Nte Afo Emeti?

Nte afo ama ọbọ ufọn ndikot mme nsiondi Enyọn̄-Ukpeme eke ndondo emi? Ọfọn, se m̀mê emekeme ndibọrọ mme mbụme oro ẹtienede mi:

• Ntak emi ẹkemede ndimen akpa idiọkn̄kpọ—nsọn̄ibuot Adam—ndomo ye udọn̄ọ oro ẹdade-da ẹmana?

Enye etie nte udọn̄ọ koro Adam ama ayak idiọkn̄kpọ ọnọ nditọ esie. Ntem, nnyịn idada idiọkn̄kpọ imana, ukem nte ndusụk nditọwọn̄ ẹdade udọn̄ọ ẹmana ẹto ete ye eka mmọ.—8/15, page 5.

• Nso inen̄erede inam afai ọkọri mfịn?

Satan odomo ndidianade mme owo n̄kpọn̄ Jehovah ebe ke ndinam mmọ ẹma afai, adade ndise senima, ikwọ, ye mme mbre kọmputa emi ẹsinamde mme andibre ẹnen̄ede ẹbre nte ẹbakde ibak ẹnyụn̄ ẹwotde owo. Afai oro ẹsiwụtde ke ekebe ndise etịp esịn ke ediwak afai oro ẹdude mfịn.—9/1, page 29.

• Anie ekedi Pontius Pilate?

Enye ekedi owo Rome emi okotode ukeuke ufọk imọ, ndien etie nte enye ekedi owoekọn̄. Akwa Edidem Tiberius eke Rome ekemek Pilate ndikara mbahade obio ukara Judaea ke isua 26 E.N. Pilate ama okop ikọ oro mme adaiso mme Jew ẹkedoride Jesus ke ini ẹkekpede ikpe Jesus. Edi Pilate ama enyịme ẹwot Jesus man enem otuowo esịt.—9/15, page 10-12.

• Nso idi “idiọn̄ọ” oro ẹsiakde ke Matthew 24:3?

Idiọn̄ọ oro enyene ediwak ikpehe, emi ẹdianade kiet ẹnam idiọn̄ọ edidu Jesus. Idiọn̄ọ emi esịne ekọn̄, akan̄, idiọk udọn̄ọ, ye unyekisọn̄, ndien idiọn̄ọ emi edinam mme anditiene Jesus ẹfiọk “edidu” esie ọkọrọ ye “utịt editịm n̄kpọ emi.”—10/1, page 4-5.

• Isenidụt ewe ke mme Jew ẹkedụn̄ọ?

Akpan ebiet oro mme Jew ẹkedụn̄ọde ke akpa isua ikie ẹkedi Syria, Asia Minor, Babylonia, ye Egypt, ndien esisịt ibat mme Jew ẹma ẹdụn̄ọ ke ikpehe Obio Ukara Rome ke Europe.—10/15, page 12.

• Ndi Christian ekeme ndinyene eti ubieresịt edieke enye anamde utom oro ẹkamade ikan̄?

Owo kiet kiet enyene ndibiere m̀mê imọ iyanam utom idịbi udia oro oyomde ẹkama ikan̄ m̀mê n̄kpọekọn̄ eken. Edi utom oro ẹkamade ikan̄ ekeme ndinam owo akama iyịp edieke enye adade ikan̄ oro otop owo; owo onyụn̄ ekeme ndinọ idemesie unan, mîdịghe asua m̀mê owo oro oyomde ndisio usiene ekeme ndiwot enye. Christian emi akamade utọ n̄kpọekọn̄ oro ididotke ndikama akpan ifetutom ekededi ke esop. (1 Timothy 3:3, 10)—11/1, page 31.

• Sia ẹdade “Armageddon” ẹto ikọ emi “Obot Megiddo,” ndi ọwọrọ ke ẹdin̄wana Armageddon ke obot kiet ke Ufọt Ufọt Edem Usiahautịn?

Baba. Obot Megiddo idụhe, n̄kukụre se idude edi ekpri ibombom emi okon̄de akan itịghede unaisọn̄ Israel. Ofụri n̄kann̄kụk Megiddo ikpekemke kpukpru “ndidem isọn̄ ye udịmekọn̄ mmọ.” Ẹdin̄wana akwa ekọn̄ Abasi ke ofụri ererimbot, ndien ekọn̄ emi editre kpukpru ekọn̄. (Ediyarade 16:14, 16; 19:19; Psalm 46:8, 9)—12/1, page 4-7.