Ndi Afo Ayasan̄a ye Abasi?
Ndi Afo Ayasan̄a ye Abasi?
‘Sụk idem san̄a ye Abasi fo.’—MICAH 6:8.
1, 2. Didie ke ẹkeme ndimen udọn̄ oro Jehovah enyenede ke idem nnyịn ndomo ye enye oro ete m̀mê eka oro ekpepde eyen esie isan̄ enyenede?
NSEKEYEN oro ikpat mîsọn̄ke adaha adada, anyanarede omụm ete m̀mê eka esie ubọk onyụn̄ osio akpa ukot isan̄. Emi ekeme nditie nte ekpri n̄kpọ, edi ete ye eka esie ẹda emi nte n̄wọrọnda n̄kpọ oro owụtde ke nsekeyen mmimọ ọtọn̄ọ ndinam ata akpan n̄kọri ke uwem. Enen̄ede ọdọn̄ ete ye eka ndisan̄a ikpat kiet ye eyen mmọ ke ediwak ọfiọn̄ ye isua oro ẹdide ke iso. Mmọ ẹdori enyịn ndida eyen mmọ usụn̄ ke ediwak n̄kpọ nnyụn̄ nse mban̄a enye ke n̄kan̄ eke obụk ye eke ntụk tutu enye okpon.
2 Jehovah Abasi enyene ukem udọn̄ oro ke idem nditọ esie ke isọn̄. Enye eketịn̄ ntem ini kiet ko aban̄a ikọt esie Israel, m̀mê Ephraim: “Ami n̄kekpep Ephraim ndisan̄a, mmụm mmọ ke ubọk mmọ n̄kama; . . . Nda mme urụk owo, kpa mme ídụ̀t [m̀mê urụk] ima, ndụri mmọ.” (Hosea 11:3, 4) Jehovah ọdọhọ ke ufan̄ikọ emi ke imọ itie nte edima ete m̀mê eka oro emede ime ekpep eyen esie isan̄, iso-ọfọn emende eyen emi akama ke ini enye ọduọde. Enen̄ede ọdọn̄ Jehovah, kpa ata eti Ete, ndikpep nnyịn isan̄. Enye enem esịt n̄ko ndisan̄a ye nnyịn nte nnyịn ikade iso ndinam n̄kọri. Itien̄wed oro ọbọpde ibuotikọ nnyịn owụt ke nnyịn imekeme ndisan̄a ye Abasi! (Micah 6:8) Edi nso ke ndisan̄a ye Abasi ọwọrọ? Ntak oyomde nnyịn isan̄a ye Abasi? Didie ke ikeme ndisan̄a ye Abasi? Ndien mme edidiọn̄ ewe ke ikeme ndinyene nto edisan̄a ye Abasi? Ẹyak ineme mbụme inan̄ emi ke adiana ke adiana.
Nso ke Ndisan̄a ye Abasi Ọwọrọ?
3, 4. (a) Ntak emi uwụtn̄kpọ aban̄ade edisan̄a ye Abasi edide n̄wọrọnda? (b) Nso ke ndisan̄a ye Abasi ọwọrọ?
3 Edi akpanikọ, owo ikemeke ndisan̄a ye Jehovah ke ata ata usụn̄, koro enye edi spirit. (Exodus 33:20; John 4:24) Ntre ke ini Bible ọdọhọde ke mme owo ẹsan̄a ye Abasi, enye etịn̄ emi ke ndamban̄a usụn̄. Bible ada n̄wọrọnda uwụtn̄kpọ emi mme owo ke kpukpru idụt ẹfiọkde, emi onyụn̄ ekemde ye ini ekededi. Kamse, ndi odu ebiet m̀mê emana oro mme owo mîfiọkke se ndisan̄a ye owo ọwọrọde? Ndi uwụtn̄kpọ emi inọhọ ekikere iban̄a ufan ufan ye n̄kpet n̄kpet itie ebuana? Emi anam ifiọk se ndisan̄a ye Abasi ọwọrọde. Edi, ẹyak ise se ndisan̄a ye Abasi enen̄erede ọwọrọ.
