Mbuọtidem Oro Afo Enyenede ke Abasi Okpon Adan̄a Didie?
Mbuọtidem Oro Afo Enyenede ke Abasi Okpon Adan̄a Didie?
“Ẹka iso, ndien, ndibem iso nyom obio ubọn̄.”—MATTHEW 6:33.
1, 2. Nso ke akparawa kiet akanam aban̄a utom esie, ndien ntak-a?
AKPARAWA kiet ama enyene udọn̄ ndinen̄ede nsịn idem nnam utom ke esop mmọ. Mfịna ekedi ke utom esie ikayakke enye esidụk mbono esop kpukpru ini. Nso ke enye akanam aban̄a oro? Enye ama ọtọn̄ọ ndidu mmemmem uwem, esịn n̄wed ọkpọn̄ utom oro, ndien nte ini akakade enye ama okụt utom eke mîkọbiọn̄ọke enye ndibuana ke mme edinam Christian. Mfịn, okụkọfiọn̄ esie iwakke nte ekesiwakde, kpa ye oro, enye ke ese aban̄a ubon esie onyụn̄ enyene ifet ndin̄wam esop n̄kan nte ekesin̄wamde.
2 Ndi ọmọfiọk ntak emi akparawa oro akanamde oro? Ndi emekere ke afo akpanam orụk ukpụhọde oro edieke okpodude ke ukem idaha oro? Edi n̄kpọ itoro ke ediwak Christian ẹnam ukem oro, ndien edinam mmọ owụt ke mmọ ẹnyene mbuọtidem ke en̄wọn̄ọ Jesus emi: “Ẹka iso, ndien, ndibem iso nyom obio ubọn̄ ye edinen ido esie, ndien ẹyedian kpukpru n̄kpọ eken ẹnọ mbufo.” (Matthew 6:33) Utu ke ndibuọt idem ke ererimbot, mmọ ẹnyene mbuọtidem ke Jehovah eyekpeme mmimọ.—Mme N̄ke 3:23, 26.
3. Ntak emi ndusụk owo ẹkemede ndikere ke owo ikemeke ndibem iso nyom Obio Ubọn̄ Abasi?
3 Ke ẹkerede ẹban̄a ini nsọn̄ọn̄kpọ emi nnyịn idude uwem, ndusụk owo ẹkeme ndikere m̀mê ubiere oro akparawa oro akanamde owụt ifiọk. Mfịn, ndusụk owo ẹdi ọkpọikpọi ubuene, ke adan̄aemi mbon eken ẹdide ata imọ. Ediwak owo ke mme idụt oro ẹbuenede ẹsisọsọp ẹnam se ededi oro mmọ ẹkụtde man n̄kpọ ọfọn esisịt. Ke n̄kan̄ eken, ediwak owo ke mme idụt uforo ẹn̄wana ndika iso ndu uwem imọ kpa ye nte n̄kpọ edide aka iso afiak edem, utom mînyụn̄ itiehe aba nte ekesitiede, mme eteutom ẹsinyụn̄ ẹyomde mbonutom ẹnam utom ẹkan nte ẹkesinamde. Sia n̄kpọ ọsọn̄de ntem, ndusụk owo ẹkeme ndikere, ‘Nte owo ekeme ndibem iso nyom Obio Ubọn̄?’ Man ikeme ndibọrọ mbụme emi, kere ban̄a otuowo oro Jesus eketịn̄de ikọ ọnọ.
“Ẹtre Nditịmede Esịt”
4, 5. Didie ke Jesus okowụt ke ufọn idụhe ikọt Abasi nditịmede esịt n̄kaha mban̄a mme n̄kpọ udu uwem eke usen ke usen?
4 Jesus okodu ke Galilee ke ini enye eketịn̄de ikọ ọnọ akwa otuowo emi ẹketode ediwak ebiet. (Matthew 4:25) Ikawakke mbon oro ẹkenyenede n̄kpọ ke otu mmọ. Eyedi ata ediwak mmọ ẹkedi ubuene. Kpa ye oro, Jesus ama ọdọhọ mmọ ẹkûbem iso ẹyom inyene obụkidem, edi ẹkam ẹyom n̄kpọ oro enen̄erede enyene ufọn akan—kpa n̄kpọuto eke spirit. (Matthew 6:19-21, 24) Enye ọkọdọhọ ete: “Ẹtre nditịmede esịt mban̄a ukpọn̄ mbufo ẹte ididia nso m̀mê idin̄wọn̄ nso, m̀mê ẹban̄a ikpọkidem mbufo ẹte idisịne nso. Nte ukpọn̄ ikanke udia, ikpọkidem inyụn̄ ikanke edisịnen̄kpọ?”—Matthew 6:25.
