‘Ikọ Ntiense Oro Ẹnọde Kpukpru Mme Idụt’
‘Ikọ Ntiense Oro Ẹnọde Kpukpru Mme Idụt’
“Mbufo ẹyedi mme ntiense mi . . . tutu esịm ke ata utịt ikpehe isọn̄.”—UTOM 1:8.
1. Ini ewe edi akpa ini emi mme mbet ẹkekopde ntịn̄nnịm ikọ oro ẹwetde ke Matthew 24:14, ndien ke m̀mọ̀n̄?
NNYỊN imenen̄ede imehe ye ikọ Jesus oro ẹwetde ke Matthew 24:14 tutu ndusụk nnyịn ikeme nditịn̄ enye ke ibuot. Nso n̄wọrọnda ntịn̄nnịm ikọ ke emi edi ntem! Kere ban̄a se mme mbet ẹkekerede akpa ini oro mmọ ẹkekopde ikọ emi. Ekedi isua 33 E.N., mme mbet ẹma ẹdu ye Jesus ke n̄kpọ nte isua ita, ndien ke emi mmọ ẹma ẹsan̄a ye enye ẹdi Jerusalem. Mmọ ẹma ẹkụt mme utịben̄kpọ oro enye akanamde ẹnyụn̄ ẹkpan̄ utọn̄ ẹkop se enye ekekpepde. Okposụkedi oro mmọ ẹkedatde esịt ẹban̄a akpanikọ oro Jesus ekekpepde mmọ, mmọ ẹma ẹtịm ẹfiọk ke idịghe kpukpru owo ẹkekop inemesịt ẹban̄a oro. Mme asua Jesus ẹma ẹkop odudu etieti.
2. Mme n̄kpọndịk ye mme afanikọn̄ ewe ke mme mbet ẹkenyene ndisobo?
2 Mbet inan̄ ẹma ẹtie ye Jesus ke Obot Olive ẹnen̄ede ẹkpan̄ utọn̄ ẹnọ enye nte enye eketịn̄de aban̄a mme n̄kpọndịk ye mme afanikọn̄ oro mmọ ẹdisobode. Jesus ama ebem iso etịn̄ ọnọ mmọ ke ẹyewot imọ. (Matthew 16:21) Idahaemi enye ama anam an̄wan̄a ke ẹyebiọn̄ọ mmọ n̄ko ke ibak ibak usụn̄. Jesus ọkọdọhọ mmọ ete: “Mme owo ẹyeda mbufo ẹyak ẹnọ ukụt ẹnyụn̄ ẹwot mbufo, ndien mbufo ẹyedi mbon emi kpukpru mme idụt ẹsuade ke ntak enyịn̄ mi.” Ikokụreke ke oro. Mme nsunsu prọfet ẹyeda ediwak owo ẹtụn usụn̄. Ediwak owo ẹyetuak ukot ẹduọn̄ọ ẹnyụn̄ ẹda kiet eken ẹnọ ẹnyụn̄ ẹsua kiet eken. Ke akpanikọ “ediwak owo” ẹyeyak ima emi mmọ ẹmade Abasi ye Ikọ esie ebịt.—Matthew 24:9-12.
3. Ntak emi ikọ Jesus oro ẹwetde ke Matthew 24:14 akpade owo idem?
3 Ke Jesus ama eketịn̄ aban̄a mme afanikọn̄ oro ẹdisịmde mme mbet esie, enye ama etịn̄ ikọ oro anade edi ama anam idem akpa mmọ. Enye ọkọdọhọ ete: “Ẹyenyụn̄ ẹkwọrọ eti mbụk obio ubọn̄ emi ke ofụri isọn̄ nte ntiense ẹnọ kpukpru mme idụt; ndien adan̄aoro ke utịt eyedi.” (Matthew 24:14) Ke akpanikọ, utom emi Jesus ọkọtọn̄ọde ke Israel—nditie “ntiense nnọ akpanikọ”—ekenyene ndika iso nnyụn̄ ntara nsịm ofụri ererimbot. (John 18:37) Nso ntịn̄nnịm ikọ oro akpade owo idem ke emi edi ntem! Edidi n̄kpọ-ata ndinam utom oro atara esịm “kpukpru mme idụt,” edinyụn̄ edi utịben̄kpọ ndinam utom oro kpa ye ‘usua eke kpukpru mme idụt.’ Ndinam ata akamba utom oro ayanam ẹfiọk odudu Jehovah onyụn̄ owụt ke Enye edi Andikon̄ N̄kan, oyonyụn̄ owụt nte ima, mbọm ye ime esie okponde etre. Ke adianade do, emi ọyọnọ mme asan̄autom esie ifet ndiwụt ke imeten̄e inyụn̄ ibuọt idem ye Enye.