4 N̄kọ emeti mme anam-akpanikọ iren oro, Enoch ye Noah? Ntak ẹdọhọde ke mmọ ẹma ẹsan̄a ye Abasi? (Genesis 5:24; 6:9) Ke Bible, ikọ emi “ndisan̄a” esiwak ndiwọrọ nditiene akpan usụn̄ edinam. Enoch ye Noah ẹma ẹmek usụn̄ uwem oro okodude ke n̄kemuyo ye uduak Jehovah Abasi. Sia mmọ mîkebietke mbon eyo mmọ, mmọ ẹma ẹyom ndausụn̄ Jehovah, ẹnyụn̄ ẹtiene ndausụn̄ oro enye ọnọde. Mmọ ẹma ẹnyụn̄ ẹbuọt idem ye enye. Ndi emi ọwọrọ ke Jehovah ekesinam ubiere ọnọ mmọ? Baba-o. Jehovah ọmọnọ mme owo ifụre edimek se mmọ ẹyomde ndinam, ndien enye oyom ida enọ emi ọkọrọ ye “ukeme ukere n̄kpọ” inam n̄kpọ. (Rome 12:1) Nte ededi, ke ini inamde ubiere, oyom isụhọde idem inyụn̄ iyak anana-mbiet ekikere Jehovah ada ukeme ukere n̄kpọ nnyịn usụn̄. (Mme N̄ke 3:5, 6; Isaiah 55:8, 9) Ntem, nte nnyịn isan̄ade isan̄ uwem emi, Jehovah ayasan̄a ye nnyịn.
5. Ntak emi Jesus eketịn̄de aban̄a edidian cubit kiet ke isua uwem owo?
5 Bible esiwak ndimen uwem ndomo ye isan̄. Ke ndusụk idaha, enye esimen odomo ye ata ata isan̄, ke adan̄aemi ndusụk ini esidide ke ndamban̄a usụn̄. Ke uwụtn̄kpọ, Jesus ọkọdọhọ ete: “Anie ke otu mbufo ekeme ndidian n̄kpọ [emi ke ata ata usụn̄ ọwọrọde “cubit kiet”] ke isua uwem esie ke ntak emi okopde editịmede esịt?” (Matthew 6:27) Ikọ itien̄wed emi ekeme ndisọn̄ ndin̄wan̄a fi. Ntak emi Jesus etịn̄de aban̄a edidian “cubit kiet,” emi edide udomo isan̄, ke “isua uwem” owo, emi ẹdade ini ẹdomo? * Ana in̄wan̄-in̄wan̄ ke Jesus ekemen uwem odomo ye isan̄. Ke nditịm ntịn̄, enye ekekpep ke editịmede esịt idikam ikemeke ndidian n̄kpọ ndomokiet ke isan̄ uwem oro afo asan̄ade. Nte ededi, ndi ikọ ọwọrọ ke inyeneke se nnyịn ikemede ndinam man isan̄a ye Abasi ibịghi? Iwọrọke ntre! Oro ada nnyịn edisịm ọyọhọ mbụme nnyịn iba, Ntak oyomde nnyịn isan̄a ye Abasi?
Ntak Oyomde Nnyịn Isan̄a ye Abasi?
6, 7. Nso ke mme anana-mfọnmma owo ẹnen̄ede ẹyom, ndien ntak ọfọnde ika ibịne Jehovah kaban̄a emi?
6 Ẹtịn̄ ntak kiet oro oyomde nnyịn isan̄a ye Jehovah ke Jeremiah 10:23: “O Jehovah, mmọfiọk nte ke usụn̄ owo idụhe owo ke ubọk: owo eke asan̄ade inyụn̄ ikemeke ndinen̄ede ikpat esiemmọ.” Ntre, nnyịn mme owo inyeneke ukeme m̀mê unen ndida idem nnyịn usụn̄. Nnyịn imenen̄ede iyom ndausụn̄. Mbon oro ẹsọn̄ọde ẹbiere ndisan̄a ke usụn̄ idemmọ, ẹnyụn̄ ẹdade ke idem ẹkpọn̄ Abasi, ẹnam ukem ndudue oro Adam ye Eve ẹkenamde. Akpa ebe ye n̄wan oro ẹkekere ke mmimọ imenyene unen ndibiere ke idem mmimọ se idide eti ye idiọk. (Genesis 3:1-6) Unen ndibiere se idide eti ye idiọk ikam ‘idụhe nnyịn ke ubọk.’
