Nyene Usọ Edikpan̄ Utọn̄ ke Usụn̄ Owụtde Ima

“AMANAM etieti nte akakpan̄de utọn̄ ọnọ mi.” Ndi owo ọdọhọ fi ntre ke ndondo emi? Nso ikọ itoro ke emi edi ntem! Mme owo ẹsima owo oro esinen̄erede ọnọ mmọ n̄kpan̄utọn̄. Nnyịn imekeme ndinam mbon oro ẹkopde mfụhọ m̀mê mbon oro mfịna akande ubọk ẹkop idem inem edieke inen̄erede ikpan̄ utọn̄ inọ mmọ. Ndi nnyịn isitịmke imehe ye mme owo ke ini inen̄erede ikpan̄ utọn̄ inọ mmọ? Ke esop Christian, ndikpan̄ utọn̄ ke usụn̄ oro owụtde ima edi akpan n̄kpọ oro ẹyomde man ikeme ‘ndidemede kiet eken nnọ ima ye nti utom.’—Mme Hebrew 10:24.

Nte ededi, ediwak owo idịghe nti mme andikpan̄ utọn̄. Mmọ ẹsima ndinọ owo item, ndibụk ifiọk n̄kpọntịbe mmọ, m̀mê ndinọ ekikere idemmọ utu ke ndikpan̄ utọn̄ n̄kop se mbon en̄wen ẹyomde nditịn̄. N̄kpan̄utọn̄ enen̄ede edi usọ. Didie ke nnyịn ikeme ndikpep ndikpan̄ utọn̄ ke usụn̄ oro owụtde ima?

Akpan N̄kpọ Oro Ẹyomde

Jehovah edi “Akwa Anditeme” nnyịn. (Isaiah 30:20, NW) Enye ekeme ndikpep nnyịn ekese mban̄a edikpan̄ utọn̄. Kere ban̄a nte Jehovah akan̄wamde prọfet Elijah. Elijah ama okop ndịk ke ini Ọbọn̄ an̄wan Jezebel ekedịghede enye uwem, onyụn̄ efehe aka wilderness ọkọdọhọ Abasi akam owot imọ do. Angel Abasi ama etịn̄ ikọ ye enye do. Jehovah ama akpan̄ utọn̄ ke ini prọfet oro akasiande enye ntak oro imọ ikopde ndịk, onyụn̄ ada akwa odudu Esie anam n̄kpọ. Nso ikedi utịp? Elijah ikokopke aba ndịk, enye ama onyụn̄ afiak aka akanam utom esie. (1 Ndidem 19:2-15) Ntak emi Jehovah esidade ini akpan̄ utọn̄ okop mfịna mme asan̄autom esie? Koro enye ekere aban̄a mmọ. (1 Peter 5:7) Akpan n̄kpọ oro oyomde inam man idi eti andikpan̄ utọn̄ edi ndiwụt ke imenen̄ede ikere iban̄a mbon en̄wen.

Ke Bolivia, eren kiet emi akanamde akwa idiọkn̄kpọ ama owụt esịtekọm ke ini ekemmọ andinịm ke akpanikọ akakpan̄de utọn̄ ke ima ima usụn̄ ọnọ enye. Eren oro ọdọhọ ete: “Ini oro ekedi ndiọkn̄kan ini ke uwem mi. Akayak nsịn̄ n̄kpakanamke aba n̄kpọ Jehovah ke mîkpekedịghe emi eyenete kiet akadade ini akpan̄ utọn̄ ọnọ mi. Enye iketịn̄ke uwak ikọ, edi ndikụt ke enye ama enen̄ede akpan̄ utọn̄ ọnọ mi ama ọsọn̄ọ mi idem. N̄kasianke enye mfịna mi man enye eteme mi se n̄kpanamde; mma mfiọk se n̄kpanamde. N̄kukụre se n̄koyomde ekedi ndifiọk ke odu owo emi ọfiọkde nte etiede mi ke idem. Enye ndikakpan̄ utọn̄ nnọ mi ikayakke mfịna oro akan mi ubọk.”