4. Mmanie ke ẹkedọhọ ẹnam utom unọ ikọ ntiense, ndien nso ndọn̄esịt ke Jesus ọkọnọ mmọ?
4 Jesus ama anam an̄wan̄a mme mbet esie ke mmọ ẹnyene ata akpan utom ndinam. Mbemiso Jesus ọkọdọkde heaven, enye ama owụt mme mbet esie idem onyụn̄ ọdọhọ mmọ ete: “Mbufo ẹyebọ odudu ke ini edisana spirit edide edidoro mbufo ke idem, ndien mbufo ẹyedi mme ntiense mi ke Jerusalem ye ke ofụri Judea ye Samaria tutu esịm ke ata utịt ikpehe isọn̄.” (Utom 1:8) Nte ededi, ke mîbịghike mbon en̄wen ẹkenyene nditiene mmọ nnam utom emi. Kpa ye oro, mme mbet ẹkedi ibat ibat. Nso ndọn̄esịt ke mmọ ẹkebọ ntem ndifiọk ke okopodudu edisana spirit Abasi ọyọnọ mmimọ odudu ndinam utom Abasi emi!
5. Nso ke mme mbet mîkọfiọkke iban̄a utom unọ ikọ ntiense?
5 Mme mbet ẹma ẹfiọk ke akana mmimọ ikwọrọ eti mbụk inyụn̄ ‘inam mme owo ke kpukpru idụt ẹdi mbet.’ (Matthew 28:19, 20) Edi mmọ ikọfiọkke adan̄a nte ẹdikwọrọde ikọ itre, ikonyụn̄ ifiọkke ini emi utịt edidide. Nnyịn ifiọkke n̄ko. Jehovah ikpọn̄ ọfiọk. (Matthew 24:36) Ke ini ẹdinọde ikọ ntiense ekem nte Jehovah oyomde, enye ayanam idiọk editịm n̄kpọ emi esịm utịt. Adan̄aoro kpọt ke mme Christian ẹdifiọk ke ẹnam utom ukwọrọikọ ekekem nte Jehovah akaduakde. Akpa mme mbet ikekemeke ndifiọk adan̄a nte ẹdinọde ikọ ntiense ke utịt ini emi.
Unọ Ikọ Ntiense ke Akpa Isua Ikie
6. Nso iketịbe ke Pentecost 33 E.N. ye esisịt ini ke oro ebede?
6 Ke akpa isua ikie, utom edikwọrọ Obio Ubọn̄ ye edinam mbet ama enyene akamba uforo. Ke usen Pentecost 33 E.N., n̄kpọ nte mbet 120 ẹkedu ke ubet enyọn̄ ke Jerusalem. Ẹma ẹn̄wan̄a edisana spirit Abasi ẹduọk mmọ, ndien apostle Peter ama ọnọ utịn̄ikọ oro ekedemerede owo udọn̄ onyụn̄ anam an̄wan̄a se utịben̄kpọ oro ọkọwọrọde, ndien n̄kpọ nte owo 3,000 ẹma ẹnịm ke akpanikọ ẹnyụn̄ ẹna baptism. Ntọn̄ọ akakam edi oro. Kpa ye ukeme oro mme adaiso ido ukpono ẹkesịnde nditre edikwọrọ eti mbụk, “Jehovah [ama] aka iso ndida mbon oro ẹnyan̄ade ndian nnọ [mme mbet] ke usen ke usen.” Ikebịghike, ‘ibat mbon emi ẹma ẹsịm n̄kpọ nte tọsịn ition.’ Ke oro ebede, “mme andinịm Ọbọn̄ ke akpanikọ [ẹma] ẹdọdiọn̄ ẹdiana [ye mmọ], udịm owo ẹdide iren ye iban.”—Utom 2:1-4, 8, 14, 41, 47; 4:4; 5:14.
