uyen. Kpa ye oro enyịn ọkọdiọn̄de-diọn̄ ekịm mi, okosụk enenen̄ede  ọdọn̄ mi ndika, akpan akpan sia n̄kokopde ke ata ediwak owo ke Africa ẹnyene udọn̄ ke Bible ye ke ndinam n̄kpọ Jehovah. Ini kiet, mma nnyụn̄ ntịn̄ ntre ntre nnọ Valérie ke n̄kpama ndika n̄kese Africa, nnyụn̄ mbụp m̀mê enye akpama ndisan̄a ye ami. Enye ama enyịme, nnyịn inyụn̄ iwet leta inọ ediwak n̄kọk itieutom Mme Ntiense Jehovah ke mme idụt Africa oro ẹsemde French.

Togo ẹma ẹbọrọ nnyịn. Idem ama aduai mi, nnyụn̄ ndọhọ Valérie okot ibọrọ leta oro ọnọ mi. Leta oro ọkọdọhọ idi, ntre Valérie ama ọdọhọ ete: “Ke edide ntre, yak idaha!” Ke mma n̄kenyene nneme ye nditọete ke n̄kọk itieutom, mmọ ẹma ẹdọhọ mi nnyene nneme ye Sandra, asiakusụn̄ emi odude ke Lomé emi edide ibuot obio. Nnyịn ima idọhọ ke ididaha isan̄ ke December 1, 1998.

Esịt akadat nnyịn didie ntem okposụkedi n̄kpọ ẹkenen̄erede ẹkpụhọde! Ke ima ikebehe ke Lomé inyụn̄ iwọrọ ke ubomofụm, ufiop Africa ama ofụk nnyịn nte abran̄kịn. Sandra ama edisobo ye nnyịn. Akananam nnyịn ikwe kiet eken, edi ke ebe oro eketie nnyịn nte idi n̄kani ufan. Esisịt ini mbemiso nnyịn ikedide idibehe, ẹma ẹmek Sandra ye Christine nsan̄a esie ẹkenam utom nte mme akpan asiakusụn̄ ke nsannsan ekpri obio emi ekerede Tabligbo. Nnyịn ima inyene akwa ifet editiene mmọ n̄ka efakutom mmọ. Nnyịn ikodu ọfiọn̄ iba, ndien ke ini ikọnyọn̄de mma mfiọk ke nyafiak ndi.

Esịt Ama Adat Mi Ndifiak Ndi Togo

Ke mma n̄kesịm France, mma nsọsọp ntọn̄ọ ntịmidem ndifiak ndi Togo. Ubon nnyịn ẹma ẹn̄wam ndinam ndutịm man n̄keme ndidu ọfiọn̄ itiokiet. Ntre ke September 1999, mma mfiak ndụk ubomofụm ndi Togo. Nte ededi, isan̄ enye emi n̄kasan̄a ikpọn̄. Kere nte eketiede ubon nnyịn ke idem ke mmọ ẹkekụtde mi nsan̄ade ikpọn̄ ndi kpa ye mfịna enyịn mi! Edi ufọn ikodụhe nditịmede esịt. Mma nsian ete ye eka mi ke mme ufan mi, emi ẹma ẹkenanam n̄kpọ nte ito ubon kiet, ke ẹtie ẹbet mi ke Lomé.

Ekedi n̄kpọ idatesịt didie ntem ndifiak ndi obio emi ata ediwak owo ẹnyenede udọn̄ ke Bible! Idịghe esen n̄kpọ ndikụt mme owo ẹkotde Bible ke efak. Ke Tabligbo, mme owo ẹkeme ndikot fi edi ufọk ke ntak edinyene nneme Bible kpọt. Nso n̄wọrọnda ifet ke ekedi ntem ndibuana ukeuke ufọk ye akpan asiakusụn̄ iba! Mma ndikpep ido efen, emi edide edise mme n̄kpọ ke isio isio usụn̄. Ata akpan n̄kpọ oro n̄kekpepde edi ke nditọete nnyịn ke Africa ẹbem iso ẹbịne n̄kpọ Abasi. Ke uwụtn̄kpọ, ndisan̄a ediwak kilomita ke ukot mbemiso ẹsịmde Ufọkmbono Obio Ubọn̄ ikpanke mmọ ndika mme mbono esop. Mma n̄kpep ekese n̄kpọ efen efen nto ufan ufan edu ye ntatubọk mmọ.

Ke ini n̄kọnyọn̄de utom an̄wautom usen kiet, mma nsịn Sandra etap ke utọn̄ nte ke ananam mi ndịk ndifiak nnyọn̄ France. Enyịn mi ama etetịm ekịm. Mma n̄kere mban̄a akwa udịmowo ye uyom ke mme efak ke obio Béziers, mma n̄kere n̄ko mban̄a mme udịghi ukot ke ikpọ ufọkenyọn̄, ye ediwak n̄kpọ eken emi ẹsinamde uwem ọsọn̄ ye mbon oro  mîkwe usụn̄ ọfọn. Ke edide isio ye oro, okposụkedi owo mîsịnke itai ke mme efak obio Tabligbo, uyom ikponke mi, mme owo iwakke ikaha, ubomisọn̄ inyụn̄ iwakke. Ndinam didie ke France ke emi obio Tabligbo ama ekemehe mi mi?

Usen iba ke oro ebede, Mama ama okot mi ete ke ẹtetie ẹbet mi ndidụk ufọkn̄wed oro ẹkpepde owo nte ẹkamade ebua oro esidade owo usụn̄. Ebua oro ẹkotde Océane ke ekebet ndida mi usụn̄. Ẹma ẹfiak ẹnọ mi se n̄koyomde, ndien esịt iketịmekede mi aba. Ke mma n̄kanam utom emi asan̄ade ye inemesịt ke ọfiọn̄ itiokiet ke Tabligbo, mma ndaha France man n̄kosobo ye Océane.