Jesus Christ edi akakan Uwụtn̄kpọ oro ikpekpebede kaban̄a nte ẹkpekpan̄de utọn̄ ke usụn̄ oro owụtde ima. Esisịt ini ke Jesus ama ekeset ke n̄kpa, mbet esie iba ẹma ẹto Jerusalem ẹdika obio-in̄wan̄ emi okoyomde usụn̄ ke n̄kpọ nte kilomita 11. Idem ama emem mmọ. Ntre Jesus Christ oro ẹkenamde eset ama asan̄a ye mmọ. Enye ama ada usọ obụp mmọ mbụme man ọfiọk se ikedide mfịna mmọ, mmọ ẹma ẹnyụn̄ ẹbọrọ. Mmọ ẹma ẹsian enye ke idotenyịn oro mmimọ ikenyenede akpa mfụhọ ndien ke oro anam esịt etịmede mmimọ. Jesus ama ekere aban̄a mmọ onyụn̄ akpan̄ utọn̄ ọnọ mmọ ke usụn̄ oro owụtde ima, ndien emi ama anam mbet iba oro ẹkpan̄ utọn̄ n̄ko. Ekem Jesus ama  “asiak mme n̄kpọ emi ẹketịn̄de ẹban̄a enye ke ofụri N̄wed Abasi ọnọ mmọ.”—Luke 24:13-27.

Ndikpan̄ utọn̄ ke ini mbon en̄wen ẹtịn̄de ikọ ayanam mmọ ẹma ndikpan̄ utọn̄ nnọ nnyịn n̄ko. N̄wan kiet otode Bolivia ọdọhọ ete: “Ete ye eka mi ọkọrọ ye eka ye ete ebe mi ẹma ẹtọn̄ọ ndisua usụn̄ oro n̄kọbọkde nditọ nnyịn. N̄kamaha ikọ mmọ, edi n̄konyụn̄ mfiọkke se n̄kpanamde nte eka. Ke ini oro, n̄wan kiet edide kiet ke otu Mme Ntiense Jehovah ama awaha edise mi. Enye ama asian mi mme un̄wọn̄ọ Abasi. Nte ededi, usụn̄ oro enye okobụpde mi mbụme ama anam mfiọk ke enye ayakpan̄ utọn̄ ọnọ mi. Mma ndọhọ enye odụk edi ufọk, ndien ikebịghike mma ntọn̄ọ ndisian enye mfịna mi. Enye ama eme ime akpan̄ utọn̄ okop se ntịn̄de. Enye ama obụp mi m̀mê nso ke nyom nditọ mi ẹdi onyụn̄ obụp se ebe mi ekerede aban̄a oro. Ama efere mi ke idem ke ini n̄kenyenede nneme ye owo oro okodomode ndifiọk nte etiede mi ke idem. Ke ini enye ọkọtọn̄ọde ndiwụt mi se Bible etịn̄de aban̄a uwem ubon, mma mfiọk ke n̄kenyene nneme ye owo oro ekenyenede udọn̄ aban̄a se itịbede inọ mi.”

Bible ọdọhọ ke “ima . . . iyomke ufọn esiemmọ.” (1 Corinth 13:4, 5) Do, ndikpan̄ utọn̄ ke usụn̄ oro owụtde ima ọwọrọ ndiyom ufọn mbon en̄wen. Emi ekeme ndiyom ikọbi ekebe ndise, itre ndikot n̄wedmbụk n̄kpọntịbe, m̀mê inịme urụk ukopikọ nnyịn ke ini mbon en̄wen ẹtịn̄de akpan n̄kpọ ẹnọ nnyịn. Ndikpan̄ utọn̄ ke usụn̄ oro owụtde ima ọwọrọ ndinen̄ede nnyene udọn̄ ke se owo en̄wen etịn̄de. Emi ọwọrọ nnyịn nditre nditịn̄ mban̄a idem nnyịn ke nditịn̄ utọ ikọ nte, “Oro anam mi nti se iketịbede inọ mi ediwak isua emi ẹkebede.” Okposụkedi utọ ikọ oro odotde ke ini inemede nneme ye mme ufan nnyịn, nte ededi, oyom ikpọnọrede udọn̄ idem nnyịn inịm n̄kan̄ kiet ke ini owo etịn̄de akpan mfịna esie ọnọ nnyịn. Usụn̄ en̄wen odu oro nnyịn ikemede ndiwụt ke imenen̄ede ikere iban̄a mme owo ke ini mmọ ẹtịn̄de ikọ.

