Mme Mbụme Ẹtode Mme Andikot

Ndi Christian ekeme ndinyene eti ubieresịt edieke enye enyịmede ndinam utom oro oyomde ẹkama ikan̄?

Mme Ntiense Jehovah ke ofụri ererimbot ẹda mbiomo oro Abasi ọnọde mmọ ndinọ mbonubon mmọ n̄kpọ eke obụk, ke akpan n̄kpọ. (1 Timothy 5:8) Nte ededi, ndusụk utom ẹnen̄ede ẹtuaha ye mme edumbet Bible, ntre ẹkpenyene ndifep utọ utom oro. Utọ utom oro edi enye oro enyenede ebuana ye ‘mbre mfọniso,’ edida iyịp nnam n̄kpọ ke ukwan̄ usụn̄, edisịn udọn̄ nnọ edida un̄wọn̄ ye edin̄wọn̄ sika. (Isaiah 65:11, NW; Utom 15:29; 2 Corinth 7:1; Colossae 3:5) Nte ededi, odu mme utom efen oro Bible mîkpanke nnennen nnennen, edi oro ekemede ndibiat ubieresịt owo m̀mê eke mbon en̄wen.

Owo kiet kiet enyene ndibiere m̀mê imọ iyanam utom idịbi udia oro oyomde ẹkama ikan̄ m̀mê n̄kpọekọn̄ eken. Nte ededi, utom oro ẹkamade ikan̄ ekeme ndinam owo akama iyịp owo edieke ẹyomde enye otop owo. Ntre, Christian enyene ndibọn̄ akam ntie n̄kere m̀mê imọ iyekeme ndisọsọp mbiere ke imọ iditopke owo ke ini oyomde ẹnam ntre. Owo oro akamade ikan̄ ekeme n̄ko ndinọ idemesie unan mîdịghe, asua m̀mê owo oro oyomde ndisio usiene ekeme ndiwot enye.

Utọ utom emi ekeme n̄ko ndifịna mbon en̄wen. Ke uwụtn̄kpọ, akpan utom Christian edi ndikwọrọ eti mbụk Obio Ubọn̄ Abasi. (Matthew 24:14) Ndi utọ owo oro eyekeme ndikpep mbon en̄wen ete “ẹtie ke emem ye kpukpru owo,” ke adan̄aemi enye adade utom oro ẹkamade ikan̄ odu uwem? (Rome 12:18) Nso kaban̄a nditọ m̀mê mbonubon eken? Ndi ndinyene ikan̄ ke ufọk ekeme ndisịn uwem mmọ ke itiendịk? Akan oro, ndi emi ekeme ndinam mbon en̄wen ẹtuak ukot ẹduọn̄ọ?—Philippi 1:10.

Ke “mme akpatre usen” emi, ata ediwak owo “ẹtie obom obom, imaha eti ido.” (2 Timothy 3:1, 3) Ke ọfiọkde emi, ndi owo ekeme ndidọhọ ke owo ‘iditịn̄ke ikọ idian imọ’ edieke enye emekde ndinam utom oro anamde enye enyene ntuaha ye utọ mbon obom emi? (1 Timothy 3:10) Baba. Ntre, esop Abasi ididaha utọ owo oro nte “owo emi owo mîkemeke ndidori ikọ” edieke enye akade iso akama ikan̄ ke ẹma ẹkeda mfọnido ẹnọ enye item Bible. (1 Timothy 3:2; Titus 1:5, 6) Ntem, utọ owo oro idotke ndikama akpan ifetutom ekededi ke esop.

Jesus ama anam mme mbet esie ẹfiọk ke edieke mmọ ẹbemde iso ẹyom Obio Ubọn̄, ke ufọn idụhe mmọ nditịmede esịt n̄kaha mban̄a mme n̄kpọ udu uwem. (Matthew 6:25, 33) Ke akpanikọ, edieke nnyịn ibuọtde idem ọyọhọ ọyọhọ ke Jehovah, “enye ayakama [nnyịn]: enye idiyakke edinen owo esehede ke nsinsi.”—Psalm 55:22.