7 Ndi afo ukereke ke omoyom ndausụn̄ ke isan̄ uwem? Nnyịn imesinyene ikpọ ye n̄kpri ubiere ndinam kpukpru usen. Esisọn̄ ndinam ndusụk ubiere emi, ndien mmọ ẹkeme nditụk ini iso nnyịn ọkọrọ ye eke mbonima nnyịn. Kamse, owo oro ọsọn̄ọde kpukpru nnyịn onyụn̄ enyenede ifiọk akan, okop inemesịt ndinọ nnyịn ima ima ndausụn̄ man inam mme ubiere oro! Edi n̄kpọ mfụhọ nditịn̄ ke ata ediwak owo mfịn ẹmek ndibuọt idem ke ọniọn̄ idemmọ ẹnyụn̄ ẹmek ndinen̄ede ikpatisan̄ mmọ. Mmọ ẹfụmi akpanikọ oro ẹwetde ke Mme N̄ke 28:26 ẹte: “Owo eke ọbuọtde idem ye esịt esiemmọ edi ndisịme owo: edi owo eke asan̄ade ke ifiọk ọyọbọhọ.” Jehovah oyom nnyịn ibọhọ afanikọn̄ oro esisịmde mbon oro ẹbuọtde idem ke abian̄a abian̄a esịt mmọ. (Jeremiah 17:9) Enye oyom nnyịn isan̄a ọniọn̄ ọniọn̄, inyụn̄ ibuọt idem ke imọ nte Adausụn̄ ye Anditeme oro enyenede ọniọn̄. Ke ini inamde ntre, nnyịn iyenyene ifụre inyụn̄ ikop uyụhọ nte isan̄ade isan̄ uwem emi.
8. Idiọkn̄kpọ ye unana mfọnmma ẹsida owo ẹkesịm m̀mọ̀n̄, edi nso ke Jehovah aduak ọnọ nnyịn?
8 Ntak en̄wen oro oyomde isan̄a ye Abasi edi koro isan̄ oro isan̄ade oyom usụn̄. Bible etịn̄ akpanikọ oro akamade mfụhọ. Ke ndusụk udomo, isan̄ kpukpru mme anana-mfọnmma owo editre ke ukem ebiet. Ecclesiastes 12:5 etịn̄ ntem aban̄a afanikọn̄ oro ẹsisan̄ade ye usọn̄: “Owo ọmọn̄ aka ke nsinsi idụn̄ esie; mbon ntuan̄a ẹnyụn̄ ẹkanade obio ẹkụk.” Nso idi “nsinsi idụn̄” emi? Enye edi udi, kpa ebiet emi idiọkn̄kpọ ye unana mfọnmma ẹsidade nnyịn ẹkesịm. (Rome 6:23) Nte ededi, Jehovah oyom nnyịn isan̄a isan̄ oro ọfọnde akan ibio ibio isan̄ afanikọn̄ emi ọtọn̄ọde ke usen emana esịm udi. (Job 14:1) Edi n̄kukụre ke ndisan̄a ye Abasi ke nnyịn ikeme ndidori enyịn ndisan̄a adan̄a anyan ini oro enye oyomde nnyịn isan̄a—ke nsinsi. Nte idịghe se afo oyomde edi oro? Do, ana in̄wan̄-in̄wan̄ nte ke oyom afo asan̄a ye Ete fo eke heaven.
Didie ke Ikeme Ndisan̄a ye Abasi?