5 Ekeme ndidi ediwak owo oro ẹkekpan̄de utọn̄ ẹnọ Jesus ikekereke ke ẹkeme ndinam se enye eketịn̄de oro. Mmọ ẹma ẹfiọk ke mmimọ mînamke ọkpọsọn̄ utom, ke n̄kpọ ọyọsọn̄ ye ubon mmimọ. Nte edidi, Jesus ama eti mmọ aban̄a mme inuen. Kpukpru usen inuen ẹnyene ndiyom udia ye ebietidụn̄, kpa ye oro, Jehovah esise aban̄a mmọ. Jesus ama onyụn̄ eti mmọ nte Jehovah esisede aban̄a mme flawa ke ikọt, emi ẹkam ẹyede ẹkan Solomon ke ofụri ubọn̄ esie. Edieke Jehovah esede aban̄a mme inuen ye flawa, adan̄a didie akan oro ke enye edise aban̄a nnyịn? (Matthew 6:26-30) Nte Jesus eketịn̄de, uwem (m̀mê ukpọn̄) ye ikpọkidem nnyịn ẹkan udia oro isidepde ndida mbọk idem nnyịn ye ọfọn̄ oro isidade ifụk ikpọkidem nnyịn. Uwem nnyịn edidi ikpîkpu edieke idade ofụri ukeme ibọk idem inyụn̄ ifụk iferi nnyịn, edi isịnke idem inam n̄kpọ Jehovah.—Ecclesiastes 12:13.
Ekikere Oro Adade Ukem Ukem
6. (a) Mme Christian ẹnyene ndinam nso? (b) Anie ke mme Christian ẹkọn̄ ọyọhọ mbuọtidem mmọ?
6 Edi akpanikọ ke Jesus ikọdọhọke mme andikpan̄ utọn̄ nnọ enye ẹtre ndinam utom ẹnyụn̄ ẹtie ẹbet Abasi ọnọ ubon mmọ n̄kpọ udu uwem. Idem mme inuen ẹnyene ndiyom se mmọ ye nditọ mmọ ẹdidiade. Ke ntre, mme Christian ẹkenyene ndinam utom edieke akanade mmọ ẹnyene se ẹdiade. Akana mmọ ẹse ẹban̄a ubon mmọ. Nditọufọk ye ifịn emi ẹkedide mme Christian ẹkenyene ndisịn ifịk nnam utom nnọ mme eteufọk mmọ. (2 Thessalonica 3:10-12; 1 Timothy 5:8; 1 Peter 2:18) Man enyene se adade an̄wam idemesie, apostle Paul ama esiwak ndinam utom ubọp ufọkọfọn̄. (Utom 18:1-4; 1 Thessalonica 2:9) Edi, mme Christian oro ikọkọn̄ke mbuọtidem ke utom idịbi udia. Mmọ ẹkebuọt idem ke Jehovah. Emi ama ọnọ mmọ ata ifụre emi mbon en̄wen mîkenyeneke. Andiwet psalm ọkọdọhọ ete: “Mmọ eke ẹbuọtde idem ye Jehovah ẹbiet Obot Zion, emi mîsehekede, edi ebịghi ke nsinsi.”—Psalm 125:1.
7. Nso ikeme ndidi ekikere owo oro mînen̄ekede inyene mbuọtidem ke Jehovah?
7 Owo eke mînen̄ekede inyene mbuọtidem ke Jehovah ekeme ndinyene isio isio ekikere. Ata ediwak owo ẹkọn̄ mbuọtidem mmọ ke inyene obụkidem. Ntem, mme ete ye eka ẹsisịn udọn̄ ẹnọ nditọ mmọ ẹte ẹda ekese isua uyen mmọ ẹka ufọkn̄wed ntaifiọk, ye idotenyịn ke oro ayanam mmọ ẹkeme ndinyene utom oro ẹdikpede mmọ ediwak okụk. Edi n̄kpọ mbọm nditịn̄ ke ndusụk ubon Christian ẹkụt ata ntakurua ke ndinam oro, koro nditọ mmọ ẹwọn̄ọde ẹkpọn̄ n̄kpọ eke spirit ẹnyụn̄ ẹbịne inyene obụkidem nte utịtmbuba.
