Ndi Devil Edi Ata Owo?

AFO ekere ke Devil edi nso? Ndi ekere ke enye edi ata owo emi esitapde mme owo ẹnam ndiọi n̄kpọ, mîdịghe ndi enye akam edi ikpîkpu idiọkn̄kpọ? Ndi Devil edi owo oro ẹkpekopde ndịk ẹban̄a, ndi ẹkpeda enye nte ikpîkpu nsunsu ekikere, mîdịghe ndi ẹkpeda enye nte owo n̄ke? Ndi ikọ emi “devil” ada aban̄a odudu oro ẹkerede-kere ke enye esibiat n̄kpọ ke ekondo? Ndi ekeme ndidi ikọ emi akam ada aban̄a ndiọi edu oro mme owo ẹnyenede, nte ndusụk mme ekpep ukpepn̄kpọ ido ukpono eyomfịn ẹdọhọde?

Ikpaha owo idem ndikụt mme owo ẹnyenede nsio nsio ekikere ẹban̄a owo emi Devil edide. Kam kere nte esisọn̄de ndidiọn̄ọ owo emi enen̄erede ọfiọk ndidịp se enye edide! Ke akpanikọ, esinen̄ede ọsọn̄ ndidiọn̄ọ utọ owo oro edieke enye ebierede ndika iso ndịp se enye edide. Bible ọdọhọ ke Devil edi utọ owo oro. Bible okot enye Satan onyụn̄ ọdọhọ ke enye “Satan ke idemesie ke akaka iso ndiforo angel un̄wana.” (2 Corinth 11:14) Okposụkedi Devil edide anamidiọk, enye esinam nte idi edinen owo man akpabian̄a mme owo. Enye enen̄ede oyom ndinam mme owo ẹnịm ke imọ ikam idụhe-du.

Anie ndien ke Devil edi? Ini ewe ke enye ekedidu, enye okonyụn̄ asan̄a didie edidu? Didie ke enye akara mme owo mfịn? Ndi odu n̄kpọ ekededi oro nnyịn ikemede ndinam man ibiọn̄ọ odudu esie? Bible esịne nnennen mbụk aban̄ade ntọn̄ọ Devil onyụn̄ ọnọ nnennen ibọrọ ke mme mbụme emi.

[Ndise ke page 3]

Ọsọn̄ didie ntem ndidiọn̄ọ owo emi ebierede ndidịp se enye edide!