7. Ntak Cornelius ndikokpụhọ ido ukpono esie ekedide n̄wọrọnda n̄kọri?
7 N̄wọrọnda n̄kọri oro ẹkenamde ke isua 36 E.N. ekedi nte ke Cornelius, owo Gentile, ama okpụhọde ido ukpono esie onyụn̄ ana baptism. Ke ini Jehovah ọkọdọhọde apostle Peter aka ebịne Cornelius emi akabakde imọ, Jehovah okowụt ke ewụhọ oro Jesus ọkọnọde ete “ẹkenam mme owo ke kpukpru idụt ẹdi mbet” ikedịghe ndinam sụk mme Jew oro ẹkedude ke nsio nsio idụt ẹdi mbet. (Utom 10:44, 45) Didie ke mme adaiso ke utom oro ẹkenam n̄kpọ kaban̄a emi? Mme apostle ye mbiowo ke Judaea ẹma ẹtoro Abasi ke ini mmọ ẹkefiọkde ke ẹkenyene ndikwọrọ eti mbụk n̄ko nnọ mbon idụt—kpa mbon oro mîdịghe mme Jew. (Utom 11:1, 18) Kan̄a ke emi, utom ukwọrọ eti mbụk ama aka iso ndinyene uforo ke otu mme Jew. Ke isua ifan̄ ẹma ẹkebe, eyedi n̄kpọ nte isua 58 E.N., “ediwak tọsịn [mme Jew oro ẹkenịmde ke akpanikọ]” ẹma ẹdidiana ye mbon Gentile oro ẹkenịmde ke akpanikọ.—Utom 21:20.
8. Didie ke eti mbụk otụk mme owo?
8 Okposụkedi enemde ndifiọk ke ibat mme owo oro ẹkekabarede ẹdi mme Christian ama ọkọri ke akpa isua ikie, nnyịn ikpedehedei ifre ke emi edi ata ibat owo. Etop Bible oro mmọ ẹkekopde ama enyene odudu. (Mme Hebrew 4:12) Etop emi ama enen̄ede okpụhọrede uwem mbon oro ẹkenyịmede enye. Mme owo oro ẹma ẹdu nti uwem, ẹmen obufa owo ẹsịne, ẹnyụn̄ ẹtie ke emem ye Abasi. (Ephesus 4:22, 23) Ukem oro ke edi mfịn. Kpukpru mbon oro ẹnyịmede eti mbụk ẹnyene utịbe utịbe idotenyịn ndidu uwem ke nsinsi.—John 3:16.
Mme Nsan̄autom Abasi
9. Nso ifetutom ye mbiomo ke akpa mme Christian ẹkefiọk ke imenyene?
9 Akpa mme Christian ikọbọhọ itoro ke se mmọ ẹkenamde. Mmọ ẹma ẹfiọk ke “odudu edisana spirit” akan̄wam mmimọ ikwọrọ ikọ. (Rome 15:13, 19) Uforo eke spirit oro mmọ ẹkenyenede okoto Jehovah. Mme Christian oro ẹma ẹfiọk n̄ko ke mmimọ imenyene ifetutom ye mbiomo nte mme “nsan̄autom Abasi.” (1 Corinth 3:6-9) Mmọdo, mmọ ẹma ẹnen̄ede ẹsịn idem ke utom oro ẹkedọn̄de mmọ nte Jesus eketemede.—Luke 13:24.
10. Nso ukeme ke ndusụk akpa mme Christian ẹkesịn ke ndinọ ikọ ntiense ke ofụri idụt?
10 Paul emi ekedide ‘apostle ọnọ mme idụt,’ ama esisan̄a ata ediwak kilomita ke obot ye ke mmọn̄, onyụn̄ asiak ediwak esop ke Asia emi ekedide ikpehe obio ukara Rome onyụn̄ asiak ke Greece. (Rome 11:13) Enye n̄ko ama aka Rome, ndien ekeme ndidi enye ama esịm Spain. Kan̄a ke emi, apostle Peter emi ẹkedọhọde ọkwọrọ “eti mbụk . . . ọnọ mbon oro ẹnade mbobi,” ama aka Babylon ndinam utom do, kpa ebiet oro Ido Ukpono Mme Jew ekenen̄erede ọsọn̄ ubọk ini oro. ( Galatia 2:7-9; 1 Peter 5:13) Iban nte Tryphaena ye Tryphosa ẹma ẹsịne ke otu ediwak owo oro ẹkenamde utom Ọbọn̄. Ẹdọhọ ke n̄wan efen emi ekekerede Persis, “ama anam ekese utom ke Ọbọn̄.”—Rome 16:12.