8. Didie ke mme Christian ẹda eti ibuot ẹnam n̄kpọ?
8 Ntem, mme Christian oro ẹnyenede ọniọn̄ ẹfiọk ke item Jesus ebehe nnyịn mfịn ukem nte ekedide ke akpa isua ikie, ndien mmọ ẹdomo ndinam n̄kpọ ye eti ibuot. Idem ọkpọkọm mmọ ẹnyene ndibiat ediwak hour ke utom idịbi udia man ẹkeme ndise mban̄a mbiomo mmọ nte N̄wed Abasi owụtde, akananam mmọ iyakke un̄wana-idem anam mmọ ẹfụmi n̄kpọ eke spirit emi akam edide ata akpan n̄kpọ.—Ecclesiastes 7:12.
“Ẹkûtịmede Esịt”
9. Nso nsọn̄ọ ke Jesus ọnọ mbon oro ẹbuọtde idem ofụri ofụri ye Jehovah?
9 Jesus ama ọdọhọ mme andikpan̄ utọn̄ nnọ enye ke Ukwọrọikọ esie ke Obot, ete: “Ẹkûtịmede esịt ẹnyụn̄ ẹdọhọ ẹte, ‘Nnyịn ididia nso?’ m̀mê, ‘Nnyịn idin̄wọn̄ nso?’ m̀mê, ‘Nnyịn idisịne nso?’ Sia kpukpru emi ẹdi mme n̄kpọ emi mme idụt ẹbịnede ye ọkpọsọn̄ udọn̄. Koro Ete mbufo eke heaven ọfiọk ke mbufo ẹmeyom kpukpru n̄kpọ emi.” (Matthew 6:31, 32) Nso ikọ nsịnudọn̄ ke emi edi ntem! Edieke nnyịn ibuọtde idem ofụri ofụri ye Jehovah, enye ọyọnọ nnyịn ibetedem kpukpru ini. Nte ededi, ikọ Jesus anam owo enen̄ede ekere n̄kpọ n̄ko. Ikọ oro eti nnyịn ke edieke nnyịn ibịnede mme n̄kpọ obụkidem ye “ọkpọsọn̄ udọn̄,” ke nnyịn ikere n̄kpọ nte “mme idụt,” kpa mme owo oro mîdịghe ata mme Christian.
10. Ke ini akparawa kiet okoyomde Jesus ọnọ imọ item, didie ke Jesus akayarade se akparawa oro akamade akan?
10 Ini kiet, akparawa oro ekenen̄erede enyene inyene ama obụp Jesus se imọ ikpanamde man inyene nsinsi uwem. Jesus ama eti enye se Ibet oro ẹkesisụk ẹnịmde ini oro okoyomde ẹnam. Akparawa oro ama ọdọhọ Jesus ete: “Mma nnenịm kpukpru emi; nso isụhọ aba ndinam?” Anaedi ediwak owo oro ẹkedude do ikekereke ke owo ekeme ndinam se Jesus ọkọdọhọde. Enye ọkọdọhọ ete: “Edieke afo oyomde ndifọn mma, ka kanyam kpukpru inyene fo nyụn̄ yak nọ mme ubuene ndien afo eyenyene n̄kpọuto ke heaven, nyụn̄ ditiene mi.” (Matthew 19:16-21) Akparawa oro ama ọnyọn̄ ke mfụhọ, sia enye mîkoyomke nditaba inyene esie. Inamke n̄kpọ mme adan̄a didie ke enye akama Jehovah, enye akama inyene esie akan.
11, 12. (a) Nso ikọ oro anamde owo ekere n̄kpọ ke Jesus eketịn̄ aban̄a inyene? (b) Didie ke inyene ekeme ndibiọn̄ọ owo ndinam n̄kpọ Jehovah?
