‘Ima Kpukpru Mbufo Omokpon’

E DIWAK oto-obot afanikọn̄ ẹma ẹnọmọ Japan ke isua 2004. Ndusụk afanikọn̄ emi ẹkedi oyobio, ukwọ, ye unyekisọn̄. Mmọ ẹma ẹnen̄ede ẹnọmọ ediwak owo, esịnede Mme Ntiense Jehovah. (Ecclesiastes 9:11) Nte ededi, mme unọmọ emi ẹma ẹnọ Mme Ntiense ifet ndiwụt ke imama nditọete mmimọ.—1 Peter 1:22.

Ke uwụtn̄kpọ, ke ntak ọkpọsọn̄ edịm ke ọfiọn̄ July, akpa kiet ke ufọt ufọt Japan ama ọtọ ọdọk obot. Mmọn̄ ukwọ oro ama abiat se iwakde ibe ufọk Mme Ntiense Jehovah 20. Mmọn̄ ama ọdọk esịm mita kiet ke Ufọkmbono Obio Ubọn̄ kiet. Mme Ntiense emi ẹdude ke mme esop mbọhọ oro ẹma ẹsọsọp ẹdi ẹdin̄wam. Ediwak owo ẹma ẹkpọri mme ufọk oro okpụk ẹkeyọhọde ke unyịmesịt. Ẹma ẹnam Ufọkmbono Obio Ubọn̄ oro asana ẹnyụn̄ ẹfiak ẹdiọn̄ ofụri ofụri ke ufan̄ urua iba kpọt.

Ke October 23, ata akamba unyekisọn̄ ama ọnọmọ ikpehe oro n̄ko. Ke nsụhọde n̄kaha owo 40 ẹma ẹkpan̄a, ndien se ibede owo 100,000 ẹma ẹwọrọ ẹkpọn̄ ufọk mmọ. Unyekisọn̄ emi ama abiat mmọn̄ esan̄ukwak, n̄kpọ unọ ufiop, ye ikan̄. N̄kpọ ikanamke Ufọkmbono Obio Ubọn̄ oro ẹkefiakde ẹdiọn̄ do, okposụkedi enye okoyomde usụn̄ ke kilomita 50 kpọt ọkpọn̄ ata ebiet emi unyekisọn̄ oro ọkọtọn̄ọde. Ẹma ẹsọsọp ẹda enye ẹdeme mme n̄kpọ un̄wam ke ibio ini. Mbiowo Christian ẹma ẹsọsọp ẹsan̄a ẹse nditọete mmọ ẹnyụn̄ ẹkop inemesịt ndifiọk ke n̄kpọ ikanamke baba owo mmọ kiet. Tụhi-tụhi ke ndan̄nsiere, Ntiense itiokiet emi ukwọ July oro ọkọnọmọde ẹma ẹsịn ifịk ẹda udia ye mmọn̄ ẹkenọ ke mme ikpehe oro unyekisọn̄ ọkọnọmọde. Hour ifan̄ ke unyekisọn̄ oro ama eketịbe, ẹma ẹnyene ekese n̄kpọ un̄wam ndinọ mme owo.

Ebiowo kiet ọdọhọ ete: “Mbon oro ukwọ ọkọnọmọde ẹkeda utom edida n̄kpọ un̄wam n̄kọnọ mme owo oro unyekisọn̄ ọkọnọmọde nte ifet ndiwụt esịtekọm mban̄a un̄wam oro mmọ ke idemmọ ẹkebọde. Mmọ ẹma ẹsinam emi tọn̄ọ ke tụhi-tụhi usenubọk tutu eyo okụt. Ndien esịt ekesinem mmọ didie ntem!”

Ukwọ m̀mê unyekisọn̄ ikemeke ndibiat ima oro Mme Ntiense Jehovah ẹmade kiet eken. Utu ke oro, ke ini mme utọ afanikọn̄ oro ẹtịbede, mme Christian ẹsikụt se apostle Paul akasiande ekemmọ mme andinịm ke akpanikọ ke Thessalonica: “Ima oro kpukpru mbufo ẹmade kiet eken omokpon.”—2 Thessalonica 1:3.