Good News for People of All Nations

EMI edi enyịn̄ ekpri n̄wed oro ẹkesiode ke Mbono District “Ẹsan̄a ye Abasi” eke Mme Ntiense Jehovah, oro ẹkenịmde ke 2004/2005. Nsiondi esie kiet enyene page 96 oro ọdọn̄ọde mbio mbio etop ke usem 92, ọtọn̄ọde ke usem Afrikaans esịm usem Zulu; ndien ẹnam ekpri n̄wed emi man an̄wam ẹkwọrọ eti mbụk Obio Ubọn̄ ẹnọ adan̄a ediwak owo nte ẹkekeme. (Matthew 24:14) Mme ifiọkutom oro ẹtienede mi ẹwụt utịp oro ẹnyenede ke ini ẹdade ekpri n̄wed emi ẹkwọrọ ikọ.

• Ke ubon Ntiense kiet ẹma ẹkebọ ekpri n̄wed emi ke mbono district, mmọ ẹma ẹka itie unọ idem inemesịt ita. Mmọ ẹma ẹkụt mme owo ẹtode, India, Netherlands, Pakistan, ye Philippines ke mme itie unọ idem inemesịt emi. Ebe ọdọhọ ete: “Okposụkedi kpukpru mme owo emi ẹkemede nditịn̄ Ikọmbakara esisịt, mmọ ẹma ẹkop inemesịt ke ini ikowụtde mmọ etop Obio Ubọn̄ ke usem emana mmọ, sia mmọ ẹkedude ke ebiet oro enen̄erede oyom usụn̄ ọkpọn̄ obio emana mmọ. Mmọ ẹma ẹnen̄ede ẹkụt ke inam utom nnyịn ke ofụri ererimbot, ẹnyụn̄ ẹkụt nte nnyịn idianade kiet ke ofụri ererimbot.”

• Ntiense kiet ama owụt nsan̄autom esie otode India ekpri n̄wed emi. Enye ama okop inemesịt ndikụt kpukpru usem oro ẹdude ke ekpri n̄wed emi onyụn̄ okot etop Obio Ubọn̄ ke usem emana esie. Emi ama anam mmọ ẹka iso ke nneme Bible. Idem ama akpa nsan̄autom esie efen emi otode Philippines ndikụt usem emana esie ke ekpri n̄wed oro, emi ama onyụn̄ anam enye oyom ndifiọk ekese n̄kpọ mban̄a Mme Ntiense Jehovah.

• Ke Canada, n̄wan kiet otode Nepal ama enyịme ndikpep Bible ye eyenete an̄wan kiet ke urụk ukopikọ edi ikoyomke ndikot eyenete emi ufọk. Nte ededi, ke ini eyenete emi akasiande enye ke odu ekpri n̄wed emi esịnede etop ke usem Nepali, idem ama aduai enye tutu enye ọdọhọ eyenete an̄wan emi ọwọn̄ọde edi ufọk imọ. Ama enen̄ede ọdọn̄ enye ndikụt etop oro ke usem emana esie! Ẹnịm ukpepn̄kpọ Bible ye n̄wan oro ke ufọk esie toto ke ini oro.