11 Se iketịbede oro ama anam Jesus etịn̄ se owo mîkodorike enyịn: “Edidi ọkpọsọn̄ n̄kpọ owo inyene ndidụk ke obio ubọn̄ heaven. . . . Edi mmemmem n̄kpọ camel ndibe ke odudu abiabon akan owo inyene ndidụk ke obio ubọn̄ Abasi.” (Matthew 19:23, 24) Ndi ikọ Jesus ọkọwọrọ ke owo inyene ndomokiet ididụkke Obio Ubọn̄? Baba-o, koro enye ama aka iso ndidọhọ ete: “Abasi ekeme ndinam kpukpru n̄kpọ.” (Matthew 19:25, 26) Ke akpanikọ, ke un̄wam Jehovah, ndusụk mbon inyene ini oro ẹma ẹkabade ẹdi mme Christian oro ẹyetde aran. (1 Timothy 6:17) Nte ededi, enyene eti ntak oro akanamde Jesus etịn̄ ikọ oro akpade owo idem do. Enye ọkọnọ ntọt.
12 Edieke owo amade inyene esie ukem nte akparawa oro akamade, inyene oro ekeme ndibiọn̄ọ enye ndinam n̄kpọ Jehovah ke ofụri esịt. Oro ekeme nditịbe nnọ owo oro ama ekenyenyene inyene ye owo oro ‘ebierede ndinyene inyene.’ (1 Timothy 6:9, 10) Ndinen̄ede mbuọt idem ke mme n̄kpọ obụkidem ekeme ndinam owo etre ‘ndikere mban̄a unana esie ke n̄kan̄ eke spirit.’ (Matthew 5:3) Oro ekeme ndinam enye ekere ke imọ iyomke un̄wam Jehovah. (Deuteronomy 6:10-12) Enye ekeme ndiyom esop ẹnọ imọ san̄asan̄a ukpono. (James 2:1-4) Ndien enye ekeme ndibiat ekese ini ndia inyene utu ke ndinam n̄kpọ Jehovah.
Kere N̄kpọ ke Eti Usụn̄
13. Nso ukwan̄ ekikere ke mbon Laodicea ẹkenyene?
13 Esop Laodicea eke akpa isua ikie ẹma ẹnyene ukwan̄ ekikere ẹban̄a inyene. Jesus ọkọdọhọ mmọ ete: “Koro afo ọdọhọde ete: ‘Ami mmenyene inyene, mmonyụn̄ n̄kọ inyene ndien nnanake n̄kpọ ndomokiet,’ edi afo ufiọkke ete idi owo nditaha omonyụn̄ enyene mbọm, ebuene, edi nnan onyụn̄ asan̄a iferi.” Ikedịghe inyene mbon Laodicea akanam mmọ ẹnyene mbọm ntre ke n̄kan̄ eke spirit. Ekedi koro mmọ ẹkebuọt idem ke inyene utu ke ndibuọt ke Jehovah. Emi ama anam mmọ ẹtie ndebe ndebe ke n̄kan̄ eke spirit, ndien Jesus ama ọdọhọ ke ‘iyọkpọhi mmọ isio ke inua imọ.’—Ediyarade 3:14-17.
14. Ntak emi okodotde Paul otoro mme Christian oro ẹkedide mme Hebrew?
14 Ke n̄kan̄ eken, Paul ama otoro mme Christian oro ẹkedide mme Hebrew aban̄a nte mmọ ẹkenamde n̄kpọ akpa ini oro ukọbọ ekesịmde mmọ. Enye ọkọdọhọ ete: “Koro mbufo ẹma ẹwụt mbon oro ẹdude ke ufọk-n̄kpọkọbi mbọm ẹnyụn̄ ẹnyịme ke idatesịt ẹte ẹbụme inyene mbufo, sia ẹfiọkde ẹte mbufo ẹmenyene inyene eke ọfọnde akan oro onyụn̄ ebịghide.” (Mme Hebrew 10:34) Mme Christian oro iketịmekede esịt ke ndikataba inyene mmọ. Mmọ ẹma ẹka iso ẹdat esịt koro mmọ ikọkpọn̄ke inyene oro “ọfọnde akan . . . onyụn̄ ebịghide.” Kpa nte owourua ke n̄ke Jesus akayakde kpukpru se enye ekenyenede atak man edep ọsọn̄urua pearl kiet, mmọ ẹma ẹbiere ndisọn̄ọ ndori enyịn ke Obio Ubọn̄, inamke n̄kpọ m̀mê nso iditak mmọ. (Matthew 13:45, 46) Nso eti edu ke emi edi ntem!
