Mme Mbụme Ẹtode Mme Andikot

Psalm 102:26 ọdọhọ ke “ẹyesobo” enyọn̄ ye isọn̄. Ndi oro ọwọrọ ke ẹyesobo ekondo Isọn̄?

Andiwet psalm ọkọbọn̄ akam ọnọ Jehovah ete: “Afo okodori isọn̄ ke itie esie ke eyo oko: ndien enyọn̄ edi se ubọk fo ẹnamde. Mmọ ẹyesobo, edi afo eyebịghi; ndien kpukpru mmọ ẹyetaha nte ọfọn̄idem; afo oyokpụhọ mmọ nte ekụra, ndien mmọ ẹyekpụhọ.” (Psalm 102:25, 26) Udọn̄ikọ itien̄wed oro owụt ke mme ufan̄ikọ emi itịn̄ke iban̄a edisobo isọn̄, edi ke ẹtịn̄ ẹban̄a Abasi ndidu ke nsinsi. Udọn̄ọikọ emi onyụn̄ owụt n̄ko ntak emi ifiọk emi ọkpọdọn̄de mme asan̄autom Abasi esịt.

Andiwet psalm emi, oro etiede nte okodu ke ntan̄mfep ke Babylon, ọtọn̄ọ ke ndibụk ukụt esie. Enye eseme ke usen uwem imọ asuana “nte nsụn̄ikan̄.” Ọkpọsọn̄ mfụhọ ọdiọk enye idem, ọfọp enye ọkpọ “nte ifia ikan̄.” Enye akpa mba, “onyụn̄ eyemede nte mbiet,” onyụn̄ okop ndobo “nte ntatusụn̄, eke etiede ikpọn̄ ke ọkọm ufọk.” Ukụt iyakke enye ekeme aba ndidia udia, ndien idụhe usen oro enye mîsemeke eseme. (Psalm 102:3-11) Kpa ye oro, andiwet psalm emi iduọkke idotenyịn. Ntak-a? Ke ntak se Jehovah ọn̄wọn̄ọde ndinam ye Zion, m̀mê Jerusalem.

Okposụkedi ẹkesobode Zion, Jehovah ọn̄wọn̄ọ ke ẹyefiak ẹbọp enye. (Isaiah 66:8) Ntre, andiwet psalm ọdọhọ Jehovah uko uko ete: “Afo ayadaha ke enyọn̄ atua Zion mbọm: koro emekem ke ini nte afo ọfọnde ido ye enye, kpa ini emi ẹnịmde. Koro Jehovah ọdiọn̄de Zion; enye ọmọbiọn̄ọde ke ubọn̄ esie.” (Psalm 102:13, 16) Ekem, andiwet psalm afiak ọtọn̄ọ nditịn̄ mban̄a ukụt esie. Ke nditịm ntịn̄, enye ekere ke edieke Jehovah ekemede ndinam ẹfiak ẹbọp Jerusalem, ke enye ekeme ndinyan̄a imọ nsio ke ukụt imọ. (Psalm 102:17, 20, 23) Ndien odu n̄kpọ efen oro anamde andiwet psalm emi enen̄ede enyene mbuọtidem ke Jehovah. Nso idi oro? Enye ndifiọk ke Abasi odu ke nsinsi.

Jehovah odu ke nsinsi nsinsi, ke adan̄aemi andiwet psalm emi odude usen ifan̄ kpọt. Andiwet psalm ọdọhọ Jehovah ete: “Mme isua fo ẹbịghi ke ofụri emana.” (Psalm 102:24) Andiwet psalm emi aka iso ọdọhọ ete: “Afo okodori isọn̄ ke itie esie ke eyo oko: ndien enyọn̄ edi se ubọk fo ẹnamde.”—Psalm 102:25.

Idem ata ediwak isua oro enyọn̄ ye isọn̄ ẹdude ifetke-fet ndisịm eke Jehovah emi odude ke nsinsi nsinsi. Andiwet psalm emi afiak adian do ete: “Mmọ [enyọn̄ ye isọn̄] ẹyesobo, edi afo eyebịghi.” (Psalm 102:26) Ẹkeme ndisobo ata enyọn̄ ye isọn̄. Edi akpanikọ ke Jehovah ọdọhọ ke mme itie en̄wen ke Bible ke mmọ ẹdidu ke nsinsi. (Psalm 119:90; Ecclesiastes 1:4) Edi ẹkeme ndisobo mmọ edieke oro ekpedide uduak Abasi. Edi Abasi ke idem esiemmọ ikemeke ndikpa! Abasi kpọt anam mme edibotn̄kpọ emi “ẹbịghi ke nsinsi-nsinsi.” (Psalm 148:6) Edieke Jehovah etrede ndise mme edibotn̄kpọ emi enyịn, do “kpukpru mmọ ẹyetaha nte ọfọn̄idem.” (Psalm 102:26) Edieke Jehovah ekpemekde ndinam ntre, se enye obotde ẹkpetaha edi enye ke ododu kpa nte ọfọn̄ esitahade edi andinyene ke ododu. Nte ededi, mme itien̄wed eken ẹwụt ke utọ n̄kpọ oro idịghe uduak Abasi. Ikọ Abasi ọn̄wọn̄ọ ọnọ nnyịn ke Jehovah oyom ata enyọn̄ ye isọn̄ ẹdu ke nsinsi nsinsi.—Psalm 104:5.

Edi n̄kpọ ndọn̄esịt ndifiọk ke Jehovah iditreke ndisu kpukpru un̄wọn̄ọ esie. Inamke n̄kpọ m̀mê nso idomo ẹsịm nnyịn, ke ini isemede inọ enye, nnyịn imekeme ndinyene mbuọtidem ke enye iditreke ‘ndise akam eyen ubuene, ke idinyụn̄ isịnke akam mmọ ke ndek.’ (Psalm 102:17) Ih, un̄wọn̄ọ oro Jehovah ọn̄wọn̄ọde ke iyan̄wam nnyịn, nte ikụtde ke Psalm 102, akam edi se ẹberide edem akan idem isọn̄ oro nnyịn isan̄ade ke esịt.