Ndin̄wam Mbon Oro Ẹsemde Usem Chinese ke Mexico

“OWO duop eke ẹtode ke kpukpru usem mme idụt ẹdimụm, kpa mmọ ẹdimụm eyen Judah kiet utọn̄ ọfọn̄idem, ẹte, Ẹyak nnyịn ika ye mbufo: koro nnyịn imokop ite ke Abasi odu ye mbufo.” (Zechariah 8:23) Mfịn, inem inem ntịn̄nnịm ikọ emi ke osu ke ofụri ererimbot. Mme owo “ẹtode ke kpukpru usem mme idụt” ke ẹyịre Israel eke spirit ke idem man ẹtuak ibuot ẹnọ Jehovah Abasi. Mme Ntiense Jehovah ẹnen̄ede ẹnyene udọn̄ ke ntịn̄nnịm ikọ oro osude mi. Ediwak mmọ ke ẹkpep mme usem efen man ẹtiene ẹbuana ke utom ukwọrọikọ oro ẹnamde ke ofụri ererimbot mi.

Mme Ntiense Jehovah ke Mexico ẹtiene ẹnam emi. N̄kpọ nte owo 30,000 emi ẹsemde usem Chinese ẹdụn̄ ke Mexico. Ke 2003, owo 15 ke otu mmọ ẹkedụk Editi n̄kpa Christ oro ẹkenịmde ke Mexico City. Emi ama anam Mme Ntiense ke Mexico ẹfiọk ke mbon oro ẹsemde usem Chinese do ẹkeme ndibọ akpanikọ. Ẹma ẹtịm ukpep ọfiọn̄ ita oro ẹdikpepde ediwak Mme Ntiense ẹtode Mexico nte ẹkpekwọrọde ikọ ẹnọ mbon oro ẹsemde usem Chinese. Mme Ntiense 25 ẹkebọ ukpep emi. Ke ẹma ẹkekụre ukpep emi, akwa owo ukara otode ikpehe oro ẹsemde usem China ẹkotde Mandarin ke Mexico City ama odụk usọrọ ukụre ukpep oro, emi ama owụt nte ukpep emi okotụkde mbon oro ẹsemde usem Chinese emi ẹdụn̄de ke Mexico. Ufọkn̄wed oro ẹkpepde usem Chinese do ama ọnọ owo ita ke otu Mme Ntiense oro ẹkebọde ukpep oro ẹka idụt en̄wen ke mfọn ẹkenen̄ede ẹkpep usem Chinese.

Ẹma ẹnen̄ede ẹkpep mmọ nte ẹsemde usem Chinese. Ke ẹma ẹkekpep mmọ mme akpan ubak udịmikọ ke usem Chinese, nditọ ukpepn̄kpọ emi ẹma ẹtọn̄ọ ndikwọrọ ikọ inikiet inikiet ke usem Chinese ke ikpehe Mexico City oro ẹsinamde mbubehe. Ifịk ifịk nditọ ukpepn̄kpọ emi ẹma ẹtọn̄ọ ukpepn̄kpọ Bible ye owo 21. Ediye uduot ekpri n̄wed oro, Nso ke Abasi Oyom Oto Nnyịn?, emi ẹdade ata ata abisi ẹkabarede ẹsịn ke usem Chinese, ama enen̄ede an̄wam.

Sia mîbịghike Mme Ntiense emi ẹketọn̄ọ ndikpep usem Chinese, didie ke mmọ ẹkekeme ndinịm mme ukpepn̄kpọ Bible? Ke ntọn̄ọ ntọn̄ọ, n̄kukụre se mmọ ẹkekemede nditịn̄ ke ini ẹsobode owo emi esemde usem Chinese ekedi, “Qing Du [Mbọk kot]” ẹnyụn̄ ẹnyan ubọk ẹwụt ikpehe ekikere, ekem ẹwụt mmọ mbụme. Ke owo oro ama okokot ama onyụn̄ ọbọrọ mbụme, Mme Ntiense ẹyedọhọ, “Shei shei [Sọsọn̄ọ]” ẹnyụn̄ ẹdọhọ, “Hen Hao [Amanam etieti].”