Nen̄ede Kpan̄ Utọn̄ man Ọfiọk nte Etiede Owo ke Idem

Mme ufan Job ẹma ẹkop enye etịn̄de ikọ ke nsụhọde n̄kaha utịm ikoduop. Kpa ye oro, Job ọkọdọhọ ete: “Akpakam n̄kụt owo eke [“akpan̄de utọn̄ ọnọ,” NW] mi”! (Job 31:35) Ntak emi enye ọkọdọhọde ntre? Koro nte mmọ ẹkekpan̄de utọn̄ ikọdọn̄ke Job esịt. Mmọ ikekereke iban̄a Job, ikonyụn̄ iyomke ndifiọk nte eketiede enye ke idem. Ke akpanikọ, mmọ ikowụtke edikere mban̄a nte mme andikpan̄ utọn̄ oro ẹkopde owo mbọm. Edi apostle Peter eteme ete: “Kpukpru mbufo ẹnyene ekikere kiet, ẹwụt edikere mban̄a, ẹnyene ima nditọete, ẹtua owo mbọm, ẹsụhọde idem.” (1 Peter 3:8) Didie ke nnyịn ikeme ndiwụt ke imekere iban̄a mme owo? Usụn̄ kiet edi ndiwụt ke imọfiọk nte etiede mmọ ke idem. Nditịn̄ utọ ikọ nte “anaedi n̄kpọ oro ama enen̄ede abiak fi” m̀mê “anaedi ikọ fo ikan̄wan̄ake mmọ” edi usụn̄ kiet ndiwụt ke nnyịn imekere iban̄a owo. Usụn̄ en̄wen edi nditịn̄ se owo oro eketịn̄de ke ikọ idem nnyịn, ntem iwụtde ke ikọ esie ama an̄wan̄a nnyịn. Ndikpan̄ utọn̄ ke usụn̄ oro owụtde ima ọwọrọ n̄ko ndikpan̄ utọn̄ n̄kop ikọ oro owo etịn̄de nnyụn̄ mfiọk nte etiede owo oro ke idem.

Robert * edi asan̄autom uyọhọ ini eke Mme Ntiense Jehovah oro enyenede mbufiọk. Enye ọdọhọ ete: “Enyene ini emi mmen̄kenyeneke aba udọn̄ ke utom ukwọrọikọ. Ntre mma nnyene nneme ye esenyịn oro asan̄ade-san̄a.  Enye ama enen̄ede akpan̄ utọn̄ ọnọ mi onyụn̄ odomo ndifiọk nte etiede mi ke idem. Etie nte enye ama akam ọfiọk ke ami mma n̄kop ndịk ke imọ iyokụt ndudue inọ mi. Esenyịn oro ama ọdọn̄ mi esịt onyụn̄ ọdọhọ ke an̄wan̄a imọ ntak oro etiede mi ntre ke idem, ke ama onyụn̄ etie imọ ntre n̄ko ke idem. Emi ama enen̄ede an̄wam mi ndika iso ke utom ukwọrọikọ mi.”

Ndi imekeme ndikpan̄ utọn̄ nnọ owo okposụkedi nnyịn mînyịmeke ye se enye etịn̄de? Ndi imekeme ndidọhọ owo ke imokop inemesịt enye ndisian nnyịn nte etiede enye ke idem? Ih. Nso edieke ekpri eyen an̄wanade en̄wan ke ufọkn̄wed m̀mê n̄kaiferi ọnyọn̄de ufọkn̄wed edidọhọ ke imenyene udọn̄ ke idem akparawa? Ndi ikpakam itịmke ifọn ete m̀mê eka ndikpan̄ utọn̄ nnyụn̄ ndomo ndifiọk se idude eyen oro ke esịt mbemiso asiande enye se idide eti ye idiọk edu uwem?