9. Ntak emi Jehovah ekedịpde ikọt esie iso ndusụk ini, edi nso ikọ ndọn̄esịt ke enye eketịn̄ ke Isaiah 30:20?
9 Oyom inen̄ede ikere iban̄a ọyọhọ mbụme nnyịn ita ke nneme emi. Enye edi, Didie ke nnyịn ikeme ndisan̄a ye Abasi? Nnyịn ikụt ibọrọ ke Isaiah 30:20, 21: “[“Akwa Anditeme,”NW] fi ididịbeke aba: enyịn fo ẹyenyụn̄ ẹkụt [“Akwa Anditeme,”NW] fi: ndien utọn̄ fo ẹyekop uyo ke edem fo, ete, ‘Emi edi ọkpọusụn̄, mbufo ẹsan̄a ke esịt,’ ke mbufo ẹdin̄wọn̄ọrede ẹka nnasia, m̀mê ẹnyụn̄ ẹka ufien.” Ke itien̄wed oro ọnọde nsịnudọn̄ mi, anaedi ikọ Jehovah oro ẹwetde ke Isa 30 ufan̄ikọ 20 ama eti ikọt Jehovah ke enye ama edịp mmọ iso esie ke ini mmọ ẹkesọn̄de ibuot ye enye. (Isaiah 1:15; 59:2) Nte ededi, ufan̄ikọ emi owụt ke Jehovah idịbeke-dịbe, edi ada ke iso mme anam-akpanikọ ikọt esie. Emi ekeme ndinam iti andikpep oro adade ke iso nditọ ufọkn̄wed ekpep mmọ n̄kpọ.
10. Ke nso usụn̄ ke afo ‘okop uyo’ Akwa Anditeme fi “ke edem fo”?
10 Ẹnọ isio isio uwụtn̄kpọ ke Isa 30 ufan̄ikọ 21. Ẹwụt nte Jehovah asan̄ade ikọt esie ke edem, ọnọde mmọ ndausụn̄ ke nnennen usụn̄ oro mmọ ẹkpesan̄ade. Nditọ ukpepn̄kpọ Bible ẹdọhọ ke etie nte ẹda ikọ emi ẹto usụn̄ oro ekpemerọn̄ esitienede mme erọn̄ esie ndusụk ini, ofioride n̄kpo mbak mmọ ẹdidụk idiọk afan̄. Didie ke uwụtn̄kpọ emi abuana nnyịn? Ọfọn, ke ini iyomde ndausụn̄ ito Ikọ Abasi, nnyịn ikot ikọ oro ẹkewetde ediwak tọsịn isua emi ẹkebede. Ntre etie nte n̄kpọ eke nnyịn ikopde ikọ oro ke edem nnyịn, koro ẹkewet mmọ ata anyan ini ko ke edem. Kpa ye oro, mmọ ẹsụk ẹnyenyene ufọn mfịn kpa nte ẹkenyenede ke ini ẹkewetde mmọ. Item Bible ekeme ndida nnyịn usụn̄ ke ubiere oro inamde ke usen ke usen, onyụn̄ ekeme ndin̄wam nnyịn inam ndutịm inọ ini iso. (Psalm 119:105) Edieke nnyịn isịnde ifịk iyom utọ item oro inyụn̄ idade enye isịn ke edinam, oro owụt ke Jehovah edi Adausụn̄ nnyịn, ke nnyịn inyụn̄ isan̄a ye Abasi.