11. Didie ke Jehovah ọkọdiọn̄ mme mbet ke ukeme oro mmọ ẹkesịnde?
11 Jehovah ama enen̄ede ọdiọn̄ mmọ ke ukeme oro mmọ ẹkesịnde onyụn̄ ọdiọn̄ mbon eken oro ẹkesịnde ifịk ẹnam utom. Ke se isụhọrede ikan isua 30 tọn̄ọ nte Jesus ekebem iso etịn̄ ke ẹyenọ ikọ ntiense ke ofụri idụt, Paul ama ewet ete ke ẹma ẹkwọrọ ‘eti mbụk ẹnọ kpukpru edibotn̄kpọ ke idak ikpaenyọn̄.’ (Colossae 1:23) Nte eyo oro ama esịm utịt? Ih ama esịm. Editịm n̄kpọ mme Jew ama esịm utịt ke isua 70 E.N. ke ini mbonekọn̄ Rome ẹkesobode Jerusalem ye temple esie. Edi, Jehovah ebiere ke ana ẹnen̄ede ẹnọ ikọ ntiense akan nte akanam ẹnọde mbemiso imọ isobode editịm n̄kpọ Satan ke ofụri ererimbot.
Ikọ Ntiense Oro Ẹnọde Mfịn
12. Didie ke ewụhọ ndikwọrọ ikọ akan̄wan̄a akpa Nditọ Ukpepn̄kpọ Bible?
12 Ke mfiakedem ama ọkọdọn̄ n̄kam ke ediwak isua, ẹma ẹfiak ẹtọn̄ọ edisana utuakibuot ke utịt utịt ọyọhọ isua ikie 19. Nditọ Ukpepn̄kpọ Bible, nte ẹkediọn̄ọde Mme Ntiense Jehovah ini oro, ẹma ẹtịm ẹfiọk se ewụhọ edinam mbet ọkọwọrọde. (Matthew 28:19, 20) Ke isua 1914, n̄kpọ nte owo 5,100 ẹkebuana ọyọhọ ọyọhọ ke utom ukwọrọikọ, ndien eti mbụk ama esịm n̄kpọ nte idụt 68. Nte ededi, Nditọ Ukpepn̄kpọ Bible oro ikenen̄ekede ifiọk se Matthew 24:14 ọwọrọde. Ke utịt utịt ọyọhọ isua ikie 19, mme n̄ka Bible ẹma ẹkabade ẹnyụn̄ ẹmịn̄ Bible—kpa n̄wed eti mbụk m̀mê gospel—ke ediwak usem ẹnyụn̄ ẹsuan enye ke ofụri ererimbot. Ntem, ke ediwak isua ẹma ẹkebe, Nditọ Ukpepn̄kpọ Bible emi ẹkekere ke ẹma ẹnọnọ ikọ ntiense ke mme idụt.
13, 14. Didie ke nsiondi Enyọn̄-Ukpeme (Ikọmbakara) eke 1928 eketetịm anam uduak Abasi an̄wan̄a?
13 Sụn̄sụn̄, Jehovah ama anam uduak esie enen̄ede an̄wan̄a ikọt esie. (Mme N̄ke 4:18) Enyọn̄-Ukpeme (Ikọmbakara) eke December 1, 1928 ọkọdọhọ ete: “Nte nnyịn imekeme ndidọhọ ke edisuan Bible osu ntịn̄nnịm ikọ oro aban̄ade ẹdikwọrọ eti mbụk Obio Ubọn̄? Ke akpanikọ isụhu! Kpa ye oro ẹsuande Bible, osụk oyoyom ekpri otu mme ntiense Abasi oro ẹdude ke ererimbot ẹmịn̄ mme n̄wed oro ẹdade ẹnam [uduak] Abasi an̄wan̄a owo ẹnyụn̄ ẹka ẹbịne mbon oro ẹkebọde Bible emi, mîdịghe ntre mme owo idifiọkke ke Obio Ubọn̄ Messiah ama ọtọn̄ọ ke eyo nnyịn.”
14 Nsiondi Enyọn̄-Ukpeme (Ikọmbakara) oro ama aka iso ọdọhọ ete: “Ke 1920, . . . Nditọ Ukpepn̄kpọ Bible ẹma ẹdinyene nnennen ifiọk ẹban̄a ntịn̄nnịm ikọ Ọbọn̄ oro ẹwetde ke Matthew 24:14. Do ndien ke mmọ ẹkefiọk ke ‘gospel emi’ akanade ẹkwọrọ ke ofụri ererimbot nte ntiense ẹnọ mme Gentile m̀mê mme idụt, edi gospel owụtde ke Edidem Messiah ọtọn̄ọ ndikara isọn̄, ikedịghe gospel eke obio ubọn̄ oro mîkedịghe kan̄a.”
