Mme Mbụme Ẹtode Mme Andikot
Mme Mbụme Ẹtode Mme Andikot
Ndi Joseph, kpa anam-akpanikọ asan̄autom Jehovah, ama enyene san̄asan̄a kọp sidibe oro enye ekesidade ayararede n̄kpọ, sia etiede nte Genesis 44:5 ọdọhọ ntre?
N̄kpọ baba kiet idụhe ndinam nnyịn inịm ke Joseph ama esibre orụk idiọn̄ ekededi.
Bible owụt ke Joseph ama enen̄ede ọfiọk ke ifọnke ndida mfọni mfiọk ini iso. Ke ini ẹkedọhọde Joseph asiak ndap Pharaoh, enye ama ọsọn̄ọ etịn̄ ke Abasi kpọt ekeme ‘ndibọrọ,’ m̀mê ndisian, Pharaoh se iditịbede. Emi ama anam Pharaoh ke idemesie enịm ke Abasi emi Joseph okponode—kpa ata Abasi, idịghe ndedịbe odudu—akanam Joseph ọfiọk se iditịbede ke ini iso. (Genesis 41:16, 25, 28, 32, 39) Ke Ibet oro ẹkenọde Moses nte ini akakade, Jehovah ama akpan mfọni m̀mê edibre idiọn̄, ke ntre owụtde ke Imọ ikpọn̄-ikpọn̄ ikeme nditịn̄ ini iso.—Deuteronomy 18:10-12.
Ntak ndien emi Joseph ọkọdọhọde asan̄autom esie ọdọhọ ke imọ isida kọp sidibe oro ‘iyararede n̄kpọ’? * (Genesis 44:5) Ọyọfọn ikere se ikanamde Joseph etịn̄ ikọ emi.
Ọkpọsọn̄ akan̄ ama anam nditọete Joseph ẹdaha ẹka Egypt ndikedep udia. Kpa mmọ ẹkenyam Joseph ẹsịn ke ufụn ediwak isua emi ẹkebede. Idahaemi, mmọ ikọfiọkke ke mmimọ ikoyom un̄wam ito eyenete mmimọ, emi edide andise enyịn mban̄a udia ke Egypt. Joseph ikanamke mmọ ẹfiọk owo oro imọ idide. Utu ke oro, enye okododomo mmọ ese. Ih, Joseph okoyom ndifiọk m̀mê mmọ ẹma ẹnen̄ede ẹkabade esịt. Enye n̄ko okoyom ndifiọk m̀mê mmọ ẹnen̄ede ẹma Benjamin eyenete mmọ ye Jacob ete mmọ, emi ekenen̄erede ama Benjamin. Emi akanam Joseph etịbi n̄kari emi edi.—Genesis 41:55–44:3.
Joseph ama ọnọ asan̄autom esie kiet uyo ete ọdọn̄ udia ọyọhọ ekpat udia nditọete imọ onyụn̄ ayak okụk mmọ ọdọn̄ ke ekpat mmọ, onyụn̄ esịn kọp sidibe imọ ke inua ekpat Benjamin. Ke kpukpru emi, Joseph akanam nte idi andikara oro otode idụt ukpono ndem. Enye akakama idem nte andikara Egypt, anam n̄kpọ ntre, onyụn̄ etịn̄ ikọ ntre, ndien emi ama anam nditọete esie oro mîkekereke-kere ke eyenete mmimọ oro ikanyamde ekpedidu ke utọ itie oro, ẹnen̄ede ẹnịm ke enye ekedi andikara idụt oro.
Ke Joseph ama akafiak osobo ye nditọete esie, enye ama aka iso ada n̄kari esie obụp mmọ ete: “Nte mbufo ifiọkke ite owo nte ami ikpụhu ndiyarade n̄kpọ?” (Genesis 44:15) Mmọdo, etie nte ke kọp oro kpọt ke enye akada ebre mmọ n̄kari emi. Joseph akanam n̄kari ke ndidọhọ ke ikada kọp emi iyararede n̄kpọ kpa nte enye akanamde n̄kari ke ndidọhọ ke Benjamin ekeyeyịp kọp oro.
[Ikọ idakisọn̄]
^ ikp. 5 The Holy Bible, With an Explanatory and Critical Commentary, oro F. C. Cook ewetde, etịn̄ nte ẹkesidade kọp ẹyararede n̄kpọ ke eset, ete: “Ẹkesisịn mmọn̄ ke kọp, ẹyak gold, sidibe, m̀mê mme n̄kpọmbana ẹsịn ke esịt mmọn̄ oro, ẹnyụn̄ ẹse nte mmọ ẹtiede, mîdịghe ẹwụk enyịn ẹse mmọn̄ oro ukem nte owo esede ukụtiso.” Christopher Wordsworth, emi edide etịn̄ n̄kpọ mban̄a Bible, ọdọhọ ete: “Ndusụk ini, ẹma ẹsidọn̄ mmọn̄ ẹyọhọ kọp, ndien ẹkesida mbukpọn̄ utịn oro ẹkụtde ke enyọn̄ mmọn̄ oro ẹfiọk se ẹkeyomde ndifiọk.”