Ke mma n̄kọbọ ukpep ke ediwak ọfiọn̄, ẹma ẹkpọn̄ Océane ẹnọ mi. Ikememke utom ke ntọn̄ọ ntọn̄ọ. Nnyịn ikenyene ndikpep nte kiet eken esinamde n̄kpọ. Nte ededi, nte ini akakade, mma ndifiọk ke mma nnen̄ede nyom Océane. Ke nditịm ntịn̄, Océane edi ubak idem mi idahaemi. Mme owo ẹkesinam n̄kpọ didie ke obio Béziers ke ini mmọ ẹkekụtde nsan̄ade ye ebua n̄waha ufọk mmọ? Ẹma ẹsikpono mi ẹnyụn̄ ẹfọn ido ye ami. Océane ama ọwọrọ etop ke mbọhọ nnyịn etieti. Sia ediwak owo mîsimaha owo n̄kpọnnam, ndisan̄a ye ebua oro ama anam n̄keme nditịn̄ mban̄a mfịna enyịn mi ifụre ifụre. Mme owo ẹma ẹsinyene ifụre ndikpan̄ utọn̄ nnọ mi. Ke nditịm ntịn̄, Océane ama akabade edi ata eti usụn̄ ndida ntọn̄ọ nneme.

Ndisan̄a ye Océane Ndi Africa

N̄kefreke enyịn ke Africa, ndien mma mben̄e idem ndifiak ndi ọyọhọ utịm ikata. Isan̄ emi n̄kasan̄a ye Océane. N̄kasan̄a n̄ko ye Anthony ye Aurore emi ẹdide n̄kparawa ebe ye n̄wan, ọkọrọ ye Caroline ufan mi—kpukpru mmọ ẹdi mme asiakusụn̄ n̄ko. Nnyịn ikedibehe ke Lomé ke September 10, 2000.

Mme owo ẹkebabak Océane ke ntọn̄ọ ntọn̄ọ. Iwakke mme owo ke Lomé emi akanam ẹkụtde utọ akwa ebua oro, sia ata ediwak ebua ke Togo ẹdi n̄kpri. Ke ini ndusụk owo ẹkekụtde n̄kpaha ke itọn̄ esie, mmọ ẹkekere ke enye edi idat ebua oro oyomde ẹkpekpeme; ke ini Océane ke idem esiemmọ ekeben̄ede idem ndikpeme mi mbiọn̄ọ n̄kpọ ekededi oro enye ekekerede ke ọmọn̄ edịghe mi uwem. Edi ikebịghike obufa ebietidụn̄ emi ama emehe Océane. Ke ini ẹfọride enye n̄kpaha ke itọn̄, enye ọtọn̄ọ utom esie—okpono idem, ọfiọk se akpanade anam, onyụn̄ odu mi ke n̄kan̄. Ke ini ẹfọrọrede enye n̄kpaha, enye ebre mbre, ndien ndusụk ini ekeme ndinam ndisịme ido. Nnyịn ima isibre mbre ye kiet eken.

Ẹkedọhọ kpukpru nnyịn ididu ye Sandra ye Christine ke Tabligbo. Nnyịn ima isikot nditọete ẹdi ufọk inyụn̄ itịn̄ utom ebua oro esidade owo usụn̄, ntak emi ami nyomde enye, ye nte mmọ ẹkpenamde n̄kpọ ke ebiet emi enye odude; emi ama anam mmọ ẹmehe ye Océane. Mbiowo ẹma ẹnyịme ke mmekeme ndisan̄a ye Océane n̄ka Ufọkmbono Obio Ubọn̄. Ẹma ẹnọ ntọt ke esop man ẹnam n̄kpọ emi an̄wan̄a, sia emi ekedide ata esen n̄kpọ ke Togo. Ke ini utom ukwọrọikọ, n̄kesisan̄a ye Océane n̄kukụre ke ini nnamde mme mfiakn̄ka nnyụn̄ nnịmde mme ukpepn̄kpọ Bible, sia mme owo emi ẹmemehe ye ami ẹnyụn̄ ẹfiọk idaha mi.

Ndikwọrọ ikọ ke efakutom emi edi n̄kpọ idatesịt ọnọ mi kpukpru ini. Mmesiwụt esịtekọm kpukpru ini mban̄a mfọnido nti owo emi, utọ nte mmọ ndisisọsọp nnọ mi n̄kpọitie ntie. Eka mi ama asan̄a ye ami ke ọyọhọ ikanan̄ oro n̄kedide Togo ke October 2001. Ke urua ita ẹma ẹkebe, enye ama afiak ọnyọn̄ France, sia ekenen̄erede okụt ke idem ọsọn̄ mi, onyụn̄ okop inemesịt.

Mmenen̄ede n̄wụt esịtekọm nnọ Jehovah ke emi n̄kemede ndinam utom ke Togo. Mmodori enyịn ke Jehovah ayaka iso ndinọ mi ‘se esịt mi oyomde’ ke adan̄aemi n̄kade iso ndida kpukpru se nnyenede nnam utom esie. *

[Ikọ idakisọn̄]

[Mme ndise ke page 10]

Ama esinen̄ede ọdọn̄ mi ndikụt nte isọn̄ Africa etiede ye ndiye unamikọt Africa

[Ndise ke page 10]

Océane ama esisan̄a ye ami ke mme mfiakn̄ka

[Ndise ke page 11]

Mbiowo ẹma ẹnyịme nsisan̄a ye Océane n̄ka mme mbono esop