15. Didie ke utom unọ ikọ ntiense atara toto ke iduọk isua 1920?
15 “Ekpri otu mme ntiense” oro ẹkedude ke iduọk isua 1920 ẹma ẹkọri. Ke mme isua oro ẹketienede, ẹma ẹkụt “akwa otu owo” eke “mme erọn̄ en̄wen” ẹnyụn̄ ẹtọn̄ọ nditan̄ mmọ mbok. (Ediyarade 7:9; John 10:16) Mfịn, owo 6,613,829 ẹdi mme atan̄a etop eti mbụk ke idụt 235 ke isọn̄. Nso utịbe utịbe edisu ntịn̄nnịm ikọ ke emi edi ntem! Akananam owo ikwọrọke “eti mbụk obio ubọn̄ emi” ke akamba udomo ntem. Akananam mme anam-akpanikọ asan̄autom Jehovah iwakke ntem ke isọn̄.
16. Nso utom ke ẹkenam ke isua utom oro ebede? (Se chart ke page 27-30.)
16 Akwa otu Mme Ntiense ẹma ẹdiana kiet ẹnam ekese utom ke isua utom 2005. Ẹma ẹda se iwakde ikan biliọn hour kiet ẹtan̄a eti mbụk ke idụt 235. Ẹma ẹnam mfiakn̄ka oro awakde etieti, ẹnyụn̄ ẹnịm se iwakde ibe ukpepn̄kpọ Bible miliọn itiokiet. Mme Ntiense Jehovah ẹkekeme ndinam utom emi, sia mmọ ẹkenyịmede ndida ini ye inyene mmọ mbuana Ikọ Abasi ye mbon en̄wen. (Matthew 10:8) Jehovah aka iso ndida okopodudu edisana spirit esie nnọ mme asan̄autom esie odudu ndinam uduak esie.—Zechariah 4:6.
Ndisịn Ifịk Nnọ Ikọ Ntiense
17. Didie ke Mme Ntiense Jehovah ẹnam ikọ Jesus aban̄ade edikwọrọ eti mbụk?
17 Okposụkedi se ikperede isua 2,000 ẹma ẹkebe tọn̄ọ nte Jesus ọkọdọhọ ke ẹyekwọrọ eti mbụk, ikọt Abasi itekke ke ifịk oro mmọ ẹdade ẹnam utom oro. Nnyịn imọfiọk ke ini isọn̄ọde ida inam se ifọnde, nnyịn iwụt ke imenyene mme edu Jehovah oro ẹdide ima, mbọm, ye ime. Ukem nte Jehovah, nnyịn iyomke owo ndomokiet atak edi iyom mme owo ẹkabade esịt ẹnyụn̄ ẹnam emem ye Jehovah. (2 Corinth 5:18-20; 2 Peter 3:9) Sia Mme Ntiense Jehovah ẹyọhọde ye spirit Abasi, mmọ ẹka iso ẹtan̄a eti mbụk ifịk ifịk tutu esịm utịt isọn̄. (Rome 12:11) Nte utịp, mme owo ke kpukpru ebiet ẹnyịme akpanikọ ẹnyụn̄ ẹtiene ima ima ndausụn̄ Jehovah. Kere ban̄a uwụtn̄kpọ ifan̄.
18, 19. Mme ifiọkutom ewe ke afo ekeme ndibụk man owụt nte ndusụk owo ẹkenamde n̄kpọ ẹban̄a eti mbụk?
18 Charles ekedi ọtọin̄wan̄ ke edem usoputịn Kenya. Enye ama anyam un̄wọn̄ akawakde ebe kilogram 8,000 ke 1998, ndien ẹma ẹnọ enye n̄weditoro nte Akakan Ọtọ-Un̄wọn̄. Ini oro ke enye ọkọtọn̄ọ ndikpep Bible. Ikebịghike enye ama ọfiọk ke owo eke anamde utom utọ un̄wọn̄ abiat ewụhọ oro Jesus ọkọnọde ete owo ama mbọhọidụn̄ esie. (Matthew 22:39) Ke ini Charles ọkọfiọkde ke ‘akakan ọtọ-un̄wọn̄’ edi ‘akakan owotowo,’ enye ama ọduọk ibọk owot un̄wọn̄ oro enye ọkọtọde. Enye ama anam n̄kọri tutu ayak idem ọnọ onyụn̄ ana baptism, ndien idahaemi enye edi asiakusụn̄ ofụri ini ye asan̄autom unamutom.