Mme N̄ke 20:5 ọdọhọ ete: “Uduak ke esịt owo edi udem; edi owo mbufiọk oyokot enye osio.” Edieke owo oro enyenede ọniọn̄ ye mbufiọk mîsimaha ndinọ owo item ke idemesie, ekeme ndiyom ikpekpek enye ibọ item. Kpasụk ntre ke edi ke ini ikpan̄de utọn̄ ke usụn̄ oro owụtde ima. Oyom mbufiọk man ikeme ndifiọk se isịnede owo ke esịt. Ọfọn ndibụp mbụme, edi ana itịm ikpeme mbak mbụme nnyịn editie nte ke imọnọhọ ke ọkpọkpọ mbubehe mbon en̄wen. Ọfọn ndidọhọ owo oro oyomde nditịn̄ ikọ nnọ nnyịn ebem iso eneme mme n̄kpọ oro enye ekemede ndineme ifụre ifụre. Ke uwụtn̄kpọ, ekeme ndidi mmemmem n̄kpọ nnọ n̄wan oro oyomde nditịn̄ mban̄a mfịna ndọ mmọ ndibem iso ntịn̄ nte enye ye ebe esie ẹkesan̄ade ẹsobo ẹnyụn̄ ẹdọ ndọ. Ekeme ndidi mmemmem n̄kpọ nnọ owo oro mîwọrọke an̄wautom aba ndibem iso ntịn̄ nte enye akasan̄ade ọbọ akpanikọ.

Esisọn̄ Ndikpan̄ Utọn̄ ke Usụn̄ Oro Owụtde Ima

Ekeme ndisọn̄ ndikpan̄ utọn̄ ke ini owo ayatde esịt, koro edi ndammana n̄kpọ nditịn̄ ikọ nnyan̄a idem. Didie ke ikeme ndikan n̄kpọ-ata emi? Mme N̄ke 15:1 ọdọhọ ete: “Sụn̄-sụn̄ ibọrọ akabade ifiopesịt efep.” Ndida mfọnido ndọhọ owo etịn̄ mfịna esie nnyụn̄ nnyene ime enye etịn̄ ntak iyatesịt esie edi usụn̄ kiet ndibọrọ ikọ ke sụn̄sụn̄ ido.

Ọkpọsọn̄ utọk esiwak ndinam mme ọtọhọ utọk ẹfiak ẹtịn̄ se mmọ ẹma ẹketetịn̄. Owo kiet ekere ke owo enye eken ikpan̄ke utọn̄ ikop se imọ itịn̄de. Ọkpọfọn didie ntem edieke owo mmọ kiet okpodopde uyo akpan̄ utọn̄ okop se enye eken etịn̄de! Nte ededi, edi akpan n̄kpọ ndifara ke idem nnyụn̄ ntịn̄ ikọ ke usụn̄ oro owụtde ima ye ọniọn̄. Bible asian nnyịn ete: “Owo eke omụmde n̄kpọk-inua esie akama edi ọniọn̄.”—Mme N̄ke 10:19.

Owo idaha-da ukeme ndikpan̄ utọn̄ ke usụn̄ oro owụtde ima, imana. Nte ededi, emi edi usọ oro ẹkemede ndisịn ifịk n̄kpep. Ke nditịm ntịn̄, emi edi usọ oro odotde ẹnyene. Ke akpanikọ, ndikpan̄ utọn̄ ke ini mbon en̄wen ẹtịn̄de ikọ owụt ke imama mmọ. Emi n̄ko anam nnyịn ikop inemesịt. Owụt ọniọn̄ didie ntem ndinyene usọ edikpan̄ utọn̄ ke usụn̄ oro owụtde ima!

[Ikọ idakisọn̄]

[Ndise ke page 11]

Ana ikpọnọrede udọn̄ idem nnyịn inịm n̄kan̄ kiet ke ini ikpan̄de utọn̄ inọ mme owo

[Ndise ke page 12]

Ekeme ndisọn̄ ndikpan̄ utọn̄ ke ini owo ayatde esịt