15. Didie ke n̄kaiferi Christian kiet ke Liberia ekebem iso oyom Obio Ubọn̄?
15 Ediwak owo mfịn ẹnyene ukem eti edu oro. Ke uwụtn̄kpọ, ke Liberia, n̄kaiferi Christian kiet ama enyene ifet ndika ufọkn̄wed ntaifiọk. Ẹda utọ ifet oro ke idụt oro nte usụn̄ emi ẹkemede ndida nnyene eti ini iso. Nte ededi, enye ekedi asiakusụn̄, kpa ọkwọrọ eti mbụk uyọhọ ini, ndien ẹma ẹdọhọ enye anam utom nte akpan asiakusụn̄ ke ibio ini. Enye ama emek ndibem iso nyom Obio Ubọn̄ nnyụn̄ n̄ka iso ke utom uyọhọ ini. Enye ama adaha aka efakutom esie onyụn̄ ọkọtọn̄ọ ukpepn̄kpọ Bible 21 ke ufan̄ ọfiọn̄ ita. N̄kaiferi Christian emi ye ediwak owo emi ẹbietde enye ẹbem iso ẹyom Obio Ubọn̄, idem kpa ye emi ekemede ndinam mmọ ẹtaba n̄kpọ obụkidem oro mmọ ẹkpenyenede. Didie ke mmọ ẹsọn̄ọ ẹda ẹnam emi ke ererimbot oro mme owo ẹmade inyene mi? Mmọ ẹnyene ediwak nti edu. Ẹyak ineme ndusụk nti edu emi.
16, 17. (a) Ntak emi ndibuọt idem ke Jehovah enen̄erede oyom nsụkidem? (b) Ntak emi ikpọbuọtde idem ke mme un̄wọn̄ọ Abasi?
16 Nsụkidem: Bible ọdọhọ ete: “Buọt idem fo ye Jehovah ke ofụri esịt fo; ndien kûberi edem ke asian fo. Diọn̄ọ enye ke kpukpru usụn̄ fo, ndien enye eyenen̄ede usụn̄ fo enịm. Kûse idem fo ke ọfiọkn̄kpọ.” (Mme N̄ke 3:5-7) Ndusụk ini, esitie nte ke usụn̄ emi ẹnamde n̄kpọ ọfọn edieke ẹsede nte ererimbot esede. (Jeremiah 17:9) Edi, ata Christian esitiene ndausụn̄ oro Jehovah ọnọde. (Psalm 48:14) ‘Ke kpukpru usụn̄ esie’—ke n̄kpọ esop, ke ubọ ukpep m̀mê ke utom idịbi udia, ke unọ idem nduọkodudu, m̀mê ke n̄kpọ ekededi—enye osụk idem oyom item Jehovah.—Psalm 73:24.
17 Ndibuọt idem ke mme un̄wọn̄ọ Jehovah: Paul ọkọdọhọ ete: “Owo eke asan̄ade ekpere Abasi enịm ke akpanikọ ete enye odu ye nte ke enye edi andinọ mmọ eke ẹsịnde ifịk ẹyom enye utịp.” (Mme Hebrew 11:6) Edieke nnyịn mînịmke ke Jehovah oyosu mme un̄wọn̄ọ esie, ekeme nditie nte ke owụt ifiọk ‘ndida ererimbot emi nnam n̄kpọ ọyọhọ ọyọhọ.’ (1 Corinth 7:31) Ke n̄kan̄ eken, edieke inyenede akwa mbuọtidem, nnyịn iyebiere ndibem iso nyom Obio Ubọn̄. Owo edisan̄a didie enyene akwa mbuọtidem? Edi ke ndinen̄ede nsan̄a n̄kpere Jehovah kpukpru ini ke akam ofụri esịt ye ukpepn̄kpọ idemowo ofụri ini. (Psalm 1:1-3; Philippi 4:6, 7; James 4:8) Nnyịn imekeme ndibọn̄ akam nte Edidem David ọkọbọn̄de ite: “Ami mbuọt idem mi ye afo, O Jehovah; ndọhọ nte, ‘Afo edi Abasi mi.’ Ufọn fo okpon didie” ntem!—Psalm 31:14, 19.
18, 19. (a) Didie ke nsịnifịk ọsọn̄ọ mbuọtidem nnyịn ke Jehovah? (b) Ntak emi Christian ekpenyịmede ndiyak n̄kpọ atak enye?