11. Jeremiah 6:16 ọdọhọ ke Jehovah eketịn̄ nso ye ikọt esie, edi mmọ ẹkenam n̄kpọ didie?
11 Ndi imenen̄ede iyak Ikọ Abasi ada nnyịn usụn̄ ntre? Ọfọn isituak ida ndusụk ini ida ofụri esịt idụn̄ọde idem nnyịn. Kere ban̄a ufan̄ikọ oro edin̄wamde nnyịn inam ntre: “Ntem ke Jehovah ọdọhọ ete, Mbufo ẹda ke mme usụn̄, ẹnyụn̄ ẹse, ẹnyụn̄ ẹbụp ẹban̄a mme ọkpọusụn̄ eset, ẹte, Eti usụn̄, enye? ndien mbufo ẹsan̄a ke esịt, ẹnyụn̄ ẹkụt nduọk-odudu [ẹnọ] ukpọn̄ mbufo.” (Jeremiah 6:16) Ikọ emi ekeme nditi nnyịn akaisan̄ oro atuakde ada ke isobo usụn̄ oyom ndausụn̄. Se okoyomde mme ọsọn̄ibuot ikọt Jehovah ke Israel ẹnam ke n̄kan̄ eke spirit edi oro. Ama oyom mmọ ẹfiak ẹkesan̄a ke “mme ọkpọusụn̄ eset.” “Eti usụn̄” oro ke ete ete mmọ oro ẹkenamde akpanikọ ẹkesan̄a, edi ndisịme ama anam idụt Israel ọwọn̄ọde ọkpọn̄ eti usụn̄ oro. Edi n̄kpọ mfụhọ nditịn̄ ke idụt Israel ama ọsọn̄ ibuot inyụn̄ inamke ima ima item oro Jehovah ọkọnọde mmọ. Ufan̄ikọ oro aka iso ete: “Edi mmọ ẹdọhọ ẹte, ‘Nnyịn idisan̄ake.’” Nte ededi, ke eyomfịn, ikọt Abasi ẹnyịme ndinam item oro.
12, 13. (a) Didie ke mme anditiene Christ oro ẹyetde aran ẹnam item oro odude ke Jeremiah 6:16? (b) Didie ke nnyịn ikeme ndidụn̄ọde idem nnyịn nse nte isan̄ade mfịn?
12 Toto ke utịt utịt ọyọhọ isua ikie 19, mme anditiene Christ oro ẹyetde aran ẹmeda item oro odude ke Jeremiah 6:16 ẹbuan ye idemmọ. Nte otu, mmọ ẹda iso ke ndifiak n̄kasan̄a ke “mme ọkpọusụn̄ eset” ke ofụri esịt. Sia mmọ mîbietke Christendom oro ẹdide mbon mfiakedem, mmọ ẹsọn̄ọ ẹyịre ke “nti ikọ” oro Jesus Christ eketịn̄de, emi mme anam-akpanikọ anditiene enye eke akpa isua ikie E.N. ẹkemụmde ẹkama. (2 Timothy 1:13) Tutu esịm mfịn emi, mbon oro ẹyetde aran ẹn̄wam kiet eken ẹnyụn̄ ẹn̄wam “mme erọn̄ en̄wen” emi ẹdide nsan̄a mmọ, ẹka iso ẹdu eti ye inem inem uwem oro Christendom ọwọn̄ọrede ọkpọn̄.—John 10:16.
13 Ebe ke ndinọ udia [eke spirit] ke edikem ini, otu ofụn oro anamde akpanikọ aman̄wam ediwak miliọn owo ẹkụt “mme ọkpọusụn̄ eset” ẹnyụn̄ ẹsan̄a ye Abasi. (Matthew 24:45-47) Ndi afo emesịne ke otu ediwak miliọn owo oro? Edieke edide ntre, nso ke afo ekeme ndinam mbak udufiọrọ ukpọn̄ “mme ọkpọusụn̄ eset” unyụn̄ udụk usụn̄ idemfo? Owụt eti ibuot ndisituak nda ke ini ke ini ndụn̄ọde nte afo asan̄ade isan̄ uwem. Edieke afo okotde Bible ye mme n̄wed oro ẹkọn̄ọde ke Bible kpukpru ini onyụn̄ etiene abuana ke ndutịm ukpepn̄kpọ oro mbon oro ẹyetde aran ẹnamde mfịn, ọwọrọ ke ẹkpep fi ndisan̄a ye Abasi. Ndien ke ini afo osụhọrede idem ada item oro ẹnọde fi esịn ke edinam, ke akpanikọ afo asan̄a ye Abasi ke “mme ọkpọusụn̄ eset.”