Ẹma ẹtọn̄ọ ukpepn̄kpọ Bible ntre ye n̄wan kiet emi ọkọdọhọde ke idi Christian. Ke Ntiense kiet ama ekekpep n̄kpọ ye mma emi ọyọhọ utịm ikata, Ntiense emi ama ekere m̀mê se imọ isikpepde  akam an̄wan̄a enye. Ntre, Ntiense emi ama asan̄a ye Ntiense en̄wen oro esemde usem Chinese aka edem mma oro. Ke ini Ntiense oro ẹkedade ẹka do okobụpde mma oro m̀mê enye enyene mbụme, mma oro ama obụp ete: “Ndi nnyene ndifiọk ewọk mbemiso nnade baptism?”

Ikebịghike, ẹma ẹtọn̄ọ Ukpepn̄kpọ N̄wed Esop ke usem Chinese, ndien n̄kpọ nte owo 9 oro ẹsisemde usem Chinese ye Mme Ntiense 23 ẹtode Mexico ẹkesidụk. Abiausọbọ oro edide eyen China, emi owo udọn̄ọ oro enye ọkọsọbọde idem ọkọnọde Enyọn̄-Ukpeme ye Awake! ke usem Spanish, ama esitiene odụk. Sia enye mîkekemeke ndikot usem Spanish, enye ama ọdọhọ owo akabarede nsịtnsịt ọnọ imọ. Ke ama ọkọfiọk ke magazine oro etịn̄ n̄kpọ aban̄a Bible, enye ama obụp owo oro enye ọkọsọbọde idem m̀mê enye ekeme ndinam imọ inyene magazine oro ke usem Chinese. Owo udọn̄ọ oro ama ada ọsọk enye, ndien n̄kọk itieutom Mme Ntiense Jehovah ke Mexico ama anam ndutịm man Ntiense emi esemde usem Chinese aka ebịne enye. Eka abiausọbọ emi ke China ama enyene Bible, ndien abiausọbọ emi ama esima ndikot Bible. Ke ini enye okoyomde ndika Mexico, eka esie ama ọdọhọ enye okûtre ndikot Bible. Ntre, abiausọbọ emi ama esibọn̄ akam oyom owo oro edin̄wamde imọ inen̄ede ifiọk Abasi a-Bible. Enye ọkọdọhọ ete: “Abasi ọmọbọrọ akam mi!”

Ubon kiet oro ẹtode China ẹnyụn̄ ẹbọde ufọk ke ukpeokụk ẹto n̄wan Mexico oro ekesikpepde Bible ye Mme Ntiense Jehovah, ẹsitiene ẹdụk Ukpepn̄kpọ N̄wed Esop. Okposụkedi mmọ mîketịmke ifiọk usem Spanish, mmọ ẹsitiene ẹkpan̄ utọn̄ ke ini ukpepn̄kpọ emi akade iso. Nte ini akakade, mmọ ẹma ẹbụp ada ukpepn̄kpọ m̀mê enye enyene n̄wed ndomokiet ke usem Chinese. Ikebịghike, ẹma ẹtọn̄ọ ndikpep mmọ Bible ke usem Chinese. Esisịt ini ke oro ebede, mmọ ẹma ẹdọhọ ke iyom ndikwọrọ ikọ nnọ nditọ idụt mmimọ nnyụn̄ nyak idem nnọ Jehovah.

Edi akpanikọ ke imemke utom ndikpep usem Chinese. Nte ededi, nte mme ifiọkutom oro ibụkde mi ẹwụtde, Jehovah aman̄wam mme owo oro ẹsemde ediwak usem, esịnede usem Chinese, ndikpep uduak esie ke Mexico, ye ke mme ebiet en̄wen ke ererimbot.

[Ndise ke page 17]

Otu oro ẹkpepde usem Chinese ke Mexico City

[Ndise ke page 18]

Mme Ntiense ẹtode Mexico ẹnịm ukpepn̄kpọ Bible ke usem Chinese

[Ndise ke page 18]

Ndida usem Chinese n̄kwọrọ ikọ ke enyịnusụn̄ ke enyịnusụn̄ ke Mexico City