19 Eyịghe idụhe nte ke Jehovah ada ikọ ntiense oro ẹnọde ke ofụri ererimbot enyen̄e kpukpru mme idụt, ndien “ndiye n̄kpọ kpukpru mme idụt”—mme owo—ke ẹdụk ẹdi. (Haggai 2:7, NW) Pedro emi odụn̄de ke Portugal, ama odụk ufọkn̄wed ukpep utom oku ke ini enye ekedide isua 13. Enye okoyom ndikabade ndi isụn̄utom nnyụn̄ n̄kpep mme owo Bible. Nte ededi, ke esisịt ini ebede, enye ama ọkpọn̄ ufọkn̄wed oro sia owo ikesiwakke ndida Bible n̄kpep mmọ n̄kpọ. Ke isua itiokiet ẹbede, enye ama ekekpep n̄kpọ aban̄a ekikere ke ufọkn̄wed ntaifiọk ke Lisbon. Enye okodụn̄ ye eyeneka eka esie an̄wan edide kiet ke otu Mme Ntiense Jehovah, ndien n̄wan oro ama esịn udọn̄ ọnọ enye ndikpep Bible. Ini oro, Pedro ikọfiọkke ke Abasi odu, enye ikonyụn̄ ikemeke ndibiere m̀mê akpana ikpep Bible m̀mê ikpanaha ikpep. Enye ama etịn̄ unana iwụk esie emi ọnọ prọfesọ emi esikpepde enye n̄kpọ aban̄a ekikere. Prọfesọ oro ama ọdọhọ enye ke kiet ke otu ukpepn̄kpọ oro ẹban̄ade ekikere owụt ke mme owo oro mîkemeke ndinam ubiere ẹsinam n̄kpọ oro ekemede ndinọ idem mmọ unan. Ke ini Pedro okokopde oro, enye ama ebiere ndikpep Bible. Ikebịghike enye ama ana baptism ndien idahaemi enye n̄ko ke ekpep Bible ye mme owo.
20. Ntak emi nnyịn ikemede ndikop inemesịt ke ẹnọ mme idụt ikọ ntiense ke ata akamba udomo?
20 Nnyịn isụk ifiọkke adan̄a nte ẹdikwọrọde ikọ inọ mme idụt, m̀mê ndifiọk usen ye hour n̄kanika emi utịt edidide. N̄kukụre se ifiọkde edi ke idibịghike utịt eyedi. Nnyịn imokop inemesịt ndifiọk ke ndikwọrọ eti mbụk ke utọ akamba udomo oro edi kiet kpọt ke otu ediwak n̄kpọ oro ẹwụtde ke ini ekpere Obio Ubọn̄ Abasi ndida itie ukara owo. (Daniel 2:44) Nte mme isua ẹbede, ẹnọ ata ediwak owo ifet ndinam n̄kpọ mban̄a eti mbụk oro mmọ ẹkopde, ndien emi ọnọ Abasi nnyịn, kpa Jehovah itoro. Akpakam edi ubiere nnyịn ndisọn̄ọ nda nnam akpanikọ nnyụn̄ ndiana kiet ye nditọete nnyịn ke ofụri ererimbot nnam utom unọ ikọ ntiense ke kpukpru mme idụt. Ke inamde ntre, nnyịn iyayan̄a idem nnyịn ye mmọ emi ẹkopde uyo nnyịn.—1 Timothy 4:16.
Nte Afo Emeti?
• Ntak emi Matthew 24:14 edide n̄wọrọnda ntịn̄nnịm ikọ?
• Nso ukeme ke akpa mme Christian ẹkesịn ndikwọrọ ikọ, ndien ye nso utịp?
• Nditọ Ukpepn̄kpọ Bible ẹkedi ẹdidiọn̄ọ ke nso idi ntak oro oyomde ẹnọ kpukpru mme idụt ikọ ntiense?
• Nso ke afo enen̄ede ama ke ini odụn̄ọrede utom ikọt Jehovah ke isua utom oro ebede?
[Mme Mbụme Ukpepn̄kpọ]
[Chart ke page 27-30]
2005 SERVICE YEAR REPORT OF JEHOVAH’S WITNESSES WORLDWIDE
(Se magazine)
[Ndise obio/Mme ndise ke page 25]
Paul ama esisan̄a ata ediwak kilomita ke obot ye ke mmọn̄ ọkwọrọ eti mbụk
[Ndise ke page 24]
Jehovah ọkọdọn̄ Peter ọkọnọ Cornelius ye ubon esie ikọ ntiense