18 Ndisịn ifịk ke utom Jehovah: Paul akabuan edibuọt idem ke mme un̄wọn̄ọ Jehovah ye nsịnifịk ke ini enye ekewetde ete: “Nnyịn iyom owo mbufo kiet kiet owụt utọ ifịk oro man ekpenyene ọyọhọ nsọn̄ọ aban̄a idotenyịn tutu esịm utịt.” (Mme Hebrew 6:11) Edieke nnyịn inamde ekese ke utom Jehovah, enye ọyọnọ nnyịn ibetedem. Kpukpru ini oro enye ọnọde nnyịn ibetedem, mbuọtidem oro inyenede ke enye ọdọdiọn̄ okpon, emi anam nnyịn ‘isọn̄ọ ida, iyakke n̄kpọ esịghede nnyịn.’ (1 Corinth 15:58) Emi esisọn̄ọ mbuọtidem ye idotenyịn nnyịn.—Ephesus 3:16-19.
19 Ndinyịme ndiyak n̄kpọ atak nnyịn: Paul ekemek nditiene Jesus utu ke ndika iso nnam utom oro akpakanamde enye enyene inyene. Ke akpanikọ, enye ekemek se ifọnde, okposụkedi uwem ọkọsọn̄de ye enye ndusụk ini. (1 Corinth 4:11-13) Jehovah in̄wọn̄ọke ndinọ nnyịn uwem ndunịm, mme asan̄autom esie ẹsinyụn̄ ẹyọ nsọn̄ọn̄kpọ ndusụk ini. Nnyịn ndinyịme ndidu mmemmem uwem nnyụn̄ nyak mme n̄kpọ ẹtak nnyịn ẹwụt ke imenen̄ede ibiere ndinam n̄kpọ Jehovah.—1 Timothy 6:6-8.
20. Ntak emi ọfọnde owo oro ebemde iso oyom Obio Ubọn̄ eme ime?
20 Ime: Mbet oro James ama esịn udọn̄ ọnọ ekemmọ mme Christian ete: “Ẹme ime, ke ntre, nditọete, tutu ke edidu Ọbọn̄.” (James 5:7) Ke ererimbot oro etiede itọk itọk mi, ọsọsọn̄ ndime ime. Nnyịn iyom n̄kpọ ẹtịbe usọp usọp. Edi Paul esịn udọn̄ ọnọ nnyịn ete ikpebe mbon oro “otode ke mbuọtidem ye ime mmọ ẹbọ mme un̄wọn̄ọ ẹnyene.” (Mme Hebrew 6:12) Nyịme ndibet Jehovah. Ke akpanikọ, enen̄ede odot ndinyene ime ntie mbet nsinsi uwem ke Paradise ke isọn̄!
21. (a) Nso ke iwụt ke ini ibemde iso iyom Obio Ubọn̄? (b) Nso ke idineme ke ibuotikọ oro etienede?
21 Ke akpanikọ, ẹkeme ndinam item oro Jesus ọkọnọde ete ẹbem iso ẹyom Obio Ubọn̄. Ke ini inamde oro, nnyịn iwụt ke imenen̄ede ibuọt idem ke Jehovah, onyụn̄ owụt ke imemek n̄kukụre eti uwem oro ọfọnde Christian ndidu. Nte ededi, Jesus ama onyụn̄ eteme nnyịn “ndibem iso nyom . . . edinen ido [Abasi].” Ke ibuotikọ oro etienede, nnyịn iyokụt ntak emi inen̄erede iyom utọ nsịnudọn̄ oro mfịn.
Nte Emekeme Ndinam An̄wan̄a?
• Nso ke Jesus ekesịn udọn̄ ọnọ nnyịn ete inam ke se iban̄ade n̄kpọ obụkidem?
• Nso ke ikpep ito uwụtn̄kpọ Jesus aban̄ade camel ye odudu abiabon?
• Nti edu ewe ẹn̄wam nnyịn ndibem iso nyom Obio Ubọn̄ Abasi?
[Mme Mbụme Ukpepn̄kpọ]
[Ndise ke page 21]
Ediwak owo oro ẹkekopde ikọ Jesus ẹkedi ubuene
[Ndise ke page 23]
Akparawa oro ekedide owo inyene ama ama inyene esie akan Abasi
[Ndise ke page 23]
Owourua oro ke n̄ke Jesus ama ayak kpukpru n̄kpọ atak man enyene ọsọn̄urua pearl kiet
[Ndise ke page 24]
Edieke nnyịn isịnde idem ke utom Jehovah, enye ọyọnọ nnyịn ibetedem