San̄a nte N̄kpọ eke “Okụtde Enye Emi Enyịn Owo Mîkwe”
14. Didie ke mme ọkpọkpọ ubiere oro inamde ẹdiwụt ke imada Jehovah nte ata owo?
14 Man ikeme ndisan̄a ye Jehovah, ana ida enye nte ata owo. Ti ke Jehovah ama ọsọn̄ọ etịn̄ ọnọ mbon oro ẹkenamde akpanikọ ke Israel eset ete ke imọ ikedịpke mmọ iso. Kpasụk ntre mfịn, enye ayararede idemesie nte Akwa Anditeme ọnọ ikọt esie. Ndi amada Jehovah nte Akwa Anditeme oro adade fi ke iso ọnọ fi ukpep? Oyom inyene orụk mbuọtidem oro edieke anade isan̄a ye Abasi. Moses ama enyene orụk mbuọtidem oro, “koro enye ama aka iso ọsọn̄ọ ada nte n̄kpọ eke okụtde Enye emi enyịn owo mîkwe.” (Mme Hebrew 11:27) Edieke idade Jehovah nte ata owo, do nnyịn iyekere iban̄a nte ubiere oro inamde editụkde enye. Ke uwụtn̄kpọ, nnyịn idikam ikereke-kere ndinam idiọkn̄kpọ ndien ekem idomo ndidịp mbiowo Christian m̀mê mbonubon nnyịn idiọkn̄kpọ nnyịn. Utu ke oro, nnyịn iyesịn ukeme ndisan̄a ye Abasi idem ke ini owo ndomokiet mîkwe nnyịn. Nnyịn imebiere kpa nte Edidem David eke eset ekebierede ete: “Nyasan̄a ke ufọk mi ke esịt eke ọfọnde ama.”—Psalm 101:2.
15. Didie ke ndibuana ye nditọete Christian ekeme ndin̄wam nnyịn ida Jehovah nte ata owo?
15 Jehovah ọfiọk ke nnyịn idi mme anana-mfọnmma owo ye nte ke ekeme ndisọn̄ nnyịn ndusụk ini ndinịm se nnyịn mîkwe ke enyịn. (Psalm 103:14) Enye anam ekese man an̄wam nnyịn ikan utọ mmeme oro. Ke uwụtn̄kpọ, enye atan̄ ikọt “enyịn̄ esie” ke kpukpru idụt ke isọn̄ obok ọtọkiet. (Utom 15:14) Ndidiana kiet nnam n̄kpọ esie anam nnyịn isọn̄ọ kiet eken idem. Ndikop nte Jehovah an̄wamde Christian eyenete eren m̀mê n̄wan akan mmeme m̀mê n̄kpọsọn̄ idomo, anam inen̄erede ida Abasi nte ata owo.—1 Peter 5:9.
16. Didie ke ndikpep mban̄a Jesus edin̄wam nnyịn isan̄a ye Abasi?
16 Ke akande kpukpru emi, Jehovah ọmọnọ nnyịn uwụtn̄kpọ Eyen esie. Jesus ọkọdọhọ ete: “Ami ndi usụn̄ ye akpanikọ ye uwem. Baba owo kiet itieneke Ete ibọhọke ebe ke ami.” (John 14:6) Ndikpep mban̄a nte Jesus okodude uwem ke isọn̄ edi kiet ke otu mfọnn̄kan usụn̄ oro ẹkemede ndin̄wam nnyịn inen̄ede ida Jehovah nte ata owo. Jesus ama owụt mfọnmma edu ye usụn̄ unam n̄kpọ Ete esie eke heaven ke kpukpru se enye eketịn̄de m̀mê anamde. (John 14:9) Oyom inen̄ede ikere iban̄a nte Jesus akpanamde n̄kpọ ke ini inamde ubiere. Ke ini ubiere oro inamde owụtde ke ima ibọn̄ akam inyụn̄ inen̄ede itie ikere se Jesus akpanamde, do nnyịn imetiene nde ikpat Christ. (1 Peter 2:21) Oro owụt ke nnyịn isan̄a ye Abasi.
Mme Edidiọn̄ Ewe ke Idinyene?
