Mme Mbụme Ẹtode Mme Andikot

Ndi ekebe ediomi ekesịne itiatn̄wed iba kpọt, mîdịghe ndi mme n̄kpọ en̄wen ẹma ẹsịne n̄ko?

Ke ini ẹkeyakde temple Solomon ẹnọ Abasi ke isua 1026 M.E.N., “baba n̄kpọ kiet [ikodụhe] ke ekebe, ke mîbọhọke itiat-n̄wed iba oro Moses ekesịnde ke Horeb, ke ini Jehovah [okodiomide] ediomi ye nditọ Israel, adan̄aemi mmọ ẹketode ke Egypt.” (2 Chronicles 5:10) Nte ededi, ikedịghe ntre kpukpru ini.

“Ke ọyọhọ ọfiọn̄ ita, nte nditọ Israel ẹkewọn̄ọ ke isọn̄ Egypt,” mmọ ẹma ẹdụk Wilderness Sinai. (Exodus 19:1, 2) Ke oro ebede, Moses ama ọdọk aka Obot Sinai ọkọbọ itiatn̄wed iba oro ẹkewetde Ibet. Moses ọdọhọ ete: “Ndien n̄kabade nto ke obot nsụhọde, nnyụn̄ nda itiat-n̄wed nsịn ke ekebe oro n̄kanamde; mmọ ẹmenyụn̄ ẹsịne do, kpa nte Jehovah eketemede mi.” (Deuteronomy 10:5) Emi ekedi ekebe, m̀mê n̄kpọ oro ẹdade ẹsịn n̄kpọ ke ibio ini, emi Jehovah ọkọdọhọde Moses anam man ọkpọdọn̄ itiat oro ẹkedade ẹwet Ibet. (Deuteronomy 10:1) Ẹkenam ekebe ediomi oro ẹkụre ke n̄kpọ nte utịt utịt isua 1513 M.E.N.

Esisịt ini ke ẹma ẹkefak nditọ Israel ẹsio ke Egypt, mmọ ẹma ẹtọn̄ọ ndisụk uyo mban̄a udia. Ntre, Jehovah ama ọnọ mmọ manna. (Exodus 12:17, 18; 16:1-5) Moses ama eteme Aaron ini oro ete: “Da eso, da omer domo manna sịn ke esịt, nyụn̄ nịm enye ke iso Jehovah, ete ana ọnọ mme emana mbufo.” Mbụk oro aka iso ete: “Nte emi Jehovah eketemede Moses, kpa ntre ke Aaron enịm enye ke iso n̄kpọ-ntiense [n̄kpọ oro ẹsidade ẹtịm mme akpan n̄kpọ ẹnịm], ete ekpeme enye.” (Exodus 16:33, 34) Nte eyịghe mîdụhe, ke adan̄aemi Aaron ọkọdọn̄de manna ke eso m̀mê aban̄ ini oro, ẹkenịm enye ke iso N̄kpọ-Ntiense ke Moses ama akanam ekebe ediomi onyụn̄ ọdọn̄ itiatn̄wed oro.

Nte ima ikokokụt, ẹkenam ekebe ediomi ke utịt utịt isua 1513 M.E.N. Ke anyan ini ama ekebe, ke Korah ye mbon eken ẹma ẹkesọn̄ ibuot, ẹma ẹdisịn esan̄ Aaron ke ekebe ediomi. Apostle Paul etịn̄ aban̄a “ekebe ediomi . . . emi aban̄ o-gold oro manna esịnede, ye esan̄ Aaron oro ekesehede ye itiatn̄wed ediomi ẹkedude.”—Mme Hebrew 9:4.

Abasi ọkọnọ nditọ Israel manna ke ofụri isua 40 oro mmọ ẹkeyode ke wilderness. Owo ikọnọhọ mmọ manna aba ke “ẹma ẹkedia mbun̄wụm isọn̄” un̄wọn̄ọ. (Joshua 5:11, 12) Ẹkesịn esan̄ Aaron ke ekebe ediomi ye uduak—man edi idiọn̄ọ m̀mê ntiense ọnọ emana nsụkuyo oro. Emi owụt ke esan̄ oro ama odu do ke nsụhọde n̄kaha, ke ofụri ini oro mmọ ẹkeyode ke wilderness. Do, owụt ifiọk ndibiere nte ke esisịt ini ke Israel ama okodụk Isọn̄ Un̄wọn̄ọ n̄ko mbemiso ẹkeyakde temple Solomon ẹnọ Abasi, ke ẹma ẹsion̄o esan̄ Aaron ye aban̄ o-gold oro manna ekesịnede ẹfep ke ekebe ediomi.