Andikọbọ Ọbọ Akpanikọ

EDIWAK isua ko ke edem, Santiago ye Lourdes n̄wan esie ẹma ẹwọrọ ẹkedụn̄ ke ediye obio Huillcapata ke Peru, man ẹkpebuana etop Bible oro ọnọde idotenyịn ye mbio obio oro. Nte ededi, ikebịghike, oku ufọkabasi ama oto Cuzco edi edikot kpukpru mbio obio oro obon ọtọkiet. Oku emi ama odụri mmọ utọn̄ ete ke Mme Ntiense Jehovah oro ẹsụk ẹdide do ẹyenam ata idiọk udọn̄ọ owot mme ufene mmọ, ẹnyụn̄ ẹnam snow enen̄ede edep abiat mbun̄wụm in̄wan̄ mmọ.

Ediwak owo ẹma ẹnịm inua-okot ntịn̄nnịm ikọ emi, ndien emi ikayakke owo ndomokiet enyịme ndikpep Bible ye Santiago ye Lourdes ke se ibede ọfiọn̄ itiokiet. Udiana andikara obio ama akam ebịn Santiago ye Lourdes efep ke efak onyụn̄ otomo mmọ ke itiat. Edi ebe ye n̄wan emi ẹkesinam n̄kpọ emem emem nte mme Christian.

Nte ini akakade, ndusụk mbio obio oro ẹma ẹtọn̄ọ ndikpep Bible. Idem udiana andikara oro ekerede Miguel ama okpụhọde edu esie. Enye ama ọtọn̄ọ ndikpep Bible ye Santiago, etre ndin̄wọn̄ n̄kpọ mbe ubọk, onyụn̄ akabade edi owo emem. Ke akpatre, Miguel, n̄wan esie, ye nditọ iban esie iba, ẹma ẹbọ akpanikọ Bible.

Mfịn ọsọn̄-idem esop Mme Ntiense Jehovah odu ke obio emi. Esịt enem Miguel sia ekese itiat oro enye ekesitomode oyom nditọ Santiago ye Lourdes mîkesitọhọ mmọ; enye n̄ko ọkọm ebe ye n̄wan emi aban̄a nti uwụtn̄kpọ oro mmọ ẹkenịmde ke nditie emem emem.

[Mme ndise ke page 32]

Emem emem edu uwem Santiago ye Lourdes (enyọn̄ enyọn̄) ama anam Miguel (utịt utịt nnasia) okpụhọde edu esie