17. Edieke isan̄ade ke usụn̄ Jehovah, nso “nduọkodudu” ke idikụt inọ ukpọn̄ nnyịn?
17 Ndisan̄a ye Jehovah Abasi anam idu uwem oro ọnọde uyụhọ. Ti se Jehovah ọkọn̄wọn̄ọde ndinọ ikọt esie oro ẹkeyomde “eti usụn̄.” Enye ọkọdọhọ ete: “Ẹsan̄a ke esịt, ẹnyụn̄ ẹkụt nduọk-odudu [ẹnọ] ukpọn̄ mbufo.” (Jeremiah 6:16) Nso ke “nduọk-odudu” oro ọwọrọ? Ndi ọwọrọ ndidu ọkpọmiọk uwem? Baba-o. Jehovah ọnọ nnyịn se ifọnde ikan oro, n̄kpọ oro owo emi enyenede n̄kpọ akan mîkemeke ndinyene. Ndikụt nduọkodudu nnọ ukpọn̄ fo ọwọrọ ndinyene ifụre ekikere, ndikop idatesịt, ndinyụn̄ n̄kop uyụhọ ke n̄kan̄ eke obụk ye eke spirit. Utọ nduọkodudu oro anam fi enen̄ede enịm ke imemek mfọnn̄kan usụn̄ uwem. Imemke ndinyene utọ ifụre ekikere oro ke ererimbot afanikọn̄ emi!
18. Nso edidiọn̄ ke Jehovah oyom ndinọ fi, ndien nso ke afo ebiere ndinam?
18 Edi akpanikọ, uwem ke idemesie edi akwa edidiọn̄. Idem okposụkedi isan̄ uwem mîniọn̄ke, ọfọn akan emi nnyịn mîkpasan̄ake-san̄a. Nte ededi, akananam Jehovah iyomke isan̄ fo edi ibio ibio isan̄ emi ọtọn̄ọde ke nsehe uyen etre ke ini usọn̄ emi asan̄ade ye afanikọn̄. Baba, Jehovah oyom fi enyene anana-mbiet edidiọn̄. Enye oyom afo asan̄a ye imọ ke nsinsi! Ẹnen̄ede ẹwụt emi ke Micah 4:5: “Kpukpru mme idụt ẹyesan̄a ke enyịn̄ abasi mmọ; nnyịn iyonyụn̄ isan̄a ke enyịn̄ Jehovah Abasi nnyịn ke nsinsi-nsinsi.” Ndi ayama ndibọ edidiọn̄ emi? Ndi omoyom ndidu uwem oro Jehovah okotde “ata uwem”? (1 Timothy 6:19) Ke edide ntre, nen̄ede biere ndisan̄a ye Jehovah mfịn, n̄kpọn̄, kpukpru usen, ke emi ye ke nsinsi nsinsi!
[Ikọ idakisọn̄]
^ ikp. 5 Ndusụk edikabade Bible ẹkabade “cubit” ke ufan̄ikọ emi nte udomo ini, utọ nte “ini kiet” (The Emphatic Diaglott) m̀mê “n̄kpasịp ini kiet” (A Translation in the Language of the People, eke Charles B. Williams). Nte ededi, ikọ oro ẹdade ke akpasarade uwetn̄kpọ enen̄ede ọwọrọ cubit, emi ekedide n̄kpọ nte sentimita 45 ke uniọn̄.
Didie ke Afo Ọkpọbọrọ?
• Nso ke ndisan̄a ye Abasi ọwọrọ?
• Ntak emi afo oyomde ndisan̄a ye Abasi?
• Nso idin̄wam fi asan̄a ye Abasi?
• Mme edidiọn̄ ewe ke mbon oro ẹsan̄ade ye Abasi ẹnyene?
[Mme Mbụme Ukpepn̄kpọ]
[Mme ndise ke page 23]
Ke ini ikotde Bible, nnyịn imesikop uyo Jehovah ke edem nnyịn nte ọdọhọde, “Emi edi ọkpọusụn̄”
[Ndise ke page 25]
Nnyịn imesidia udia eke spirit ke edikem ini ke mme mbono esop